“Sa Dihang ang Akong Kalibotan Ngitngit, Ako Midangop ngadto ni Kristo,” Liahona, Mar. 2023.
Mga Young Adult
Sa Dihang ang Akong Kalibotan Ngitngit, Ako Midangop ngadto ni Kristo
Sa kadaghang ngitngit nga mga butang nga nahitabo sa akong palibot, dili na ko sigurado kon unsay ipasabot sa pagbaton og pundasyon diha ni Kristo.
Litrato pinaagi sa Getty Images, giposingan sa modelo
Sa mensahe diha sa bag-ohay nga kinatibuk-ang komperensiya, si Presidente Henry B. Eyring, Ikaduhang Magtatambag sa Unang Kapangulohan, namulong mahitungod sa malisod nga mga panahon sa kalibotan: “Si Apostol Pablo misulat ngadto ni Timoteo, ‘Timan-i kini: sa kataposang mga adlaw moabot ang mga malisod nga panahon’ (2 Timoteo 3:1).
“… Ug mao nga mahimong mas lisod, dili mas sayon, ang pagtahod sa mga pakigsaad nga kinahanglan natong himoon ug tumanon aron makasunod sa ebanghelyo ni Jesukristo.”1
Samtang naminaw ko niini nga mga pulong, mibati ko og kabalaka. Ako nakigbisog na og mga hagit sa akong panimalay sa Venezuela. Busa ang mga pangutana sama sa, “Unsaon man nga ako magpabiling positibo nga ang kalibotan hilabihan man ang kangitngit?” ug “Unsaon man nga ako makatan-aw sa unahan ngadto sa hayag nga kaugmaon nga ngitngit man kaayo ang karon?” mao ang anaa sa akong kasingkasing nianang higayona.
Apan si Presidente Eyring mihatag og solusyon. Siya mikutlo sa Helaman 5:12, nga naghisgot mahitungod sa pagtukod sa atong pundasyon “diha sa lig-on nga sukaranan sa atong Manunubos, nga mao si Kristo.”
Ako sa kanunay nagtuo nga kini nga kasulatan tinuod, apan ang pagtukod sa akong pundasyon diha sa Manluluwas mas sayon sultihon kay sa buhaton. Hinoon, samtang nagpaduol ko ni Kristo, akong nakita nga ang tanan mamaayo ra kon ang imong hugot nga pagtuo lig-on diha Kaniya (tan-awa sa Doktrina ug mga Pakigsaad 90:24).
Mibati nga Gisalikway
Duha ka bulan ang milabay, nakadawat ko og makasagmuyo nga balita gikan sa pamilya. Ang akong kalibotan daw nahugno. Nawad-an ko og umoy, naglibog, ug labihan ang kabalaka nga gani nasakit ko!
Wala ko makasabot kon nganong nag-atubang kami og ingon nga mga kalisdanan nga naningkamot man unta ko nga magmatinud-anon. Naghunahuna ko kon nakahimo ba ko og sayop. Ang umaabot morag wala nay paglaom, ug mibati ko nga gisalikway sa Langitnong Amahan ug ni Jesukristo.
Diha sa tunga-tunga sa akong kasakit, nakigsulti ko sa usa ka buotan nga higala. Siya misulti nako og usa ka butang nga dili gayod nako malimtan: “Sa akong hunahuna kini nga sitwasyon usa ka maayong oportunidad nga makapamalandong ka sa imong personal nga relasyon sa Ginoo. Bisan unsa pa ang nahitabo, anaa ra nimo kon ikaw modangop Kaniya alang sa tabang. Kon buhaton nimo, Siya mohatag nimo og gugma ug kahupayan nga imong gikinahanglan karon.”
Kadto nga mga pulong miusab sa akong panglantaw. Ako nasuko ug nasakitan ug naglibog sa akong mga kahimtang, apan ako adunay kapilian. Bisan unsa pa ang atong naagian, unsay atong mga kahadlok, o unsa nga mga kalisdanan ang atong giatubang, si Jesukristo anaa kanunay sa atong tupad. Kita adunay kapilian sa pagdangop ngadto Kaniya uban sa hugot nga pagtuo, dili palayo gikan Kaniya, diha sa lisod nga mga panahon.
Kana ang paagi sa pagpalig-on sa atong pundasyon sa hugot nga pagtuo diha Kaniya ug sa pagbarog sa kalisdanan sa kalibotan. Pinaagi sa pagpili Kaniya.
Sama sa gitudlo ni Elder D. Todd Christofferson sa Korum sa Napulog Duha ka Apostoles: “Sa taliwala niining kalayo sa magtutunaw, imbis masuko sa Dios, makigsuod sa Dios. Motawag sa Amahan pinaagi sa ngalan sa Anak. Molakaw uban Kanila pinaagi sa Espiritu, matag adlaw. Tugoti Sila sa paglabay sa panahon sa pagpakita sa Ilang kaligdong nganha kaninyo. Moduol gayod para makaila Kanila ug makaila sa imong kaugalingon.”2
Si Kristo naghulat nako nga modangop Kaniya alang sa panabang. Kana wala magpasabot nga Iyang wagtangon ang tanan nakong mga problema o ayohon ang tanan sa akong kinabuhi ug pamilya dihadiha dayon, apan Siya motabang nako nga mahimong mas maayo, makakaplag og kalipay, ug mahimong mas matarong.
Ug kadugayan, samtang nagtinguha ko sa Manluluwas pinaagi sa pag-ampo, pagtuon sa kasulatan, ug hugot nga pagtuo, Siya mitabang nako sa pagpasaylo sa mga sakop sa akong pamilya ug sa pagdapit og balik sa kalipay ngari sa akong kinabuhi, bisan kon ang pipila sa mga hagit wala pa gihapon masulbad.
Usa ka Saad sa Kasiguroan
Kining kataposang mga adlaw malisod gayod. Kita nakadungog bahin sa mga gubat ug mga balita bahin sa mga gubat, mga pandemiya, mga katalagman—ug sigurado ko nga aduna pay mas lisod nga mga panahon sa umaabot. Apan, ang pagtukod diha sa lig-on nga tukuranan nga mao si Jesukristo ug ang pagsalig Kaniya sa kanunay maghatag kanato og kalinaw ug kalipay, bisan unsa pa ang atong giatubang. Sama sa gitudlo usab ni Presidente Eyring, “Alang kanato kinsa nabalaka sa atong kaugalingon ug alang niadtong atong gihigugma, adunay paglaom diha sa saad nga ang Dios mihimo og dapit sa kahilwasan diha sa umaabot nga mga unos.”3
Pagkagamhanan ug pagkaanindot nga saad. Ako nakakita nga kana nga saad natuman sa akong kinabuhi. Ako nasayod nga kini mao ang gipahiuli nga ebanghelyo ni Jesukristo ug Siya ang tinubdan sa tanang panalangin. Siya mao ang kahayag, Siya mao ang atong Manluluwas, ug kita mao ang Iyang mga karnero. Kita mopili Kaniya ug mopili sa hugot nga pagtuo.
Ang tagsulat nagpuyo sa Zulia, Venezuela.