Mga Young Adult
Pipila ka Tambag sa Pag-atubang og Makahadlok ug Walay Kasiguroan nga Umaabot
Diha sa akong personal ug propesyonal nga kinabuhi, ako nag-atubang og daghan nga walay kasiguroan ug nakat-on sa unsang paagi ang Langitnong Amahan makatabang nato nga makalahutay niini.
Sa dihang gamay pa ko, ang akong pamilya milalin gikan sa Tonga ngadto sa Estados Unidos. Ang akong amahan usa ka boksidor sa nagpuyo pa kami sa Tonga, ug gisugdan ko niya sa pagbansay og boksing sa among pag-abot sa Estados. Ang iyang komprehensibo nga plano mao nga ako mahimong heavyweight champion sa kalibotan sa umaabot. Siya mitudlo nako nga dili mahadlok. Ikaw dili angay nga mahadlok sa boksingan kon ikaw gusto nga molampos. Ang akong amahan dili aktibo sa Simbahan nianang higayona, apan siya mitudlo nako og daghan mahitungod sa pag-atubang og kalisod ug pagbaton og kaisog sa pag-atubang sa kahadlok.
Ang pagkat-on sa pagboksing talagsaon nga miandam nako alang sa akong propesyon. Mieskwela ko sa Brigham Young University sa pagka-eskalar sa football. Ug bisan ang paghimo sa unsay giisip sa kadaghanang tawo nga tingali ang labing makahadlok nga butang nga buhaton diha sa natad sa football—ang pagsalo sa football—kalma nako kining gihimo. Wala gayod ako mahadlok. Gani, ganahan ko sa hagit sa football.
Ang akong amahan naglantaw nga ako adunay propesyonal nga panarbaho sa sports—kini diha sa football, dili sa boksing. Apan ako nagtuo nga ang akong pagbansay nakatabang nako nga magbaton og hugot nga pagtuo ug sa pagpaabot uban ang hugot nga pagtuo ug paglaom diha sa walay kasiguroan.
Ang amahan ni Vai nagsaulog sa pagkakuha og puntos sa dula sa iyang anak.
Litrato pinaagi ni Mark Philbrick / BYU © BYU Photo
Isip mga young adult, kamo mag-atubang og daghan nga malisod ug makahadlok nga mga butang—personal nga mga isyu sama sa mga desisyon mahitungod sa edukasyon, panarbaho, kaminyoon, ug pamilya. Ug kamo usab mag-atubang og daghang dinagko nga mga isyu, sama sa ekonomikanhong mga krises, katilingbanon [social] nga mga tintasyon, politikanhong kagubot, ug bisan gubat. Apan gikan sa akong kaugalingong kasinatian sa kinabuhi, ako nasayod nga kon kita mopili sa pag-una sa Ginoo sa atong mga kinabuhi, Siya anaa kanunay nga mogiya nato subay niining tanan.
Ang Impluwensiya sa Maayong mga Higala ug Maayong mga Tawo
Ako suwerte nga dunay maayong mga higala sa dihang nakauli ko gikan sa akong misyon. Usa ka higala nga akong nakaila didto sa sentro sa pagbansay sa misyonaryo mipaila kanako ngadto sa babaye nga nahimo nakong asawa. Wala gyod nako ibaliwala ang kamatuoran nga ang inyong mga higala sa kasagaran motino sa inyong kalamposan o kapakyasan sa kinabuhi. Ang inyong mga higala ug mga tigmatuto makatabang ninyo sa paghimo og mga desisyon nga mogiya kaninyo paduol o palayo gikan sa Dios.
Sa dihang ako diha sa National Football League, ako midayeg ni Gifford Nielsen, kinsa nakadula usab sa BYU sa wala pa moadto sa NFL, sa kataposan nahimong usa ka sportscaster ug dayon usa ka General Authority Seventy. Miduol ko kaniya usa ka adlaw sa golf course, ug siya mihatag nako og tambag nga nakapausab sa dagan sa akong propesyonal nga panarbaho.
Naglingkod mi sa golf cart, ako lang ug siya, ug human ako misulti kaniya mahitungod sa akong plano nga moapil sa telebisyon sama niya pagkahuman nako og dula og football, gitambagan ko niya nga dili mopadayon sa usa ka panarbaho nga magkinahanglan nako nga modula sa mga Dominggo. Nianang paagiha, ako makabaton kanunay og calling ma-Dominggo ug makaserbisyo sa Simbahan.
Niana lang ka yano, apan tambag kadto nga wala nako mahunahunai. Ug kana nakapausab sa dagan sa akong kinabuhi.
