“O Le Auala o Loo Aofia ai le Tama Faalelagi ma Iesu Keriso i ō Tatou Olaga,” Liahona, Tes. 2023.
Autalavou Matutua
O Le Auala o Loo Aofia ai le Tama Faalelagi ma Iesu Keriso i ō Tatou Olaga
I le sauniuni ai e auauna atu i se misiona na ou maua ai se avanoa e aoao atili ai e uiga i le ala na La’ua faaali mai ai i lo’u olaga.
Ata na saunia e Alecia Schubert
I lo’u tuputupu a’e, sa matua’i ou ootia lava i le molimauina o faifeautalai faamisiona ua toe foi mai i le fale i lo matou motu o Toga ma tuuina mai a latou molimau. O nei taimi sa masani ona uunaia ai lava a’u e auauna atu i la’u lava misiona. Ina ua oo ii le taimi e amata ai ona ou tapena, sa ou aoaoina le tele o mea e uiga i lagona o lo tatou Tama Faalelagi ma le Faaola ia i tatou.
O ni nai upumoni nei ua ou aoaoina e uiga i le La’ua matafaioi i o tatou olaga.
1. Ua La’ua Silafia i Tatou
Ina ua ou auai i le vasega sauniuni a faifeautalai, sa le’i faigofie. Sa ou tauivi ma ni feteenaiga patino ma popole o le a ou lē faia se eseesega i le avea ai ma se faifeautalai. Sa ou lagona le popole atili i aso uma.
Sa ou tauivi ma nei lagona mo se taimi ma tatalo ia iloa pe o lava lo’u lelei e auauna atu ai.
I se tasi aso, a o o’u siakiina la’u imeli, sa ou tatalaina se sāvali mai le ComeuntoChrist.org. O iina, i mataitusi lapopoa, ma matamatatetele, sa i ai upu “Ua Lava lou (Lelei)!”
O nei upu na tuia ai lo’u loto, ma sa ou lagonaina le mafanafana. Na tali mai a’u tatalo! Sa ou iloaina o loo silafia atoatoa e le Tama Faalelagi ma Iesu Keriso o tatou tulaga ma e mafai ona taliina a tatou tatalo i auala e sili ona patino.
2. Afai Tatou te Faatuatuaina i La’ua, o le a La’ua Taitaia i Tatou
E ui lava sa ou manao e auauna atu i se misiona, ae sa ou tauivi pea e faia le faaiuga. Sa tele o’u manaoga patino lea e tatau ona faataatia ese pe afai ou te auauna atu. Sa amata la’u tausaga muamua i le iunivesite, sa ou musu e tuua ni faauoga taua, ma sa ou fuafua lava i taimi uma e auai i le Vaegaau a Toga. Sa maliu foi lo’u tuagane talu ai nei i le pule i le ola, ma o le faavauvau sa ou lagonaina na faigata ai ona agai i luma.
Sa masani ona ou mafaufau, “Pe sa’o moni ea le auauna atu i se misiona mo a’u?”
O lea, sa ou aveina uma ai a’u fesili i le konafesi aoao. I le taimi o lena konafesi, sa ta’ua ai e Elder Dieter F. Uchtdorf, “Ae saili ma le naunautai i le upumoni—upumoni e faavavau, ma le lē masuia—o le a manino atili au filifiliga.”1
Sa ou lagonaina le moni o lena faamatalaga. O nisi taimi e mafai ona faigata ona talitonu o le a saunia e le Atua se mea e sili atu pe a tatou pipii atu i o tatou manaoga muamua. Ae e ala i le anapogi, tatalo, ma sāvali mai konafesi aoao, sa ou aoaoina patino ai e faapea, a tatou faalagolago i le Atua, o le a tele ina tatou iloa o loo Ia taitaiina i tatou i avanoa ma faamanuiaga sili atu nai lo le mea e mafai ona tatou iloaina e i tatou lava (tagai Eperu 11:40).
E pei lava ona tausia e le Atua o le fanauga a Isaraelu i le toafa ina ua latou salamō i le tuua o Aikupito (tagai Esoto 16:3), ma e pei lava ona sa Ia taitaia le aiga o Liae i le isi itu o le vao i le nuu folafolaina (tagai 1 Nifae 18), e mafai lava ona tatou talitonu o le a Ia taitaia i tatou i le mea e tatau ona tatou i ai pe afai e faaali lo tatou faatuatua.
3. La Te Tuuina Mai Pea Vavega
O le aoao e uiga i auala ofoofogia uma o loo aofia ai le Tama Faalelagi ma Iesu Keriso i o tatou olaga e faafouina ai lo’u faamoemoe e mafai mea uma e ala i le faatuatua ia Iesu Keriso (tagai Mataio 19:26). E tusa lava pe tatou te tauivi ma lagona o le lē atoatoa, o le a La’ua faamanuiaina i tatou i le fesoasoani e tatau ai ma vavega tatou te manaomia mo o tatou tulaga patino.
E ui i o’u popolega, sa faamanuiaina a’u e le Atua i le vavega o le mautinoa e auauna atu ai i se misiona.
E ala i le ola ai i le talalelei a Iesu Keriso, e mafai ai ona tatou maua le filemu ma vavega i o tatou olaga a o tatou taumafai e mulimuli ia te Ia i luga o le ala o feagaiga. E ala i le osia ma le tausia o feagaiga ma le Tama Faalelagi, “ua fusia faatasi i tatou,” e pei ona sa aoao mai e Peresitene Russell M. Nelson. Ma “ona o la tatou feagaiga ma le Atua, o le a lē pa’ū ai lava o Ia i Ana taumafaiga e fesoasoani ia i tatou, ma o le a tatou lē faatinoina lava Lona onosa’i alofa mutimutivale ia i tatou. Ua tofu i tatou ma se nofoaga faapitoa i le loto o le Atua. E i ai Ona faamoemoega maualuluga mo i tatou.”2 A o tatou saili atu i le Tama Faalelagi ma Iesu Keriso, o le a tatou vaaia la La’ua faatosinaga faavavega i o tatou olaga.
O le saunia mo se misiona na faaali mai ai ia te a’u le tele o le talisapaia e lo tatou Faaola ma le Tama Faalelagi o lo tatou naunautaiga e ositaulaga mo lo La’ua faamoemoega. Ua ou vaai i le ala na fesoasoani ai ia te a’u le tuuina atu o lo’u taimi, taleni, ma le loto ia i Laua e “faatumauina ai le malosiaga lelei faaleagaga”3 ma manumalo ai i le lalolagi.4 Ou te talitonu ma lo’u loto atoa o loo i ai faamanuiaga maoae o loo faatalitali mai mo i tatou pe a tatou auauna atu ma le loto i ai i le Alii.