Tuliloaina le Alao le Fiafia
Saunia e Elder Quentin L. Cook
O Le Koramaa Aposetoloe Toasefululua
E mafai ona tatou tausia ni fanau amiotonu, tumu i le faamoemoe i soo se mea i le lalolagi pe afai e i ai so latou faavae mausali i le Faaola.
Ata na pueina e Jim Lillywhite
I le tele o tausaga ua mavae, sa tofia ai nisi o o‘u tausoga laiti e faia se galuega fesoasoani i le faatoaga a lo matou Tamamatua o Crozier Kimball. I le avea ai ma se taui, sa folafola atu ia i latou le keke1 maoae a Tinamatua Clara.
Ina ua maea a latou galuega, sa latou agai atu i le umukuka mo lo latou taui. Peitai, sa poloka e Tamamatua le faitotoa o le umukuka. Na manatua e lo‘u tausoga o Kathy Galloway, pe tusa ma le 14 tausaga i lena taimi, sa ia nofo i lalo i luga o se nofoa umi ma valaaulia tausoga e nonofo i luga o le fola. Sa ia faafetai atu ia i latou mo la latou galuega faigata ona fai mai lea sa i ai sana mea taua e faasoa atu ae latou te lei aia le latou keke.
“O le a oo mai se taimi i o outou olaga o le a manaomia ai ona outou iloa ma faatino mea o le a ou faasoa atu ia te outou,” na ia saunoa ai.
Sa ia faamatala mai o lona tamamatua o Heber C. Kimball (1801–68) ma isi tuaa paionia sa feagai ma luitau faigata faaletino. Fai mai Tamamatua na vave lava ona iloa e paionia, a fia ola, e tatau ona latou galulue faatasi ma alolofa ma auauna atu le tasi i le isi.
“O se tasi lenei o talatuu maoae na latou tuua ia te oe!” na ia fai atu ai a o amata ona tafe ifo loimata i ona alafau.
“I lo‘u valaauga o se peteriaka ma le avea ai ma ou tamamatua, pe a ou tilotilo i lalo i faigata o taimi, … ua tiga lo’u loto mo oe,” o lana tala lea. “O le a e feagai ma luitau faalelagona ma faaleagaga lea e le mafai e le toatele o ou tuaa paionia ona mafaufauina.”
Sei vagana ua faamamaluina e le tupulaga laitiiti le talatuu tele o le alofa ma le auaunaga a paionia, sa ia faaopoopo atu, “e toatele outou o le a toilalo ona o le a le mafai ona outou ola na o outou.”
Ma, faatasi ai ma se sootaga o le agaga-i-le-agaga, sa faaiu ai e Tamamatua Kimball: “Tatou te manaomia le tasi ma le isi. E faaopoopo atu i le faasoaina atu o a tatou molimau o le talalelei i le tasi ma le isi, o lo tatou tiute o le alofa ma auauna atu ma faamalolosia ma faafailele ma lagolago ma lagolago e le tasi le isi, … aemaise lava i lo matou aiga. Faamolemole ia manatua i aso e gata ai, o lou ola e mafai ona faalagolago i lou naunautaiga e galulue faatasi ma alofa ma auauna atu le tasi i le isi. Ia, tatou o loa e ai le keke!”
E Manaomia e le Tasi le Tasi
Ata na pueina e Wendy Gibbs Keeler
E pei ona faaalia i le vāvao faalelalolagi o loo siomia ai i tatou, ma e pei lava ona valoia e Tamamatua Crozier Kimball, tatou te manaomia le tasi ma le isi. Tatou te manaomia ni aiga alolofa, korama ma Aualofa ua faatumulia i auaunaga, ma paranesi , uarota, ma siteki lagolagosua.
