Digital Lamang
Pagsagop ug Family History—Malungtarong mga Bugkos , Mahangturong mga Koneksiyon
Unsaon nato pagkahibalo kon ato bang ipadayon ang family history nga buhat alang sa atong biyolohikanhon o sinagop nga mga linya sa pamilya?
Napanalanginan kita nga makaapil sa mga ordinansa sa templo nga masilyo kita og dungan isip pamilya alang sa karon ug sa tanang kahangturan. Sigon sa gitudlo ni Presidente Russell M. Nelson: “Ang kahimayaan usa ka kalihokan sa pamilya. Pinaagi lamang sa makaluwas nga mga ordinansa sa ebanghelyo ni Jesukristo nga ang mga pamilya mahimaya. Ang katapusan diin kita maningkamot mao nga kita mahimong malipayon isip usa ka pamilya—na-endowed, nabugkos, ug naandam alang sa kinabuhing dayon diha sa presensya sa Dios.”1 Kini nga oportunidad naglugway niadtong natawo diha sa pakigsaad ug niadtong kinsa gisagop ug nasilyo ngadto sa ilang mga pamilya pinaagi sa sagrado nga mga ordinansa sa templo.
“Mahigugmaon, mahangturon nga mga pamilya mahimong mamugna pinaagi sa pagsagop. Bisan kon ang mga anak moabot ngadto sa usa ka pamilya pinaagi sa pagsagop o pagkatawo, patas ra ni gihapon nga bililhong panalangin. Ang mga anak kinsa nasilyo sa templo ngadto sa nagsagop kanila nga mga ginikanan makadawat sa matag panalangin nga kabahin sa ilang mahangturon nga pamilya.”2
Kon ang usa ka sinagop magsugod sa buhat sa family history, adunay duha ka posible nga pedigree nga sundon, isiksik, ug ikonsiderar alang sa buhat sa templo.
Bisan sundon ang linya sa pagsilyo (isip maoy tawag sa usa ka tawo sa nagsagop nga pamilya) o ang biyolohikanhon nga linya—o ang duha—kinahanglan nga pangitaon pinaagi sa mga konseho sa family history ug pagpadayag. Walay usa ka eksakto nga tubag, ug ang matag tawo nga nag-atubang niini nga pagpili kinahanglan nga modangop niini ngadto sa pag-ampo.
Si Elder Richard G. Scott (1928–2015) sa Korum sa Napulog Duha ka Apostoles mitudlo: “Ang bisan unsang buhat nga inyong himoon sa templo maoy oras nga maayong pagkagahin, apan ang pagdawat og mga ordinansa alang sa usa sa imong kaugalingong katigulangan naghimo sa panahon diha sa templo nga mas sagrado, ug bisan mas dagkong panalangin ang madawat. Ang Unang Kapangulohan mideklarar, ‘Ang atong pinakaimportanteng obligasyon mao ang pagpangita ug pag-ila sa atong kaugalingong katigulangan’ [Unang Kapangulohan nga sulat, Peb 29, 2012].”3
Komon kini alang sa sinagop nga mga indibidwal nga adunay sukwahi nga mga pagbati mahitungod kon unsay gipasabot niini kabahin sa ilang katigulangan. Si Mary (ang ngalan giusab) miingon: “Ang family history makalibog alang kanako. Giingnan ko nga ang akong ‘katigulangan’ mao kadtong diin ako nasilyo, ug usahay gibati nako ang garbo niana nga panulundon, apan kanunay akong mobati og tipik sa limbongan nga syndrome tungod kay dili sila akong kadugo. Ang akong biyolohikanhon nga pamilya nakabuhat og malukpanon nga buhat sa family history ug mipakita kanako og pipila ka journal ug mga litrato. Mahandurawon kadto ug masugyoton nga makakita gayod kon asa ko naliwat … ug mobati og koneksiyon samtang nagbasa ko og mga pulong gikan sa akong mga katigulangan. Apan ako hapit na mobati nga daw nanghulam ako niana nga pagbati sa pagkakonektar, tungod kay moadto ko sa gawas niana nga ordinansa sa templo.”
