E Na’o le Faatekinolosi: Talavou Matutua
Sailia o Keriso ma Feagaiga: O Ki a Nifae i le Faitauina o le Feagaiga Tuai
Na faasoa mai e Nifae nisi o malamalamaaga e mafai ona fesoasoani ia te oe i lau suesuega.
Ata na pueina e Bethany Ellice Draper
Ou te fiafia e faitau le Feagaiga Tuai I le aluga o tausaga, ua ou mauaina ni ki se lua e vaavaai i ai i le Feagaiga Tuai e aumaia ai le olioli ma faateleina ai le malamalama: O Keriso ma feagaiga.
O nisi nei o auala e mafai ona tatou maua ai Keriso ma feagaiga i la tatou suesuega o le Feagaiga Tuai i lenei tausaga.
Sailia o Keriso
O Nifae, sa faitauina tusitusiga paia mai papatusi apamemea, na faapea mai, “Faauta, e fiafia loʼu agaga i le faamaonia atu i oʼu tagata le moni o le afio mai o Keriso; ona, o le faamoemoega lenei na tuu mai ai le tulafono a Mose; ma o mea uma na tuu mai e le Atua mai le amataga o le lalolagi, i le tagata, o ni faatusatusaga o ia” (2 Nifae 11:4).
E tele auala e mafai ona tatou maua ai Iesu Keriso i le Feagaiga Tuai.
O Le Atua o le Feagaiga Tuai
Ona ua tatou iloa e ala i faaaliga i ona po nei o Iesu Keriso o le Atua o le Feagaiga Tuai (tagai Mataupu Faavae ma Feagaiga 110:3–4), e mafai ona tatou vaai i Lona mana i le Foafoaga ma o se Faitulafono i luga o le Mauga o Sinai o loo aoaoina Isaraelu i le ala e avea ai e faapei o le Atua. Ua tatou aoao e uiga i Lona alofa tunoa i le togiolaina mai le nofopologa i Aikupito, Lona alofa i le tausiga o Lona nuu i le vao ma le taitaiina atu o i latou i le nuu folafolaina, ma Lona popolega faifai pea e ala i le auina mai o perofeta ma ofoina atu le faamagaloga ia Isaraelu a o latou salamo ia latou agasala.
Ituaiga o Iesu Keriso
E tele ituaiga (po o faatusa) o Iesu Keriso i tala o le Feagaiga Tuai, o le tele o na faailoga o Lona afio mai i le lumanai e pei ona tusia i le Feagaiga Fou ma le Tusi a Mamona. O le tala ia Aperaamo ma Isaako ua valoia ai le ositaulagaina e le Atua o le Tama o Lona Alo, o Iesu Keriso. Sa laveaiina e Iosefa ona uso mai le matelaina faaletino, e pei lava ona laveaiina i tatou e Iesu Keriso mai le matelaina faaleagaga. Sa faasaoloto e Mose lona nuu mai le pologa a o faasaolotoina i tatou e Iesu mai le agasala. Na aoao atu e le Alii le fanauga a Isaraelu i le mana o le faatuatua ia te Ia ma Lana Togiola i le tala i le gata apamemea i le vao. Sa faataitai Elia ma Elisaia i le Faaola a o la faamaloloina e mama‘i ma faatutu mai e na oti.
Malamalamaaga i le Faaola o le Feagaiga Fou
O Iesu Keriso o loo i ai faafaatusa i tala i le Feagaiga Tuai ma le tulafono a Mose. O tala o le Paseka ma le taulaga i le tulafono a Mose e faasino atu ia Keriso. O le faaataata mai o le misiona a Iesu, sa faamalolo ai e perofeta i le Feagaiga Tuai e mamai ma faatutu mai e na oti. E ala mai i le perofeta o Ieremia, na folafola mai ai e le Alii ia i tatou se “feagaiga fou” (Ieremia 31:31; tagai foi fuaiupu 32).