Pagbarog alang sa Unsay Inyong Gituohan
Kadaghanan sa akong panarbaho sa NFL makahadlok ug walay kasiguroan. Dos porsiyento lamang sa magdudula sa football sa kolehiyo ang makaabot ngadto sa NFL, ug bisan gani kon ako makaapil sa team, mahimo akong tangtangon bisan kanus-a. Sa paglahutay kutob sa akong mahimo usa ka dakong panalangin, apan ang pagpakabuhi nga walay laing plano lisod. Kini nagkinahanglan og dakong hugot nga pagtuo.
Sa NFL, ikaw mobalhin og team ngadto sa laing team, tuig ngadto sa laing tuig, magbalik-balik sa tibuok nasod. Kini ingon og madanihon, apan ang kadaghanan sa mga tawo wala makakita sa dili kaayo madanihon nga mga bahin. Lisod kini nga paagi sa pagpakabuhi. Ug lisod usab kini nga paagi sa pagpuyo sa mga magtiayon; kana mao ang usa ka rason nganong adunay taas nga gidaghanon sa diborsyo tali sa mga propesyonal nga mga atleta.
Unsay nakatabang mao nga ako nasayod diin ako magbarog. Ako adunay lig-on nga pundasyon ni Kristo, ug ako kanunay nga nagbuhat niadtong tanan nga mga butang nga makapaduol nako ngadto Kaniya ug sa Langitnong Amahan.
Kamo dili tingali mag-atubang og dalan sa panarbaho nga adunay grabe nga presyur ug tintasyon, apan sa akong bahin, ang pagkapropesyonal nga atleta nakapabantang nako ngadto sa lahi kaayo nga estilo sa kinabuhi kay sa akong naandan. Pananglitan, kon kamo moabot sa dagkong siyudad ug nagbiyahe sa sinugdanan, ang akong mga kauban sa team diha-diha dayon gusto nga mogawas ug moapil sa lain-laing mga kalihokan nga wala mahisubay sa mga sumbanan sa ebanghelyo, ug ako nasayod diha mismo nga ako dili makahimo sa pagsunod sa ebanghelyo ug sa mga pamaagi sa kalibotan sa samang higayon. Ako wala makatubag “hunahunaon ko kana” aron sa pag-alam-alam kanila. Hinoon, kinahanglan ko nga magmalig-on sa akong hugot nga pagtuo ug mopasabot nganong dili ko makaapil kanila.
Si Vai uban sa iyang asawa, si Keala, sa adlaw sa ilang kasal
Mga litrato sa pamilya sa maayong kabubut-on sa tagsulat
Ako suwerte nga ako naminyo samtang ako nag-eskwela sa kolehiyo. Sa dihang miadto ko sa NFL, ang akong asawa ug ang among unom ka bulan nga masuso uban nako. Kami naminyo sa templo, ug ako nasayod unsa ang kahulogan niadto nga mga pakigsaad alang kanako ug unsa ang gikinahanglan niini kanako. Mao nga ako mosulti sa akong mga kauban sa team, “Dili, dili ako mobuhat niana.” Ug kon sila mamugos, ako moingon, “Ang akong asawa ug ako naminyo sa balay sa Ginoo diin kami mihimo og sagrado nga mga pakigsaad. Kadto nga mga pakigsaad mas importante kanako kay sa bisan unsa pa.”
Ug ang katingalahan nga butang mao nga sa dihang sila mangutana nako niadto nga mga pangutana ug nakasiguro gayod unsa nga klase nga tawo ako, kadtong maong mga kauban sa team maoy manalipod kanako ug motahod sa akong mga sumbanan ug mga pakigsaad. Nagkinahanglan kini og kaisog sa pagbarog unsay inyong gituohan ug gimahal.
Ang pag-atubang og daghan kaayo nga tintasyon makahadlok sa sinugdanan, apan ang pagsalig diha sa Langitnong Amahan ug paghinumdom sa kasagrado ug kahulogan sa akong mga pakigsaad sa atubangan sa pagpamugos nakatabang nako kanunay nga mobarog nga lig-on diha sa dalan sa pakigsaad sa akong panarbaho. Kamo makahimo sa ingon sa bisan unsa nga mga sirkumstansiya nga inyong makita ang inyong kaugalingon sa kinatibuk-an sa inyong panaw.