Si Susan (ngalan giilisan), sama sa kadaghanan sa mga sinagop, nakuryoso kaayo kabahin sa iyang mga ginikanan sa pagkatawo. Nasilyo siya niadtong masuso pa ngadto sa iyang sinagop nga pamilya ug mibati sa gahom ug kompirmasiyon nga mao kini sila ang ilang kaliwatan—sila diin siya makauban niya sa kahangturan. Gibati niya nga napanalanginan pinaagi sa pagbuhat sa family history ug buluhaton sa templo alang niini nga pamilya. Bisan pa man, wala kana naghikaw kaniya sa kakuryoso o sa iyang tinguha sa paghalad sa makaluwas nga mga ordinansa ngadto sa mga tawo sa linya sa iyang pagkatawo. Nabalaka siya nga mora og nahimo siyang dili maunongon ngadto sa iyang sinagop nga pamilya sa pag-angkon niana nga tinguha. Apan human sa usa ka mahigugmaon nga panag-istoryahanay uban sa iyang mga ginikanan, nasiguro siya niana nga mga pagbati sa gugma ug kamaunongon dili mawala pinaagi sa pagpadayon sa sagrado nga buhat alang sa iyang linya sa pagkatawo.
Usa ka Butang sa Pagtambag ug Pagpadayag
Mga dinamika sa pamilya halapad, ug unsay maayo alang sa usa ka tawo mahimong dili komportable sa lain. Kon ang imong sinagop nga pamilya mobati og kadili komportable sa imong pagpadayon sa imong biyolohikanhon nga pedigree, tingali mas maayo nga mohunong una niana nga buhat ug mopunting lang una sa ubang katigulangan. Ang panahon mahimong moabot sa sunod alang sa imong biyolohikanhon nga linya, ingon nga ang matag tawo nga natawo sa kalibutan adunay kahigayonan sa pagdawat og mga ordinansa sa templo sa usa ka higayon niana. Apan hibaloi nga ang pagporma sa pamilya sa sunod kinabuhi nga daw makalibog alang kanato uban sa atong gamay nga panglantaw mahimo nga sa umaabot maklaro na.
Si Presidente Dallin H. Oaks, Unang Magtatambag sa Unang Kapangulohan, miasoy niini nga istorya nga gipakigbahin kaniya sa usa ka higala:
“Human namatay ang iyang pinanggang asawa ug inahan sa iyang mga anak, ang usa ka amahan nagminyo pag-usab. Ang ubang hamtong nga mga anak makusganong misupak sa iyang pagminyo og usab ug nangayo’g tambag sa suod nga kaliwat kinsa usa ka tinahod nga lider sa Simbahan. Human makadungog sa mga rason sa ilang pagsupak, nga nakapukos sa mga kondisyon ug relasyon didto sa kalibutan sa espiritu o sa mga gingharian sa himaya human sa Kataposang Paghukom, kining lider miingon: “Sayop ang inyong gikabalak-an. Mabalaka unta mo kon makaabut ba kaha kamo niadtong mga dapita. Kana maoy tutuki. Kon moabut mo didto, ang tanan mas nindot pa kaysa inyong mahanduraw.’
“Unsa ka makahupay nga pagtulun-an! Salig sa Ginoo!”4
Mga Opsiyon sa FamilySearch
Sa laing bahin, adunay mga feature sa FamilySearch motugot sa imong mga opsiyon nga andam. Sayon ra ang pagsubay sa usa ka nasilyo nga linya ug usa ka biyolohikanhon nga linya sa tsart sa imong pedigree kon mao kini imong pilion. Sulod sa Family Tree sa FamilySearch.org, makapili ka sa opsiyon sa “Pagdugang og Ginikanan [Add Parent]” ngadto sa imong rekord. Makamugna kini og linya nga adunay lain nga pares sa ginikanan nga imong masiksik ug madugang taman kon unsa kalayo sa imong gitinguha. Mahimo kang mopili asa nga hugpong sa mga ginikanan ang imong gusto nga ipakita, apan dali ra nimong mabalik-balik. Sulod sa imong indibidwal nga rekord, mahimo usab nimong itudlo kon ang relasyon sa ginikanan biyolohikanhon ba o sinagop kon unsa ang imong gitinguha.
