Kamo ba Nagtinguha kang Kristo Matag Adlaw?

Ni Orson S. Franco

Ang akong kasinatian sa templo nakatabang kanako nga makaamgo nga ako kinahanglan magtinguha sa pagpangita kang Kristo kada adlaw.

Ang tagsulat nagpuyo sa Guatemala.

Imahe

usa ka lalaki nga young adult nagbasa sa mga kasulatan duol sa abli nga bentana

Sa dihang gamay pa ko, kasagaran mangutana ako sa akong kaugalingon og mga pangutana sama sa “Makasulti ba ang Balaang Espiritu?” “Kon moadto ako sa langit, makakita ba ako sa Dios?”

Karon nga mas tigulang na ako og gamay, ako makahandom ug makakita nga ang Langitnong Amahan kanunay nga naggiya kanako ug nagpakita kanako og ebidensiya nga anaa Siya, apan ako wala kanunay nakaila sa Iyang impluwensiya sa akong kinabuhi. Napanalanginan ako nga gipadako diha sa usa ka panimalay nga aduna ang gipahiuli nga ebanghelyo ni Jesukristo, apan ako nagsalig sa pagpamatuod sa uban sulod sa dugay nga panahon. Lisod alang kanako nga motuo nga tinuod gayod ang Dios.

Usa ka adlaw, sa dihang mga 15 anyos ako, ang akong bishop mipahibalo sa usa ka temple trip sa ward. Naanad na ako nga moadto sa templo uban sa akong pamilya, mao nga wala ako maghunahuna nga mahinungdanon kini. Total wala man kaayo koy gibati ug wala makasabot sa importansiya sa mga pakigsaad ug mga ordinansa nga gipahigayon diha sa templo.

Sa dihang miabot ang adlaw, misulod ako sa templo ug nag-ilis ngadto sa akong puti nga sinina nga pangbunyag [jumpsuit]. Samtang milabay ako sa usa ka salamin, daklit akong nakakita sa akong kaugalingon nga nagsul-ob og puti ug adunay pahiyom sa akong nawong. Samtang naghulat ako sa ubang mga miyembro sa akong ward, nahibulong ako. Namalandong ako sa katahom sa bunyaganan ug sa mga hulagway nga gipintura sa dihang sa kalit lang, nabati nako ang Espiritu nga hinay nga mihikap sa akong kasingkasing.

Dili gayod nako makalimtan ang mga pulong nga misantop sa akong hunahuna: “Orson, kini mao ang balay sa Ginoo. Siya nahigugma kanimo. Gusto Siya nga ikaw mag-usab sa imong kinabuhi ug maningkamot nga mahimong mas maayo nga tawo sa hinay-hinay.”

Mibati ako og dako kaayo nga gugma niadto nga mga pulong apan kalit lang nga nabuntog sa pagbati nga sad-an. Hangtod niining tungora wala nako giseryoso ang templo. Mao nga nag-ampo ako sa akong kasingkasing, nga nangayo sa Langitnong Amahan nga pasayloon ako.

Ug nasayod ako nga Siya nakadungog sa akong pag-ampo tungod kay mibati ako og dako gayod nga kalinaw sa akong kasingkasing.

Nianang adlawa, gipalawman nako ang akong hugot nga pagtuo ug nakadawat og tinuod nga pagpamatuod sa ebanghelyo nga dugay na nakong gihandom. Nianang adlawa, ligdong akong nakaingon sama niadtong duha ka disipulo ni Juan: “Nakita nako ang Mesiyas” (tan-awa sa Juan 1:41).

Yano nga mga Paagi nga Mokonektar

Sukad niini nga kasinatian, naningkamot ako nga mas makaila sa impluwensiya sa Langitnong Amahan sa akong kinabuhi pinaagi sa pagtinguha ni Jesukristo matag adlaw. Bisan og ang kalibotan makapahimong lisod sa pagpaminaw sa tingog sa Manluluwas usahay, nasayod na ako karon nga Siya tinuod gayod ug nga Siya nag-uban kanako.

