Ua Na’o Tusiga Faatekinolosi

Mauaina o le Olioli ma le Malosi e ala i le Tausia o Feagaiga o le Malumalu

Saunia e Kathryn Reynolds

Aufono Faufautua Aoao a le Aualofa

O le auai na o ia i le malumalu e ono faigata i nisi taimi, ae e faatumulia i tatou e le Tama Faalelagi i Lona alofa mama, malosi tumau, ma le olioli e faavavau a o tatou taumafai e faamamalu a tatou feagaiga o le malumalu.

Manatua: O lenei tusiga ua iloiloina e le Matagaluega o Malumalu.

E alala le tusitala i Iuta, ISA.

tamaitai o loo saofai i luma o le malumalu — Atapue na faaali e tagata faataitai

I le avea ai ma se tagata o le Ekalesia e lei faaipoipo lava, ua silia ma le 18 tausaga talu ona maua ou faaeega paia e aunoa ma se toalua e faatasi ma a’u i le malumalu. Mo nisi o i tatou i lenei tulaga, faatasi ai ma i latou ua tete‘a, ua oti a latou tane, pe ua faaipoipo, ae e le o umia e lona toalua se pepa faataga o aoga o le malumalu, e tele lava ina faigata ona auauna atu ma tapuai i le malumalu. Atonu ua faateleina o tatou lagona o le tuuatoatasi ona o savali o le faaipoipoga e faavavau ma le aiga ua lalagaina i sauniga uma. E ui lava ou te fesootai atu i nei lagona o tauiviga i nisi taimi, ua ou iloa ai nai lo le taulai atu pe ua ou mauaina faamanuiaga uma ua folafolaina mai i le malumalu, e mafai ona ou taulai atu i le ofoina atu o mea uma e mafai ona ou tuuina atu i totonu—ma fafo—o le malumalu i le Tama Faalelagi ma Iesu Keriso.

Ua feiloai atu Simona i le tamaitiiti o Keriso

Mo le lima tausaga, sa ou faigaluega o se failautusi a le peresitene o le malumalu i le Malumalu o Sate Leki. O se atavali matagofie, “O Simeona o loo Faamamaluina le Tamaitiiti o Keriso,” sa tautau i luga o le puipui e lata ane i la‘u kesi. O loo faaalia ai Maria ma Iosefa o loo tuuina atu Iesu i le malumalu ma faataulagaina atu ni lupe se lua e tusa ai ma le tulafono a Mose, o le tasi mo se taulaga mo agasala ma le isi mo se taulaga mu (tagai Levitiko 12:6, 8).

O taimi uma lava ou te savali ai i autafa o le atavali, sa foliga mai sa tilotilo sao mai mata o manulele ia te au, ma sa ou lagonaina e pei o loo faaaoga e le Alii lenei ata faafaatusa e fesili mai ai ia te au, “O le a se mea e te ofoina mai a o e tuuina mai oe lava ia te Au?”

Sa masani ona ou lagonaina, “Oa’u le taulaga e tuuina atu ia te Ia.” O lo‘u olaga atoa—o lo’u usiusitai toatasi i a‘u feagaiga ma Ia—o la’u meaalofa ma la‘u taulaga, o lo’u “paia i le Alii.”

E pei ona valaaulia i tatou e le Aposetolo o Paulo, e mafai ona tatou “tuuina atu [o tatou] tino o se taulaga ola, e paia, e talia e le Atua, o la outou auaunaga talafeagai lea” (Roma 12:1; ua faaopoopo le faamamafa). Mo a’u, o se vaega o lenei taulaga ola i le Atua e mafai ona aofia ai la‘u taulaga e

tausi a‘u folafolaga ma Ia ua ou osia e ala i a’u feagaiga o le malumalu,
taumafai e faamamalu ma usitai i poloaiga,
“ia faamuamua le Atua”¹ e ala i le faamuamua o Ia i lo‘u olaga i aso taitasi,
auauna atu i isi i auala masani ma faafaileleina e pei ona faia e Keriso,
faaali atu le agaga faafetai mo avanoa ua tuuina mai e le Tama Faalelagi ia te a’u e auai ai i Lana galuega i le lalolagi,
ma ia naunau e faalagolago i le Alii a o Ia taialaina a‘u i ala eseese ua Ia faapolopoloina mo lo’u olaga.

