Ua Na’o Tusiga Faatekinolosi

Ae Faapefea Pe Afai e Foliga Mai e Le Taliina A‘u Tatalo?

Saunia e Brittany Beattie

Mekasini a le Ekalesia

Mafaufau i manatu nei e fitu e aoao atili ai e uiga i le ala e tali mai ai e le Tama Faalelagi tatalo amiotonu uma .

Ata na tusia e Paul Mann

Ua faafia i tusitusiga paia atoa, ona tatou faitau i le folafolaga, “Ole atu i le Atua; Ia ole atu, ona foaiina mai ai lea ia te outou; ia outou saili, ona outou maua ai lea; tuitui atu, ona toina ai lea ia te outou” (Faaliliuga a Iosefa Samita, Mataio 7:12 [i le Mataio 7:7, vaefaamatalaga a]). I le tuuina mai o lena folafolaga, e faapefea ona tatou faaauau pe a tatou lagonaina e le taliina a tatou tatalo, aioiga, ma manaoga?

O se tali masani atonu o nisi taimi o le mafaufau pe faafofoga moni mai le Atua pe tali mai i a tatou tatalo, pe atonu foi tatou te mafaufau, “E tali mai o Ia i tatalo a tagata uma ae le o a‘u.” Ae o loo i ai isi tali e mafai ona fesoasoani ia i tatou e maua ai le malosi po o le faamoemoe e agai ai i luma i le faatuatua pe iloa le tele o auala atonu ua uma ona tali mai ai le Tama Faalelagi ia tatou tatalo.

O tali taitasi e mafai ona amata i le i ai o le faatuatua i le Atua, o ia “o se Atua o le upumoni, ma e le mafai ona pepelo” (Eteru 3:12; tagai foi Tito 1:2). Pe a tatou manatuaina lena aoaoga faavae, e le manaomia ona tatou taumanatunatu pe o le a tali mai le Atua i a tatou tatalo ma e mafai ona taulai atu lo tatou malosi i le vaavaai mo Lona aao ma le taitaiga i o tatou olaga, ma le iloaina e tali mai o Ia i tatalo uma. O nei faiga e fitu ua faasoa mai ai nisi o le tele o mataupu faavae e mafai ona fesoasoani ia i tatou e iloa ai pe mafai faapefea ona tatou maua ma iloa faamanuiaga ma tali mai le Tama Faalelagi i o tatou olaga.

1. Faalagolago e finagalo le Atua i le mea e sili ona lelei mo oe.

O lo tatou tomai e agai ai i luma i le faatuatua e mafai ona sili atu ona faaleleia pe a tatou manatua o loo i ai pea i taimi uma i le mafaufau o le Tama Faalelagi mea e sili ona lelei mo i tatou. E pei ona aoao mai Elder Richard G. Scott (1928–2015) o le Korama a Aposetolo e Toasefululua, nai lo le taliina o tatalo uma i le ala tatou te mananao ai, o le a Ia, i Lona alofa mutimutivale, “tali mai i au tatalo i le ala ma i le taimi o le a avea ma ou lelei silisili e faavavau.”¹

A o tatou aoao e talitonu o le a tali moni mai lava le Tama Faalelagi i le ala sili mo i tatou, e mafai ona tatou maua le filemu ma le lotofaafetai nai lo le le fiafia pe a le taliina tatalo i le ala atonu sa tatou faamoemoe i ai. E mafai ona tatou “faia ma le fiafia mea uma ua i ai i lo tatou mana,” ma le faamoemoe mo “le faaalia o lona aao” (Mataupu Faavae ma Feagaiga123:17) i faamanuiaga sili atu ona olioli o le a oo mai.

2. Suesue i ai ma saili se taitaiga patino.

Na aoao mai Peresitene Nelson e faapea “e fiafia le Alii i taumafaiga.”² E le mafai ona tatou faamoemoeina ni tali pe afai tatou te le naunau e faatino le galuega. Ina ua le maua e Oliva Kaotui se faamanuiaga sa ia sailia, sa faamanatu atu e le Alii ia te ia (ma i tatou):

“Faauta, sa e le malamalama; sa e manatu o le a Ou tuu atu ia te oe lena mea, ae e te lei mafaufau i ai ae na o lou ole mai ai ia te a’u.

“Ae, faauta, ou te fai atu ia te oe, e ao ina e suesue i ai i lou mafaufau; ona ao lea ona e ole mai lea ia te a’u po ua sao, ma afai ua sao o le a Ou faia ia mu lou loto i totonu ia te oe; o lea, o le a e lagona ai ua sao” (Mataupu Faavae ma Feagaiga 9:7–8).

