E Na’o le Faatekinolosi: Talavou Matutua

E Faapefea Ona Tatou Faamuamua le Atua Pe a Faia Faaiuga o le Olaga?

Saunia e Chakell Wardleigh Herbert

Mekasini a le Ekalesia

Pe a tatou feagai ma le tele o ala eseese i le olaga, e faapefea ona tatou iloa o loo tatou i ai i luga o le ala e finagalo le Tama Faalelagi tatou te uia?

Ata

atatusi o le tagata o loo tilotilo i ala eseese

Pe na i ai se taimi na e le mautonu ai a o feagai ma se filifiliga? I taimi faapenei, e mafai ona faigofie ona mafaufau, Ae faapefea pe afai ou te faia se filifiliga sese ma le ausia ai le galuega e finagalo le Tama Faalelagi ou te faia i lenei olaga?

E masani ona ta‘u mai ia i tatou e mafai e le Tama Faalelagi ona taiala i tatou i la tatou faigamalaga i le olaga nei, ae e faapefea ona tatou mulimuli i le fautuaga a Peresitene Russell M. Nelson e “filifili e faamuamua le Atua i o tatou olaga,” ia “filifili e avea le Atua ma faatosinaga sili ona mamana i o tatou olaga,”¹ a o faia pea a tatou lava filifiliga? Pe o faatonu mai e le Tama Faalelagi le mea o le a tatou o i ai po o mea o le a tatou faia po o foliga o le a i ai o tatou olaga mai lea aso i lea aso?

Ioe, e ui o loo i ai i le Atua se fuafuaga sili o le fiafia lea e mafai ai e i tatou ona toe foi atu e toe nonofo faatasi ma Ia, Ae Na te le puleaina vaega uma o o tatou olaga. E finagalo o Ia ia tatou filifili mo i tatou lava pe a oo mai i o tatou faamoemoega ma faananauga o le olaga.

O ni nai mea nei e manatua pe a mafaufau i lena upumoni.

O Le Faitalia o se Meaalofa

Talu ai tatou te feagai ma le tele o ala e mafai ona tatou uia i le olaga, e mafai ona foliga taufaafefe pe lofituina le faitalia. O nisi taimi ou te matua fefe lava i le faia o le filifiliga “sese” lea na ou lagona le le mafai ona agai i luma i le olaga po o le alualu i luma.

Ae ao ou aoao e faalagolago i le Tama Faalelagi ma au lava ia, ua ou aoao ai e talisapaia lenei meaalofa o le filifiliga (tagai i le 2 Nifae 2:16).

E oo lava i lo tatou faitalia, e tatau lava ona tatou fefautuaai i taimi uma ma le Tama Faalelagi e uiga i a tatou faaiuga tetele e suia ai olaga ma pe o le a foi Lona finagalo. A tatou faia lea mea, e mafai ona Ia fesoasoani e taitai i tatou agai i le lelei. E pei ona sa aoao mai Elder Jeffrey R. Holland o le Korama a Aposetolo e Toasefululua, “E tatau ona tatou faaeteete ia aua nei misia le aao o le Alii pe a ofoina mai, pe a finagalo o ia e fesoasoani mai.”² Ae a tatou ola amiotonu, Na te faatuatuaina foi i tatou e faaaoga ma le poto lo tatou faitalia ma mulimuli i a tatou faananauga amiotonu ia maua le olioli a o tatou agai atu i le ala o feagaiga.

E Mafai Ona Tatou Filifili e Talia Avanoa

E i ai sa‘u uo na filifili e le auauna atu i se misiona ona o nisi o tauiviga patino. I ni tausaga mulimuli ane, sa ia lagona le le mautonu ma le lotonutimomoia i taimi uma na te faitau ai se laina i lona faamanuiaga faapeteriaka lea na faapea mai o le a ia maua le avanoa e auauna atu ai i se misiona. Sa ia lagonaina e pei ua ia faaleagaina mea sa saunia e le Atua mo ia ma sa masani ona faatumulia i le maasiasi ma le le mautonu e uiga i le lumanai.

Ae a o ia mafaufau loloto ma le agaga tatalo i lenei tulaga, sa ia iloa ai o le upu autu i lona faamanuiaga faapeteriaka o le avanoa. Ua valaaulia i tatou e le Tama Faalelagi ia usiusitai ia te Ia ma filifili avanoa lelei i vaitau uma o le olaga.

Ae faapefea pe afai tatou te misia se avanoa? Pe tatou te le taliaina Ana valaaulia uma?

O le mea e faafetai ai, ona o lo tatou Faaola, o le a tele atu avanoa mo auaunaga ma atinaega i o tatou olaga atoa.

O le Tama Faalelagi o se Atua o le faamagaloga ma le alofa. E pei ona folafola mai e Isaia, “A ia foi mai ia Ieova, ona alofa mai lea o ia ia te ia; ia foi mai i lo tatou Atua, aua na te matua faamagaloina” (Isaia 55:7).

