“Usa ka Sundanan aron Malikayan ang Pagbati nga Walay Pag-uswag,” Liahona, Sept. 2022.
Usa ka Sundanan aron Malikayan ang Pagbati nga Walay Pag-uswag
“Si Jesus mitubo sa kaalam ug sa gidak-on ug sa kahimuot kaniya sa Dios ug sa tawo” (Lucas 2:52), ug mao usab kita.
Litrato pinaagi ni Judith Ann Beck
Pagbati nga Walay Pag-uswag
Samtang naningkamot sa pagsunod sa ebanghelyo isip usa ka single adult, lisod nga dili mopokus sa piho nga mga bahin sa atong kinabuhi nga atong gilaoman nga lahi unta. Usahay moabot kita sa punto nga mobati nga walay pag-uswag. Alang nako, kadto nga mga pagbati nga walay pag-uswag sa piho nga aspeto daw maoy mopatigbabaw, ug magpabilin kini nako sa pipila ka adlaw, mga bulan, ug sa hinayhinay gani mga tuig. Daghan ko kanunay og mga rason nga magmalipayon ug mobati og maanindot bahin sa kinabuhi, apan usahay, kining pagbati nga walay pag-uswag grabe nga miigo nako.
Atol nianang higayona, ang akong tin-edyer nga pag-umangkong lalaki mihangyo sa paggahin og panahon uban nako. Siya nakaamgo og panginahanglan alang sa mga tumong sa iyang kinabuhi ug nangayo og tambag. Ako wala gayod mobati nga anaa sa posisyon sa kalig-on aron mohatag og dakong kaalam, apan naminaw ko. Ako nasayod nga ako “[maka]pamangamuyo” sa Dios alang sa tabang (tan-awa sa Alma 34:17–27) ug nag-ampo nga makasulti og butang nga makahuloganon alang niya. Agi og tubag, akong nahinumdoman ang Lucas 2:52: “Si Jesus mitubo sa kaalam ug sa gidak-on, ug sa kahimuot kaniya sa Dios ug sa tawo.”
Samtang naningkamot ko sa pagpokus sa mga panginahanglan sa akong pag-umangkon nga lalaki imbes sa akong kaugalingon, adunay nagsugod nga kausaban kanako. Ang akong pag-umangkon nga lalaki ug ako naghisgot mahitungod sa kon sa unsa man nga paagi si Kristo mitubo sa espirituwal, sosyal, pisikal, ug intelektuwal ug mao usab kita. Bisan kon ang mga panginahanglan sa akong pag-umangkon nga lalaki lahi kay sa akoa, kining upat ka aspeto sa paglambo mahinungdanon namong duha. Samtang naghisgot mahitungod sa kasulatan, akong naamgohan nga tubag kini sa akong kaugalingong mga pangutana mahitungod sa kon unsaon nga mahaw-as gikan sa pagkawalay pag-uswag.
Pag-usab sa Akong Pokus, Paglihok sa mga Plano
Sa dihang ako naningkamot nga molambo ingon nga ang Manluluwas milambo, ang akong pagpokus nausab, ug kana nga kausaban nagdala og dugang nga mga panalangin. Sama sa giingon ni Presidente Russell M. Nelson, “Ang kalipay nga atong gibati dili kaayo konektado sa mga sirkumstansiya sa atong kinabuhi apan konektado kaayo sa gitutokan sa atong kinabuhi.”1 Ang akong mga paningkamot nga mas molambo sama ni Jesukristo nakatabang nga mapalayo ang atensiyon gikan sa mga sirkumstansiya nga nakawagtang sa pagpokus ug nagpunting niini pag-usab ngadto sa mga aspeto nga akong mapauswag. Nakahimo ko nga ang akong mga gihunahuna akong lihokon.
Naghunahuna ko og maayo kon unsaon kaha nako sa paglambo diha sa matag aspeto nga gihisgotan diha sa Lucas 2:52, gikan sa kanunay nga pag-adto sa templo ngadto sa pagkompleto og layo nga lumba sa bisikleta.
Litrato sa Memphis Tennessee Temple pinaagi ni James Whitney Young
Sa matag aspeto sa akong mga tumong, aduna koy mga obserbasyon:
-
Samtang nagtrabaho sa usa ka tumong, gibati nako kanunay nga si Kristo milig-on nako sa espirituwal, sosyal, pisikal, ug intelektuwal nga paagi diha lamang nianang usa ka tumong.
-
Panagsa ra, kon aduna man, nga adunay nahitabo nga ang tumong nalahi sa ubang aspeto sa paglambo—kini daw konektado ug naglig-on sa usag usa. Ang pagpalambo sa usa ka aspeto mosangpot sa pagpalambo sa tanang uban nga mga aspeto. Ang pagpabaliwala sa bisan unsa nga aspeto makaapekto usab sa tanang uban nga mga aspeto. Akong naamgohan nga ang matag aspeto nagkinahanglan og atensiyon.
-
Hapit matag tumong naglakip sa ubang mga tawo—sa pagkat-on man gikan nila o sa pagpaambit sa mga hunahuna ug mga kasinatian ngadto nila—ug nakapalawom sa atong mga relasyon.
Pagkaplag ug Pagpaambit og Kalipay diha kang Kristo
Ako padayon nga adunay oportunidad nga makakita ug madasig sa paglambo diha sa uban, ug nanghinaot nga makahimo usab ako og ingon niini alang nila. Bag-ohay lang akong nakig-istorya sa usa ka dili minyo nga higala nga mibati nga walay pag-uswag ug nasagmuyo sa pipila ka sirkumstansiya sa kinabuhi. Naminaw ko aron makasabot, ug dayon nakaapaambit ko og mga kasinatian nga nakatabang nako ug mipunting usab og balik sa matag aspeto sa paglambo sa Manluluwas.
Samtang dili tanan nga aspeto sa kinabuhi ang mipabati kanako nga walay nausab nga pag-uswag sa katuigan nga milabay, ako nausab samtang ako nagkat-on nga mas mopokus diha sa Manluluwas ug maningkamot nga molambo sama Niya. Sama sa gipaambit ni Presidente Nelson, “Adunay daghang butang nga atong mahimong madumala. Kita mohan-ay sa atong mga prayoridad ug motino unsaon nato paggamit sa atong kusog, panahon, ug mga kahimtang. … Kita mopili kon asa kita modangop alang sa kamatuoran ug giya.”2 Bisan unsa pa man ang atong sirkumstansiya, ang mga aspeto sa paglambo diha sa Lucas 2:52 makatabang nato nga mausab ang atong pagpokus ug makakaplag og dugang nga kalipay ug pag-uswag pinaagi sa Langitnong Amahan ug sa Manluluwas.
Ang tagsulat nagpuyo sa Tennessee, USA.