“Pagsunod sa Ehemplo ni Kristo: Pag-atiman Niadtong Nanginahanglan,” Liahona, Mar. 2023.
Pagsunod sa Ehemplo ni Kristo: Pag-atiman Niadtong Nanginahanglan
Gikan sa produksiyon sa pagkaon ngadto sa pagresponde panahon sa emerhensiya ngadto sa pagpangalagad, adunay daghang paagi nga kita makapakita og gugma ngadto sa atong mga silingan.
I Will Believe [Ako Motuo], ni Liz Lemon Swindle, dili mahimong pakopyahan
Isip mga sumusunod ni Jesukristo, ang mga miyembro sa Ang Simbahan ni Jesukristo sa mga Santos sa Ulahing mga Adlaw naningkamot sa pagsunod sa duha ka dagkong mga sugo: paghigugma sa Dios ug paghigugma sa atong mga silingan (tan-awa sa Mateo 22:37–39). Ang pagsunod niining duha ka dagkong mga sugo ug sa ehemplo ni Jesukristo mao ang naggiya sa Simbahan ug sa mga miyembro niini sa pag-atiman niadtong nanginahanglan.
Busa sa unsa man nga paagi nga ang Simbahan nagtabang sa pag-atiman niadtong nanginahanglan? Ug sa unsang paagi nga ang mga miyembro makaapil niining mahinungdanon nga buhat?
Mga Paagi sa Pagtabang
Isip mga miyembro sa Simbahan, kita naningkamot sa pagpangita niadtong nanginahanglan ug sa pagtabang sa tanang anak sa Dios bisan unsa pa ang ilang kaliwatan, nasyonalidad, o relihiyon.
Kita nag-atiman niadtong nanginahanglan sa daghang paagi, lakip sa:
-
Pagpuasa ug ang paggamit sa mga halad sa puasa.
-
Pagpangalagad sa usag usa.
-
Mga programa bahin sa pagbarog pinaagi sa kinaugalingong paningkamot.
-
Mga programa sa tibuok kalibotan bahin sa pagkaon, edukasyon, limpyo nga tubig, ug pag-atiman sa kahimsog.
-
Pagresponde panahon sa emerhensiya.
-
Boluntaryo nga mga proyekto diha sa komunidad.
Samtang ang pipila sa makitawhanong mga paningkamot sa Simbahan halapad kaayo, bisan ang ginagmay nga mga paningkamot kon matipon makahimo og dakong epekto. Ania ang pipila ka ehemplo kon sa unsang paagi nga ang mga miyembro sa Simbahan nagtabang niadtong nanginahanglan.
Sugod niadtong Pebrero 2022, ang mga Santos sa Ulahing mga Adlaw didto sa Poland mitabang sa mga mikagiw sa transportasyon, pagkaon, ug kapuy-an.
Pagpangalagad taliwala sa Gubat
Si RaeAnn ug si Sterling Jarvis—mga miyembro sa Simbahan didto sa Warsaw, Poland—wala mahibalo unsay mahitabo sa dihang sila mipili nga mopapuyo og mga mikagiw diha sa ilang panimalay. Apan sila andam sa pagtabang nila sa bisan unsa nga paagi kutob sa ilang mahimo.
Wala madugay human nga ang gubat nagsugod didto sa Europe, usa ka Ukrainian nga pamilya nga lima ka buok nanuktok sa ilang pultahan sa ala-1:00 sa kaadlawon. Sila mibiyahe og hapit 500 ka milya (800 km) aron mangita og luwas nga dapit. Ang mga Jarvis mipasulod nila ni Maryna ug Serhii Bovt ug sa ilang tulo ka anak sa ilang panimalay. Kadugayan nakaugmad sila og tinuod nga paghigugma ug pagpakabana alang sa pamilya nga Bovt. “Kon imong ipaambit ang gugma, kini molambo,” si Maryna misulti bahin sa ehemplo sa serbisyo sa mga Jarvis. “Kini ang nakapasuod namo sa usag usa ug ngadto sa Ginoo.”
Isip mga miyembro sa Simbahan, kita naningkamot sa pagsunod sa ehemplo sa Manluluwas pinaagi sa pagpangalagad niadtong naglibot kanato. Ang mga tawo dili kinahanglan nga moikyas gikan sa gubat o sa pagpanglutos aron magkinahanglan og tabang. Matag buhat sa kamabination sa atong bahin—bisan unsa kagamay—makaepekto sa kinabuhi sa usa ka tawo alang sa kaayohan.
Komunidad sa Pagpaambit
Didto sa gipanag-iya sa Simbahan nga Laie Hawaii Crops Farm, sobra sa 310 ka pamilya ang nagtanom og mga lagutmon aron suportahan ang ilang mga pamilya. Sa ilang 1.25-acre nga gibahinbahin nga mga luna, kini nga mga pamilya nagtanom og gabi, tapioca, kamote, kolo, bayabas, ug ubang mga lagutmon sa isla.
Ang umahan gidumala sa usa ka magtiayon nga misyonaryo ug nagdawat og suporta gikan sa ubang mga misyonaryo ug mga miyembro. Kini nga mga boluntaryo motabang sa paghawan sa yuta, pag-andam sa yuta nga tamnan, ug pagtudlo og nag-unang mga kahanas sa pagpanguma.
Tungod niini nga mga misyonaryo, mga miyembro, ug mga boluntaryo, daghang tawo nga nagkinahanglan og pagkaon sa Hawaii mas makasuporta na sa ilang kaugalingon kon magnihit ang mga trabaho. Ang komunidad mas molig-on kon ang mga tawo magtinabangay sa pag-atiman sa umahan ug mopaambit sa unsay ilang gitanom.