Soo se taimi lava tatou te sailia ai ma faalogo i faaaliga, ou te iloa o le a fesoasoani mai le Tama Faalelagi ia i tatou ia iloa po o a taulaga e faia ia te Ia i aso taitasi ma i o tatou olaga atoa.

O Le Alofa ma Folafolaga a le Alii

A o ou taumafai e tuuina atu se taulaga paia i le Atua e ala i le auala ou te filifili e ola ai, ua ou matua nofouta lava ua na o lo‘u Faaola lava ma Lana taulaga e le iu e mafai ai lenei mea. Ma o le a lē i ai se isi igoa e tuuina mai po o se isi lava ala po o ni auala e mafai ona oo mai ai le olataga i le fanauga a tagata … , ua na o i le suafa lava o Keriso” (Mosaea 3:17). O lenei malamalama faavae ua faamalosia ai a’u ma le malosi sili atu e faateleina ai la‘u sootaga patino ma Ia.

Ina ua afio mai Keriso i Amerika ina ua mavae Lona Toetu, sa o atu sa Nifae “taitoatasi … ma sa latou vaai i o latou mata ma tagotago i o latou lima, ma latou iloa ma le mautinoa … o ia lava lea … o le a oo mai lena mea” (3 Nifae 11:15; faaopoopo le faamamafa).

Sa ou lagonaina se faamautinoaga matagofie faapena i le aso na ou ulu atu ai i le malumalu ina ia maua ou faaeega paia. A o faafeao atu a‘u i le eria mo le sauniga amata, o lo’u loto (faapea foi ma siosiomaga) sa matua toafilemu ma filemu. O vaega taitasi o le sauniga na faamanatu mai ai ia te a’u le matua toatasi lava o lo‘u faaolataga ma le ala e faaalia ai le alofa mutimutivale o Keriso mo i tatou tai toa tasi. Sa faaosofia ai a’u e mafaufau loloto i le taua o a‘u feagaiga.

Talu mai lena aso, sa ou pipiimau pea i le malosi ou te maua mai se naunautaiga faifai pea e tausia a‘u folafolaga ia te Ia ma ou te pipiimau faapitoa lava i Ana, folafolaga ia te a’u.

Mo se faataitaiga, o nisi o faamanuiaga folafolaina faapitoa i le sauniga amata e faatatau i le faaipoipoga sa lei matala mai mo a’u. Ou te iloa o se mea masani i nisi o taimi le tauivi ma se vaaiga e tapulaa faaletino, ae ou te talitonu atoatoa e silasila le Alii i mea uma e pei ona i ai i Ona luma i le taimi nei²—e oo lava i na manaoga tatou te naunau e maua i le lumanai.

Pe a fetalai mai le Faaola, e mafai ona tatou talitonu o le a Ia faataunuuina Ana folafolaga, aua e faatuatuaina pea o Ia. Ma i Lana vaaiga silisilima le faavavau ua uma ona faataunuuina Lana vaegao le feagaiga.

O se mau e sili ona ou fiafia i ai e faitauina:

“E mamana le Atua i le faataunuuina o ana upu uma.

“Ona o le a faataunuuina e ia ana folafolaga uma o le a ia faia ia te outou” (Alema 37:16–17; faaopoopo le faamamafa).

O lenei tautinoga maoae ua aumaia ai ia te au le olioli tele ma le malosi e agai ai i luma!

Olioli e Uluola

O le talitonu ma le faalagolago i nei folafolaga—e oo lava i nisi ua “mamao” (Eperu 11:13)—e mafai ona taitai atu ai i tatou ia maua se gafatia sili atu mo le olioli e uluola ai i o tatou olaga i le taimi nei ma mulimuli ane. E le faaleaogaina le olaga i luitau, e tusa lava po o a o tatou tulaga o i ai nei. O tofotofoga o se vaega o le fuafuaga o le faaolataga a le Tama Faalelagi, ae e faapena foi le fiafia.