I le Feagaiga Fou, e afio mai Iesu o se faataunuuga o le tulafono ma perofeta i le Feagaiga Tuai. Sa ia tuuina atu le feagaiga fou i le Lauga i luga o le Mauga ma faatuina ia faatusa o le feagaiga i le taimi o le tausamiga o le Paseka i le Tausamaaga Mulimuli. Na aoao i tatou e Iesu ia alolofa ma auauna atu le tasi i le isi a o Ia faamaloloina e mama‘i ma faatutu mai e ua oti. Sa Ia togiolaina i tatou mai le agasala ma le oti e ala i Lana Togiola, ma sa Ia faatuina Lana Ekalesia i luga o le fogaeleele. A tatou iloa Iesu o le Atua o le Feagaiga Tuai, e mafai ona tatou malamalama atili ia te Ia i le Feagaiga Fou.
Sailia o Feagaiga
Na aoao mai foi Nifae ia i tatou e vaavaai mo feagaiga i tusitusiga paia: “Ma e fiafia foi lo‘u agaga i feagaiga a le Alii na ia faia i o tatou tamā” (2 Nifae 11:5).
Ua faamamafa mai foi e Peresitene Russell M. Nelson le taua o feagaiga. Na ia saunoa: “O le faamālo sili e mafai ona ausia iinei i lenei olaga, o le iloa lea o oe o se tagata tausi feagaiga.” O taui mo se tagata tausi feagaiga o le a maua uma iinei ma le olaga a sau.”1
Maeu le ofoofogia o lea folafolaga! E tusa lava pe ua uma ona papatisoina ma osia feagaiga o le malumalu, atonu tatou te le iloaina le taua tele o nei folafolaga e mafai ona aafia ai o tatou olaga i aso uma mo le lelei sili atu. Ae ua faamanatu mai e le Feagaiga Tuai ia i tatou le uiga moni o le avea ma se “tagata o le feagaiga” ma le ala e mafai ai ona tatou malamalama atili i faamanuiaga ma tiutetauave e oo mai ai.
O le feagaiga autu o loo ta‘ua i le Feagaiga Tuai o le feagaiga faa-Aperaamo. E mafai ona tatou maua upumoni e uiga i le talalelei a Iesu Keriso i lenei feagaiga, lea e taitai atu ai i tatou ia Iesu Keriso, lea tatou te maua ai le faaolataga.
O nisi nei o auala e fesoasoani ai le Feagaiga Tuai ia i tatou ia malamalama atili ma tausia a tatou feagaiga.
Malamalama i La Tatou Matafaioi i le Feagaiga Faa-Aperaamo
O le feagaiga faa-Aperaamo o se faasologa o folafolaga ma faamanuiaga na tuuina atu ia Aperaamo lea e faaauau pea e oo mai i le taimi nei i le “feagaiga fou ma tumau-faavavau” na toefuatai mai e le Perofeta o Iosefa Samita (tagai Mataupu Faavae ma Feagaiga 132:30–31). Na aoao mai Peresitene Nelson:
“Na faaali mai le Alii i nei aso e gata ai e toe faafou lena feagaiga faa-Aperaamo. Sa tautino atu e le Matai i le Perofeta o Iosefa Samita:
“Na maua e Aperaamo folafolaga e faatatau i ana fanau, ma e faatatau i le fua o ona sulugatiti—o lē o ona sulugatiti ua e sau ai, … la’u auauna o Iosefa. …
“‘O lenei folafolaga ua a outou foi, aua o outou e tupuga mai ia Aperaamo’ [Mataupu Faavae ma Feagaiga 132:30–31].”2
E ala i lenei feagaiga, na foafoaina ai e le Alii se aiga amiotonu lea e mafai ai ona Ia aoao atu Lana talalelei ma aumai Ana fanau ia Iesu Keriso. Na aoao mai i tatou e le Aposetolo o Paulo afai tatou te o mai ia Keriso, e avea i tatou ma se vaega o le aiga o Aperaamo: “Afai foi e o Keriso outou, e moni, o le fanau outou a Aperaamo, o suli foi e tusa ma ma mea na folafolaina” (Kalatia 3:29; tagai foi fuaiupu 27). E ala i le feagaiga faa-Aperaamo, o tagata o Le Ekalesia a Iesu Keriso o le Au Paia o Aso e Gata Ai o le a avea ma aiga o Isaraelu ma suli i faamanuiaga o le feagaiga faa-Aperaamo.
