“Pagtugot sa Ginoo nga Mogiya sa Inyong Kinabuhi,” Liahona, Sept. 2022.
Mga Young Adult
Pagtugot sa Ginoo nga Mogiya sa Inyong Kinabuhi
Dili ako makakita kanunay kon sa unsang paagi mapahigayon ang mga butang, apan kon ako molihok inubanan sa hugot nga pagtuo, ang Ginoo mopanalangin nako.
Ang relihiyon wala kaayo hatagig pagtagad sa akong panimalay sa dihang nagtubo pa ko—bisan og ang akong mga ginikanan relihiyoso kaayo sa labing dakong bahin sa ilang kinabuhi, ang kataposang pagpahiling sa sakit sa akong amahan, taliwala sa ubang mga pagsulay, maoy nakaingon nga sila mibiya sa relihiyon nga ilang nadak-an. Ako nag-edad og kwatro sa diha nga siya namatay sa kanser ug mao usab ang kinamanghoran sa 13 ka anak, ug ang akong biyuda nga inahan dili makatuo nga ang Dios mitugot nga mahitabo kini sa among pamilya.
Apan sa dihang nag-edad na ko og 14, gibati nako nga dunay kulang sa akong kinabuhi. Naghunahuna ko kon ako aduna bay mas dako nga katuyoan nga wala ko makahibalo. Gibati nako nga sama ni Joseph Smith, samtang ang “akong hunahuna gitawag ngadto sa mahinungdanon nga pamalandong ug dako nga kabalisa” (Joseph Smith—History 1:8). Bisan og wala ko makadungog kabahin ni Joseph Smith niana nga higayon, nagsugod ko sa pagsiksik sa susama kaayo sa iyaha samtang mitambong ko og daghan nga mga simbahan naglaom nga akong makaplagan ang kamatuoran.
Ug akong nakaplagan, usa ka adlaw, sa dihang nakita nako ang duha ka batan-ong lalaki nga nag-amerikana nga miadto sa balay sa akong silingan. Nakuryoso ko ug mihangyo nila kon mahimo ba kong moapil sa ilang appointment. Human makakuha sa pagtugot sa akong inahan, nagsugod ko sa pagpaminaw sa mga panaghisgotan sa misyonaryo ug sa kataposan mipasakop sa Simbahan.
Ang pagpasakop sa Ang Simbahan ni Jesukristo sa mga Santos sa Ulahing mga Adlaw nakatabang nako pagpangita sa akong katuyoan, ilabi na sa mga tuig sa akong pagka-young adult sa dihang mohimo ko og daghang mga desisyon nga ang mga tawo sa akong palibot dili uyon niini. Apan bisan og ako aduna nay katuyoan ug direksyon, dili ako kanunay sigurado kon unsay umaabot.
Hinoon, samtang akong giatubang ang wala mahibaloi ug walay kasiguroan ug ang daghan kaayo nga mga kausaban, ang giya sa Langitnong Amahan kanunay kon ako modangop ngadto Kaniya. Nakat-on ko og pipila ka paagi sa pagsalig Kaniya ug sa akong hugot nga pagtuo nga nakatabang nako nga mopadayon sa pagpangita sa akong katuyoan.
Pagpadayon sa usa ka Misyon
Sa edad nga kadaghanan sa akong mga kaedad nag-andam sa pag-eskwela sa kolehiyo, ako naghunahuna unsaon sa pag-adto sa misyon. Sa Chile, ang tanan kinahanglan nga mokuha og eksamin sa dili pa mosulod sa unibersidad. Gitanyag kini kausa ra sa usa ka tuig, mao nga kon ako magmisyon, dili lang gilangay nako ang akong edukasyon sulod sa duha ka tuig apan usab kinahanglang maghulat og dugang tuig aron makaeskwela human niana.
Ang akong pamilya, ilabi na ang akong inahan, supak sa pagmisyon. Importante kaayo kaniya nga ako makadawat og edukasyon sa kolehiyo. Apan bisan pa ako nagtuo nga ang Ginoo motabang nako unsay gikinahanglan, mao nga mainampoon akong nagsugod sa pagpangandam.
