E Na’o le Faatekinolosi
Pe o A’u ea le Mafuaaga o Lo’u Nofofua, pe o Le Mea Lenei na Fuafuaina e le Atua mo A’u?
E fa mataupu faavae ua fesoasoani ia te au e maua ai le faamoemoe i tali uma. Ma ua ou iloaina o fesili eseese e lua e sili atu ona taua i lou olaga.
Ata na pueina e Tina Lerohl
Pe a tatou nofofua mo se taimi umi atu nai lo le mea na tatou faamoemoeina, o se mea masani lo tatou fesili ifo ia i tatou lava, “Pe ua ou nofofua ea ona o se mea sa ou faia (pe lei faia), pe o le mea lenei na faamoemoeina e le Atua mo au?” O le mea e malie ai, o se “ioe” i soo se vaega o lenei fesili e mafai ona aumaia ai le faamoemoe ma le faanoanoa. Ae a o ou tomanatu i lo’u tulaga nofofua i le aluga o tausaga, e fa mataupu faavae—faatasi ai ma le tele o isi—na aumaia ia te au le faamoemoe mo se tali i lenei fesili. Ma ua ou iloaina o loo i ai moni lava ni fesili e sili atu ona lelei e mafai ona ou fesili atu ai nai lo lena—o fesili e mafai ai ona suia o’u popolega i le olioli, faamoemoe, ma le alualu i luma (tagai i mataupu faavae 3 ma le 4 o loo i lalo).
Mataupu Faavae 1: E mafai e le Atua ona faia “[o]mea uma … galulue faatasi mo lo [tatou] lelei.”
Pe a tatou mafaufau loloto pe aisea ua tatou nofofua ai, e tele manatu e ono oo mai i le mafaufau, e pei o le “Pe tatau ea ona ou alu i nisi tafaoga faamasani?” po o le “Ae a pe a tau ina ou fesili atu i lena tagata i se tafaoga faamasani?” Po o a lava mafuaaga e ono i ai, pe a tatou taumanatunatu pe o tatou nofofua ona o se mea sa tatou faia pe lei faia, e mafai ona tatou maua le malosi i lenei upumoni mai le Mataupu Faavae ma Feagaiga 90:24: “Saili ma le filiga, tatalo e le aunoa, ma ia talitonu, ma o le a galulue faatasi mea uma mo lo outou lelei, pe afai tou te savavali sa‘o ma manatua le feagaiga na outou osifeagaiga ai ma le tasi.”
Pe semanu ua uma ona tatou faaipoipo pe ana ese se mea na tatou faia i le taimi ua tuanai, e mafai ona tatou maua le malosi i le iloaina afai tatou te tausia a tatou feagaiga ma faalatalata atili atu ia Keriso i le faatuatua e ala i le suesueina o tusitusiga paia, tatalo, ma le avea ma soo, ona mafai lea ona tatou faatuatuaina o le a “galulue faatasi mea uma mo lo tatou lelei.” A tatou saili e mulimuli ia Keriso, o le a fesoasoani le Tama Faalelagi ia i tatou e aoao mai o tatou aafiaga ua tuanai ma faaaoga e faamanuia ai i tatou i le lumanai. O le folafolaga o le faaipoipoga e faavavau o le a le aveesea mai ia i latou o e ola amiotonu.
Mataupu Faavae 2: E i ai le Alii i auiliiliga o o tatou olaga.
Ina ua tuuina mai e Peresitene Henry B. Eyring, Fesoasoani Lua i le Au Peresitene Sili, lana saunoaga i le konafesi aoao “E, Ia Manatua, Ia Manatua Lava” ia Oketopa 2007, ou te lei malamalama i le aafiaga tele o le a i ai i lou olaga. Ae sa ou galue i le valaaulia ia iloa ma tusifaamaumau le aao o le Alii i le olaga o lo’u aiga i aso taitasi.1 E ui ou te lei 100 pasene i le aluga o tausaga, ae ua ou tusia le faitau afe o auala na taialaina ai e le Alii lo‘u olaga, e masani lava i ni auala e foliga mai e laiti. O lenei faiga faigofie i aso taitasi (ma e pei o taumafaiga uma, e manaomia ai le faataitai ina ia lelei atili ai) ua aumaia ai ia te au le olioli loloto a o ou lagonaina le alofa ma le taitaiga a le Tama Faalelagi mo au i le tele o taimi i aso taitasi.
