“Ua E Mauaina Ou Faaeega Paia. O Le A La le Isi Mea?,” Liahona, Tes. 2023.

Ua E Mauaina Ou Faaeega Paia. O Le A La le Isi Mea?

Saunia e Becca Wright

Mekasini a le Ekalesia

O le a le isi mea e sosoo ai pe a uma ona maua faaeega paia i le maota o le Alii?

Faamalo atu! Ua e faia se laasaga telē i le “ala o feagaiga e toe foi atu ai i le aiga i o tatou Matua Faalelagi ma … i latou tatou te alolofa i ai.”¹ E tele naua mea o loo teuina e le Alii mo oe.

Toe Foi Mai i le Malumalu i le Tele e te Mafaia

O lea la ua e mauaina ou lava faaeega paia, toe foi soo atu i le tele e te mafaia! Atonu o loo e atiina a’e pea lau molimau i le malumalu, ma e lē afaina lena. E lē manaomia ona e malamalama i mea uma i le taimi nei. O le a tuputupu a’e lou malamalama ma le sootaga faalefeagaiga ma le Atua a o e toe foi atu i le malumalu.

Afai e te nofo latalata i se malumalu, ia faaeteete ia aua nei faatagaina “le faatauvaa o le ala, po o lona faigofie tele” (1 Nifae 17:41) e faalavelave ia te oe mai le toe foi soo i ai. Na aoao mai Elder Richard G. Scott (1928–2015) o le Korama a Aposetolo e Toasefululua: “E tele taimi ua ou vaai ai i tagata taitoatasi ua faia ni osigataulaga maoae e o atu i se malumalu taumamao. … A faigofie ma lata mai se malumalu, e mafai e mea laiti ona faalavelave i au fuafuaga e alu i le malumalu. Faatutu ni sini faapitoa, mafaufau i ou tulaga, i taimi e mafai ai ma o le a auai ai i sauniga o le malumalu. Ona aua lea nei faatagaina se isi lava mea e faalavelave i lena fuafuaga.”²

Faataua Lau Pepa Faataga

E mafai ona eseese le tele o taimi e mafai ona tatou tapuai ai i le malumalu, ae e mafai e i tatou taitoatasi ona faataua i a tatou pepa faataga o le malumalu. O lau pepa faataga e lē na o se pepa e tau ina ia faataga ona ulufale ai. E atagia mai ai le talitonuina o oe e le Alii a o Ia valaaulia oe i Lona maota i le lalolagi. O le umiaina ma le agavaa o se pepa faataga o le malumalu e faailoa atu ai foi lou manao e toe foi atu i se aso i Lona aiga i le lagi. Na uunaia i tatou e Elder Ronald A. Rasband o le Korama a Aposetolo e Toasefululua ina ia ola i aso taitasi e “fautuaina atu i le Alii”:

“O lou pepa faataga o le malumalu e atagia ai se faamoemoega loloto, faaleagaga o loo e taumafai malosi e ola ai i tulafono a le Alii ma fiafia i mea e alofa o Ia i ai: lotomaualalo, agamalu, mausali, alofa mama, lototoa, agaalofa, lotofaamagalo, ma le usiusitai. Ma e te tautino atu oe lava i na tulaga faatonuina pe a e sainia lou igoa i lena pepa paia. …

“Ina ia ‘fautuaina atu i le Alii’ o le faamanatu atu lea o mea ua faamoemoeina mai se e Paia o Aso e Gata Ai tausi feagaiga.”³

Faapelepele i Ou Ofusa o le Malumalu

E pei ona faailoa mai e le Au Peresitene Sili, o le avanoa paia o le ofuina ma le faamaoni o le ofusa o le malumalu o “se faailoaga i fafo atu o se tautinoga i totonu e mulimuli i le Faaola o Iesu Keriso.”⁴

O le laeiina ma le talafeagai o ofusa o le malumalu e mafai ona manatu i ai ma le fiafia “o le ala a le Alii e faatagaina ai i tatou e auai faatasi ma i tatou i le malumalu pe a tatou tuumuli. … Ma e ui e lē mafai ona tatou i ai pea i totonu o le malumalu, ae o se vaega e mafai ona faatasi pea ma i tatou e faamanuia ai o tatou olaga.”⁵

Ua tuuina atu e le Tama Faalelagi ia te oe se meaalofa sili (o le uiga lena o le faaeega paia). O le ofuina ma le faaaloalo ma le tautala e uiga i ou ofusa o le malumalu o ni auala faigofie ia e mafai ona e faaalia ai lou lotofaafetai mo lenei meaalofa.

Ia Faamaoni

O le faamaoni e lē faapea e taumasuasua pea i tatou i taimi uma i le Agaga o le Alii. O lona uiga tatou te tumau i le faatuatua e tusa lava pe tatou te lē o mautinoa. Ua faamautinoa mai e le Alii faamanuiaga silisili ia i latou o e filifilia o Ia.

“O outou o ni fanau iti, ma tou te le’i malamalama lava i le tetele o faamanuiaga o i ai i le Tamā i ona lava aao ma ua saunia mo outou;

“… ae ui i lea, ia fiafia, ona o le a Ou taitaia outou i le ala. O le malo o la outou ia, ma o ona faamanuiaga o a outou ia, ma o ʼoa o le faavavau o a outou foi ia” (Mataupu Faavae ma Feagaiga 78:17–18).

Ua faaopoopo mai Peresitene Russell M. Nelson i nei folafolaga:

Ou te folafola atu ia te outou i le gasologa o taimi, o le a avea le malumalu ma se nofoaga o le saogalemu, mafanafana, ma faaaliga.”⁶

“Ou te folafola atu pe a e faateleina lou taimi i galuega o le malumalu ma talafaasolopito o aiga, o le a faateleina ma faaleleia lou gafatia e faalogo ai ia te Ia.”⁷

“Ia faataua ma faamamalu au feagaiga i lo isi uma tautinoga. A’o e faamuamua ai le Atua i lou olaga, ou te folafola atu ia te oe le filemu sili atu, talitonuga maumaututu, olioli, ma ioe, le malologa.”⁸

O nei faamanuiaga taitasi o le a fai mo oe a o e taumafai e faaauau pea ona atiina a’e lau sootaga faalefeagaiga ma le Tama Faalelagi ma Iesu Keriso—o le sootaga aupito taua o lou olaga.