Afai o loo tatou faatalitali mo se tali patino i se fesili lautele, ona tatou mananao lea e sui i se fesili ua uma ona suesueina, ona saili lea o le faamaoniaga. Mo se faataitaiga, afai o loo tatou tatalo ia iloa “O le a le isi mea e tatau ona ou faia?” e aunoa ma le faia o ni mea se tele atu nai lo le tatalo mo se taitaiga, ona tatau lea ona tatou mautinoa ua tatou sailiilia o tatou avanoa, mamafatu ia i latou, ma mulimuli i mataupu faavae o le talalelei i le filifilia o le filifiliga sili ona lelei, ona tuuina atu lea o lena filifiliga i le Alii mo se faamaoniga o le filifiliga sa‘o lea.

3. Ia tatala i avanoa e tele.

O le manatuaina o “ala [a le Atua] e maualuga atu nai lo [o tatou] ala” (Isaia 55:9; tagai foi fuaiupu 8) e mafai ona fesoasoani ia i tatou e tatala ai auala eseese atonu e tali mai ai le Tama Faalelagi i a tatou tatalo. Mo se faataitaiga, na aoao mai e Elder Scott le ala e mafai ona tali mai ai tatalo ina ia faamaloloina i ni auala se tele: “E taua ona malamalama o Lana faamalologa e mafai ona faauigaina o le faamaloloina, po o le faamāmāina o au avega, po o le mautinoa foi lea e aoga lava le tumau sei oo i le iuga ma le onosai, aua e manaomia e le Atua ni atalii ma ni afafine totoa o e ua naunau ina ia faaatoatoaina pe afai o Lona finagalo lea e tusa ma Lona poto.”³

O le suesueina o tusitusiga paia ma aoaoga faaperofeta e o faatasi ma le autu o loo tatou tatalo ai, e mafai ona fesoasoani tatou te iloa ai tali—i le tele o auala—e mafai ona auina mai ia i tatou e le Tama Faalelagi. O le faia o lena mea e fesoasoani tatou te aloese ai mai le vaaiga papau⁴ ae ia tatala atu i le finagalo ma le malamalama o le Atua.

4. Talia ma le lotomaualalo se “leai.”

O nisi taimi o le mea e “mo lo tatou lelei silisili e faavavau” o le mauaina lea o le tali o le “leai.” A tupu lena mea, e mafai ona tatou maua le malosi i lenei fautuaga mai ia Peresitene Nelson, lea e mafai ona fesoasoani tatou te iloa ai le alofa ma le alofa mutimutivale o le Atua:

“E le o a tatou tatalo uma o le a taliina mai e pei ona tatou moomoo i ai. O nisi taimi o le tali o le a leai. E le tatau ona tatou ofo ai. O matua faaletino alolofa e le fai mai ioe i talosaga uma a a latou fanau. …

“E tatau ona tatou tatalo e tusa ai ma le finagalo o lo tatou Tama Faalelagi. E finagalo o Ia e tofotofo i tatou, ia faamalosia i tatou, ma fesoasoani ia i tatou ia ausia o tatou gafatia atoatoa. Ina ua i ai le Perofeta o Iosefa Samita i le Falepuipui o Liperate, sa ia aioi atu mo se toomaga. Sa tali mai Ana tatalo i se faamalamalamaga: ‘O nei mea uma e te maua ai le poto masani, ma o le a avea mo lou lelei’ [Mataupu Faavae ma Feagaiga 122:7].”⁵

Pe a tatou maua se “leai,” e mafai ona tatou maua se malosiaga ese i le vaavaai mo le tuputupu ae, aafiaga, ma le agalelei lea e sau mai o tatou tulaga.

5. Ia manatua e faamamaluina e le Atua le faitalia.

O nisi o tali tatou te tatalo ai atonu e manaomia ai lo tatou faaaogaina muamua o lo tatou faitalia ma faatino i le faatuatua a o lei mauaina se tali. Na aoao mai Elder David A. Bednar o le Korama a Aposetolo e Toasefululua e faapea, ina ua manaomia e le fanauga a Isaraelu ona sopoia le vaitafe o Ioritana, latou te lei vaai i se vai ua vaeluaina seia oo ina ua latou laa i ai i totonu (tagai Iosua 3:15–16). O le faatuatua moni e taulai atu i le Alii o Iesu Keriso ma e tau atu e le aunoa i faatinoga amiotonu.”⁶

Pe o tatou naunau ea e galulue i le faatuatua e aunoa ma se tali ma faalagolago i folafolaga ma aoaoga a le Atua? Afai o lea, atonu tatou te iloa o loo faatalitali mai le Tama Faalelagi e tuu mai ia i tatou se tali seia “uma ona tofotofoina o lo tatou faatuatua” (Eteru 12:6). O nisi taimi o le faatinoga e tatau ona tatou faia atonu e le fesootai tonu i le manao tatou te sailia ae i se suiga o le loto e saunia ai i tatou ia maua le tali.

