Fakaʻilekitulōnika Pē: Ngaahi ʻAta ʻo e Tuí
Falala Mai Kiate Au
ʻI heʻeku vahevahe ʻeku ngaahi fehuʻí mo e hohaʻá mo ʻeku tamaí, naʻá ne talamai ha meʻa kuo teʻeki ai ke ngalo ʻiate au.
Laʻitā meia Richard M. Romney
ʻI heʻeku kei siʻisiʻí, ne u faʻa muimui holo ʻi heʻeku tamaí ʻi heʻemau kiʻi fāmá, kole ke ngāue mo ia, mo feinga ke tokoni kiate ia ʻi heʻene ngaahi ngāue lahi. Naʻá ku manako ke heka ʻi heʻene lolí mo tokoni kiate ia ʻi he fetongi kiá. ʻOku ou manatuʻi ʻene lau mai ha ngaahi talanoa kiate kimautolu fānaú mo ʻave kimautolu ʻo ʻeva saliote, taumātaʻú, mo e ʻeva ʻo nofo kemi. ʻE hoko maʻu pē ʻa e heka hoosi mo Tetí, tautautefito ʻi he ʻotu moʻungá, ko ha manatu makehe.
Hili ʻeku kamata ʻi he ako māʻolungá, naʻe kamata ke u fifili ki he ngaahi meʻa ne akoʻi kiate au fekauʻaki mo e ongoongoleleí. Ne u veiveiua mo fifili koeʻuhi ko e ngaahi meʻa naʻe lea ʻaki ʻe ha niʻihi ʻo hoku ngaahi kaungāmeʻá.
ʻI ha pō ʻe taha ne u tuʻu ʻi homau loto falé ʻo sio ki tuʻa mei homau matapā sioʻata lahí ki he ngaahi fetuʻú. Kuo fuoloa e poʻulí, pea naʻá ku fakakaukau kuo mohe ʻa e tokotaha kotoa pē. Ka naʻe tangutu hifo ʻa Teti ʻi hoku tafaʻakí, pea kamata ke ma talanoa.
Naʻá ku talaange ki ai ʻeku ngaahi fehuʻí mo e ngaahi meʻa ne u hohaʻa ki aí. Ne tali mai heʻeku tamaí ʻo ne fakamoʻoniʻi ʻene ʻiloʻi ʻoku moʻoni e ongoongoleleí. Naʻá ma talanoa ki he fuʻu hohaʻa ki he “ngaahi meʻa liló” mo e ʻikai fakapotopoto e meʻa ko iá. Naʻe pehē ʻe Teti kuo pau ke u fai e aofangatukú pea mahalo ʻe fie maʻu ha taimi ki ai. Naʻá ne talamai leva ha meʻa kuo teʻeki ke ngalo ʻiate au. Naʻá ne pehē, ko e taimi ʻe ʻi ai haʻaku ngaahi fehuʻi pe hohaʻá, te u lava pē ʻo fakafalala ki heʻene tuí mo e fakamoʻoní.
Naʻá ku ʻofa heʻeku tamaí peá u ʻiloʻi he ʻikai ke ne teitei takihalaʻi au pe talamai ha meʻa naʻe ʻikai moʻoni. Kapau naʻá ne fakapapauʻi e meʻa naʻá ne tui ki aí, naʻá ku ʻiloʻi te u lava ʻo falala kiate ia.
Ko ia, ne u falala ki ai.
ʻI he ngaahi taʻu ne u ngāue aí, ne u fetaulaki mo ha ngaahi fakakaukau, ngaahi vavalo fakaʻatamai, tōʻonga moʻui, mo e ngaahi tui naʻa nau fakafepakiʻi au, naʻá ku tui ki heʻeku tamaí mo falala ki ai. ʻI he ngaahi taʻu ʻo ʻeku hoko ko ha uaifi mo ha faʻeé, pea siviʻi ʻeku tuí ʻe he ngaahi meʻa kuó u aʻusiá, ne u tui pē ki heʻeku tangataʻeikí mo falala ki ai. ʻI heʻeku fakakaukau he taimí ni, ki he ngaahi tūkunga lolotonga ʻo e māmaní, ʻoku ou tui pē ki heʻeku tangataʻeikí mo falala ki ai.
ʻOku ou faʻa fakakaukau ki he pō fuoloa ko iá mo ʻeku fepōtalanoaʻaki mo Tetí. ʻOku ou fakakaukau ki ha founga ne mei kehe ai ʻeku moʻuí ka ne taʻeʻoua ʻene sīpinga fakafiemālie pau mo tuʻu maʻú.
ʻI heʻeku kei siʻí, naʻe ʻikai ke u teitei saiʻia he ngaahi meʻa ne fakaʻamua ʻe he moʻuí. Naʻe tokangaʻi au ʻe heʻeku ongomātuʻa leleí. Ka ʻi he ngaahi meʻa kotoa naʻe foaki mai ʻe heʻeku ongomātuʻá, ʻoku ou houngaʻia taha ʻi he ngaahi tuʻunga ʻulungaanga mahuʻinga naʻá na akoʻi kiate aú, mo e fakavaʻe mālohi ʻo e ongoongolelei naʻá na foaki maʻakú, mo ʻena moʻui faingofua mo faʻifaʻitakiʻanga leleí.
ʻOku ou houngaʻia foki ʻi he ʻi ai ʻeku Tetí ke u fakafalala ki ai—ʻo ʻikai tuʻo taha pē ka ʻi he taimi kotoa pē. Naʻá ne hoko ko ha faʻifaʻitakiʻanga maʻongoʻonga ʻo e ngaahi meʻa ʻoku mahuʻinga tahá. Ko ʻeku tamaí ʻa ʻeku moʻungaʻi tangatá.