E mafai ona tatou aoao e uiga i la tatou matafaioi i le feagaiga e ala i le suesueina o olaga o i latou i le Feagaiga Tuai, e ala i le suesueina o folafolaga na faia e le Alii i Ana fanau i poloaiga, ma e ala i le faalogo i perofeta anamua o e sa aioi atu i le fanauga a Isaraelu ia salamo ma usitai i a latou feagaiga.
Mauaina o Faamanuiaga Folafolaina e ala i a Tatou Feagaiga
A o tatou faitau i le Feagaiga Tuai, e mafai ona tatou vaavaai mo faailoga o le tausia e le Alii o folafolaga na osia i le feagaiga faaAperaamo. O faamanuiaga silisili ona lauiloa e tolu o laueleele, lea e faatusa i se tofi i le malo o le Tama Faalelagi; fanau, o se folafolaga o le faatelega e faavavau; ma faamanuiaga o le talalelei ma le perisitua, “o faamanuiaga ia o le faaolataga, o le ola e faavavau lava” (Aperaamo 2:11).
Sa folafola atu ia Aperaamo e faapea o ana fanau “o le a manuia ai aiga uma o le lalolagi” (Kenese12:3). O lona uiga o le a afio mai Iesu Keriso i le lalolagi e ala i le gafa o Aperaamo ma faamanuiaina atunuu uma o le lalolagi e ala i Lana Togiola ma le Toetu (tagai Kalatia 3:16).
O a faamanuiaga ua e vaaia i lou olaga i aso nei ona o le feagaiga faaAperaamo?
O Le Tiute o le Faapotopotoina o Isaraelu
Faatasi ai ma faamanuiaga, o le avea ai ma se vaega o le feagaiga faa-Aperaamo e aofia ai tiutetauave patino. E ala i le suesueina o le Feagaiga Tuai, tatou te aoao ai i le ala e ola ai i a tatou feagaiga. I le avea ai ma aiga o Aperaamo, ua valaauina tagata o le Ekalesia e faapotopoto Isaraelu. A tatou auai i le galuega faafaifeautalai, auaunaga, galuega o le malumalu, valaauga i le Ekalesia, ma le aoao atu ma le tausiaina o o tatou aiga, ua tatou faapotopotoina Isaraelu e ala i le aumaia o isi ia latalata atili atu ia Keriso.
Na aoao mai Peresitene Nelson: “Soo se taimi e te faia ai soo se mea e fesoasoani ai i soo se tasi—po o fea lava le itu o le veli—laa agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani e faapotopoto Isaraelu.”3
Aoao e Fiafia i le Feagaiga Tuai
O le tausaga lenei a o e faitauina le Feagaiga Tuai mo a tatou suesuega o le Sau, Mulimuli Mai ia te A‘u, e mafai ona e aoao ia fiafia i ona aoaoga e ala i le mulimuli i le faataitaiga a Nifae o le vaavaai mo autu nei e lua: Keriso ma feagaiga. O le faia o lena mea, e mafai ai ona e malamalama atili ia Iesu Keriso, Lana Togiola, ma Lana talalelei. E mafai foi ona e aoao atili e uiga i le “feagaiga fou ma tumau-faavavau” ma lau matafaioi o loo i ai o se soo o Keriso ma o se tasi o le aiga o Isaraelu.
O tala ma aoaoga i le Feagaiga Tuai e mafai ona fesoasoani ia i tatou e faalolotoina ai lo tatou sootaga ma le Faaola ma lo tatou malamalama ma le tautinoga i a tatou lava feagaiga.