“E finagalo le Atua ia tatou galulue faatasi ma fesoasoani le tasi i le isi,” ua saunoa mai ai Peresitene Nelson. “O le mafuaaga lena ua Ia auina mai ai i tatou i le lalolagi i ni aiga ma faatulaga i tatou i totonu o uarota ma siteki. O le mafuaaga lena ua Ia poloaiina ai i tatou ia tautua ma auauna atu le tasi i le isi. O le mafuaaga lena ua Ia poloaiina ai i tatou ia ola i totonu o le lalolagi ae le o ni ō o le lalolagi. E mafai ona tatou ausia faatasi ni mea se tele na’ua nai lo mea tatou te mafaia na o i tatou.”2
O le olaga i lo tatou esetete lona luae faigata. Ona o le Pau o Atamu ma Eva, ua tatou feagai ai ma mea matuitui ma vaotuitui, tofotofoga ma faaosoosoga. O na aafiaga o se vaega o le fuafuaga o le fiafia, ae tatou te fesoasoani le tasi i le isi e onosaia afa o le olaga.
E pei o Atamu ma Eva, o e na “auina atu … mai le faatoaga o Etena” (Kenese 3:23), ua auina mai i tatou mai lo tatou aiga sauniuni i le muai olaga i lenei lalolagi pa‘ū. Ma e pei o Atamu ma Eva, tatou te olioli i lo tatou malamalama i le fuafuaga a le Atua mo Ana fanau:
“Ma i lena aso na viia ai e Atamu le Atua ma sa faatumuina, ma sa amata ona vavalo e uiga i aiga uma o le lalolagi, ua fai mai: Ia viia lava le suafa o le Atua, aua ona o laʼu solitulafono ua pupula ai oʼu mata, ma o le a ou maua i le olaga lenei le olioli, ma o le a ou toe vaai i le Atua i le tino.
“Ma o Eva, lana avā, sa faalogo atu i nei mea uma ma sa fiafia, ua fai mai: Ana lē seanoa la ta solitulafono po ua lē maua e i taua ni fanau, ma po ua lē mafai ona ta iloa le lelei ma le leaga, ma le oliolio le togiolaina o i taʼua, ma le ola e faavavau ua tuu mai e le Atua iai latou uma o e e usiusitai” (Mose 5:10–11; tagai foi 2 Nifae 2:25).
“O Se Vaega o Lona Faamoemoega Paia”
O le aumaia o lo tatou “tino ola pea ma le ola e faavavau”“o [le] “galuega ma … mamalu” a lo tatou Tama (Mose 1:39).“O i tatou,” e pei ona aoao mai Peresitene Nelson, “o se vaega o Lona faamoemoega paia.”3
Ua folafola mai le Au Peresitene Sili ma le Korama Aposetolo Toasefululua i le muai olaga, “sa iloa ma tapua’i atalii ma afafine agaga i le Atua o lo latou Tama e Faavavau ma sa tatou talia Lana fuafuaga e mafai ai e Lana fanau ona maua se tino faaletino ma maua le tomai faalelalolagi latou te maua ai le atoatoaga ma iloa tino ai lo latou taunuuga paia o ni suli o le ola e faavavau.”4 Ma na aoao mai talu ai nei Peresitene Dallin H. Oaks, Fesoasoani Muamua i le Au Peresitene Sili, “I lalo o le fuafuaga a lo tatou Tama Faalelagi, na ‘foafoaina ai e Iesu Keriso le lagi ma le lalolagi’ (Mataupu Faavae ma Feagaiga 14:9) ina ia mafai e i tatou taitoatasi ona maua le aafiaga faaletino e tatau ai e saili ai lo tatou taunuuga paia.”5
Ua faamanino mai e tusitusiga paia ma perofeta o aso e gata ai le matafaioi tauao loo faia e o tatou tino i le fuafuaga a le Atua. O lo tatou taunuuga o le toe foi atu lea i Lona afioaga ma ni tino toetutu, faaeaina ma ola o ni aiga e faavavau.