I le avea ai ma tagata o le ekalesia o loo nofofua i le taimi nei, atonu tatou te moomoo mo ni paaga ma auai i lenei faigamalaga o le olaga faaletino lea e mafai i nisi taimi ona lagona le pei o se lalolagi tuuatoatasi ma le pagatia. Ae o le tumau latalata ia Keriso e mafai ona aumaia ia i tatou le malosi ma le fiafia e faavavau.

Sa faamanatu mai e Alema ia i tatou e faapea “sa saunia e le Alii mea mo i latou ina ia latou le fia aai, pe ina ia latou le fia feinu; ioe, ma sa ia tuu mai foi ia te i latou le malosi, ina ia latou le mafatia i soo se ituaiga o puapuaga, vagana ai ua tofatumoanaina i le olioli ia Keriso” (Alema 31:38; faaopopo le faamamafa).

Ou te faafetai a o ou faamamaluina a’u feagaiga o le papatisoga ma le malumalu i la‘u taulaga ia te Ia, ua saunia e Keriso—ma o le a faaauau pea ona tuuina atu—mo o’u manaoga, pe faaleagaga, faaletino, pe faalelagona. Ua faatumulia foi a‘u i “le manuia foi mai le Atua, o loo silisili lava i mea uma e manatu i ai” (Filipi 4:7), ma ua mafai ai ona ou onosaia le malaga o lo’u olaga ma le olioli.

E pei ona aoao mai e Peresitene Russell M. Nelson, “E mafai ona tatou lagonaina le olioli e tusa lava po o a mea o tutupu—pe le o tutupu—i o tatou olaga. O le olioli e sau mai ma ona o [Iesu Keriso]. O Ia o le puna o le olioli uma.”³

O Se Taulaga o le Paia

O taimi taitasi ou te mafaufau ai i le atavali o lupe, e faamanatu mai pea lava pea ia te a’u e ofo atu a‘u lava ia Keriso e ala i lo’u ola ai i feagaiga. E faapitoa lava lo‘u faafetai mo folafolaga ua Ia ofoina mai ia te a’u e ala i le tausia o a‘u feagaiga o le malumalu.

Afai e te lei mauaina lava ni au lava sauniga faaola i totonu o le malumalu pe e te lei auai foi mo se taimi mo tapuaiga patino i le malumalu mo soo se mafuaaga, ou te valaaulia outou ma le alofa e faataatia ese soo se papupuni ua tuanai po o le taimi nei ma faia ni taumafaiga talafeagai e ulufale atu ai i na faitotoa paia. A o e faia lena mea, o le a mafai ona e maua le malosi ma le olioli lea e ofoina mai e le Tama Faalelagi ma Iesu Keriso ia i tatou e ala i tapuaiga ma feagaiga o le malumalu.

Ou te iloa o le malumalu o se nofoaga e mafai ona suia ai i tatou—e le ona o le maota paia lava ia ae ona o le ua faatusa i ai ma pe faapefea ona faasino atu ai i tatou ia Iesu Keriso. Pe a tatou ulu atu i na faitotoa paia, ou te lagona e pei o loo tatou faatumuina a tatou lamepa taitasi i le suauu faaleagaga a o tatou saunia mo le toe foi mai o le Faaola (tagai Mataio 25:1–13). O le osia ma le tausia o a tatou feagaiga o le papatisoga ma le malumalu e saunia ai i tatou ia maua mea uma o loo teuina e le Tama mo i tatou.

A o tatou tausia a tatou feagaiga, ou te talitonu o le a faatumuina e lo tatou Tama Faalelagi ma lo tatou Faaola o tatou olaga i le mana faalauteleina e galulue ai i le faatuatua ma faatasi ai ma le olioli faamalamalamaina e ola ai i le olaga ua tuuina mai ma le limafoai ia i tatou e le Atua.