Mo se faataitaiga, matau le matafaioi o le lotomaualalo e faatatau i faamanuiaga ua folafola mai i le Mataupu Faavae ma Feagaiga 112:10: “Ia e lotomaualalo; ma o le a taitai oe e le Alii lou Atua i le lima, ma tuu mai ia te oe tali i au tatalo.” E mafai ona tatou mafaufau pe ono mafai faapefea e le lotomaualalo ona fesoasoani ia i tatou e faaaoga lo tatou faitalia e saili ai ma maua faamanuiaga e finagalo le Tama Faalelagi e tuuina mai ia i tatou.⁷ E mafai foi ona tatou suesue i le afioga a le Atua e saili ai isi uiga e mafai ona tatou atiina ae e faaagavaaina ai i tatou ia maua nisi o faamanuiaga tatou te sailia.

I se isi itu, o nisi o tali tatou te tatalo ai atonu e manaomia ai isi e faaaoga lo latou faitalia e faatino ai. Mo se faataitaiga, atonu tatou te tatalo ina ia toe foi mai se tasi i le toaga atoatoa i le Ekalesia, suia se amioga, pe tuuina mai ia i tatou se avanoa tatou te mananao ai. I tulaga taitasi, e aofia ai le faitalia a se isi tagata. Ma talu ai e taua tele le faitalia i le Tama Faalelagi—“o le Taua lava i le Lagi na tauina i lo tatou faitalia”⁸—e taua le manatua o le a Ia le aveesea le faitalia o se isi e tusa lava pe tali mai ai i a tatou tatalo.

Afai e foliga mai e le mafai ona tatou maua tali i se tatalo e faalagolago i faatinoga a se isi tagata, nai lo le tatalo mo na o le isi tagata ia suia, e mafai foi ona tatou tatalo ia iloa mea e mafai ona tatou faia e faateleina ai le alofa po o le onosai i a tatou sootaga, faatoilalo o tatou lava vaivaiga (tagai Mataio 7:3–5), pe faaleleia atili tomai e fesoasoani ai ia i tatou ia agavaa mo se avanoa fou.

6. Ia “agavaa e maua faaaliga.”⁹

Afai o faigata ia i tatou ona maua tali i tatalo, e mafai ona tatou mautinoa ua tatou agavaa mo le mafutaga faifai pea a le Agaga Paia. Na aoao mai Peresitene Nelson: “Afai o loo taofia e se mea i tatou mai le tatalaina o le faitotoa i le taitaiga faalelagi, atonu e manaomia ona tatou salamo. O le salamo e mafai ai ona tatou tatalaina le faitotoa ina ia mafai ona tatou faalogo atili i le siufofoga o le Alii i le tele o taimi ma le manino.”¹⁰

E aofia ai i lenei mea le puleaina o o tatou lagona. Na aoao mai Elder Scott: “O le uunaiga musuia a le Agaga Paia e mafai ona faatoilaloina pe ufitia i lagona malolosi, e pei o le ita, inoino, naunau, fefe, po o le faamaualuga. Pe a i ai ia ituaiga o faatosinaga, e pei lava o le taumafai e folofolo malie le tofo maaleale o se vine a o ai i se polo feū [jalapeño]. O loo i ai uma tofo e lua, ae o le tasi e matuai taomia ai lava le isi. E faapena foi, o lagona malolosi e faatoilalo ai uunaiga maaleale a le Agaga Paia.”¹¹

Faitau pe mafai faapefea ona tatou faamamaina atoatoa o tatou olaga ia maua le taitaiga mai le Tama Faalelagi i le “Tuputupu Ae i le Mataupu Faavae o Faaaliga,” saunia e Peresitene Nelson, ma le “Ia Maua le Taitaiga Faaleagaga,” saunia e Elder Scott.

7. Faaauau pea ona tatalo ma pipiimau i le faatuatua.

Po o le a lava lau mea e fai, aua nei taofia le tatalo. “Tatalo e tusa lava pe leai sou manao e tatalo,” na aoao mai ai Elder Scott.¹² Faaaoga lenei taimi e malupuipuia ai, ia sili atu nai lo se isi lava taimi muamua, lou faavae faaleagaga.

