Digital Lamang: Mga Young Adult
3 ka Paagi nga ang Kinatibuk-ang Komperensiya Makausab sa Inyong Kinabuhi
Ania ang pipila ka paagi nga mopauli gikan sa komperensiya uban sa kongkreto nga plano.
Gilitratohan sa pamilya Kaufusi
Kanunay akong makat-on og bag-ong mga baroganan kon ako maminaw sa kinatibuk-ang komperensiya. Mapahinumdoman ako sa gugma sa Dios alang nako, makasabot ko og bag-ong mga butang mahitungod sa Simbahan ug sa Pag-ula ni Jesukristo, ug makita nako ang mga kasulatan sa bag-ong panglantaw. Usa ka talagsaong oportunidad nga maminaw sa buhing mga propeta ug apostoles.
Apan usahay maglisod ko sa paggamit nianang bag-ong kahibalo ug pagsabot ngadto sa butang nga akong mabuhat, ug sama sa gipasabot ni Elder Dale G. Renlund sa Korum sa Napulog Duha ka Apostoles, “Kadaghanan sa mga panalangin nga tinguhang ihatag sa Dios kanato nagkinahanglan og buhat sa atong bahin—lihok nga magbase sa atong hugot nga pagtuo kang Jesukristo. Ang pagtuo diha sa Manluluwas usa ka baroganan sa buhat ug gahom.”1
Karong bag-o naningkamot ko sa pagsunod niana nga tambag ug mipauli gikan sa komperensiya nga nasayod sa kongkreto nga mga paagi sa paglihok. Ania ang tulo ka sugyot sa paghimo og plano nga mabuhat human sa komperensiya.
1. Tambong nga adunay piho nga mga pangutana.
Pirme na nato kining madunggan, apan kini tinuod! Ang pag-ila unsay inyong gipangita makatabang kaninyo sa pagtutok sa inyong pagtuon ug pagpangandam ug pag-angkon og piho nga panabot samtang kamo magtan-aw o maminaw sa kinatibuk-ang komperensiya.
Ug kon nangita kamo og butang nga mabuhat, sulayi sa paglakip og mga berbo sa inyong mga pangutana. Ania ang pipila ka ehemplo:
-
Unsaon nako sa pagtuon sa akong mga kasulatan sa mas epektibong paagi?
-
Unsay akong mahimo nga mas daghan ang masabtan sa akong pagsimba didto sa templo?
-
Unsa ang usa ka baroganan ang akong madugang sa akong kinabuhi nga mas makapaduol nako ngadto sa Langitnong Amahan ug sa Manluluwas?
2. Paghunahuna sa uban.
Samtang ang komperensiya adunay talagsaong mga mensahe sa pagtabang nato nga molambo ang atong mga kinabuhi, kanunay usab kitang gipahimangnoan sa pagpalambo sa atong mga relasyon ug magmatngon sa mga panginahanglan niadtong anaa sa atong palibot. Ang pagtambong sa komperensiya nga naghunahuna og usa ka tawo—usa ka kauban sa kwarto, inyong kapikas, usa ka sakop sa pamilya, usa ka higala—makatabang ninyo nga makabaton og lahi nga kasinatian sa kinatibuk-ang komperensiya. Tingali mobati kamo nga naaghat nga ila-ilahon pag-ayo kadtong inyong gipangalagaran, lig-onon ang dugay nang relasyon, o gani pangitaon ang usa ka tawo nga wala kaayo ninyo mailhi.
Sama sa gisulti ni Sister Sharon Eubank, Unang Magtatambag sa Kinatibuk-ang Kapangulohan sa Relief Society: “Mga kaigsoonan, pinaagi sa inyong pagpangalagad, mga donasyon, panahon, ug gugma, kamo nahimong tubag sa daghan kaayong mga pag-ampo. Ug anaa pa gayoy daghan pa nga buhatonon. Isip nabunyagan nga mga miyembro sa Simbahan, kita ubos sa pakigsaad nga moamuma niadtong mga nanginahanglan. Ang atong indibidwal nga mga pagpaningkamot wala gayod nagkinahanglan og kwarta o layo nga mga dapit; kini nagkinahanglan sa giya sa Balaang Espiritu ug usa ka andam nga kasingkasing nga moingon ngadto sa Ginoo, ‘Ania ako, ipadala ako.’”2
3. Pagmatugtanon ngadto sa mga tubag gikan sa Espiritu.
Dili tanang mga tubag moabot sa unsay gisulti gayod sa mga mamumulong. Pagbantay sa unsay isulti sa Espiritu kaninyo pinaagi sa mga hunahuna ug mga pagbati. Si Elder Dieter F. Uchtdorf sa Korum sa Napulog Duha ka Apostoles miingon: “Ang mga tubag sa inyong piho nga mga pag-ampo mahimong direktang moabut gikan sa usa ka partikular nga pakigpulong o gikan sa piho nga hugpong sa mga pulong. Sa laing mga higayon ang mga tubag mahimong moabot gikan sa mora og walay kalabotan nga pulong, hugpong sa mga pulong, o awit. Ang kasingkasing nga napuno sa pasalamat alang sa mga panalangin sa kinabuhi ug ang dakong tinguha sa pagpaminaw ug pagsunod sa mga pulong sa tambag moandam og agianan alang sa personal nga pagpadayag.”3
Ug kon madawat na nato kana nga pagpadayag, importante nga isulat kini. Bisan human sa kusog kaayo nga espirituhanon nga kasinatian sa komperensiya, ang atong maayong mga tumong mahimong mawala kon kita dili makahinumdom sa eksakto unsa nga mga pulong o mga istorya ang nakadasig nato, o unsay atong gusto nga palamboon. Si Presidente Russell M. Nelson mitambag nato sa “pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—oo, sa mga tinguha sa inyong kasingkasing. Ug dayon maminaw! Isulat ang mga ideya nga mosulod sa inyong hunahuna. Irekord ang inyong mga gibati ug sundi kini sa paglihok sa unsay giaghat nga angay ninyong buhaton. Kon inyong balikbalikon kini nga proseso matag adlaw, matag bulan, matag tuig, kamo ‘molambo ngadto sa baroganan sa pagpadayag.’”4
Ang paghangyo sa Ginoo sa pagtabang nato sa pag-implemintar sa bag-ong mga kausaban sa atong kinabuhi makapahimo sa kinatibuk-ang komperensiya nga mas usa ka personal nga kasinatian. Dili kinahanglan nga butang nga dako o lisod—bisan ang pagpauli uban sa usa o duha ka butang nga gusto ninyong gamiton sa inyong kinabuhi makahatag na kini og kaayohan. Sumala sa gipasabot ni Elder Michael A. Dunn sa Seventy, “Ang matag paningkamot nga atong himoon sa pag-usab—bisan unsa pa kini ka gamay alang kanato—tingali maoy mohimo og labing dako nga kalainan sa atong kinabuhi.”5 Ang Ginoo nakakita sa atong mga paningkamot ug mopadayon sa paggiya nato samtang kita magtinguha sa Iyang tambag ug hinumdoman unsay atong nakat-onan sa kinatibuk-ang komperensiya.