Sa dihang ang akong bishop miadto sa akong balay dala ang nahuman na mga papeles sa misyon ug nangayo og pirma sa akong inahan, nasurprisa siya; wala nako siya sultihi nga ako mipadayon sa proseso. Nagkinahanglan kadto og hilabihan nga pangombinser, apan ang Ginoo mipahumok sa iyang kasingkasing ug mitabang kaniya nga makasabot nga ako gusto nga moserbisyo.
Ang ebanghelyo mihatag nako og kasiguroan nga ako nagbuhat sa saktong butang, apan kini pinaagi lamang sa pagpadayon, lakang sa matag lakang uban sa hugot nga pagtuo—bisan sa akong tanang pangutana ug kawalay kasiguroan—nga ako padayon nga nag-uswag.
Nagsunod sa Pagpadayag human sa laing Pagpadayag
Ang pagpauli gikan sa akong misyon nagpasabot usab sa pagbalik ngadto sa walay kasiguroan. Samtang ako nagtinguha og giya gikan sa Langitnong Amahan pinaagi sa pag-ampo ug pagpuasa, nakadawat ko og pagpadayag nga ako kinahanglan nga mobalhin ngadto sa Estados Unidos ug moeskwela sa Brigham Young University, nga ingon og morag imposible kaayo nga buluhaton.
Gibuhat nako ang labing maayo nga akong mahimo ug mihimo sa sunod nga labing maayong mga lakang. Usahay gibati nako nga wala akoy gipadulngan—naningkamot ako pag-ayo, apan wala ko makasiguro nga ang akong mga paningkamot makatabang nako sa pagkab-ot sa akong mga tumong. Hinoon, ang akong pinakatumong mao ang pagsunod unsa ang gusto sa Ginoo nga akong buhaton, ug kana nga tumong mao ang bililhon kanako.
Samtang ako naningkamot, usa ka adlaw gibati nako nga nadasig sa pag-adto sa akong buotan nga higala kinsa gikan sa Estados Unidos ug nagpuyo sa akong lugar. Wala ko masayod kon unsay mahitabo niana nga higayon—miadto ko tungod kay ang Espiritu migiya nako—apan ang akong higala ug ang iyang amahan nahimong instrumento sa pagtabang nako unsay buhaton sa pagpangaplay ug makakuha og visa nga akong gikinahanglan aron makaeskwela sa BYU. Uban sa ilang tabang ug uban sa dakong mga sakripisyo nga gihimo sa akong inahan sa pagbayad sa akong pagbiyahe, nakaadto ko didto. Usa kadto ka milagro.
Ang akong kinabuhi nagpadayon sa pag-uswag sa samang paagi. Akong gibuhat ang akong labing maayo ug dayon nakadawat og pagdasig, usa ka butang matag higayon, kon unsay sunod nakong buhaton. Nianang paagiha, nakatrabaho ko sa missionary training center, nakakita og paagi nga makabayad sa akong tuition, mihukom unsay akong major, sa kataposan nakagradwar, ug naminyo.
Ang mga tubag nga akong nadawat dili kanunay diha-diha ug wala koy hingpit nga detalyado nga plano, apan nakadawat ko og kasiguroan nga ang Ginoo nahimuot sa direksiyon nga akong gipadulngan.
Kon ang Pagpadayag Ingon og Dili Sakto
Paglabay sa pipila ka tuig, nakakat-on ko unsa ka importante ang sakripisyo sa pagsunod sa ebanghelyo. Kon kita gusto nga ang Ginoo mohatag nato og katuyoan ug direksyon, kinahanglan nga andam kita nga modawat niana nga direksyon.
