Digital Lamang

Unsa man Kon Ako Morag Wala Mobati sa Espiritu?

Ni Victoria Passey

Mga Magasin sa Simbahan

Ikonsiderar kining tulo ka ideya sa pagkat-on pa og dugang mahitungod kon sa unsang paagi nga ang Espiritu makigsulti nimo.

Imahe

Young adult nga babaye nga naggunit sa mga kasulatan ug nagtan-aw sa layo

Gilitratohan ni Catherine Frost

Human sa atong bunyag, kita gikompirmahan isip mga miyembro sa Ang Simbahan ni Jesukristo sa mga Santos sa Ulahing mga Adlaw ug gidapit sa pagdawat sa gasa sa Espiritu Santo pinaagi sa pagpandong sa mga kamot sa usa ka tawo nga naghupot og katungod sa pagkapari. Kini nga gasa naghatag kanato og katungod sa kanunayng pakig-uban sa Espiritu Santo kon kita padayong magsunod sa mga sugo.

Ang atong koneksyon sa Espiritu Santo makatabang nato sa pagsunod sa pagdapit ni Presidente Russell M. Nelson nga “Paminaw Kaniya.”¹ Sama sa gitambag ni Presidente Nelson, “Wala gayod sukad nga mas importante nga makahibalo unsaon sa pagpaminaw sa Espiritu nga mamulong kaninyo kay sa karon.”² Unsa ang atong mahimo kon kita maghunahuna nga kita dili makabati o wala mobati sa Espiritu? Ania ang pipila sa daghang posibilidad.

1. Sabta ang mga tahas sa Espiritu Santo ug kon unsaon Niya sa pagpakigsulti sa daghang paagi.

Kon kita maningkamot nga mobati sa Espiritu, importante nga atong sugdan ang pagsabot kon kinsa ang Espiritu Santo ug kon sa unsang paagi Siya makigsulti nato. Ang matag tawo mahimong makadawat og pagpadayag sa lainlaing paagi; pananglitan, ang pipila ka tawo mas sagad nga mobati og kainit samtang ang uban kasagaran mobati og kalinaw. Ang mao nga mga pag-aghat ug mga pagbati mahimong moabot sa matag usa nato sa nagkalainlaing paagi diha sa lainlaing higayon. Hunahunaa pag-usab ang mga higayon sa nangagi dihang imong gibati ang Espiritu Santo. Ikonsiderar ang pagsulat sa unsay imong gibati nianang mga higayona. Ang pagbuhat sa ingon mahimong makatabang nimo nga makita kon sa unsang paagi nga ang Espiritu makigsulti nimo ug makatabang nimo sa pag-ila kon ikaw mobati niana karon—nga mao ang ebidensya sa Espiritu Santo sa imong kinabuhi. Ania ang sanglitanan sa unsay gitudlo sa pipila ka propeta ug apostoles mahitungod sa kinaiya sa Espiritu Santo:

Presidente Nelson: “Sa Dios nga Kapangulohan, ang Espiritu Santo mao ang mensahero. Siya modala sa mga hunahuna diha sa inyong alimpatakan nga gusto sa Amahan ug sa Anak nga inyong madawat. Siya mao ang Maghuhupay. Siya mohatag og usa ka pagbati sa kalinaw sa inyong kasingkasing. Siya mopamatuod sa kamatuoran ug mokompirma unsa ang tinuod samtang [kita] maminaw ug mobasa sa pulong sa Ginoo.”³
Presidente Henry B. Eyring, Ikaduhang Magtatambag sa Unang Kapangulohan: “Ang kanunay nga pagbaton sa Espiritu uban kanato mao ang makabaton sa giya ug direksyon sa Espiritu Santo sa atong inadlaw nga mga kinabuhi. Kita, sama pananglit, mapasidan-an pinaagi sa Espiritu aron mabatokan ang tintasyon sa pagbuhat og daotan. … Kon kita moambit sa sakramento uban sa hugot nga pagtuo, ang Espiritu Santo makapanalipod nato ug niadtong atong gihigugma gikan sa mga tintasyon nga moabot nga nagkakusog ug nagkadaghan. Ang pagpakig-uban sa Espiritu Santo makapahimo sa maayo nga mas madanihon ug makapaminos sa kusog nga tintasyon. Kini igo na nga rason aron maningkamot kita nga mahimong takos aron ang Espiritu magauban kanato sa kanunay. Sama nga ang Espiritu Santo naglig-on kanato batok sa daotan, Siya usab naghatag nato sa gahom sa pag-ila tali sa kamatuoran gikan sa mga bakak.”⁴
Elder David A. Bednar sa Korum sa Napulog Duha ka Apostoles: “Ang Espiritu Santo mao ang ikatulo nga sakop sa Dios nga Kapangulohan; Siya usa ka personahe sa espiritu ug magsaksi sa tanang kamatuoran. Sa mga kasulatan ang Espiritu Santo mao ang gipasabot nga Maghuhupay (tan-awa sa Juan 14:16–27; Moroni 8:26), usa ka magtutudlo (tan-awa sa Juan 14:26; D&P 50:14), ug usa ka tigpadayag (tan-awa sa 2 Nephi 32:5). Ang mga pagpadayag gikan sa Amahan ug sa Anak ihatag pinaagi sa Espiritu Santo. Siya ang mensahero ug ang saksi sa Amahan ug sa Anak.”⁵
Elder Ronald A. Rasband sa Korum sa Napulog Duha ka Apostoles: “Hinumdomi ang saad sa Ginoo: ‘Ako mohatag nganha kanimo sa akong Espiritu, nga mohatag og kahayag sa imong hunahuna, nga mopuno sa imong kalag uban sa hingpit nga kalipay’ (Doktrina ug mga Pakigsaad 11:13). Ganahan ko niana nga pasalig. Ang hingpit nga kalipay nga mopuno sa atong mga kalag magdala og mahangtorong panglantaw nga sukwahi sa adlaw-adlaw nga pagpakabuhi. Kanang hingpit nga kalipay moabot isip kalinaw taliwala sa kalisdanan o kasakit. Maghatag kini og kahupayan ug kaisog, mopasabot sa mga kamatuoran sa ebanghelyo, ug mopalambo sa atong gugma alang sa Ginoo ug sa tanang anak sa Dios.”⁶
Elder Gary E. Stevenson sa Korum sa Napulog Duha ka Apostoles: “Ang tulo ka gipadayag nga mga kamatuoran nga nagdala kanato sa kahibalo bahin sa Espiritu Santo … mao nga ang Espiritu Santo ang ikatulong sakop sa Dios nga Kapangulohan, ang Espiritu Santo usa ka personahe sa espiritu, ug ang gasa sa Espiritu Santo moabot pinaagi sa pagpandong sa mga kamot. … Ang tulo ka tubag sa pangutana nga ‘Unsaon sa Espiritu Santo pagtabang kaninyo?’ [mao nga] ang Espiritu Santo mopasidaan, ang Espiritu Santo mohupay, ug ang Espiritu Santo mopamatuod.”⁷
Presidente Boyd K. Packer (1924–2015): “Kining hilabihan ka sensitibo, malumo nga espirituhanong komunikasyon dili makita sa atong mga mata ni madungog sa atong mga dunggan; usa kini ka tingog nga bation sa usa ka tawo labaw kay sa madungog. … Ang tingog sa Espiritu gihulagway diha sa mga kasulatan nga dili makusog ni pagaw, dili usa ka tingog sa dugdog, ni kini usa ka tingog sa usa ka dako nga kaguliyang nga kasaba, apan usa kini ka hagawhaw nga tingog, nga hingpit sa kalumo, ingon nga kini usa ka honghong, ug kini midulot bisan ngadto sa kinahiladman sa kalag ug nakapainit sa ilang mga kasingkasing.⁸

Ikaw makakat-on og dugang kon sa unsang paagi nga ang Espiritu Santo makigsulti diha sa hilisgotan nga “Espiritu Santo” sa kinatibuk-ang komperensiya ug sa Mga Hilisgotan sa Ebanghelyo.

Ikonsiderar: Unsa ang akong gibati nga ang Espiritu Santo nakigsulti nako?

2. Tumana ang imong mga pakigsaad.

Ang pagdawat sa gasa sa Espiritu Santo konektado gayod sa atong pakigsaad sa bunyag, ug ang mga pakigsaad nagkinahanglan og paningkamot sa atong bahin aron madawat ang gisaad nga mga panalangin. Kita gipahinumdoman sa unsay atong gisaad nga buhaton ug unsay gisaad ngari nato matag semana samtang moambit kita sa sakramento: kita nagsaad sa pagdala sa ngalan ni Kristo, kanunay nga mohinumdom Kaniya, ug maghupot sa Iyang mga sugo, ug kita gisaaran nga makabaton kanunay sa Iyang Espiritu uban kanato kon kita mohimo niini (tan-awa sa Doktrina ug mga Pakigsaad 20:77, 79).

