Ua Na’o Tusiga Faatekinolosi: Autalavou Matutua
O se Mea na Aoao mai e se Fatu Maukeni Se Tasi ia te A‘u e uiga i le Alofa o le Atua
Sa ou aoaoina a o tatou atiina ae le alofa o le Atua e ala i le agalelei, faaaloalo, agaalofa, ma le faaaofiaina, o le a tuputupu ae maualuga.
Sa siomia lo‘u fale a o ou laitiiti i fanua e tele i laau sosolo. Ina ua iva ou tausaga, sa ou faamamaina se vaega ititi i le faatausiusiuga o le fanua e toto ai se togalaau. I le amataga o le tautotogo, sa ou totoina ai se fatu maukeni se tasi ma tausia i aso taitasi, ma le naunau e totogo a‘e. I totonu o ni nai aso, i lo’u fiafia tele, sa amata ai ona tupu ae ni laulaau lanumeamata mai le eleele. I le aluga o aso ma vaiaso na sosoo ai, sa ou maofa i le televave o le faatupulaia o le ola o la’u fatu maukeni e tasi. Faatasi ai ma vaega paia o fatu, eleele, susulu o le la, ma le vai, na suia faavavega ai la‘u fatu laitiiti i ni fue se tele e falala atu i itu uma.
I se taimi puupuu mulimuli ane, na oso mai ai ni patupatua lanumeamata i le mea sa faatoa fuga mai ai fugalaau lanumoli ma le samasama. Ma i le aluga o le taumafanafana, na liua ai patupatu i ni maukeni lapopoa, lanumoli. Ina ua oo mai le seleselega, sa ou tipiina a‘u maukeni. Sa ou tei lava! O maukeni taitasi na maua mai ai le faitau selau ma selau o fatu.
Atonu e te mafaufau ia te oe lava, “Manaia tele lena, ae o le a le mea e faatatau i ai lenei fatu maukeni ia te a’u o se talavou matua?” Ia, i le matauina o le sapalai e foliga mai e le gata o fatu mai la‘u seleselega, sa faafuasei ai ona ou malamalama i le ala, faatasi ai ma le fesoasoani a le Atua, e mafai ai ona liua le utiuti (tasi le fatu) i le le iu ma le faavavau. Sa ou vaaia “e leai lava se mea e tasi e lē mafaia e le Atua” (Luka 1:37). Manatua upu a le Perofeta o Alema: “O mea laiti ma faatauvaa e faataunuu ai mea tetele” (Alema 37:6).
Na foafoaina e le Atua la‘u tamai fatu maukeni e fua mai ai le leai o se tapulaa, e oo lava i tupulaga e le i’u, i se taamilosaga e le muta o le tuputupu ae ma le atinaega. Ma e faapena foi ona moni mo le tele o isi mea i o tatou olaga, e aofia ai le tomai e lagona ai ma faasoa atu Lona alofa paia.
Atinaeina o le Alofa o le Atua
I le aluga o taimi, ua ou malamalama ai ua totoina e lo tatou Tama Faalelagi alofa i totonu o i tatou taitoatasi le fatu o Lona alofa e faavavau. E lava le alofa o le Atua ia i tatou e toto ai Lona alofa i o tatou agaga ma le faamoemoe tatou te atiina ae ma tuputupu ae ai e ala i le auauna atu, faatuatua, salamo, ma le tausia o feagaiga.
Ae a la ia taimi o le olaga pe a tatou lagona le mamao mai le alofa o le Atua? O nisi taimi tatou te lagona ai le taumamao mai ia te Ia ona sa tatou faia ni mea sese pe agasala ma e lei mauaina le malosi po o le lototele e faia ai laasaga muamua agai i le salamo. O nisi taimi tatou te pisi tele ai ma faalavelaveina e isi mea uma ua tatou faia i le olaga lea e galo ai ia i tatou pe tuuese ai mea laiti i aso uma lea e fesoasoani tatou te lagona ai le latalata atili atu i lo tatou Tama Faalelagi ma Lona alofa. Atonu foi tatou te lagonaina e pei ua tele naua a tatou tatalo e lei taliina po o le toatele naua o tagata na faatiga ia i tatou po o taimi na le fesoasoani mai ai le Atua ia i tatou.
Atonu tatou te lagonaina le le mafai ona tatou fesootai atu i le alofa o le Atua i o tatou lava olaga lea e le mafai ai ona tatou malamalama i le auala e mafai ona tatou faasoa atu ai lena alofa i isi.
Ae po o le a lava le vaega po o le tulaga o o tatou olaga, e tusa lava po o a mafatiaga po o amioletonu ua tatou onosaia, e mafai lava ona tuputupu ae le alofa o lo tatou Tama Faalelagi e ala i faigata i o tatou olaga. E mafai ona faatoilaloina tiga uma, ita, ma le le fiafia. Afai tatou te atiina ae le alofa o le Atua e ala i le agalelei, faaaloalo, agaalofa, ma le faaaofiaina, o le a tuputupu ae maualuga. O lo tatou gafatia e alolofa ma auauna atu ai i isi o le a avea ma mea e le iu, faavavau, ma sili atu ona matagofie nai lo le mea na tatou moemiti i ai.
A o tatou atiina ae le fatu o le alofa o le Atua i totonu o i tatou, e mafai ona tatou selesele i le alofa mama o Keriso—alofa mama (tagai Moronae 7:47). O i latou o e atiina ae le fatu o le alofa o le Atua e seleseleina foi se fua tele o uo, faaaumea, ma le faatuatua faateleina—o mea e tolu e mafai ona faaaoga e talavou matutua uma! A o tatou atiina ae ma le faaeteete le fatu o le alofa o le Atua, e mafai ona tatou maua se seleselega e le faatapulaaina o le alofa e faavavau i a tatou sootaga faaleaiga, a tatou auaunaga i le Ekalesia, ma o tatou olaga patino.
Faasoaina o le Alofa o le Atua
Ua aoao mai tusitusiga paia e faapea “o le Atua o le alofa lea” (1 Ioane 4:8). Sa maitauina e Peresitene M. Russell Ballard, Sui Peresitene o le Korama a Aposetolo e Toasefululua e faapea “o le uiga sili ona taua o le Tama Faalelagi ma Lona Alo Pele e tatau ona tatou moomoo ma saili ia tatou mauaina i totonu o i tatou lava, o le meaalofa lea o le alofa moni, ‘o le alofa mama o Keriso’ (Moronae 7:47).”1
O lenei alofa mama o Keriso e mafai ai e i tatou ona alolofa atu ma auauna atu i isi e pei ona faia e le Faaola. A o tatou mulimuli i le faataitaiga a Keriso o le auauna atu, tatou te iloa ai le alofa o le Atua i totonu o i tatou ma aoao pe faapefea ona faasoa atu lena alofa.
O i latou e iloaina lelei a’u e masani lava ona ou tauaveina se fatu maukeni i lau taga e faamanatu mai ai ia te a’u le taua o le lesona o le olaga na aoaoina: E mafai e le Tama Faalelagi ona ave se mea e laitiiti e pei o se fatu o le alofa i o tatou olaga ma liua i se alofa mamana, e le gata, ma le alofa ma le auaunaga e faavavau a le Atua, tuaoi, ma le tagata lava ia.