Pe o se isi avanoa mo avanoa lelei e aofia ai le salamo ma le toe foi i le ala o feagaiga pe na o le i ai o se suiga o le loto ma faatagaina le Atua e toe manumalo i o tatou olaga, ia iloa, e pei ona aoao mai Elder Thierry K. Mutombo o le Fitugafulu, “a tatou filifili e mulimuli ia Keriso, ua tatou filifili ina ia suia.”³

Atonu e lei auauna atu la‘u uo i se misiona, ae ua ia faalolotoina lona faatuatua ia Keriso ma lona naunautaiga e galue i avanoa ma valaauga ua tuuina atu ia te Ia. Ma ua ia maua le olioli ma le faamalieina i le faia o faaiuga lelei ma le faatagaina o le Atua e taiala o ia.

Ia Fetuutuunai ma Saili Faaaliga

Ou te manatu o le toatele o i tatou e tuputupu ae i le faia o se otootoga auiliili mo o tatou olaga. Mo se faataitaiga, o a’u: Sa ou fuafua e galue i le matata faafomai, faaipoipo i le taimi sa 21 ai o‘u tausaga, ma le mauaina o ni tamaiti a o lei atoa le 30 tausaga, o ia mea uma a o tausia atoatoa lo’u aiga i le talalelei ma ola i se olaga fiafia ma le lemafuatiaina.

(Seāseā tutupu mea e pei ona fuafuaina.)

O iina na ave moni ai a‘u e le olaga a o ou faatuatuaina a’u lava e faia ni faaiuga lelei, maua avanoa, mulimuli i uunaiga, ma faamuamua le Atua:

O au o se tusitala. O le vaaia o le toto ma nila ou te faafaufau ai.
Ou te lei faaipoipo seia oo i le 27 o ou tausaga (ma i le ogatotonu o se faama‘i pipisi). Ma sa ou faaipoipo i se tasi sa ou iloaina mo le toeitiiti atoa le 10 tausaga, e ui lava sa ou tafao faamasani i isi tagata i lena taimi.
Ou te tauivi ma se gasegase tiga faaumiumi lea e mafai ona faigata ai le olaga i nisi taimi. O lenei ma‘i ua afua ai ona le maua se fanau, ma avea ai le avanoa o le faia o se fanau o se faailoga fesili tele.

A o ou liliu atu i le Tama Faalelagi mo se taitaiga, ua ou maua le olioli i o‘u tulaga e ui lava i le matuai ese o lo‘u olaga mai o’u ulua’i faamoemoega. Ma ou te faatuatua o le a sili atu le lumanai a o faaauau pea ona ou faia.

E lelei le i ai o le faamoemoe ma faamoemoega mo o tatou olaga lea o le a taitai atu ai i le tuputupu ae ma le faamalieina. Ae o le fetuutuunai ma le gauai atu i suiga i na faamoemoega e mafai ona tatou maua ai le olioli i soo se tulaga.

O le a le lelei ai pea mea uma o le olaga i le ala tatou te mananao pe faamoemoe i ai, ae mafai ona tatou faatuatua e mafai e le Tama Faalelagi ona faaauau pea ona faasino atu i tatou agai i avanoa ma le olioli lelei. Na aoao mai Peresitene Russell M. Nelson: “O mea lelei uma i le olaga—o faamanuiaga faapolopolo uma e iai le taua e faavavau—e amata i le faatuatua. O le faatagaina o le Atua e faamuamua i o tatou olaga e amata i le faatuatua o loo Ia finagalo e taiala i tatou.”⁴

E Finagalo le Tama Faalelagi Ia Tatou Olioli

Ona o loo tatou feagai ma le tele naua o ala e mafai ona tatou uia i le olaga, o le a i ai pea ni fesuiaiga i la tatou faigamalaga i taimi uma. O le mea e taua o lo tatou manatuaina e fefautuaai ma le Tama Faalelagi i a tatou faaiuga ma o le ala o loo tatou i ai o le ala o feagaiga. O le faamuamua o le Atua i o tatou olaga e faateleina ai Lona faatuatuaina o i tatou e mulimuli i se auala faamalieina lea o le a taitai atu ai ia te Ia ma faia faaiuga lelei i le ala. E finagalo o Ia ma Iesu Keriso ia tatou lagonaina le olioli, ia filifili mo i tatou lava, ia tuputupu ae, ma ia tuliloa mea tatou te fiafia i ai (tagai 2 Nifae 2:25).

Ma pe a le ausia o tatou faamoemoega o le olaga, e mafai ona tatou faamuamua le Atua e ala i le faalagolago ia te Ia, tausia o a tatou feagaiga, ma faatino i le faatuatua. O le faia o lena mea o le a taitai atu ai pea i tatou i le tele o le faamalieina, fiafia sili atu, ma avanoa e tele nai lo mea na tatou mafaufauina e mafai.

E moni lenei mea mo a’u.