Aron madawat ang kanunay nga pakig-uban sa Espiritu Santo, kita kinahanglang mohimo sa atong bahin. Ikonsiderar kini nga tambag gikan sa mga lider sa Simbahan agi og pagsugod:

Presidente Nelson: “Samtang kita maningkamot nga mahimong mga disipulo ni Jesukristo, ang atong mga paningkamot sa pagpaminaw Kaniya kinahanglan nga mas gitinguha nato. Kinahanglan kini og tininuod ug makanunayon nga paningkamot sa pagpuno sa atong inadlaw nga kinabuhi sa Iyang mga pulong, sa Iyang mga pagtulon-an, sa Iyang mga kamatuoran.”⁹
Presidente Dallin H. Oaks, Unang Magtatambag sa Unang Kapangulohan: “Ang panginahanglan sa pagpabiling limpyo sa atong personal nga templo aron makabaton sa pakig-uban ug giya sa Espiritu Santo mao ang pagpasabot sa kaimportante sa sugo nga moambit sa sakramento sa Igpapahulay. … Ang pagbag-o sa atong mga pakigsaad pinaagi sa pag-ambit sa sakramento kinahanglan usab nga pagaunhan og paghinulsol, aron kita moadto nianang sagrado nga ordinansa nga adunay usa ka masulub-on nga kasingkasing ug mahinulsolon nga espiritu (tan-awa sa 2 Ne. 2:7; 3 Ne. 12:19; D&P 59:8). Dayon, samtang magbag-o kita sa atong mga pakigsaad sa bunyag ug magpamatuod nga kita ‘sa kanunay mohinumdom kaniya’ (D&P 20:77), ang Ginoo mobag-o sa gisaad nga kapasayloan sa atong mga sala, ubos sa mga kondisyon ug sa panahon nga iyang pilion. Usa sa nag-unang mga katuyoan ug mga epekto niining pagbag-o sa mga pakigsaad ug paglimpyo gikan sa sala mao ‘nga [kita] unta sa kanunay makabaton sa iyang Espiritu uban [kanato]’ (D&P 20:77).”¹⁰
Presidente Eyring: “Alang sa daghang rason, gikinahanglan nato ang kanunay nga pakig-uban sa Espiritu Santo. Kita nagtinguha niini, apan nasayod kita gikan sa kasinatian nga dili sayon ang pagmentinar niini. Matag usa nato makahunahuna, makasulti, ug makabuhat og mga butang sa atong inadlaw nga pagpakabuhi nga makapasilo sa Espiritu. Ang Ginoo mitudlo nato nga ang Espiritu Santo makauban nato sa kanunay kon ang atong mga kasingkasing puno sa gugma nga putli ug kon ang hiyas modayan-dayan sa atong hunahuna nga walay paghunong (tan-awa sa D&P 121:45). … Kon inyong ipakita ang inyong kaandam sa pagsunod, ang Espiritu mopadala ninyo og dugang nga mga pag-aghat kon unsay ipabuhat sa Dios kaninyo alang Kaniya. Kon mosunod kamo, ang mga pag-aghat sa Espiritu mas kanunayng moabot, mas magkaduol ngadto sa kanunay nga pagpakig-uban. Ang inyong gahom sa pagpili sa matarong molambo.”¹¹
Elder Stevenson: “Importante sa atong pisikal ug espirituhanong kaluwasan nga mapabilin nato ang gasa sa Espiritu Santo. Makasugod kita sa pagbuhat sa ingon pinaagi sa pagpaningkamot sa pagtuman sa mga sugo, pagbaton og indibidwal ug pamilya nga pag-ampo, pagbasa sa mga kasulatan, ug pagtinguha og mahigugmaon ug mapasayloon nga mga relasyon uban sa pamilya ug mga minahal sa kinabuhi. Kinahanglan nga atong ipabiling mahiyason ang atong mga hunahuna, mga binuhatan, ug pinulongan. Kinahanglan natong simbahon ang atong Langitnong Amahan diha sa atong mga panimalay, sa simbahan, ug, kon mahimo, didto sa balaan nga templo. Paduol sa Espiritu, ug ang Espiritu mopaduol kaninyo.”¹²
Elder Richard G. Scott (1928–2015) sa Korum sa Napulog Duha ka Apostoles: “Ang atong Amahan naglaom nga kamo makakat-on kon unsaon sa pagbaton … [og] balaanong tabang pinaagi sa pagpakita og hugot nga pagtuo diha Kaniya ug sa Iyang Balaang Anak, nga si Jesukristo. Kon kamo nakadawat og dinasig nga giya pinaagi lamang sa pagpangayo, mahimo kamong huyang ug mas magdepende pa diha Kanila. Nasayod Sila nga ang mahinungdanong personal nga pagtubo moabot samtang manglimbasog kamo sa pagkat-on kon unsaon nga magiyahan sa Espiritu.”¹³

