Digital Lamang: Dali, Sunod Kanako
Pangutan-a Sila mahitungod sa Imong Damgo
Walay pagsapayan kon sa unsang paagi ang Langitnong Amahan makig-istorya kanato, mahinungdanon kini sa paghinumdom nga Siya gusto.
Litrato sa Templo sa Salt Lake ni Kimberly Willett Hayes
Sa dihang si Cecilia Betancourt misugot sa pakigkita sa full-time nga mga misyonaryo sa Tijuana, Mexico, wala gayud siya mainteresado sa ilang mensahe. Gani, gusto niyang ipakita nga sayop sila.
“Gusto unta nako ipakita ang akong piho nga panan-aw—nga ako nasayod sa unsay akong gituohan ug nga bisan unsa pa ang ilang itudlo kanako dili gayud eksakto,” miingon si Cecilia. Dako gayud ang iyang tinguha sa pagpakita sa iyang punto nga wala siya magkat-on gikan sa unang tulo ka diskusiyon.
“Apan unsay akong nahinumdoman mao ang ikaupat nga leksiyon,” miingon siya. “Kadtong ikaupat nga leksiyon mao ang nakapausab sa akong kasingkasing.”
Kadto nga diskusiyon, nga nagsentro sa paghupot sa mga kasugoan, mipaila ni Cecilia sa mga templo ug sa doktrina sa mahangturon nga kaminyoon ug mga pamilya.1
“Sa dihang mipakita sila nako og usa ka hulagway sa Templo sa Salt Lake, ang Espiritu mihunghong ug miingon, ‘Pangutan-a sila mahitungod sa imong damgo niadtong gamay pa ka.’” Nahinumdom sa usa ka lawak nga iyang nakit-an sa iyang damgo, gipangutana ni Cecilia ang mga misyonaryo, “Aduna bay mga lingkuranan sa piho nga han-ay sa sulod sa templo?”
“Oo,” ang sister nga mga misyonaryo mitubag.
“Aduna bay kutson o bisan unsa nga ang usa ka tawo mobarog sa likod?” Nangutana si Cecilia.
Ang mga misyonaryo, natingala unsa ka daghang impormasyon nga ilang ipakigbahin, kuryosong mitan-aw sa usag usa ug miingon, “Oo.”
“Magsul-ob ba og puti nga sinina ang mga tawo sa templo?” Nangutana si Cecilia.
“Oo,” miingon ang mga misyonaryo.
Dayon nangutana si Cecilia, “Luyo sa tawo nga nagbarug sa tunga-tunga sa lawak, aduna bay usa ka butang nga hayag ug puti nga dili ko makasulod?”
“Oo,” mitubag pag-usab ang mga misyonaryo.
“Nianang higayona,” miingon si Cecilia, “adunay miingon kanako, ‘Mao kini ang lugar nga imong nakit-an sa imong damgo.’ Dayon nagsugod ko sa paghilak. Wala ako makapugong sa akong mga luha. Usa sa mga sister miingon, ‘Cecilia, mag-andam ka ba sa pagpabunyag?’ Ang Espiritu kusog kaayo nga miingon ako og oo.”
Mga Panan-aw sa Gabii
Kasagaran sa mga damgo, dayag lang, dili ingon ka mahuluganon o makapausab sa kinabuhi sama sa damgo niadtong bata pa si Sister Betancourt. Apan ang mga damgo, sigon sa gipakita sa mga kasulatan, usa ka paagi nga ang Langitnong Amahan nag-andam, nagpahimangno, ug nagpadayag og impormasyon ngadto sa Iyang mga anak.