Na aoao mai Elder Neil L. Andersen o le Korama a Aposetolo e Toasefululua le mafuaaga e taua tele ai lenei mea: “Pe a feagai ma se tofotofoga o le faatuatua—po o le a lava lau mea e fai, aua e te laa ese mai le Ekalesia! O le faataumamaoina o oe lava ia mai le malo o le Atua i taimi o se tofotofoga o le faatuatua, ua tai pei lava o le tuua o le saogalemu o se malutaga malupuipuia o afā ae tau tonu atu lava lau vaai i le asiosio.”¹³

I na faifeautalai ua maea mai misiona ma i tatou uma, afai ua outou “fia pepese i le pese o le alofa togiola, ou te fia fesili atu, e mafai ea ona outou lagonaina nei?’ [Alema 5:26]. Afai tou te le lagonaina nei, e mafai ona outou toe lagonaina, ae mafaufau i le fautuaga a Nifae [i le 1 Nifae 15:10–11]. Ia usiusitai, manatua taimi na outou lagona ai le Agaga i le taimi ua tuanai, ma ole atu i le faatuatua. O le a o’o mai lau tali, ma o le a e lagonaina le alofa ma le filemu o le Faaola. Atonu e le oo mai i le vave po o i le auala e te manao ai, ae o le a oo mai le tali. Aua le fiu gofie! Aua lava nei fiu gofie!”¹⁴

Na aoao mai Elder Jeffrey R. Holland o le Korama a Aposetolo e Toasefululua e faapea, pe a o “tatalo … e foliga mai e le taliina ma e le taliina ma e le taliina, … e te manaomia le faatuatua.” O lena faatuatua, na ia saunoa ai, e manaomia ona avea ma se “faatuatua mamana, faatuatua lea e lagolagoina i tatou iinei ma le taimi nei, ae le na o le aso o le faamasinoga po o se mea i le mamalu selesitila.”¹⁵

Suesue Ia Iloa Atili

Aoao atili e uiga i le mauaina o tali i tatalo:

• Bible Dictionary, “Prayer

• Gospel Topics, “Repentance,” topics.ChurchofJesusChrist.org

• “Tatalo” (autu o le konafesi aoao), ChurchofJesusChrist.org

Faamatalaga

1. Richard G. Scott, “Faaaogaina o le Meaalofa Faalelagi o le Tatalo,” Liahona, Me 2007, 11.

2. Russell M. Nelson, i le Joy D. Jones, “O Se Valaauga e Faapitoa Lona Tamalii,” Liahona, Me 2020, 16.

3. Richard G. Scott, “To Be Healed,” Ensign, May 1994, 8.

4. Tagai i le Russell M. Nelson, “Ia Faamuamua le Atua,” Liahona, Nov. 2020, 92–95.

5. Russell M. Nelson, “O Le Mana Toafilemu o le Tatalo,” Liahona, Me 2003, 9.

6. David A. Bednar, “Exercise Faith in Christ” (vitio), ChurchofJesusChrist.org/media.

7. Tagai foi i le tusiga i le Bible Dictionary i le “Tatalo” ia iloa ai pe faapefea ona fesoasoani le lotomaualalo ia i tatou e faaogatusa ai o tatou loto ma le Tama Faalelagi ma aveesea ai “le tele o faigata ua ta‘ua e uiga i le tatalo.”

8. Quentin L. Cook, “Filemu o le Tagata Lava Ia: O Le Taui lea o le Amiotonu,” Liahona, Me 2013, 32–36

9. Tagai Russell M. Nelson, ”Tuputupu Ae i le Mataupu Faavae o Faaaliga,” Liahona, Ian. 2021, 7–9.

10. Russell M. Nelson, “Tuputupu Ae i le Mataupu Faavae o Faaaliga,” 8.

11. Richard G. Scott, “Ia Maua le Taitaiga Faaleagaga,” Liahona, Nov. 2009, 8.

12. Richard G. Scott, “Faaaogaina o le Meaalofa Faalelagi o le Tatalo” 10.

13. Neil L. Andersen, “Tofotofoina o lo Outou Faatuatua,” Liahona, Nov. 2012, 40.

14. James B. Martino, “Liliu Atu ia te Ia ma o le a E Mauaina Tali,” Liahona, Nov. 2015, 58–60

15. Jeffrey R. Holland, “A Saint Through the Atonement of Christ the Lord” (Brigham Young University devotional address, Jan. 18, 2022), 4, 5, speeches.byu.edu.