O lena aafiaga ma le malamalama ua fesoasoani foi ia te au e maua ai le malosi ma le faamoemoe pe a ou mafaufau pe ua ou nofofua ona o le galuega lenei e finagalo le Tama Faalelagi ou te faia i le taimi nei. E ala i le tusia soo i lalo o le auala o loo i ai o Ia i auiliiliga laiti o lo‘u aso, ou te lagona ai le filemu atoatoa o le a Ia taialaina a’u i se tasi o a‘u faaiuga sili ona taua mo le faavavau. O le fesoasoani ia te au ia maua se toalua amiotonu ma tausi feagaiga e le o se mea o le a Ia tuuaunoaina. E mafai ona ou maua le mautinoa o le a Ia taialaina au a o ou faia la‘u vaega e ola agavaa ai, saili, ma galue i uunaiga a le Agaga Paia. Ou te lagona le filemu ma le olioli aua ou te faalagolago i le Tama Faalelagi ma Iesu Keriso e taialaina lo‘u olaga.
E ui ina matuai ou manao lava e faaipoipo, ae ou te manao atili e mulimuli i le fuafuaga a le Tama Faalelagi mo au. Ou te faalagolago ia te Ia aua ou te iloa e i ai o Ia i auiliiliga o lo‘u olaga. Nai lo le taulai toto’a atu la i le faaipoipoga, ua ou sailia faaaliga e uiga i le ala o le olaga e finagalo o Ia ou te uia i le taimi nei ma le auala e mafai ona ou auauna atu ai i lo‘u aiga ma le nuu i isi auala.
Mataupu Faavae 3: O loo i ai se galuega a le Atua ou te faia.
Na fetalai le Atua ia Mose, “Ua ia te A’u se galuega mo oe” (Mose 1:6 Na aoao mai Iosefa Samita ia Moronae e faapea “ua i ai i le Atua se galuega mo au e ou te faia” ((Iosefa Samita—Talafaasolopito 1:33). Ua tofu foi i tatou taitoasi ma se galuega e fai. Ma e maeu le mamana o la tatou vaaiga i le nofofua e mafai ona i ai pe a tatou vaai i ai i tulaga o le galuega ua manaomia e le Atua i tatou taitoatasi e fai. Nai lo le vaai atu i le nofofua o se mea ua ou “vasa’i ai” i le faataunuuina o le galuega a le Atua mo aʻu, Nai lo lena, ou te mauaina se faamoemoega taua pe a ou vaai i ai o se avanoa e saofaga ai i ni auala eseese i le galuega a le Alii i aso e gata ai.
Na aoao mai Peresitene Nelson: “O outou o fanau na filifilia e le Atua e avea o se vaega o Lana autau i le taimi o lenei tumutumuga tele i le taua umi i le va o le lelei ma le leaga—i le va o le upumoni ma le mea sese. O le a le faateia au pe afai, pe a afeese le veli i le olaga a sau, tatou te iloa ai sa e aioi moni atu i lo tatou Tama Faalelagi ina ia faapolopoloina mo le taimi nei. O le a le faateia a’u i le iloaina o le muai olaga sa e alofa tele ai i le Alii na e folafola atu ai e puipuia Lona suafa ma le talalelei i le taimi o le vavao o vaaiga faaviivii faigata o lenei lalolagi. E tasi le mea e mautinoa: O oe o le aiga o Isaraelu ma ua auina mai oe iinei e fesoasoani e faapotopoto mai le au filifilia a le Atua.”2
O lenei vaaiga ua valaaulia ai au e fesuiai le fesili o le “Pe o faamoemoe le Tama Faalelagi ia te au ia ou nofofua i le taimi nei?” i le “O le a le mea ua faamoemoe le Tama Faalelagi ou te faia o se nofofua i le taimi nei?” O nai upu faaopoopo e faia ai se eseesega tele. Ona o lena vaaiga, ou te tatalo ai i aso taitasi ina ia fesoasoani le Tama Faalelagi ia te au ia ou agavaa ma saunia e faia Lana galuega i soo se mea lava Na te manaomia ai au—nofofua pe leai. E faapefea ona ou aoao po o le a lena misiona mo au?
Na lapatai mai Peresitene M. Russell Ballard o le Sui Peresitene o le Korama a Aposetolo e Toasefululua e faapea:
“[O le Faaola] ua valaauliaina outou, o ni atalii ma afafine o le Atua, ia saunia faaleagaga e ulu atu i Lana galuega. O le a manaomia ai lou malosi atoa, mafaufauga manino, taumafaiga silisili, ma le faatuatua silisili.