Ang makitawhanon nga mga proyekto sa Simbahan nagtabang sa pagsangkap og seguridad sa pagkaon, edukasyon, limpyo nga tubig, ug mga serbisyo sa pag-atiman sa kahimsog alang sa minilyon nga mga tawo sa tibuok kalibotan. Ang Simbahan naghatag usab og daghang kapanguhaan aron mapalambo ang pagbarog pinaagi sa kinaugalingong paningkamot, lakip na ang balay-tipiganan sa mga bishop, mga sentro alang sa pagpanarbaho, mga tindahan sa Deseret Industries, pagtambag nga mga Serbisyo alang sa Pamilya, mga kurso alang sa pagbarog pinaagi sa kinaugalingong paningkamot, ug mga umahan ug mga prutasan nga gipanag-iya sa Simbahan sama sa Laie Hawaii Crops Farm. Kining mga proyekto kanunay nga giabagan sa mga miyembro ug mga misyonaryo, kansang dili hinakog nga paggahin sa ilang panahon, mga talento, ug ubang kapanguhaan nakahimo og dakong kalainan niadtong nanginahanglan.
Usa ka Buhat sa Panaghigalaay
Niadtong 2021, mga 200 ka miyembro sa Simbahan mitubag sa panawagan alang sa tabang. Sila miadto sa mga sentro didto sa Germany, Estados Unidos, ug uban pang mga lugar aron sa pagtabang og proseso sa mga 55,000 ka mikagiw gikan sa Afghanistan.
Daghang boluntaryo ang miserbisyo dinhi niini nga mga sentro sulod sa duha o tulo ka semana, ug ang uban miistar pa gani og mas dugay pa. Ang mga miyembro sa Simbahan mitubag sa dinalian nga mga panginahanglan niadtong nangita og kadangpan pinaagi sa paghatag og pagkaon, mga sinina, ug ubang mga suplay.
Ang mga sister sa Relief Society sa Germany nakabantay nga daghang kababayen-an nga Afghan ang migamit sa mga sapot sa ilang mga bana aron sa pagtabon sa ilang mga ulo imbes sa tradisyonal nga mga tabon sa ulo, nga nawala o naguba tungod sa kagubot didto sa airport. Kini nga mga sister sa Relief Society nagpundok aron magtahi og tradisyonal nga sinina sa Muslim alang niini nga kababayen-an nga nanginahanglan—nagpakita og kamabination ug pagtahod sa uban, mihiklin sa ilang kalainan sa mga gituohan.
Si Sister Sharon Eubank, direktor sa Latter-day Saint Charities, miingon, “Ang atong indibidwal nga mga pagpaningkamot wala gayod nagkinahanglan og kwarta o layo nga mga dapit; kini nagkinahanglan sa giya sa Balaang Espiritu ug usa ka andam nga kasingkasing nga moingon ngadto sa Ginoo, ‘Ania ako, ipadala ako’ [Isaias 6:8].”1
Ang tinguha sa pagserbisyo kon ang mga katalagman moabot mao ang hinungdan nga ang Simbahan kanunay nga usa sa kinaunhang mga grupo nga moresponde—sa temporaryo nga kahupayan ug taas nga termino nga tabang. Ang buhat sa mga miyembro ug mga misyonaryo sa Simbahan nagtabang niadtong nanginahanglan aron mobati nga luwas, makadawat og pisikal ug mental nga pag-atiman, ug mabati ang gugma sa Dios pinaagi sa kamabination sa uban.
Where Are the Nine? [Hain Ba ang Siyam?] ni Liz Lemon Swindle, dili mahimong pakopyahan
Gitawag ngadto sa Buhat
Ang Doktrina ug mga Pakigsaad 4:3 nag-ingon, “Busa, kon kamo adunay tinguha sa pag-alagad sa Ginoo, kamo gitawag ngadto sa buhat.” Sa tanan nianang gibuhat sa Simbahan, adunay daghang paagi sa pagserbisyo.
Daghan sa mga paningkamot nga giorganisar sa Simbahan sa pagtabang niadtong nanginahanglan nahimo lamang posible tungod sa serbisyo sa mga misyonaryo ug mga miyembro. Dili tanan ang makapapuyo og usa ka mikagiw nga pamilya, makahatag og pisikal nga mga panginahanglan sa uban, o makabiya sa tanan aron motabang diha sa katalagman. Apan ang matag tawo adunay mahinungdanong bahin, ug ang kontribusyon sa matag tawo gipasalamatan ug gihatagan og bili.
Usa sa labing importante nga mga paagi nga mahatag sa mga miyembro niini nga buhat mao ang pinaagi sa mga halad sa puasa ug makitawhanon nga mga donasyon. Kining sagrado nga mga donasyon gamiton aron sa pagtabang niadtong labing nanginahanglan ug makahimo og dakong epekto sa kinabuhi niadtong mitabang. Ang mga miyembro sa Simbahan makahimo sa pagserbisyo og makitawhanon nga mga misyon, pagpasiugda og mga kurso bahin sa pagbarog pinaagi sa kinaugalingong paningkamot, ug pagboluntaryo diha sa mga balay-tipiganan sa mga bishop ug diha sa mga tindahan sa Deseret Industries. Kamo makahimo usab sa pag-atiman niadtong nanginahanglan pinaagi sa lokal nga serbisyo, mga pagdonar og dugo, mga buluhaton sa pagpangalagad, pag-ampo, ug uban pa.
Kitang tanan gitawag ngadto sa buhat. Kita gitawag sa pagsunod sa ehemplo ni Jesukristo ug sa paghigugma sa Dios ug sa atong mga silingan. Ang gikinahanglan lamang kanato mao ang usa ka andam nga kasingkasing.