Unsa ang Balaan nga Pagtahod, sa Tinud-anay?

Ni Destiny Yarbro

Samtang atong palapdan ang atong panabot sa balaang pagtahod, atong madugangan ang atong abilidad nga balaang motahod bisan diha sa mga sitwasyon nga dili kasagaran.

Tungod sa ubang lahi nga mga kasinatian nga akong naagian, ako naghunahuna mahitungod sa kahulogan sa balaan nga pagtahod. Ania kon giunsa sa pagpasabot ni Presidente Dallin H. Oaks, Unang Magtatambag sa Unang Kapangulohan, niini:

“Ang pagsimba kanunay naglakip sa mga lihok, apan ang tinuod nga pagsimba kanunayng may kalab[o]tan sa piho nga kinaiya sa hunahuna.

“Ang kinaiya sa pagsimba mao ang hinungdan sa atong lawom nga mga pagbati sa pagkamaunungon, pagpasidungog, ug pagdayeg. Ang pagsimba nag-uban sa gugma ug lawom nga pagtahod diha sa usa ka kahimtang sa debosyon nga modala sa atong mga espiritu nga mas duol ngadto sa Dios.”¹

Unsay mosantop sa hunahuna kon kamo maghunahuna kabahin sa balaang pagtahod? Ang mosunod nga mga kahimtang maisip ba nga balaang pagtahod o dili balaang pagtahod diha sa miting sa sakramento?

1. Usa ka bata nagdrowing diha sa iyang koloranan nga libro.

2. Usa ka batan-ong lalaki nagpasa sa sakramento samtang nagsul-ob og headphone.

3. Usa ka tawo naglukso-lukso ug nagwara-wara og maayo sa iyang mga bukton.

4. Usa ka batan-ong babaye nagdula diha sa iyang phone.

5. Usa ka misyonaryo kalit lang nagsinggit.

6. Usa ka babaye kanunayng maglingkod diha sa hawanan, dili gayod sulod sa chapel.

7. Usa ka lalaki naghigda sa usa ka higdaanan diha sa taliwala nga agianan sa chapel.

8. Usa ka grupo sa mga miyembro nagwara-wara ug naghimo og mga kasaba.

9. Usa ka tin-edyer nga babaye naglingkod ilawom sa lingkoranan.

10. Usa ka babaye nagbalik-balik og paso diha sa luyo sa chapel.

Kadaghanan kanato mouyon nga ang usa ka misyonaryo nga nagsyagit diha sa miting sa sakramento wala gayod nagpakita og balaan nga pagtahod kaysa mga bata nga nagdrowing og mga hulagway aron sila adunay mabuhat. Apan atong gahinan og panahon sa pagrebyo sa atong mga pangagpas mahitungod sa balaang pagtahod pinaagi sa pagtagsa-tagsa niining 10 ka tinuod nga mga kahimtang—matag usa niini personal nakong nasinati sa mga miting sa Simbahan.

1. Usa ka bata nagdrowing diha sa simbahan. Kini nga buhat komon ug andam ra nga madawat sa hapit tanang miyembro. Kita nasayod nga kini sa kasagaran wala nagpakita og pagkawalay balaan nga pagtahod gawas kon kita mitugot sa atong kaugalingon nga mabalda niini.

2. Ang usa ka tawo nagpasa sa sakramento nga naminaw sa musika diha sa iyang mga headphone. Kini dili gayod angay sa kadaghanan nga kahimtang. Tugoti nga akong ipaambit “ang nahibilin nga bahin sa istorya.” Nakaila ako og usa ka tawo nga adunay lig-on nga pagpamatuod ug nakaserbisyo og misyon ug midawat og nagkadaiyang mga calling. Sa bag-ohay lang nga katuigan, hinoon, na-diagnose siya nga dunay sakit nga schizoaffective disorder. Ang pagtaod og mga headphone makapahimo niya nga makapaminaw og hinay, malinawon nga musika ug makatabang nga dili madunggan ang mga tingog nga anaa sa iyang hunahuna. Makahimo siya sa pagbati sa Espiritu ug makaserbisyo sa uban nga may balaang pagtahod uban sa tabang sa iyang mga headphone.

3. Usa ka batan-ong lalaki naglukso-lukso ug nagwara-wara og maayo sa iyang mga bukton. Ang nahabilin nga bahin sa istorya: Kini nga brother nga dili makatabi nga dunay autismo madasig sa matag higayon nga makakita sa bishop diha sa atubangan. Siya mopahayag sa iyang kadasig pinaagi sa pagkapay-kapay sa iyang mga kamot ug sa paglukso-lukso.

   

4. Usa ka batan-ong babaye nagdula diha sa iyang phone. Ang nahabilin nga bahin sa istorya: Kini nga sister nakigbatok sa iyang katilingbanong kabalaka [social anxiety] pinaagi sa hilom nga pagdula diha sa iyang phone. Sa pagkatinuod, mas makapaminaw siya nga may balaang pagtahod ug makadawat sa mga mensahe gikan sa mga mamumulong tungod kay ang iyang kabalaka mabaling ngadto sa laing dapit.