Human makaeskwela, wala magkadimao ang mga butang sumala sa plano uban sa kompaniya nga akong gitrabahoan, mao nga ang akong asawa ug ako adunay duha ka kapilian: magpabilin sa Estados Unidos o mopauli ngadto sa Chile. Kaming duha klaro nga mibati nga kami kinahanglan nga mopauli ngadto sa Chile. Ingon og normal ra nga gusto nga mopauli, apan kini usa ka malisod nga panahon. Wala kaayoy daghang trabaho sa Chile. Naglisod ko sa pagbaligya sa among balay. Bahin sa pinansyal ug pamaagi sa pagpamalhin, kini dili ang labing maayong buhaton, bisan ang among mga pamilya naghunahuna nga kami wala magmaalamon.
Unsay inyong buhaton kon ang pagpadayag nga moabot nagkasumpaki sa sentido komon? Bisan og kadto lisod, ang akong asawa ug ako nasayod unsay buhaton. Gipahinumdoman namo ang among kaugalingon nga ang ebanghelyo midala namo hangtod niini nga higayon. Kon wala ang Ginoo, wala unta akoy inspirasyon nga nakatabang nako nga moserbisyo og misyon, modawat sa akong edukasyon, ug mahimamat ang akong asawa. Kinahanglan lang mosalig kami bisan unsa pa ang mga rason, nga gikinahanglan kami sa Chile.
Gibilin namo ang among balay sa among bishop aron kini mapaabangan hangtod nga iya kining mabaligya, ug kami mibalhin. Lisod kadto, apan nakasinati kami og daghan kaayong mga panalangin ug mga milagro sa dihang kami mipatalinghog sa tawag sa Ginoo. Ang Ginoo nasayod asa kami gikinahanglan ug asa kami mas makaserbisyo og maayo sa Iyang mga katuyoan, ug Siya mipanalangin namo tungod sa among pagkamasulundon.
Pagpangita og mga Solusyon uban sa Ginoo
Manghinaot ko nga ang mga young adult karon mosunod sa ehemplo sa igsoong lalaki ni Jared. Bisan og ang mga Jaredite nakahibalo nga kinahanglan silang mopanaw ngadto sa gisaad nga yuta, sila wala gayod makasiguro unsaon nila sa paghimo niini. Sa dihang ang igsoon nga lalaki ni Jared “mitawag diha sa ngalan sa Ginoo” (Ether 2:15), Siya mitanyag kaniya og pipila ka solusyon. Ang Ginoo misulti kaniya sa paghimo og mga kasko ug mihatag kaniya og giya unsaon nga adunay hangin diha sa mga kasko.
Apan ang Ginoo nangutana sa igsoon nga lalaki ni Jared: “Unsa ang buot nimo nga Ako kinahanglan mobuhat nga kamo makabaton og kahayag diha sa inyong mga sakayan?” (Ether 2:23). Imbis nga sultihan ang igsoon nga lalaki ni Jared unsay buhaton, ang Ginoo mihangyo kaniya sa paglakaw ug pagpangita og iyang kaugalingon nga solusyon.
Ingon niana ang nahitabo sa akong kinabuhi. Usahay ang Ginoo mohatag nako og klaro nga mga panudlo. Sa ubang higayon Siya maghulat nako nga moduol Kaniya uban sa akong kaugalingong mga ideya. Bisan hain, hinoon, importante nga akong giapil Siya sa proseso. Ang pagpuasa, pag-ampo, ug pagpakitambag uban sa Ginoo mao ang gikinahanglan nga mga lakang alang ni bisan kinsa nga maningkamot sa paghimo og mga desisyon mahitungod sa ilang mga kinabuhi.
Alang ni bisan kinsa nga mga young adult nga nangita og dugang nga katuyoan, ako motanyag niini nga tambag: Dangop ngadto sa Ginoo alang sa personal nga pagpadayag. Gamita kanunay ang inyong patriyarkal nga panalangin. Ug andam nga mosakripisyo sa dili kaayo importante nga mga butang sa inyong kinabuhi kon ang Ginoo mosulti kaniyo nga Siya adunay mas dako nga katuyoan alang kaninyo.
Akong gihigugma ang Ginoo. Ang ebanghelyo mao ang tanan kanako. Nasayod ko nga ang Ginoo nakakita sa inyong potensiyal ug gusto nga motabang ninyo nga makab-ot ang inyong balaan nga katuyoan.