“O lau misiona mai le Alii o le a tatala atu ia te oe i lea aso ma lea aso a o e tatalo, suesue i tusitusiga paia, ma tuuina atu oe lava ma le filiga i le galuega a le Alii. O le a e iloa atli ai lau galuega mai le Alii a o e gauai atu ma le fiafia i Lona finagalo. Manatua o nai faatinoga laiti o le auauna atu ma le tuuto lea e aumaia ai mea tetele. Na fetalai le Alii: “O le mea lea, aua le faavaivai i le faia o mea lelei, ona o lo o oulua faataatiaina le faavae o se galuega tele. Ma o mea iti e tutupu mai ai mea tetele” (Mataupu Faavae ma Feagaiga 64:33
“Ia faia lenei tausaga, lenei masina, ma lenei aso o se amataga fou i lou olaga.”3
Mataupu Faavae 4: Ua i ai i le Atua se fuafuaga o le fiafia mo Ana fanau uma.
E le gata i le fesili po o le a le galuega ua faamoemoe le Atua ou te faia i le taimi nei, i ni nai tausaga ua mavae sa ou aoao ai e fai atu se isi fesili sa aoga ma mamana: “O faapefea mai lo’u mulimulitaia o le fuafuaga o le faaolataga ma le fiafia a le Atua?”
E ui o le faaipoipoga e faavavau o se vaega taua o le fuafuaga o le fiafia a le Tama Faalelagi mo Ana fanau, ae e le na o le pau lea o le vaega. Seia oo mai lena avanoa (lea o loo ou galue ai pea agai i ai), e mafai ona ou taulai atu i le ola ai i isi vaega uma o le fuafuaga a le Atua mo a’u i mea e mafai ona ou taulimaina ma aumaia ai le olioli tele. Faatasi ai ma isi mea, e mafai ona ou
-
osia ma tausia feagaiga paia;
-
ola agavaa mo se faamauga i le malumalu;
-
auai i le faatinoina o galuega o le faaolataga ma le faaeaga e ala i le fesoasoani e faapotopoto Isaraelu i itu uma e lua o le veli;
-
auauna atu i lo‘u aiga ma isi;
-
saili ni auala e tausia ma faafailele, e ui e leai sa‘u lava fanau;
-
auauna atu ma le faamaoni i lou valaauga;
-
fatufatu ni aafiaga o aso taitasi e fesoasoani ou te latalata atili atu ai i le Tama Faalelagi ma Iesu Keriso;
-
aoao e faalogo ia te Ia; ma
-
faaali atu le alofa ma le lotofaafetai i le Tama Faalelagi ma Iesu Keriso.
Ma e mafai ona ou mafaufau ma le agaga tatalo i aso uma i le fesili “O faapefea lo’u mulimulita’ia o le fuafuaga o le faaolataga ma le fiafia a le Atua?” O lena fesili e maua ai i taimi uma se avanoa e maua ai faaaliga ma alualu ai i luma.
Agai i Luma i le Faatuatua
Ou te le iloa le mea o loo teuina e le Tama Faalelagi mo lo’u lumanai, ae ou te saili i aso taitasi ia iloa le isi laasaga i le galuega e finagalo o Ia ou te faia. Ma ou te iloa o le asō ma le lumanai o le a matagofie ma fiafia aua ou te iloa e alofa le Tama Faalelagi ia te au, e pei foi ona Ia alofa ia te oe. Ou te faafetai ua Ia faatagaina au e tuputupu ae i “lea fasifuaitau i luga o lea fasifuaitau” (Mataupu Faavae ma Feagaiga 98:12) ma “mai lea alofa tunoa i lea alofa tunoa” (Mataupu Faavae ma Feagaiga 93:13), ona atonu e foliga lofituina le lumanai pe afai ou te vaai i ai i le taimi e tasi. Ua ou maua le malosi tele mai le aoaoga faavae matagofie e faapea “o o‘u manatu e le o outou manatu, o o’u ala e le o outou ala, ua fetalai mai ai Ieova. “Aua e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu” (Isaia 55:8–9).
Atonu ou te le iloa lelei pe aisea ua ou nofofua ai pea i le 40 ma ona tupu o o’u tausaga, ae ou te maua le mafanafana tele, faamoemoe, ma le fiafia i le iloa e silafia e le Tama Faalelagi ia mafuaaga ma o le a Ia faia “mea uma … galulue faatasi mo [lo‘u] lelei.” Ou te faatumauina le faatuatua o loo i ai o Ia i auiliiliga o lo‘u olaga ma o le a Ia fesoasoani ia te a’u e faataunuu le galuega ua Ia faamoemoeina mo a‘u e fai i le taimi nei a o ou saili atu ma le lotomaualalo i Lana taitaiga. I le iloa ai o lena mea, ou te maua ai le olioli ma faamanuiaga i le “faia ai ma le fiafia mea uma ua i ai i lo tatou mana; ona … tatou tutu, ma mautinoa atoatoa, e vaai i le faaolataga a le Atua, ma mo lona aao e faaali mai” (Mataupu Faavae ma Feagaiga 123:17