Ua Na’o Tusiga Faatekinolosi: Autalavou Matutua
Ina ua Leai se Mea Na Lagonaina le Olioli i Lo‘u Olaga, sa Ou Liliu Atu i le Talalelei
Sa ou lagonaina e pei ua i ai se mea o misi i lo‘u loto—seia oo ina ou mauaina le olioli moni e faavavau lea e sau mai le talalelei a Iesu Keriso.
O se isi aso pagatia, leai se ola, ma le le manaia. Mo sina taimi mulimuli, sa tutusa lava mea uma, ma e ui ina sa ou taumafai ia fiafia, ae sa amata ona ou lagona le ivā ma le le mautonu. O le ogatotonu o le faama‘i pipisi o le KOVITI-19 ma sa loka lo’u atunuu, o lea sa uunaia uma ai i matou e nonofo i le fale seia toe iloa atili.
O aso uma pe a ou tilotilo ifo ia te a’u lava i le faaata, sa ou vaaia ai se gaogao iina. Atonu ona sa le mafai ona ou vaai i a‘u uo pe ona sa le mafai ona ou faigaluega pe lagolagoina lo’u aiga i lena taimi. Faatoa uma ona ou faauu mai le kolisi ma manao e avea ma se faiaoga, ae sa manaomia ona ou pasia se suesuega sa tolopoina ona o le faama‘i oti.
Sa ou lagona le le fiafia, e pei o se mea na misi i lou loto, ae sa le mafai ona ou iloa atoa po o le a, pe faapefea foi ona ou maua.
Feiloai i Faifeautalai
I se tasi po, sa tilotilo ai lo‘u tausoga i se tusi. Sa lanumoana paauli ma sa faaulutalaina “Ang Aklat ni Mormon.” Na lei leva atu ona la o ma lana uo i se mea na ta‘ua o le “afiafi faaleaiga” ma sa talanoa i faifeautalai i luga o le telefoni i ni nai po i se vaiaso talu mai lena taimi. I lenei po faapitoa, sa ia talanoa i le telefoni a o vaavaai i le tusi ae na faafuasei lava ona ia fesili mai ia te a’u pe mafai ona ou fesoasoani ia te ia e tali se fesili mai se tasi o faifeautalai.
“E moni lava?” Sa ou mafaufau ai. “O oe lea e fesili mai i ai, aisea la e tatau ai ona ou fesoasoani?”
Ae sa ou gauai atu i ai ma fesili atu ia te ia po o le a le fesili. Ma sa ia fai mai, “Ano daw layanin mo sa buhay?” (“O le a sou manatu o le a lou faamoemoega i le olaga?”)
Sa amata ona vave le tata o lo‘u fatu ina ua ou faalogo i le fesili.
“O le mea lena! O le mea lenei sa ou sailia. O le mea lenei na misi i lo‘u loto,” sa ou mafaufau ai.
Sa ou sioa atu i lo‘u tausoga, ataata, ma aumai le telefoni e tali ai le fesili a le faifeautalai. Sa ou fai atu ia te ia ou te talitonu o le faamoemoega o le olaga o le fiafia, ia olioli i le olaga, ma auauna atu i isi ma ia agalelei atu ia i latou. Ma sa ia ioeina!
Sa la fesili mai foi ma lana soa pe mafai ona la aoaoina atili ma‘ua ma lo’u tausoga e uiga i le talalelei, ma sa ma fai atu ioe. Sa aoaoina lo‘u aiga e faifeautalai a o ou laitiiti. O lo‘u tina o se tagata o le Ekalesia ae sa le toe toaga mo le tele o lo’u olaga, ae ina ua uma le talanoaga i le telefoni, sa ou manao e aoao atili.
O taimi uma lava e faasoa mai ai e faifeautalai se mea e uiga i le talalelei, sa ou lagonaina le olioli i lou loto, aemaise lava i le aoaoina e uiga i le ata o le faaolataga ma folafolaga a le Tama Faalelagi ma le Faaola. Na iu lava ina matou o i le lotu, ma sa faafeiloaia i matou e tagata o le ekalesia i o latou loto mafanafana ma lima fesoasoani.
Sa mafai ona ou lagonaina i lo‘u loto sa ou uia le ala sa’o. Ma ina ua mavae ni nai masina, sa papatisoina a’u e se uo mamae sa fesoasoani ia te a’u e agai i luma i le talalelei.
O Le Punavai o le Fiafia Moni
O le faia o le tele o suiga i lo‘u olaga ina ua uma ona auai i le Ekalesia sa faigata. Ma o lo‘u olaga e mamao lava mai le faigofie po o le fiafia i taimi uma. Ae a o ou maua ni avanoa fou e auauna atu ai ma faaloloto la‘u molimau, ua ou iloa ai ma le mautinoa o le olioli e faavavau o loo maua moni lava i lenei talalelei.
Ou te lagonaina le olioli i lou loto i soo se taimi lava ou te faitau ai i tusitusiga paia, faalogo i musumusuga faalelagi mai o tatou perofeta ma aposetolo, ma molimauina molimau a tagata o le ekalesia o siomia ai a’u. Ua ou maua la‘u tali i le fesili na fesili ai na faifeautalai i luga o le telefoni: o le faamoemoega o le olaga o le avea lea ma se tagata lelei atu mo le Atua, mo a’u lava, ma mo lo‘u aiga, i taimi uma a o taumafai e toe foi atu ia te Ia. Ma o lenei malamalama ua aumaia ai ia te a’u le fiafia tonu sa ou sailia. O le faaauau pea ona auauna atu i tagata ma ave lo‘u aiga i le lotu ua avea nei ma a’u faamuamua maualuga, aua ou te manao ia latou lagonaina le olioli moni.
Na aoao mai Peresitene Russell M. Nelson, “Afai o taulaiga o o tatou olaga e i fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea e tutupu—pe le o tutupu foi—i o tatou olaga.”1
Ou te molimau atu foi o le fiafia moni e na o le mulimuli ia Iesu Keriso e mafai ona maua ai. O avanoa uma lava sa ou maua i le talalelei a Iesu Keriso ua faatumulia ai lo‘u agaga i le olioli, aemaise lava ina ua ou faatagaina nei aafiaga e fesoasoani ia te a’u e latalata atili atu ai ia te Ia.
A o lei oo mai le faama‘i oti o le KOVITI-19, sa ou fiafia i lo’u olaga. Ae o le olioli moni e aumaia e le talalelei e ese mai le fiafia. E oo lava i le faama‘i pipisi, e aumaia e le talalelei ia te a’u le filemu ma faaali mai ia te au le faamoemoega o le olaga, lea e fesoasoani ia te a’u e agai ai pea i luma ma le faatuatua ma le faamoemoe.
Na iu lava ina ou mauaina la‘u vaega o loo misi. Sa ou manaomia le olioli o le mulimuli ia Iesu Keriso e aumaia i lo‘u loto ma lo’u olaga, e pei ona tatou faia uma.