Digital Lamang: Mga Young Adult
Pag-usab sa Akong Panglantaw sa Nagpadayon nga mga Hagit
Kon kita nag-atubang og mga hagit nga dili masulbad, unsaon nato nga makapadayon uban sa hugot nga pagtuo?
Dili ba nindot nga adunay plano alang sa imong kinabuhi? Aron mahibaloan ang tanan? Nagtuo ko nga nakahibalo ko, hangtod nga ako nadayagnos sa nagpadayon nga kondisyon sa panglawas nga gitawag og polycystic ovary syndrome (PCOS).
Sa dihang nadayagnos ko, nasuko ko ug naglibog usahay, ug akong gigahin ang akong tanang kusog sa pagwagtang niini nga kondisyon.
Unya akong naamgohan nga dili kana mao ang gusto sa Dios sa akong pagtan-aw niini nga pagsulay. Ang Espiritu mitabang nako nga makalingkawas niining tulo ka dili maayong mga panglantaw nga ako nanglimbasog ug pulihan kini og mas maayo:
“Kini nga Hagit Akong Sayop” “Kini nga Hagit Dili Akong Sayop—Kabahin Lamang Kini sa Pagkamortal”
Sa sinugdanan, nagtuo ko nga ako nakahimo og butang nga sayop nga nakaangkon niini nga sakit ug nga kon ako mousab sa akong mga kinaiya, ako “mamaayo.”
Nagkabuang ko sa pagsiksik ug gisulayan ang daghang “mga solusyon” nga nakatabang og gamay.
Sa dihang miduol ko sa Langitnong Amahan alang sa mga tubag, ang Espiritu mitabang nako nga makaamgo nga kita dili mao ang mabasol sa daghang mga panlimbasog nga atong giatubang—ang ubang mga hagit moabot lang sa pagka-mortal. Si Elder Anthony D. Perkins sa Seventy miingon, “Ang pag-antos wala magpasabot nga ang Dios wala mahimuot sa inyong kinabuhi.” Pinaagi sa paghunong sa pagpamasangil ug pagpakita og hugot nga pagtuo, ako nakakita og paglaom ug kalinaw.
“Kini nga Problema Kinahanglan nga Mawala” “Ako Makakaplag og Hingpit nga Kalipay Bisan kon Kini nga Problema Magpabilin”
Nagtuo ko nga ako mamaayo sa hingpit kon ako adunay igo nga pagtuo, ug kanunay akong mahigawad kon ako walay hugot nga pagtuo. Sa kataposan nakat-on ko nga importante usab nga magbaton og hugot nga pagtuo nga dili mamaayo.
Ganahan ko sa mensahe nga gipaambit ni Elder David A. Bednar sa Korum sa Napulog Duha ka Apostoles mahitungod sa usa ka batan-ong lalaki nga adunay kanser kinsa nangayo og panalangin sa pagkapari nga mamaayo. Bisan pa niana, si Elder David A. Bednar misulti kaniya nga aron mamaayo, siya kinahanglan usab nga magbaton og hugot nga pagtuo nga dili mamaayo. Siya miingon, “kinahanglang [niyang] buntugon, pinaagi sa Pag-ula ni Ginoong Jesukristo, ang kalagmitan sa ‘kinaiyanhon nga tawo’ nga anaa natong tanan sa pagpangayo nga walay pasensya ug pagpamugos kanunay sa mga panalangin nga gusto nato ug gituohan nga angay nato.”
Ang hugot nga pagtuo ngadto sa Dios mosangpot sa mga milagro—kon kana mao ang kabubut-on sa Dios. Apan kon kita wala makasinati og mga milagro, nan unsay sunod natong buhaton?
Diha sa Bag-ong Tugon, si Pablo naghisgot mahitungod sa pag-ampo sa pagkuha sa “tunok dinhi sa lawas” (tan-awa sa 2 Mga Taga-Corinto 12:7). Bisan og ang iyang problema wala dayon masulbad, si Pablo nakat-on sa pagsalig sa Dios ug pagsalig Kaniya alang sa kalig-on sa pag-atubang sa malisod nga hagit: “Igo kanimo ang akong grasya: kay sa imong kaluya makita sa hingpit ang akong gahom” (2 Mga Taga-Corinto 12:9).
Ang akong “tunok dinhi sa lawas” nakatabang usab nako nga mosalig sa Dios, sa ingon mihimo sa akong kahuyang ngadto sa gahom. Akong nakat-onan nga ang pagbuntog sa mga hagit nagpasabot nga makahimo sa pagdumala niini pinaagi sa pagsalig sa gahom gikan sa Manluluwas, kay sa pagwagtang niining tanan.
Ang hugot nga pagtuo diha sa Dios mosangpot ngadto sa mga milagro—kon kana mao ang kabubut-on sa Langitnong Amahan. Apan kon kita wala makasinati sa mga milagro nga atong gitinguha sa paagi nga atong gilaoman, makakita gihapon kita sa Iyang kamot nga milagrosong naglihok sa atong tibuok kinabuhi. Sama sa gitudlo ni Presidente Russell M. Nelson, “Buhata ang esprituhanong buhat sa pagtinguha og mga milagro, sa mainampoong paagi hangyoa ang Dios sa pagtabang ninyo nga makagamit niana nga matang sa hugot nga pagtuo. Ako mosaad nga kamo makasinati sa inyong kaugalingon nga si Jesukristo ‘hatagan niyag gahom ang huyang; ug ang walay umoy hatagan niyag kusog’” (Isaias 40:29).
“Walay Paglaom” “Adunay Paglaom Kanunay”
Ang usa ka masakit nga bahin kon adunay PCOS mao ang pagkadili makaanak. Sa unang higayon akong nahibaloan nga lisod alang nako nga makabaton og mga anak, gibati ko og kasuko ug gibudhian.
Sa dihang misalig ko ni Kristo, akong nakat-onan ang pagsalig sa kabubut-on ug panahon sa Dios.
Wala ko kahibalo kon ako makabaton ba og mga anak niini nga kinabuhi, apan ako nagtuo, sama sa gitudlo ni Elder Jeffrey R. Holland sa Korum sa Napulog Duha ka Apostoles, nga “anaa kanato ang tanan nga rason nga molaom sa mga panalangin gani mas dagko kay sa ato nang nadawat.”
Bisan kon ang inyong mga hagit wala masulbad, adunay paglaom kanunay: paglaon sa hingpit nga kalipay, paglaom sa pagtabang sa uban pinaagi sa empatiya nga inyong naangkon pinaagi sa inyong mga kasinatian, ug paglaom sa daghang mga panalangin nga moabot.
Usahay nakigbisog ko sa dili maayong mga panglantaw mahitungod sa akong mga hagit, apan kon ako nakigbisog, maghunahuna ko sa Manluluwas ug sa Iyang mga saad. Kon ako maningkamot sa pagpalambo sa gagmay nga mga paagi matag adlaw, mosalig sa Dios, ug mangayo Kaniya ug sa uban og tabang, ang akong umaabot mapuno sa hingpit nga kalipay ug mga panalangin—ug mao usab ang inyoha.