Digital Lamang
Duha ka Kamatuoran aron sa Pagtabang Kanato sa Paglatas sa mga Pagsulay ug Pagkamalaumon
Gikan sa Brigham Young University nga pakigpulong sa Komperensiya sa Kababayen-an sa Abril 29, 2021. Alang sa tibuok pakigpulong, bisitaha ang ChurchofJesusChrist.org/study/adults/women/byu-womens-conference.
Kining duha ka kamatuoran—nga ang mga pagsulay kabahin sa plano sa Dios ug nga ang Dios mipadala sa Iyang Anak aron pagtabang kanato—mga mahinungdanon kaayo sa atong mga tinuohan nga sayon ra kini mapakaubos ang ilang gahum.
Wala ko masayud sa tanang alantuson ug pagsulay nga inyong giatubang, apan nasayod ako nga inyo kining giatubang! Mga mahinungdanong bahin kini niining mortal nga kasinatian.
Ang pipila sa atong mga pagsulay nahibaloan sa mga tawo sa atong palibot. Ang uban nahibaloan lamang ngadto sa Ginoo. Ako nag-ampo nga Iyang pun-on ang inyong mga kalag og kalinaw, mangalagad kaninyo ingon nga Siya lamang ang makahimo, samtang atong rebyohon ang duha ka sukaranan nga mga baruganan. Kon mas lawom kita makasabot ug motuo niining duha ka sukaranan nga mga kamatuoran, mas malampuson kita makalatas sa mga pagsulay sa kinabuhi.
Baruganan #1: Ang plano sa Langitnong Amahan alang niining mortal nga kinabuhi naglakip og mga pagsulay, mga hagit, mga sakit, ug oposisyon. Kabahin kini sa plano alang sa atong indibidwal nga espritohanong pagtubo.
Diha sa Ang Perlas nga Labing Bililhon, atong makat-onan ang katuyoan sa atong kalibotanon nga kasinatian: “Ug kita mosulay kanila dinhi, aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila” (Abraham 3:25). Ang hugpong sa mga pulong nga “kita mosulay kanila” nagsugyot og “pagsulay” o “paghimatuod” kon kinsa gayud kita. Kini nga kinabuhi, usa ka pagsulay. Mao kana ang importante kaayo nga bahin sa plano.
Dili kini pagsulay nga walay mga hagit o oposisyon sa unang matang. Sa atong kinabuhi sa wala pa dinhi sa yuta, midawat kita sa plano sa atong Amahan alang sa mortal nga kinabuhi. Nasayod kita nga kinahanglan kitang sulayan. Nasayod kita nga adunay “katugbang sa tanan nga mga butang” (2 Nephi 2:11).
Kitang tanan karon nagsinati niini nga oposisyon. Dili kita angay nga mahibulong. Ang atong mga hagit makapalig-on sa atong tinguha nga maglakaw sa pagkamatinud-anon subay sa dalan sa pakigsaad. Unsa ka nindot nga plano sa atong Amahan nga gimugna—usa ka mortal nga kasinatian, pinahimo gayod alang sa pagtubo ug paglambo sa Iyang mga anak.
Baruganan #2: Si Jesukristo, pinaagi sa Iyang maulaong sakripisyo alang kanato, mibati ug mibuntog sa matag pagsulay, matag hagit, matag sakit, ug matag kagul-anan nga atong mahiagoman. Siya Mibuntog sa kalibotan. Siya molakaw uban kanato. Wala kita mag-inusara.