Daghan kanato adunay mga adlaw nga mobati kita nga mas duol og diyotay sa langit kay sa naandan. Kita usab adunay malisod nga mga adlaw nga nakigbisog kita nga mobati sa Iyang impluwensiya bisan unsaon nato sa pagpaningkamot o mga adlaw nga daghan kaayo og buluhaton nga dili kita makagahin og igong panahon aron sa pagtinguha Kaniya. Apan nasayod ako nga kon kita adunay sinsero nga tinguha sa pagpangita Kaniya, atong makita ang Iyang impluwensiya sa atong mga kinabuhi.

Kon mobati kamo nga napalayo sa Manluluwas, pangutan-a ang inyong kaugalingon, Naningkamot ba ako sa pagpangita sa Mesiyas adlaw-adlaw?

Samtang magtinguha kita nga mahimong sama sa Apostoles sa karaan, nga biyaan ang atong mga pukot (tan-awa sa Mateo 4:20) ug ubang mga responsibilidad ug mga interes sulod sa usa ka higayon aron modangop ngadto Kaniya, kita makakita Kaniya.

Kini mao ang mga tinubdan sa espirituhanong gahom nga makatabang kanato. Ang propeta Alma mipahinumdom kanato “nga pinaagi sa gagmay ug yano nga mga butang ang mga dagko nga butang ipahinabo” (Alma 37:6). Ang gagmay nga mga buhat sa hugot nga pagtuo ug espirituhanon nga mga binuhatan nga atong buhaton matag adlaw makatabang kanato sa pagpalambo sa atong kapasidad nga makaila sa Ginoo sa atong mga kinabuhi.

Pipila niini nga espirituhanon nga mga himan mahimong mga butang sama sa:

Pag-ampo inubanan sa hugot nga pagtuo
Pagtuon sa mga kasulatan sa tinuyo ug makahuluganon nga paagi
Pagserbisyo sa dili hinakog nga paagi
Pagpaambit sa inyong pagpamatuod ngadto sa usa ka higala
Pagpaminaw sa mga himno o espirituhanon nga musika
Pagtambong sa Institute
Pagbalaan sa adlaw nga Igpapahulay
Pagpuasa
Makanunayon nga pagtambong sa templo

Daghang butang ang makatabang kanato nga makakita ni Jesukristo, apan ang importante mao ang pagpadayon sa pagtinguha Kaniya. Si Presidente Russell M. Nelson mitudlo: “[Samtang magtinguha kita nga mahimong] mga disipulo ni Jesukristo, ang atong mga paningkamot sa pagpaminaw Kaniya kinahanglan nga mas gitinguha nato. Kinahanglan og tininoud ug makanunayon nga paningkamot sa pagpuno sa atong inadlaw nga kinabuhi sa Iyang mga pulong, sa Iyang mga pagtulun-an, sa Iyang mga kamatuoran.”¹

Nakaplagan ba Ninyo Siya Karon?

Bisan kon wala ninyo nadawat ang tanang tubag nga inyong gitinguha karon, padayon lang! Tinguhaa lang si Kristo ug pilia nga magbaton og hugot nga pagtuo diha Kaniya. Kon mosulay kamo sa pagpangita Kaniya kada adlaw pinaagi sa gagmay nga mga buhat, nasayod ako nga mabati ninyo ang Iyang paghangop gikan sa langit. Nasayod ako nga tinuod kini tungod kay nabati nako kini.

Giila sa Langitnong Amahan ang atong mga paningkamot. Wala kaayo Siya nagpakabana sa gidak-on sa mga butang nga atong buhaton aron sa paghatag og kaayohan sa atong mga espiritu kon kita lig-on ug seguradong makaingon matag adlaw: “Karon nakita nako ang Mesiyas!”

Kini ang akong pag-ampo nga hinaot kita makaila ug mohigugma sa atong Manluluwas adlaw-adlaw. Nga kita mobuhat sa gisugyot ni Moroni ug “[pangitaon kini] nga Jesus” (Ether 12:41). Hinaot nga kamo ug ako makakita, sa kataposan sa kada adlaw, sa usa nga si Moises ug ang ubang mga propeta misulat: Jesus sa Nazaret. Sa pagtinguha kang Kristo, makita nato ang impluwensiya sa Dios sa atong mga kinabuhi. Ug kon mas magtinguha kita kang Kristo adlaw-adlaw, mas makita nato Siya ug makaila sa Iyang tingog, nga nangulo ug naggiya kanato sa atong tibuok nga kinabuhi.