5. Usa ka misyonaryo kalit lang nagsinggit. Ang nahabilin nga bahin sa istorya: Samtang misyonaryo pa ko didto sa missionary training center, usa ka misyonaryo sa akong zone adunay Tourette’s syndrome. Panagsa, mosinggit siya diha sa klase, sa kan-anan, ug sa mga miting sa Simbahan. Ang iyang pagsyagit dili maisip nga pagkawalay balaan nga pagtahod; dali ra namong makita nga siya andam sa pagserbisyo, matinguhaon sa pagpaambit sa ebanghelyo, ug puno sa Espiritu.

6. Usa ka babaye maglingkod diha sa hawanan sa matag semana ug dili gayod sulod sa chapel. Ang nahabilin nga bahin sa istorya: Samtang nagtrabaho ko alang sa Simbahan sa Siyudad sa Salt Lake, usa ka sister misulat ngadto sa among opisina sa Disability Services mahitungod sa iyang kasinatian sa sakit nga post-traumatic stress gumikan sa iyang pagserbisyo sa militar. Kay ang pagbagting sa cell phone o ubang kalit nga saba maoy makasugmatsa pagbalikog hunahuna sa nangagi, siya dili gayod molingkod sulod sa chapel aron siya dili makapasakit ni bisan kinsa sa dili tinuyo.

7. Usa ka lalaki naghigda sa usa ka higdanan diha sa taliwala nga agianan sa chapel. Ang nahabilin nga bahin sa istorya: Sa dihang mibalhin ko sa usa ka bag-o nga ward, nasurprisa ko nga makita ang usa ka brother sa usa ka mabalhin-balhin nga higdanan nga pang-ospital diha sa chapel. Kini nga lalaki adunay daghang kakulangan ug makatambong lang sa simbahan sa ingon niini nga paagi. Nakaamgo dayon ko nga kini tipikal ra niini nga ward, ug dali ra ko nga nakapahiangay. Ang iyang pagkaanaa didto wala nagpasabot sa pagkawalay balaang pagtahod apan, sa pagkatinuod, mao ang katugbang. Dili ba, ang Manluluwas miayo sa usa ka lalaki nga gitunton sa iyang mga higala diha sa iyang higdananan ngadto sa balay nga puno sa mga tawo? (tan-awa sa Lucas 5:18–20).

8. Usa ka grupo sa mga miyembro naghimo og mga kasaba ug dinagkong mga pagwara-wara. Ang nahabilin nga bahin sa istorya: Ang kongregasyon sa mga bungol mahimong “saba” ngadto sa mga nanambong nga makadungog. Alang sa bungol nga komunidad, dili nagpasabot nga walay balaang pagtahod ang usa ka tawo nga makahimo og saba,katawa, o moubo og kusog, apan giisip kini nga walay balaang pagtahod alang sa mga miyembro sa pagsinyas mahitungod sa kalibotanong mga butang atol sa miting sa sakramento.

9. Usa ka tin-edyer nga babaye naglingkod ilawom sa mga lingkoranan. Ang nahabilin nga bahin sa istorya: Sa dihang usa pa ako ka tin-edyer, usa sa mga batang babaye nga akong kaedad kanunayng molingkod ilawom sa lingkoranan diha sa klase. Kini nga batan-ong sister nagdako sa daghang balay sagupanan ug mobati lang nga luwas diha sa sirado nga mga dapit. Sukad niadto, akong naamgohan nga kita dili makalaom sa mga estudyante sa pagkat-on kon sila anaa sa kahimtang nga mosukol, modagan, o moungot. Ang mga estudyante kinahanglan mobati nga luwas kon sila magkat-on ug, labaw ka importante, mobati sa gugma sa Manluluwas.

10. Usa ka babaye nagbalik-balik og paso diha sa hawanan. Ang nahabilin nga bahin sa istorya: Kini, sa pagkatinuod, ako. Nanglimbasog ako sa kabalaka [anxiety] sulod sa kapin sa dekada, uban sa mga pagsuol-suol sa grabing kabalaka ug uban pang mga problema sa panglawas. Atol niining panahona, ang bugtong paagi lang nga makatambong ko sa simbahan mao lang kon ako makahimo sa paglihok. Ang paglakaw-lakaw o pagdula og usa ka makalingaw nga dula sa pulseras diha sa akong mga kamot mao usahay bugtong paagi nga ako makahatag og pagtagad ngadto sa mga mamumulong ug mobati sa Espiritu. 

Si Satanas mopahimulos sa pagkatinuod nianang wala nato nahibaloan ang nahabilin nga bahin sa istorya, nga kita sa kanunay wala masayod sa mga hagit nga giatubang sa atong mga kaigsoonan sa matag adlaw. Gusto siya nga atong kalimtan nga kasagaran sa mga miyembro naghimo sa ilang labing maayo, bisan unsa pa man ang tan-aw sa uban. Ang mga sitwasyon nga akong gilista sa ibabaw mahimong talagsa ra, apan kini nagrepresentar sa daghang personal nga mga panglimbasog nga gidumala sa atong isig ka mga miyembro diha sa ilang pagtambong sa simbahan.