Ang polisiya sa Simbahan nagkinahanglan nga mosumiter ka og mga ngalan lamang alang niadtong ikaw may relasyon, mao nga kini nagtugot kanimo sa pagsumiter og mga ngalan sa templo alang sa biyolohikanhon, sinagop, ug temporaryong giamuma nga pamilya nga mga linya nga konektado sa imong pamilya.
Pagsagop sa Balay ni Israel
Ang konsepto ug praktis sa pagsagop may kalabotan sa hapit matag tawo nga nahimugso. Si Mark A. Peterson, usa ka kanhi propesor sa Brigham Young University, mitudlo:
“Ang pagsagop walay limit ngadto sa espesyal nga mga hitabo nga gitawag nato og ‘sinagop.’ Kini may kalabotan kanatong tanan. Si Apostol Pablo … misulti kabahin sa pagsagop isip ang proseso diin kita mahimong mga sakop sa pakigsaad, sakop sa pamilya ni Abraham. … Ngadto kang Pablo, ang termino nga pagsagop gigamit aron sa pagpakita nga niadtong kinsa motuo kang Jesus mahimong kabahin sa usa ka espesyal kaayo nga pamilya. Tinuod kini alang kanatong tanan kinsa nabunyagan ngadto sa Simbahan karon. Nahimo kitang mga igsoon.
“Mas klaro kini kaayo diha sa Taga-Galacia:
“Gibunyagan kamo aron mahiusa kang Kristo busa nakaambit kamo sa kinaiya ni Kristo.
“‘Busa wala nay kalainan sa mga Judio ug sa mga dili Judio, sa mga ulipon ug sa mga gawasnon, sa mga lalaki ug sa mga babaye: kay nahiusa naman kamong tanan kang Kristo Jesus.
“‘[Ug] kon kamo iya na ni Kristo, mga kaliwat kamo ni Abraham ug madawat ninyo ang gisaad sa Dios.’ [Mga Taga-Galacia 3:27–29] …
“Ang pagkahimong kabahin sa balay ni Israel gipasabot ngari kanato sa piho nga mga termino kon modawat na kita sa atong patriarchal nga mga panalangin. Diha niana gisultihan kita asa ang atong kaliwatan. Kini, usab, sa kadaghanang hitabo, usa ka pagpakita sa paglalang sa pamilya pinaagi sa proseso sa pagsagop. Usahay sulod sa usa ka pamilya adunay pipila kinsa anaa sa kaliwatan ni Ephraim samtang ang uban mahimong kang Judah o Dan o Manasseh. Ang pagkasakop sa matag usa niining mga kaliwatan kasagaran kabahin sa proseso sa pagsagop nga giingon ni Pablo. Kon mopili kita og pagkamasulundon ug paghinulsol ug moambit sa panalangin sa pakigsaad, dawaton kita ngadto sa panimalay sa hugot nga pagtuo, ang Simbahan. Dili na kita mga langyaw ug mga dumuduong kondili mga kauban na sa katawhan sa Dios ug mga sakop na sa iyang banay.”5
Ang Mahinungdanon nga Laraw sa Kalipay
Ang dakong plano sa Langitnong Amahan usa ka plano sa kalipay. Nasayod Siya nga ang pagkasilyo sa mga relasyon sa mahangturon nga pamilya magdala kanato og hingpit nga kalipay sa paagi sa suod nga koneksiyon ug mahigugmaon nga mga pagbati sa pamilya. Pinaagi sa pag-ampo, makadiskobre ka sa dalan nga ang imong kaugalingon nga personal nga panaw kinahanglan nga maoy subayon kabahin sa biyolohikanhon ug sinagop nga mga linya sa pamilya samtang kamo moapil sa buhat sa templo ug family history sa tibuok nimong kinabuhi.