Ang Langitnong Amahan nagpakabana sa atong mga pagsulay ug mga tintasiyon, ug wala Siya mibiya kanato aron pagsagubang niini nga mag-inusara. Ang Langitnong Amahan mipadala sa Iyang Anak, si Jesukristo, aron pagtabang kanato (tan-awa sa Alma 7:11–13). Ang Manluluwas dili gusto nga atong atubangon ang atong mga pagsulay nga mag-inusara. Siya “nakatunob sa intusan sa bino nga nag-inusara” (Doktrina ug mga Pakigsaad 133:50) aron dili na kita mobuhat niini. Bisan unsa ang atong giatubang, ang Langitnong Amahan ug si Jesukristo mosuporta ug mopaluyo kanato samtang mopaduol kita ngadto Kanila. Makatunga kita nga magmalampuson sa mga hagit ug mga pagsulay ug mga kasub-anan niining mortal nga kinabuhi.
Ang Gahom Niining mga Kamatuoran
Kining duha ka kamatuoran—nga ang mga pagsulay kabahin sa plano sa Dios ug nga ang Dios mipadala sa Iyang Anak aron pagtabang kanato—mga mahinungdanon kaayo sa atong mga tinuohan nga sayon ra kini mapakaubos ang ilang gahum. Apan ikonsiderar unsaon niining mga kamatuoran makaapekto sa paagi sa atong paghunahuna ug pagbati mahitungod sa kalisdanan. Tungod kay nakasabot kita sa katuyoan sa plano sa Dios, nasayod kita nga ang atong kalisdanan dili timailhan nga napakyas kita o ang plano napakyas. Nagpasabot kini nga naglambo kita. Ug tungod kay nakasabot kita sa tumong sa Pag-ula ni Jesukristo, nasayod kita nga dili gayod kita moatubang sa atong mga pagsulay nga mag-inusara. Ang Manluluwas nakasabot bisan sa atong pinakasuod ug personal nga mga panlimbasog, ug Siya nasayod gayod kon unsaon pagtabang kanato aron makasagobang niini.
Ang Tanan nga mga Butang Magkahiusa sa Paglihok alang sa Inyong Kaayohan
Tingali akong mahulagway kon sa unsang paagi ang plano sa Amahan ug ang balaang misyon sa Manluluwas maghatag kanato og kagahum sa pag-atubang sa mga hagit sa kinabuhi.
Sa ting-init sa 2020, nagsugod ko og pagbati og sakit sa akong wala nga abaga, ug wala ko masayod ngano. Dili gyod mawala ang sakit, hangtud nga, sa katapusan sa Oktubre, mibisita ko og doktor. Mitan-aw siya sa X-ray ug misugyot og CT scan. Pagkasunod gabii, ang doktor mitawag kanako sa balay—lagmit dili maayo og timailhan—ug miingon kanako nga ang CT scan nakakita og metastatic nga sakit sa akong abaga. Sa laing pagkasulti, miingon siya nga ako adunay kanser. Miingon usab siya nga daw mikatap kini paingon sa akong abaga gikan sa laing bahin sa akong lawas.
Mibarog ko sa akong gilingkoran, milakaw sa sunod nga lawak, ug miingon kang Anne Marie nga aduna koy kanser. Nianang gabhiona, ang among kinabuhi nausab. Ang tanan daw nausab.
Miduol ko sa akong amahan ug nanghangyo kon mahimo ba ko niyang tagaan og panalangin. Siya 95. Nagpundok kami isip usa ka pamilya sa panimalay sa akong mga ginikanan. Ang tanan namong mga anak miapil kanamo. Usa kadto ka milagro nga diha silang tanan sa lungsod. Nagmabinantayon kami sa pagsul-ob sa among mask, gawas lang ining sa litrato.
Litrato pinaagi sa Busath Photography
Nangandoy ko niana, sa panalangin, ang akong amahan mo-strike sa spot ug mosugo sa kanser nga mawala. Apan dili kana ang panalangin nga iyang gihatag. Iya kong gipanalanginan nga mahibaloan ang kanser, nga adunay kaayohan niini, nga mosunod ni sa pagpaayo niini, ug nga ako mamaayo ra.
