Digital Lamang: Mga Young Adult
Sa Unsang Paagi nga ang Edukasyon—ug Hugot nga Pagtuo—Nakatabang Nako sa Pagdumala sa Kawalay Kasiguroan
Human mabuak ang akong ACL, dili na ko sigurado kon unsa na ang kaugmaon, apan kana nga kasinatian midala nako ngadto sa mas labaw pa kay sa akong mahunahuna.
Nahinumdom ko nga mipauli gikan sa ospital nianang adlawa. Ang akong mga ginikanan mitabang nako og pakanaog sa sakyanan, pasulod sa balay, ug ngadto sa akong higdaanan. Nahinumdom ko nga naghigda didto, mibati nga walay pulos sa unang higayon sa akong kinabuhi.
Nagdako ko nga modula og mga isport. Gani nangandoy ko nga moapil og lumba sa dagan inigka-kolehiyo. Apan paingon sa kataposan sa high school, nabuak ang tuwaytuway [anterior cruciate ligament (ACL)] sa akong tuhod—sa ikaduhang higayon. Magkinahanglan kini og pipila ka pag-opera ug sobra sa tuig nga pagpaayo. Ang akong unang operasyon nahitabo sa wala pa ko mogradwar, ug kinahanglan ko nga magpuyo sa balay samtang ang akong mga higala nagsugod na sa sunod nga bahin sa ilang kinabuhi sa pag-eskwela sa bag-ong mga kolehiyo, pagmisyon, ug pagbalhin ngadto sa makalingaw nga mga siyudad. Ang akong kaugmaon, nga kanhi sigurado, karon napuno na sa kawalay kasiguroan.
Tinuod, nahibalo ko nga kini nga mga hagit dili talagsaon o dili ordinaryo, apan kini akong mga hagit—ug lisod kaayo kini! Ang akong reaksiyon dihadiha dayon mao ang pagbaton og bisan unsa nga pagbati og kasiguroan ug paghimo og plano alang sa akong umaabot. Apan nianang proseso sa pagpanlimbasog og personal nga kasiguroan o seguridad, usa ka proseso nga nagpadayon gihapon hangtod karon, nakakat-on ko og pipila ka butang.
Oportunidad diha sa Kawalay Kasiguroan
Usa ka maalamon nga bishop kausa miingon nako, “Usa sa mga katuyoan sa ebanghelyo dili ang pagwagtang sa atong mga hagit kondili ang pagbuntog niini.”
Kon kita magtinguha nga makakat-on gikan sa kawalay kasiguroan, imbes molikay niini, ang atong mga kasinatian makatabang nato nga mas mapaduol sa atong Manluluwas. Ang mga psychologist gani misugyot nga ang pagpuyo sa kasarangan nga kawalay kasiguroan mao ang labing maayo nga dapit alang sa personal nga paglambo.1 Apan sa kataposan, kita makadumala sa kawalay kasiguroan uban sa hugot nga pagtuo.
Si Presidente Brian K. Ashton sa BYU–Pathway Worldwide kausa miingon: “Padayon diha sa hugot nga pagtuo. Kon kamo wala makakita og solusyon sa inyong mga problema karon, tuhoi nga kadto nga mga solusyon moabot samtang kamo mopadayon, kon kamo nagbuhat sa unsay gusto nga ipabuhat sa Dios kaninyo.”2 Ang kawalay kasiguroan labing madumala kon kita masaligong molihok, magkat-on samtang kita magpadayon, samtang mosalig nga ang Dios motabang nato kon kita mosalig Kaniya.
Ang Edukayon Makahimo sa Atong mga Kaugmaon nga Mas Sigurado
Ang edukasyon adunay importante nga tahas sa pagtabang nako nga makasabot sa kawalay kasiguroan. Samtang nagpaayo gikan sa operasyon, misugod ko og kuha og online nga mga kurso sa Brigham Young University–Idaho. Sa sinugdanan dili ko sigurado kon ang online nga pagkat-on tukma ba alang nako, apan ang nindot nga mga kasinatian nga akong nasinati nakapausab dayon sa akong opinyon.
Daghan ko og nakat-onan gikan sa akong mga klasmeyt nga anaa sa lainlaing mga kahimtang. Ang akong edukasyon nakatabang nako nga maghunahuna sa lahi nga paagi mahitungod sa akong kaugalingon ug sa kalibotan nga naglibot nako, ug ang akong mga prayoridad nagsugod og kausab. Nalingaw ko og sugod sa pagkat-on kay sa magsunod-sunod lang, ug ang ebanghelyo ni Jesukristo mas adunay importansya sa akong kinabuhi.
Kon wala pa ang edukasyon, dili unta ko mamahimo kon si kinsa ko karon. Ako nagtuo nga ang hinungdan sa akong desisyon nga magmisyon mao kadto nga mga kurso. Ako nagtuo nga ang Dios naggiya nako ug mopadayon sa pagtabang nako samtang ako adunay hugot nga pagtuo diha Kaniya.
Pagtan-aw sa Kinatibuk-an
Samtang ang umaabot puno pa gihapon sa kawalay kasiguroan, dili na kini ingon ka dili komportable alang nako. Ang akong mga kasinatian nakapalig-on sa akong relasyon sa Dios ug nakatabang nako nga mausab ang akong panglantaw sa kinabuhi. Imbes sobrang maghunahuna sa tanan (butang nga maayo kaayo ko), akong naamgohan nga usahay kinahanglan lang ko nga molihok. Dili kini usa ka batasan sa walay pagpakabana, apan pagkamasaligon nga karon akong nasayran nga ang Langitnong Amahan motabang nako, modasig nako, ug mobukas og mga oportunidad alang nako samtang magpadayon ko diha sa hugot nga pagtuo.
Si Presidente Russell M. Nelson bag-ohay lang miingon, “Ang positibo nga espirituhanong paglambo maghimo nga makapadayon kita sa unahan taliwala sa … kahadlok ug kawalay kasiguroan.”3 Uban sa kalamboan nga akong naangkon, ang panganod sa kawalay kasiguroan napulihan og hayag nga paglaom alang sa umaabot. Sa pagtan-aw og balik, akong naamgohan nga ang Dios nag-uban nako—tingali dili sa mga paagi nga akong gilaoman, apan Siya anaa kanunay sa paagi nga ako nagkinahanglan gayod Kaniya.