Motuo ko nga si Satanas gusto nga kita motuo nga ang atong pagsimba mapugngan pinaagi sa mga panglimbasog, kalainan, o kahuyang sa uban. Sa pagkatinuod, akong nasuta nga atol gayod niining mga gutloa nga sa ingon nga pagbalda ako natudloan mahitungod sa gugma sa Manluluwas.

Unsa ang Akong Nakat-onan mahitungod sa Balaan nga Pagtahod

1. Ang Balaan nga Pagtahod usa ka pagpili ug kahanas.

Anaa ra kanako sa pagbati og balaan nga pagtahod. Sagad kaayo nga dili ko mobati og balaan nga pagtahod tungod kay akong gitugotan nga mabalda ang akong kaugalingon. Samtang ako nag-ugmad og espirituwal nga pagdisiplina ug gibansay ang akong espiritu sa pagtutok sa unsay labing importante, mas makahimo ako sa pagdawat og hingpit nga responsibilidad alang sa akong relasyon sa Langitnong Amahan.

2. Ang Balaan nga Pagtahod dili managsama alang sa tanan.

Usa ka higala sa pamilya kinsa nabilanggo sulod sa 17 ka tuig midawat sa Espiritu ngadto sa iyang silda pinaagi sa pagtukod og talagsaong mga modelo sa mga templo nga gama sa papel. Ang Balaan nga Pagtahod mahimong maanaa sa bisan unsa nga sitwasyon kon kita mohangop sa Espiritu.

3. Ang Balaan nga Pagtahod mahimong madasig apan usa kini ka personal nga pagpili.

Ang Balaan nga Pagtahod moabot pinaagi sa usa ka kahiladman nga pasalig sa pag-amuma sa “kinaiya sa pagsimba.” Makita lang kini kon kita tinuod nga mobati ug mopakita sa atong gugma alang sa Ginoo ug sa ubang mga miyembro. Ang akong papa sa makausa misulti nako nga kon kita modawat og responsibilidad alang sa atong balaan nga pagtahod, ang atong panglantaw mausab gikan sa “Nagsamok-samok ka sa akong pagsimba dinhi!” ngadto sa “OK kaayo ka. Makaapil ka dinhi. Wala ka nagsamok-samok sa akong balaan nga pagtahod tungod kay akong gipili nga magpakita og balaan nga pagtahod.” Dayon kita makaamgo nga ang uban nga mga lihok dili kinahanglan nga makaistorbo sa atong personal nga relasyon sa atong Manluluwas ug sa Langitnong Amahan. Siyempre, ang pagdawat og personal nga responsibilidad alang sa atong kaugalingong balaan nga pagtahod wala nagpasabot nga kita kinahanglan mobaliwala kon sa unsang paagi ang atong pamatasan mahimong makaapekto sa kasinatian sa uban. Ang atong mga paningkamot sa personal nga balaan nga pagtahod mahimong usa ka pagdugang sa atong gugma alang kanila isip atong kaigsoonan.

Ang Pagpangalagad sa Manluluwas

Sa usa ka matahom nga ehemplo sa pagpangalagad, ang Manluluwas adunay kaluoy sa tawo nga gisaniban sa daghang espiritu. Bisan og ang tawo nagsyagit ug naglakaw-lakaw nga walay biste, si Jesus wala midumili sa pag-ayo kaniya. Sa diha nalang human nga naayo ang kini nga tawo “naglingkod sa tiilan ni Jesus, may bisti na ug maayo na ug panimuot,” naghangyo nga siya mahimong magpabilin uban sa Ginoo. (Tan-awa sa Lucas 8:27–39; tan-awa usab sa Marcos 5:1–20.)

Sa samang paagi, si Jesus wala mosulti sa batang lalaki nga giyawaan sa paghunong og lunang, pagpabula sa baba, ug pagpangagot sa wala pa Siya moayo kaniya (tan-awa sa Marcos 9:17–27). Siya nakakita niini nga mga kahimtang isip mga kasinatiang mortal, dili espirituwal nga mga depekto. Kadto lang mga Pariseo nga Iyang gipapahawa kay ang ilang kaugalingong pagminatarong ug garbo nakapugong sa pagkaayo.

Samtang kamo ug ako mopalapad sa atong panabot sa balaan nga pagtahod, kita makatudlo og mas maayo ug makapangalagad sa paagi sa Manluluwas. Kita mahinumdon sa bili sa matag kalag diha sa panan-aw sa Dios (tan-awa sa Doktrina ug mga Pakigsaad 18:10). Kita makahimo sa pagpakita og balaan nga pagtahod bisan sa mga sitwasyon nga dili gayod maayo.

Tingali ang balaan nga pagtahod diha sa mata sa Ginoo adunay diyutay lang nga kalabotan sa paglingkod nga dili maglihok-lihok ug hinayng pagsulti ug mas dako ang kalabotan sa pagkalma sa atong mga hunahuna ug pagpahumok sa atong mga kasingkasing.

Ang tagsulat nagpuyo sa Texas, USA.

Mubo nga sulat

1. Dallin H. Oaks, Pure in Heart (1988), 125.