Sama pananglit, sa dihang si Jose nga taga-Ehipto batan-on nga lalaki pa, nagdamgo siya nga ang iyang mga ginikanan ug igsoong mga lalaki “miyukbo [kaniya]” (Genesis 37:9). Kadto nga damgo natuman sa usa ka katingalahan nga paagi human si Jose, pinaagi “sa Espiritu sa Dios” (Genesis 41:38), mihubad sa damgo sa Paraon sa kagutom ug kaabunda (tan-awa sa Genesis 41), nahimong gobernador sa Ehipto (tan-awa sa Genesis 41:40–43), ug miluwas sa pamilya sa iyang amahan (tan-awa sa Genesis 45).
Ang ubang ehemplo sa kasulatan naglakip sa paghubad ni Daniel sa damgo ni Nabucodonosor, nga miabot kang Daniel “pinaagi sa usa ka panan-awon” (Daniel 2:19). Gisultihan ni Daniel ang hari, “May Dios sa langit nga nagpadayag sa mga tanghaga, ug iyang gipadayag kang hari Nabucodonosor ang mahitabo sa umaabot nga mga adlaw” (Daniel 2:28).
Diha sa Bag-ong Tugon, ang anghel sa Ginoo mipakita ngadto kang Jose pinaagi sa usa ka damgo, miingon kaniya “Ayaw kahadlok sa pagpangasawa kang Maria kay siya nagsabak pinaagi sa gahom sa Espiritu Santo” (Mateo 1:20). Sa sunod nga damgo, ang anghel miingon kang Jose, “dad-a ang bata ug ang iyang inahan, ug pangagiw kamo ngadto sa Ehipto, ug pabilin didto hangtod nga papaulion ko kamo: kay ang bata pangitaon ni Herodes aron patyon” (Mateo 2:13).
Human ang Maalamong mga Hari misimba sa bata nga Kristo, sila usab “pinaagi sa damgo gipahimangnoan sa Dios sa dili pagbalik ngadto kang Herodes” (Mateo 2:12).
Sa Basahon ni Mormon, miingon si Lehi ngadto sa iyang pamilya, “ako nagdamgo og usa ka damgo; o, sa lain nga pagkasulti, ako nakakita og usa ka panan-awon” (1 Nephi 8:2; tan-awa usab sa 1 Nephi 1:16).
Si Elder David A. Bednar sa Korum sa Napulog Duha ka Apostoles mitudlo, “Ang mga pagpadayag gihatag sa nagkalain-laing paagi, lakip, sama pananglit, sa mga damgo, mga panan-awon, mga pakigsinultihanay uban sa langitnong mga mensahero, ug inspirasyon.”2
Si Elder Richard G. Scott (1928–2015) sa Korum sa Napulog Duha ka Apostoles miingon nga ang mga damgo nga naglakip og makapadasig nga mga pakigsultihanay kasagaran inubanan og sagrado nga pagbati.
“Gamiton sa Ginoo ang mga indibidwal nga girespeto nato og maayo aron pagtudlo nato sa mga kamatuoran diha sa damgo kay kita misalig kanila ug maminaw sa ilang tambag,” midugang si Elder Scott. “Ang Ginoo mao ang nagtudlo pinaagi sa Espiritu Santo. Hinoon, ang damgo himoon Niyang mas sayon sabton ug motandog sa atong mga kasingkasing pinaagi sa pagtudlo kanato pinaagi sa usa ka tawo nga atong gihigugma ug gitah[o]d.”3
Walay pagsapayan kon sa unsang paagi ang Langitnong Amahan makig-istorya kanato, mahinungdanon kini sa paghinumdom nga Siya gusto.
Si Presidente Russell M. Nelson mipahinumdom kanato: “Usa sa mga butang nga gibalik-balik sa Espiritu og sil-sil sa akong hunahuna sukad sa akong bag-o nga tawag isip Presidente sa Simbahan mao ang pagkaandam sa Ginoo nga mopadayag sa Iyang hunahuna ug kabubut-on. Ang pribilehiyo sa pagdawat og pagpadayag usa sa labing mahinungdanon nga mga gasa sa Dios ngadto sa Iyang mga anak.”4