Ikonsiderar: Unsay akong mahimo aron mas hingpit nga makatuman sa akong mga pakigsaad sa Dios?

3. Pangayo og tabang ug mosalig sa Maghuhupay.

Bisan kon kita nagpuyo nga takos sa Espiritu Santo ug naghimo sa unsay gisugo sa Ginoo nato, diha sa grabe nga depresyon ug susama nga mga pagsulay sa mental nga kahimsog, mahimong mas maglisod gihapon kita sa pagbati sa Espiritu Santo. “Ang pagkadili mobati sa Espiritu, o usa ka kinatibuk-ang pagbati nga nawad-an og pagbati o walay pagbati, sa kasagaran usa ka sintomas nga dili maayo ang mental nga kahimsog. Ang Dios wala mobiya kanimo.”¹⁴ Kon ang mental nga kahimsog mahimong mohatag og limitasyon sa atong abilidad sa pagbati sa Espiritu, mahimong makigtambag kita sa masaligan nga mga minahal sa kinabuhi, mga lider sa Simbahan, ug mga propesyonal alang sa mental nga kahimsog; hinumdoman ang mga kasinatian sa dihang gibati nato ang Espiritu sa nangagi; ug himoon ang atong mga panimalay nga mga lugar sa kalinaw diin ang Espiritu makapuyo.¹⁵

Kon kita nakigbisog sa pagbati sa Espiritu, o sa pagbati og bisan unsa, kita mahimong makabaton og hugot nga pagtuo diha sa gugma sa Langitnong Amahan alang nato. Kita mahimong mosalig sa saad sa Manluluwas, “Dili ko kamo biyaan nga daw mga ilong tuwapos: Mobalik ako kaninyo” (Juan 14:18). Ug kita mahimong mopadayon sa pag-ampo alang sa Espiritu Santo, ang Maghuhupay, sa paghatag nato og kalinaw sa umaabot.

Mahimo usab natong hinumdoman nga ang Dios naghatag nato og daghan pang pamaagi aron sa pagtabang nato nga mobati sa Iyang gugma. Sama sa gisulti ni Elder Jeffrey R. Holland sa Korum sa Napulog Duha ka Apostoles, “Tungod kay si Jesus mibaktas sa ingon ka taas, masulub-ong agianan nga nag-inusara, dili na kita kinahanglang mohimo pa sa ingon. Ang Iyang biyahe nga nag-inusara naghatag og lapad nga pakig-uban alang sa atong gamay kaayo nga luna niana nga agianan—sa puno sa kalooy nga pag-amuma sa atong Amahan sa Langit, sa walay pagkapakyas nga pakig-uban niini nga Pinalanggang Anak, sa bug-os nga gasa sa Espiritu Santo, sa mga anghel sa kalangitan, sa mga sakop sa pamilya nga anaa sa duha ka bahin sa tabil, sa mga propeta ug mga apostoles, sa mga magtutudlo, sa mga lider, ug sa mga higala. Tanan kini ug daghan pa gihatag isip mga kaubanan sa atong mortal nga panaw tungod sa Pag-ula ni Jesukristo ug sa Pagpahiuli sa Iyang ebanghelyo. Gipalanog gikan sa kinatumyan sa Kalbaryo mao ang kamatuoran nga kita dili gayod mapasagdan nga mag-inusara o dili mabuligan, bisan kon usahay bation nato ang ingon niini.”¹⁶ Kon kita naglisod sa pagbati sa Espiritu, kita mahimong mosalig ug mohupot niana nga mga kamatuoran.

Ikonsiderar: Kang kinsa ko makigtambag mahitungod sa akong mga pagbati? Sa unsa pa nga paagi nga ako makaila sa gugma sa Dios ug sa mga panalangin sa akong kinabuhi samtang ako maghulat nga mobati pag-usab sa Espiritu?