Nianang higayona siya ug ang akong mga anak nga lalaki mitangtang sa ilang mga kamot sa pagpandong sa akong ulo, usa ka pagbati sa kalinaw mitabon kanako. Nasayod ako nga kadto nga malinawon nga pagbati miabot pinaagi sa impluwensiya sa Espiritu Santo.
Nianang sunod nga bulan, sa medikal nga pagkasulti, dili nako masabtan ang akong medikal nga sitwasyon. Nasayod ko nga ako adunay kanser sa akong abaga ug sa labing minos sa usa sa laing dapit sa akong lawas. Wala ko masayud unsa nga matang sa kanser kadto o unsa ka malukpanon kadto. Wala lang gayod ako masayod.
Apan kini ang akong nahibaloan: ang akong amahan, inubanan sa akong upat ka anak nga lalaki, mihatag og panalangin ngari kanako pinaagi sa gahom sa Melchizedek nga Pagkapari. Ako adunay dakong pagtuo sa gahom niana nga panalangin. Ako usab adunay hugot nga pagtuo nga ang panalangin sumala sa kabubut-on sa Ginoo.
Sa tibuok bulan sa Nobyembre, ang mga test sa medikal nagpadayon. Samtang nagpaabot kami sa mga resulta, si Anne Marie ug ako nag-istorya og maayo mahitungod sa umaabot ug ang among hugot nga pagtuo sa plano sa Langitnong Amahan. Naghisgot kami sa posibilidad nga tingali ang akong kinabuhi sa kalibutan basin mubo ra kaysa gidahom. Apan bisan pa niana kon mopadayon ba ako sa pagpakabuhi o mamatay, wala kini mousab sa among gugma alang sa usag usa o sa among kaminyoon o sa among pamilya. Wala kini mousab sa among pagpasalamat ngadto sa Langitnong Amahan alang sa gasa sa Iyang Anak, si Jesukristo, ug sa panalangin sa pag-apil niining maanindot nga mortal nga kasinatian.
Sa among mga pag-ampo isip magtiayon, nag-ampo kami nga ang akong kinabuhi malugwayan. Apan kon ang plano mao nga ako mamatay na ug moadto na sa kalibotan sa espiritu niining higayona, among dawaton usab kana. Nag-ampo usab ako nga makakat-on ako unsay gusto sa Ginoo nga akong makat-onan gikan niini nga kasinatian. Nahinumdom ko ni Elder Neal A. Maxwell (1926–2004) sa Korum sa Napulog Duha ka Apostoles miingon sa usa ka okasyon nga ang Ginoo mihatag kaniya og kanser aron siya makatudlo sa katawhan nga may katinuoran.1 Mipadayon ako sa pagpamalandong niana.
Samtang nagpaabot kami sa diagnosis, mipadayon ako sa pagbati og kalinaw. Mapasalamaton kaayo ako sa panalangin sa akong amahan. Sa espirituhanon nga pagkasulti, iya gayod na-strike ang spot ug giayo ako. Giayo niya ako sa espirituhanong paagi.
Atol niining tanan, mibati ako sa hugot nga pagtuo ug mga pag-ampo sa mga higala, pamilya, ug mga hinigugma. Espesyal kini kaayo nga makaamgo nga ang imong mga anak, ang ilang mga kapikas, ug ang imong mga apo nag-ampo alang kanimo uban sa hugot nga pagtuo. Ang mga misyonaryo ug ang mga Santos nga among giserbisyohan sa Spain Barcelona Mission nagpakita usab sa ilang hugot nga pagtuo ug mga pag-ampo alang kanako. Unsa pay anaa nga mas dako nga panalangin? Kini nga mga pag-ampo sa hugot nga pagtuo ug suporta gikan sa daghan kaayo nakamugna og dako kaayo nga gugma nga masanapon kaayo ngari kanako.