Sunda ang Propeta
Ako nasayod nga isip mga young adult karon kamo nag-atubang og daghan kaayong walay kasiguroan ug nahadlok mahitungod sa umaabot. Ug kamo tingali naghunahuna unsay buhaton ug unsaon nga makalabang niini. Ang sayon nga tubag mao ang pagsunod sa giya sa propeta, si Presidente Russell M. Nelson. Kon ang usa ka propeta sa Dios mamulong ug mohatag kaninyo og piho nga butang, sama ra ka yano sa pagsunod niana nga tambag.
Ako nakamatikod nga si Presidente Nelson gusto nga motanyag og yanong listahan sa mga butang nga atong mahimo aron mobarog nga lig-on sa atong hugot nga pagtuo. Sa milabay nga pipila ka tuig, siya mihatag sa mga miyembro sa Simbahan og lima ka butang nga himoon aron molambo ang atong hugot nga pagtuo, lima ka paagi sa pagdugang sa espirituhanon nga paglambo, tulo ka butang nga kinahanglan ninyong himoon sa inyong pagsugod sa bag-ong tuig, ug daghan pa.
Dili siya mohatag og daghan kaayong lista sa mga butang. Yano lamang nga mga butang. Ug kon kamo mohimo niadtong yano nga mga butang ug mahugtanon, ang inyong kinabuhi mausab pinaagi sa paghimo sa labing yano nga mga butang. Ang inyong pundasyon sa hugot nga pagtuo mobarog nga lig-on, bisan kon adunay makahadlok nga mga sirkumstansiya sa kalibotan. Buhata kadto nga mga butang ug kamo OK ra. Kamo mapanalipdan.
Kini nagpahinumdom nako sa istorya ni Naaman sa Daang Tugon, ang pangulo sa kasundalohan nga adunay sanla. Miadto siya ni Eliseo, ang propeta, kinsa misulti kaniya nga hugasan ang iyang kaugalingon didto sa Suba sa Jordan makapito ka higayon. Ang pangulo sa kasundalohan naghunahuna nga kini binuang, apan ang mga tawo sa iyang palibot miawhag kaniya isip ang heneral nga mobuhat lang niini. Ug siya adunay hugot nga pagtuo nga mobuhat niini—nga butang nga yano kaayo. Ug siya nalimpyohan. (Tan-awa sa 2 Mga Hari 5:1–15.)
Pamilya ni Elder Sikahema
Isalig ang Inyong Umaabot diha sa mga Kamot sa Langitnong Amahan
Karon, tingali wala ko mahimong propesyonal nga boksingero, apan ako nakat-on og butang mahitungod sa pag-atubang sa mga kahadlok. Uban sa tanang mga desisyon ug mga hagit nga inyong atubangon karon isip usa ka young adult, ako mohangyo kaninyo sa pagbuhat sa tanan nga inyong mahimo sa pagtinguha ug paghupot sa impluwensiya sa Espiritu uban kaninyo kanunay. Mao kana ang importante. Sama sa bag-ong gitudlo ni Presidente Nelson: “Ang positibo nga espirituhanong paglambo maghimo nga makapadayon kita sa unahan taliwala sa kahadlok ug kawalay kasiguroan nga namugna sa mga pandemya, mga tsunami, pagbuto sa mga bulkan, ug armado nga mga kabangis. Ang espirituhanong paglambo makatabang nato nga makasugakod sa walay puas, daotang pag-atake sa kaaway ug pagsanta sa iyang mga paningkamot sa pagguba sa atong personal nga espirituhanong pundasyon.”1
Sa dihang mas bata pa ko ug nag-atubang sa kamatuoran nga mobalhin ngadto sa usa ka bag-ong nasod isip usa ka langyaw, wala ko makahunahuna og usa ka kinabuhi nga dili mag-atubang og walay kasiguroan. Samtang ako nagpadayon sa pag-atubang og mga walay kasiguroan sa akong tibuok kinabuhi ug sa akong pagpanarbaho, akong nakat-onan nga isip usa ka disipulo ni Kristo, kita makaatubang sa bisan unsa nga mga kahadlok o mga babag diha sa atong dalan.
Samtang inyong palibotan ang inyong kaugalinon og maayong mga tawo, mohimo ug mobarog sa inyong mga pagtuo, ug mosunod sa propeta, ang umaabot ingon og dili kaayo makahadlok. Ug kamo makahimo sa pagpadayon uban sa hugot nga pagtuo bisan pa sa kahadlok o ka walay kasiguroan. Kon inyong isalig ngadto sa mga kamot sa atong mahigugmaong Langitnong Amahan ang inyong umaabot, kamo makasalig nga Siya anaa kanunay alang kaninyo.