“O le Sootaga o le Faataoto i Taleni ma Lo‘u Valaauga o se Ta Piano a le Peraimeri,” Liahona, Iulai 2022.
Autalavou Matutua
O le Sootaga o le Faataoto i Taleni ma Lo‘u Valaauga o se Ta Piano a le Peraimeri
E silafia e le Alii le auala e faaaoga ai a tatou taleni e faamanuia ai i tatou ma tagata tatou te auauna i ai.
“O le a ou aveina i fafo la‘u meafaalogo ma savali i lalo o le potu tele seia oo ina le mafai ona ou toe lagonaina oe. Sei o tatou vaai po o le a le mamao ou te oo i ai!” o le alaga mai lea a le peresitene o le Peraimeri, e faailo mai ai ia te au e amata. Sa ou taina nota amata o le “O Le Ekalesia a Iesu Keriso” (Tusipese a Tamaiti, 70) i luga o le piano, ma ua amata ona pepese se aufaipese o tamaiti laiti.
Pe a matou le fuaina le leotele e mafai ai e tamaiti o le Peraimeri ona pepese ai, o loo matou usuina pese i saoasaoa eseese ma le faaaogaina o taga. O lo‘u taimi muamua lea i le Peraimeri talu mai le aso na atoa ai lo’u 12, ma ou te le talitonu i le tumu o le olioli i lenei nofoaga.
I ni nai tausaga ua mavae, ou te le’i mafaufauina o le taina o pese a le Peraimeri i vaiaso taitasi o le auala autu lea sa ou faaaogaina ai ou tomai faamusika. Sa aoaoina au mo tauvaga i le piano ma le vaiolini mo le tele o lo‘u olaga ma sa ou talitonu mo se taimi umi o le a ou matua aafia ai lava i musika.
Ae e oo atu i o‘u tausaga mulimuli ane i le kolisi, o le mea moni o le faamaeaina o se tikeri ma le tumau ai i se galuega sa alu ai lo’u taimi. O le faataitai ai ma aufaili mo ni nai itula i le vaiaso ma le aoaoina ma le filiga i lo‘u lava taimi na pa’u i le pito i lalo o la‘u lisi o mea e faamuamua. Sa ou fiafia lava i musika ma taumafai e nofo i lalo i se tulaga musika e faatumauina ai le tele o o‘u tomai, ae sa tele lava ina ou le toe faatinoina.
E ui i lea, talu ai nei, ua ou lelei ai. O le faaaogaina o la‘u taleni mo le Peraimeri e ese mai tauvaga ma faatinoga faigata sa ou galue malosi ai, ae i nisi o auala e sili atu ona lelei mo a’u. Ua na o le tasi lea o taimi na ou lagonaina moni ai e pei ua mafai ona ou faaaogaina a’u taleni mo le lelei o isi.
Faasoaina Atu o A’u Taleni
I le faataoto i taleni, ua faamoemoe le matai i ana auauna e faia mea maoae i taleni na te tuuina atu ia i latou. A o ia faaumaina aofaiga eseese e tusa ai ma o latou tomai, e iu lava ina faamoemoeina auauna taitasi e faaaoga taleni i se auala e faateleina ai mea sa latou maua muamua (tagai Mataio 25:15, 21).
Sa ou matuai teulotoina lenei faataoto a o ou laitiiti. E ui o taleni i le faataoto o ni aofaiga o tupe, ae e mafai ona faatatau i o tatou tomai patino ma agavaa, ma sa ou manao e galue malosi e faaleleia au lava ia ma faateleina taleni sa ia te au. O lea la, ina ua tetele mea e tupu i le olaga ma tiutetauave i le avea ai ma se tagata aoga i le kolisi, sa masani ona ou lagona le faanoanoa ona sa ou le faia nisi mea i a’u aoaoga uma tau musika. Sa ou mafaufau pe sa pei au o le tagata fefe o le sa “nana [lana] taleni i le lalolagi,” ma tanumia ona o le fefe nei leiloa (Mataio 25:25).
Ae ina ua amata lou valaauga fou, ou te lei mauaina lava lena lagona. E ui ou te lei tuleia au lava i le ala sa ou masani ai, ae sa ou lagonaina le olioli i taimi uma ou te saofai ai i tua o le piano i le tulimanu o le potu o le Peraimeri aua sa ou iloaina sa ou auauna atu i tamaiti.
Ina ua faamatala e Iesu Keriso le ala na faateleina ai e le tagata e i ai taleni e lima ana taleni, sa Ia fetalai atu ua “alu atu le tagata ma faatau atu” (Mataio 25:16). I se isi faaupuga, sa tatau i le tamaloa ona faasoa atu mea sa ia te ia i isi ina ia faaleleia ai ma faateleina.
Sa amata ona ou iloaina o le faaaluina o lou taimi e taina ai le piano mo le toatele o tamaiti le malolo i Aso Sa uma e le faapea ai ou te le o faaaogaina le tele o ou tomai. O le taina o le piano i le Peraimeri o se fefaatauaiga; Sa ou tuuina atu le musika, ma sa mafai ona ou molimauina molimau matagofie a tamaiti o la‘u uarota. O le tele o le taimi ou te faaaluina i le tulimanu o le potu o le Peraimeri, o le tele foi lea o lou lagonaina o lenei avanoa o le tuuina mai lea ia te au o se “faatelega.”
Faamanuiaina i o Tatou Valaauga
Ou te talitonu sa musuia le valaauga. Sa oo mai i se taimi o lo‘u olaga a o ou tauivi ma lo’u faatuatua ma sa masani ona ou lagonaina le lofituina i le olaga. O lenei valaauga o se faamanatu e faamalosia ai lo‘u faavae i le talalelei ma taulai atu ai i le faigofie ma le matagofie o upumoni e faavavau. Sa mafai ona ou faamalosia la‘u molimau faatasi ma tamaiti sa ou auauna atu i ai, o se tasi lea o faamoemoega moni o valaauga.
O valaauga e mafai ona faigata; o nisi taimi ua valaauina i tatou e fai ni mea tatou te le lagonaina le agavaa i ai ma e tele ai o tatou taimi e alu ai. O isi taimi o le faafeagai—atonu tatou te lagonaina e pei o o tatou valaauga e le o faaaogaina atoatoa o tatou tomai ma o a tatou taumafaiga o le a sili atu ona faaaogaina i se isi mea. Ae ua silafia e le Alii le auala e faaaoga ai a tatou taleni i se auala e faamanuiaina ai e le gata i tagata o loo tatou auauna atu i ai ae faapea foi i tatou lava.
E pei ona ou aoaoina mai lo‘u lava aafiaga, soo se taumafaiga tatou te faia e auauna atu ai i le Alii e aumaia ai se faatelega i o tatou lava olaga. Afai tatou te faapaiaina o tatou taimi ma taleni i le Alii, o le a Ia faaaogaina i taimi uma mo lo tatou lelei.