Sa kataposan, miabot na ang diagnosis. Ako adunay kanser sa akong tuo nga kidney, nga miabot sa akong wala nga abaga. Ang kanser dinha na sa akong abaga usa na ka tuig o mga ingon niana ug lagmit mas dugay pa sa akong kidney. Alang sa ubang rason, nga wala nako mahibaloi, walay kanser sa akong utok o sa baga. Ang Ginoo mabination kaayo. Adunay pagpaayo, ako kining gisunod, ug misalig ako nga sulod sa usa ka tuig o mga ingon niana mamaayo ako. “Apan kon dili” (Daniel 3:18), andam akong modawat sa kabubut-on sa Ginoo alang kanako.
Karon, dili lang ako ang adunay mga hagit sa panglawas o mga kabalaka o mga kasub-anan sa nagkalainlaing matang. Sama kanimo, ako adunay hugot nga pagtuo ni Ginoong Jesukristo. Sama kanimo, ako adunay hugot nga pagtuo sa plano sa Langitnong Amahan. Ug sama kanimo, ako adunay hugot nga pagtuo nga “ang tanan nga mga butang maghiusa sa paglihok alang sa inyong kaayohan, kon kamo maglakaw nga matarong ug mahinumdom sa pakigsaad diin kamo nagpakigsaad sa usag usa” (Doktrina ug mga Pakigsaad 90:24).
Ang atong hugot nga pagtuo dili kinahanglan nga mokuha sa atong mga pagsulay. Apan mohatag kini kanato sa gahom ug panglantaw sa paglatas niadtong mga pagsulay nga malampuson.
Ang Ehemplo sa Manluluwas: “Dili Ang Akong Pagbuot, Kondili Ang Imo Maoy Matuman”
Ang Manluluwas, kinsa mao ang atong ehemplo sa tanang butang, nagtudlo kanato kon unsaon sa paglahutay sa kalisdanan sa matinud-anon nga paagi. Ang mas sakit mao ang Iyang kasinatian didto sa Getsemani:
“Ug mibiya siya kanila ngadto sa dili kaayo halayo, ug miluhod siya, ug nag-ampo,
“Amahan, miingon siya, kon buot ka, kuhaa kining kopa gikan kanako: apan dili ang akong pagbuot, kondili ang imo, maoy matuman.
“Ug may anghel nga mitungha gikan sa langit nga milig-on kaniya” (Lucas 22:41–43).
Ang Amahan wala mikuha niini nga kopa sa pag-antos, apan wala usab Niya gisalikway ang Iyang Hinigugmang Anak. Mipadala Siya og anghel aron sa paglig-on Kaniya, ug niana nga kalig-on ang Manluluwas nakalahotay sa Walay Kinutoban nga Pag-ula.
Maingon man, kon moatubang kita og mga hagit, ang Amahan kanunay dili gayod mokuha sa alantuson, apan kon kita modawat sa Iyang kabubut-on, makadangop kita ngadto Kaniya aron mahatagan og kalig-on nga patas sa hagit.
Kalinaw diha ni Kristo
Ako mopamatuod kang Jesukristo, ang tinuod nga tinubdan sa walay kataposan nga kalinaw (tan-awa sa Juan 16:33). Tungod kay Siya mibuntog sa kalibutan, Siya naghatag sa kalig-on alang kanato aron sa pag-atubang sa matag pagsulay nga ihatag sa kalibotan ngari kanato. Siya naghatag og walay kataposan nga panglantaw pinaagi sa Iyang gipahiuli nga ebanghelyo ug paghupay pinaagi sa impluwensiya sa Espiritu Santo. Sa tinuoray, ang ebanghelyo ni Jesukristo mao ang tubag sa matag isyu nga atong atubangon sa kinabuhi.
“Ang kalinaw ibilin ko kaninyo,” miingon ang Manluluwas, “ang akong kalinaw nga dili sama sa ikahatag sa kalibotan ihatag ko kaninyo. Ayaw kamog kabalaka, ug ayaw kahadlok” (Juan 14:27).