Digital Lamang: Mga Young Adult
Pagpalapad sa Imong Pagsabot sa Imong Patriyarkal nga Panalangin
Kon ang patriyarkal nga panalangin imong himoon nga bahin sa imong inadlaw adlaw nga kinabuhi, makaplagan nimo ang kalig-on ug direksiyon nga moabot gikan niini nga langitnong gasa.
Litrato pinaagi ni Lloyd Eldredge
Kanus-a ang kataposang higayon nga imong gibasa ang imong patriyarkal nga panalangin?
Sa kalibotan nga puno sa importanting mga desisyon, ang imong patriyarkal nga panalangin nagsilbing personal nga kompas nga makatabang sa paggiya kanimo latas sa mga hagit sa mortalidad. Sa giingon ni Presidente Thomas S. Monson (1927–2018): “Ang patriyarkal nga panalangin usa ka pagpadayag ngadto sa modawat sa panalangin … sa pagpanalipod, pagdasig, ug pag-awhag sa pagkahimong aktibo ug pagkamatarong. Ang patriyarkal nga panalangin sa tinuoray naglakip og mga hugna gikan sa imong basahon sa mahangt[o]rong mga posibilidad.”1
Ang imong patriyarkal nga panalangin gituyo nga balikbalikon nga tun-an sa tibuok nimong kinabuhi kauban sa mga kasulatan ug sa mga pulong sa propeta, mao nga kon taudtaod na sukad sa imong kataposan nga pagbasa niini, basin ganahan kang mobasa niini pag-usab. Aniay pipila ka sugyot aron matabangan ka nga mas makasabot sa kaimportante sa imong patriyarkal nga panalangin ug himoon kini nga bahin sa imong inadlaw-adlaw nga kinabuhi.
1. Basaha ug Mamalandong Niini sa Kanunay
Ang kanunay nga pagbasa sa imong patriyarkal nga panalangin makatabang nimo sa paghinumdom sa dinasig nga mga pulong niini ug pag-amgo kon unsay kalambigitan niini sa lainlaing mga hugna sa imong kinabuhi. Pinaagi sa balikbalik nga pagbasa sa imong panalangin, gipakita nimo sa Langitnong Amahan nga ikaw andam nga motugot nga Siya mogiya kanimo.
Kon gahinan nimo og panahon ang pagtuon ug pagpamalandong sa dinasig nga mga pulong sa imong patriyarkal nga panalangin, tingali makakita ka og butang nga bag-o ug puno sa gahom sa matag higayon nga ikaw mobasa niini!
2. Pangitaa ang Dinasig nga Tambag
Samtang tun-an nimo ang imong patriyarkal nga panalangin, timan-i ang bisan unsang anaa kanimo nga mga pangutana. Kini nga mga pangutana posibling bisan unsa sama sa kon asa kaha ka moeskwela o kon kinsa kaha ang imong minyoan. Samtang ang imong panalangin dili maghan-ay sa tanan alang kanimo, makatabang kini sa pagdala kanimo ngadto sa maayong direksiyon. Paghimo og lista sa piho nga tambag nga imong nadawat diha sa imong patriyarkal nga panalangin. Tipigi kana nga lista uban sa imong panalangin aron ikaw makadangop niini sa kasagaran ug makita kon unsay piho nga tahas niana nga tambag nga anaa sa imong patriyarkal nga panalangin diha sa imong kinabuhi.
3. Hibaloa ang mahitungod sa Imong Kaliwatan
Ang imong patriyarkal nga panalangin magtug-an kanimo kon asa sa napulog duha ka tribo sa Israel ikaw nahisakop. Ug isip mga sakop sa balay ni Israel, tanan kita adunay responsibilidad nga manginlabot sa buhat sa Ginoo niining ulahing mga adlaw. Bisan unsa pa ang atong piho nga tribo, tanan kita kaliwat ni Abraham, mao nga tanan kita may katungod sa mga panalangin nga moabot pinaagi sa pakigsaad ngadto ni Abraham. Tun-i ang mga saad niana nga pakigsaad ug kon sa unsang paagi imong matuman ang imong responsibilidad sa pagpundok sa Israel.
4. Diskobreha ang mga Gasa ug mga Talento
Pangitaa ang piho nga mga talento nga gipanalangin kanimo sa Ginoo. Ang imong panalangin tingali dili maghisgot niini nga mga abilidad sa direktang paagi, apan samtang tun-an nimo ang imong panalangin uban sa pangutana diha sa imong hunahuna bahin sa imong mga gasa ug mga talento, makat-onan nimo ang mas daghan pa mahitungod sa imong kaugalingon. Ang pagdiskobre sa imong balaanong mga gasa makatabang nimo nga matuman ang imong misyon sa kinabuhi.
Ang patriyarkal nga mga panalangin sagrado ug personal. Mao nga importante nga dili ikompara ang mga sulod sa imong patriyarkal nga panalangin ngadto sa uban. Sigon sa nabantayan ni Presidente Monson: “Ang imong patriyarkal nga panalangin imoha ug para lang gayod sa imoha. Kini tingali mubo o taas, yano o tulukibon. Ang gitas-on ug ang pinulongan dili maoy importante sa usa ka patriyarkal nga panalangin. Ang Espiritu mao ang mopahayag sa tinuod nga kahulogan.”2
5. Hinumdomi ang Imong Balaanon nga Bili
Ang imong patriyarkal nga panalangin puno sa personal nga direksiyon gikan sa imong Langitnong Amahan. Markahi ang mga pulong nga gigamit diha sa imong patriyarkal nga panalangin sa paghulagway sa imong pagkatawo isip anak sa Dios. Pagbaton og usa ka lista bahin niini nga mga hiyas aron makita kon sa unsang paagi kini nagsilbi nga mga pahinumdom sa imong balaanon nga bili. Samtang mangita ka sa mga tudling nga naghulagway kon si kinsa ikaw, makabaton ka og mas maayong panabot kon unsay pagtan-aw sa Dios kanimo, ug molambo ang imong balaanon nga bili.
6. Magbaton og Mahangtoron nga Panglantaw
Samtang ang imong patriyarkal nga panalangin usa ka mapa nga mogiya kanimo niining mortalidad, usa usab kini ka kompas nga mogiya kanimo padulong sa kahangtoran. Ang pagbaton og mahangtoron nga panglantaw kon magtuon sa imong panalangin usa ka mahinungdanong paagi sa pagsabot sa mahinungdanong kahulogan ug sa kamatuoran nga ang tanan nga gisaad nga mga panalangin—madawat man dinhi sa kalibotan o sa sunod kinabuhi—matuman. Si Elder Jeffrey R. Holland sa Korum sa Napulog Duha ka Apostoles mipahayag: “Ang ubang panalangin moabot dayon, ang uban dugay, ug ang uban dili moabot hangtod didto na sa langit; apan alang niadtong modawat sa ebanghelyo ni Jesukristo, moabot kini.”3
Pinaagi sa kanunayng pagbasa sa imong patriyarkal nga panalangin ug sa pagtagad niini isip personal nga giya sa imong kinabuhi, mahimo nimo ang pag-atubang sa mga hagit ug mga desisyon nga nagpaabot kanimo sa unahan uban sa pagsalig. Ang imong kahibalo bahin sa imong pagkatawo isip anak sa langitnong mga ginikanan molig-on, ug makabaton ikaw og mas maayong panabot sa imong misyon dinhi sa yuta.