“O le mea lea, o a tatou sootaga ma isi tagata, o lo tatou malosi e iloa ai ma faatino e tusa ai ma le upumoni, ma lo tatou tomai e usitai ai i mataupu faavae ma sauniga o le talalelei a Iesu Keriso e faateleina e ala i o tatou tino faaletino,” ua faapea saunoa mai ai Elder David A. Bednar o le Korama a Aposetolo e Toasefululua. “A o tatou ola ai, tatou te iloaina le agamalu, alofa, agalelei, faanoanoa, le fiafia, tiga e oo lava i luitau o tapulaa faaletino o ni auala e saunia ai i tatou mo le faavavau.”6
Aoao Atu e Uiga ia Keriso
I nei aso o le masalosalo ma le le mautonu, o le malamalama i le fuafuaga o le fiafia e taua tele i lo tatou ola ai faaleagaga. Ae e le mafai ona tatou faamoemoe e faafailele e le lalolagi a tatou fanau i mataupu faavae o le fiafia e faavavau. I le avea ai ma matua, e manaomia ona tatou aoao a tatou fanau e uiga i lo latou tupuaga paia ma le taunuuga paia.
Tatou te amata i le fesoasoani ia i latou e atiina ae se molimau ia Iesu Keriso ma Lana Togiola, lea e totonugalemu i le ata o le faaolataga. Ou te talitonu e mafai ona tatou tausia ni fanau amiotonu ma faamoemoei soo se mea i le lalolagi pe afai e i ai so latou faavae mausali i le Faaola.
I afiafi faaleaiga, i taimi o tatalo faaleaiga ma le suesueina o tusitusiga paia, e ala i gaoioiga ma faiga masani faaleaiga, ma e oo lava i taimi o faasaʻoga, “ua matou tautalatala ia Keriso, ua matou olioli ia Keriso, ua matou talai atu Keriso, ua matou vavalo atu ia Keriso, … ina ia iloa e a matou fanau le mea latou te faamoemoe ai mo le faamagaloinao a latou agasala” (2 Nifae 25:26).
Tatou te fesoasoani i a tatou fanau ia malamalama o le ata o le faaolataga, o le salamo o se “mataupu aoaoina i le olaga atoa”7 lea e aumaia ai le faamoemoe ma le faamalologa a o tatalaina le agaga ma faafiafiaina ai le lumanai.
A o atiina ae e a tatou fanau le faatuatua i le Togiola a Keriso, o le a latou iloa ai e lei leiloloa lava mea uma ma o loo faatalitali mai le Alii ma aao mafola ia i latou. Tatou te fesoasoani ia latou malamalama o “a lava mea e tatau ona [tatou] tuua ina ia mulimuli ai i le ala i lou[lo tatou] aiga faalelagi, o le a i ai se aso e foliga mai ai e le o se osigataulaga.”8
Faapotopoto Fanau a le Atua
Tatou te le ausia na o i tatou lo tatou taunuuga paia. I le Au Paia o Aso e Gata Ai, ua ia i tatou se tiute faapitoa e valaaulia isi i la tatou malaga i lo tatou aiga faalelagi. E manaomia e le lalolagi ni Au Paia o Aso e Gata Ai e naunaue faasusulu atu le malamalama o le Toefuataiga e ala i a latou molimau, faataitaiga, ma le naunautaiga e faasoa atu le talalelei.Pe a tatou susulu atu, ua tatou faapotopoto.
“Pe a tatou talanoa i le faapotopotoina,” o le saunoaga leaa Peresitene Nelson, “ua na ona tatou fai atu lava o lenei upumoni taua: o fanau uma a lo tatou Tama Faalelagi, i itu uma o le veli,e tatau ona faalogo i le savali o le talalelei toefuataiina a Iesu Keriso. Latou te filifili mo i latou lava pe latou te mananao e iloa atili.”9
Ma o lea, e pei ona fautuaina ai e Tamamatua Crozier, matou te faasoa atu a matou molimau o le talalelei a Iesu Keriso. Tatou te alolofa ma auauna atu, faamalolosia ma faafailele, ma lagolago ma lagolago i e pele ia i tatou ma o tatou tuaoi.
A o tatou fesoasoani atu i isi i luga o le ala i lo latou taunuuga paia, tatou te fesoasoani ia i tatou lava i lena lava ala e tasi, “ia talia i le malo o le Tama ia le toe o atu i fafo, ae mau faatasi ma le Atuae faavavau i le lagi” (3 Nifae 28:40).