Ua Na’o Tusiga Faatekinolosi: Autalavou Matutua
Mata E Mafai e le Aoaoina o le Gagana a O‘u Tuaa ona Fesoasoani ia te A’u e Faapotopoto Isaraelu?
Sa uunaia a’u e aoao le gagana a o‘u tuaa ina ia fesootai lelei ma i latou. Ae ou te lei iloaina le tele o avanoa o le a aumaia.
Atapue na faaali e tagata faataitai
Faamatalaga
O le tamā o lo‘u tamamatua o le tagatanuu mulimuli lea o lo’u aiga na tautala i le gagana Māori. Sa masani ona ou matamata i vitio o ia ma faalogologo ia te ia o tautala i le gagana a o matou tagata, ma moomoo maimau pe ana mafai ona ou malamalama ia te ia. E ui lava sa na o ni nai augatupulaga na matua ai ia te a’u, ae ou te lei maua lena sootaga i lo matou tupuaga.
Sa ou auauna atu i se misiona i Filipaina, ma sa ou fiafia i ai. Sa ou fiafia i le gagana, tagata—mea uma. Ma talu ai sa ou faaaluina le taimi e taumafai ai e fesootai ma tagata sa ou auauna atu i ai ma aoao atu, sa oo ina ou iloa mea e tele i la latou aganuu.
E ui lava i le matagofie o lena avanoa, sa ou iloaina ou te lei taumafai lava e fesootai ma la‘u lava aganuu ma tagata i lea lava ala e tasi. E ui ina sa ou fesoasoani e faapotopoto Isaraelu i la‘u misiona, ae sa ou iloaina sa i ai ni auala taua mo a’u e fesoasoani ai e faapotopoto mai Isaraelu i le fale, aemaise lava i totonu o lo‘u lava aiga.
Sa ta‘u mai e sa’u uo Māori e lei leva ona foi mai mai le auauna atu i Filipaina e uiga i se miti sa ia faia e uiga i lona tinamatua. Sa faaali mai o ia i lana miti ma fesili mai ia te ia pe aisea na ia suesue ai i isi aganuu ae a lana ia lava aganuu.
Sa tagitagi mai lana miti ia te a’u. Sa uunaia a’u e aoao e uiga i o‘u tuaa ma fesootai ma i latou e pei ou te lei faia muamua lava.
Malamalama i le Folafolaga a Elia
Faatoa ou ulufale atu i le aoga faafomai ina ua ou filifili e aoao le gagana a o’u tagata. O lea la, e faaopopo atu i a‘u fuafuaga pisi, sa ou avea ai ni vasega i le po e aoao ai le faa-Māori.
Ina ua faatoa amata vasega, sa ou lagonaina le tuuatoatasi ma le le mautonu e uiga i le agai i luma. Ae o le tele lava o lo‘u talanoa atu i tagata o la’u vasega, o le tele foi lea o lo‘u iloaina e toatele sa lagonaina foi le uunaiga e fesootai ma lo latou tupuaga e ala i le aoaoina o le faa-Māori.
I le aluga o taimi, o le aoaoina o le faa-Māori na amata moni lava ona lagona e pei o se aafiaga faaleagaga. Sa amata ona ou malamalama i le folafolaga a Elia o le a ia “faaliliuina loto o matua i fanau, ma loto o fanau i o latou matua” (Malaki 4:6). Ua atili moni ai o’u tuaa ia te a’u.
O le aoaoina o le gagana na tatalaina ai foi faitotoa i lo‘u olaga i aso uma. Sa ou iloa o le tautala atu faa-Māori na fesoasoani ia te a’u e fesootai lelei ai ma tagata o e sa ou tuuina atu i ai le tausiga faafomai. Sa ou fesoasoani e faatulaga ni vasega Māori i la‘u iunivesite ma iloa ai e toatele isi tamaiti aoga faafomai sa fiafia foi e aoao e fesoasoani ia i latou e tuuina atu le tausiga sili atu.
E ui o le gagana ua amata ona faaitiitia le taatele, ae o le mafai ona fesootai ma i latou o e tautatala i le faa-Māori, ua fesoasoani ia te a’u e auauna atu ai i ni faitau aofai patino. Ua ou molimauina le faapitoa o lagona o o‘u tagatanuu moni e mama’i i le faalogo ma vaaia pe a mafai ona matou tautatala faatasi i la latou gagana. O nei aafiaga ua faaali moni mai ai ia te a’u le uiga o le auauna atu i le toatasi.
E Mafai Ona Tatou Fesoasoani i le Tasi ma le Isi e Faapotopoto Isaraelu
Ua aoao mai Peresitene Russell M. Nelson: “Pe a tatou talanoa e uiga i le faapotopotoina o Isaraelu i itu uma e lua o le veli, o le mea moni o loo tatou faasino atu i le galuega faafaifeautalai, malumalu, ma talafaasolopito o aiga. O loo tatou faasino atu foi i le fausiaina o le faatuatua ma le molimau i loto o i latou o loo tatou ola faatasi, galulue, ma auauna i ai.”1 O le aoaoina o le faa-Māori na fesoasoani moni lava ia te a’u e fesootai ai ma lo‘u tupuaga ma tuaa i le isi itu o le veli, ma ua ou fuafua e fai galuega mo i latou i le taimi lava e toe tatala ai le Malumalu o Hamilton Niu Sila. Ae ua fesoasoani foi ia te a’u e auauna atu ai i lenei itu.
O le avea ai ma se vaega o se ekalesia e talitonu i le fesootai atu i o tatou tuaa e faaopoopo ai lena olioli i lo’u olaga. Matou te faamuamuaina galuega o malumalu ma talafaasolopito o aiga aua matou te talitonu o tagata uma o lo matou aiga, e tusa lava po o le a le umi talu ona latou soifua ai, e tatau ona maua le avanoa e talia ai le talalelei a Iesu Keriso. Ma e mafai ona tatou fesoasoani le tasi i le isi e faataunuu lenei galuega.
O le aoaoina o le faa-Māori o se tasi lea o auala mo a’u e fesoasoani ai e faapotopoto Isaraelu. Ae e mafai e i tatou taitoatasi ona auai i lenei galuega i le tele o isi auala, ma e le tatau ona faigata. O le auai i le malumalu ma le faia o galuega sui mo o tatou aiga, sailia o o tatou gafa faaleaiga, faasino igoa, ma e oo lava i le aoao e uiga i o tatou matua matutua ma matua o matua matutua e mafai ona avea ma avanoa matagofie e fesootai ai ma o tatou tuaa.
A maea mea uma, o le sini tupito mo i tatou uma o le toe foi atu lea i le Tama Faalelagi ma nonofo faatasi ma Ia ma o tatou aiga e faavavau. Ma e ala i a tatou taumafaiga e faalolotoina a tatou fesootaiga ma isi—aemaise lava o o tatou tuaa—e mafai ai ona tatou faamalosia lo tatou tuuto atu ia Keriso ma faatumauina lena sini i le vaaiga.