E Na’o le Faatekinolosi: Talavou Matutua
Faalolotoina o Lou Malamalama i Lou Faamanuiaga Faapeteriaka
A o e faia lou faamanuiaga faapeteriaka o se vaega o lou olaga i aso uma, o le a e maua le malosi ma le taitaiga lea e sau mai lenei meaalofa faalelagi.
Ata na pueina e Lloyd Eldredge
O le a le taimi mulimuli na e faitauina ai lou faamanuiaga faapeteriaka?
I se lalolagi ua tumu i faaiuga taua, o lou faamanuiaga faapeteriaka ua avea o se tapasa patino e fesoasoani e taiala oe i luitau o le olaga faitino. E pei ona sa saunoa Peresitene Thomas S. Monson (1927–2018): “O se faamanuiaga faapeteriaka o se faaaliga i le tagata e ona ia … e puipuia, musuia, ma faaosofia le toaaga ma le amiotonu. O se faamanuiaga faapeteriaka e aofia tino ai mataupu mai lau tusi o mea o le faavavau e mafai ona maua.”1
O lou faamanuiaga faapeteriaka e tatau ona suesueina pea lava pea i lou olaga faatasi ai ma tusitusiga paia ma upu a perofeta, o lea afai ua fai si umi talu ona e faitauina lou faamanuiaga, atonu e te manao e toe laga mai i fafo. O nisi nei o fautuaga e fesoasoani ia te oe e malamalama atili ai i le taua o lou faamanuiaga faapeteriaka ma avea ai o se vaega o lou olaga i aso uma.
1. Faitau ma Mafaufau Loloto Soo i ai
O le toe foi soo i lou faamanuiaga faapeteriaka o le a fesoasoani ia te oe e manatua ai ana upu musuia ma iloa ai pe faapefea ona fesootai i tulaga eseese o lou olaga. E ala i le toe faitauina o lou faamanuiaga, ua e faaali atu ai i le Tama Faalelagi ua e naunau e tuu atu ia te Ia e taiala oe.
Afai e te faaaluina le taimi e suesue ai ma mafaufau loloto i upu musuia o lou faamanuiaga faapeteriaka, e mafai ona e maua se mea fou ma mamana i taimi taitasi e te faitauina ai!
2. Vaavaai mo Fautuaga Musuia
A o e suesue i lou faamanuiaga faapeteriaka, ia manatua soo sau fesili o i ai. O nei fesili e mafai ona i ai i soo se mea mai le mea e a’oga ai po o le e faaipoipo i ai. E ui o le a le fofola mai e lou faamanuiaga mea uma mo oe, ae e mafai ona fesoasoani e faasino atu oe i se itu lelei. Fai se lisi o fautuaga patino e te maua i lou faamanuiaga faapeteriaka. Ia tuu lena lisi i lou faamanuiaga ina ia mafai ona e tagai soo i ai ma vaai pe na faapefea ona faatino e fautuaga patino i lou faamanuiaga faapeteriaka se matafaioi i lou olaga.
3. Aoao e uiga i Lou Tupuaga
O lou faamanuiaga faapeteriaka e ta‘u atu ai ia te oe po o le fea o ituaiga e sefululua o Isaraelu e te auai ai. Ma i le avea ai ma tagata o le aiga o Isaraelu, ua ia i tatou uma se tiutetauave e auai i le galuega a le Alii i aso e gata ai. Po o le a lava lo tatou ituaiga patino, o i tatou uma lava o le gafa o Aperaamo, o lea ua tatou agavaa uma ai i faamanuiaga e oo mai e ala i le feagaiga faaAperaamo. Suesue i folafolaga i lena feagaiga ma pe faapefea ona e faataunuuina lou tiutetauave o le faapotopotoina o Isaraelu.
4. Iloaina o Meaalofa ma Taleni
Vaavaai mo taleni patino ua faamanuiaina ai oe e le Alii. Atonu e le ta‘ua sa’o mai e lou faamanuiaga nei tomai, ae a o e suesue i lou faamanuiaga ma le fesili o au meaalofa ma taleni i lou mafaufau, o le a mafai ona e aoao atili e uiga ia te oe lava. O le iloaina o au meaalofa paia o le a fesoasoani ia te oe e faataunuu ai lau misiona i le olaga.
O faamanuiaga faapeteriaka e paia ma patino. O lea e taua ai le le faatusatusaina o anotala o lou faamanuiaga faapeteriaka i faamanuiaga a isi. E pei ona ta‘ua e Peresitene Monson: “O lou faamanuiaga faapeteriaka e a oe ma e na o oe lava. Atonu e puupuu pe umi, faigofie pe loloto foi. E le o le umi po o le gagana e ala ai ona taua se faamanuiaga faapeteriaka. O le Agaga e faailoa mai ai le uiga moni.”2
5. Manatua Lou Taua Paia
Ua faatumulia lou faamanuiaga faapeteriaka i le taitaiga patino mai lou Tama Faalelagi. Faailoga upu o loo faaaoga i lou faamanuiaga e faamatala ai lou faasinomaga o se atalii/afafine o le Atua. Ia tausia se lisi o nei uiga auaumama e iloa ai pe faapefea ona avea o ni faamanatu o lou taua paia. A o e vaavaai mo fuaitau o loo faamatalaina ai oe, o le a e maua se malamalama sili atu i le ala e silasila ai le Atua ia te oe, ma o le a faateleina lau molimau i lou taua paia.
6. Tausia se Vaaiga e Faavavau
E ui o lou faamanuiaga faapeteriaka o se faafanua e taiala ai oe i le olaga nei, ae o se tapasa foi e taitai atu ai oe i le faavavau. O le tausia o se vaaiga e faavavau pe a suesueina lou faamanuiaga o le ki lea i le malamalama i lona taua ma le upumoni e faapea o faamanuiaga folafolaina uma—pe mauaina iinei i le lalolagi po o le olaga a sau—o le a faataunuuina lava. E pei ona sa folafolaina mai e Elder Jeffrey R. Holland o le Korama a Aposetolo e Toasefululua: “O nisi faamanuiaga e vave oo mai, o nisi e tuai mai, ae o isi e le oo mai seia oo atu i le lagi; ae mo i latou o e talia le talalelei a Iesu Keriso, e oo mai lava.”3
O le faitau soo o lou faamanuiaga faapeteriaka ma le taulimaina e avea o se taiala patino mo lou olaga, o le a mafai ona e faafetaia’ia ma le mautinoa luitau ma faaiuga o loo taoto mai i ou luma. O lou malamalama i lou faasinomaga o se atalii/afafine o ni matua faalelagi o le a faamalosia, ma o le a e maua se malamalama sili atu o lau misiona iinei i le lalolagi.