Faaopoopoina o Meaalofa o le Agaga i Lau Lisi o le Kerisimasi
Ata na tusia e Josh Talbot
E masani lava ona ou faia se sanuisi manaia o le sisi lagilagi. I le va o lena taumafataga tofolelei ma le tele o isi fua o kuka, sa ou taumafai e ola ai ma faaaoga i la’u misiona atoa seia oo atu lava ina avea ma tagata matua. Ona ou faaipoipo lea ma faia se fanau, o i latou e eseese uma lava a latou tofo o mea e mananao i ai. Sa manaomia ona faateleina a’u kuka!
Ae peitai, i po pe a oo i lo’u aso kuka, o le taumafai e kuka ni meaai fou sa faamaonia le avea ma se luitau. O le mea muamua, sa masani ona le lava o’u taimi i le afiafi. E ui sa ou manao e kuka ni meaai eseese, ae sa fai lava ma tau i ni faafitauli. Sa le mafai ona ou maua ni mea fai kuka i se taimi vave, po o le misi foi o nisi mea fai kuka. O le tele lava o taimi, ou te tuua ai la’u meaai sa fuafua e fai ae fai le mea vave ma faigofie.
Ae o lea sa ou manao pea e faaleleia le itu lea. O lea sa tonu ai o le a ou faia se mea ou te le’i faia lava. Sa ou tatalo mo se meaalofa faaleagaga ma sa ta’u atu le igoa.
Tasi le Meaalofa, E Tele Ona Aoga
Sa faapitoa lava ona ou tatalo mo le meaalofa o le faatulagaga. Ioe, faatulagaga! Ua uma ona i ai le matou kapoti o mea faamanogi kuka. Sa i ai foi a matou fata o mea e faaaoga e kuka ai meaai. Ae e ui ina i ai na mea i o latou tulaga, ae foliga e tele lava lo’u taimi e alu i le tau suega o sapalai nai lo le faiga o kuka.
A o ou tatalo soo mo lenei meaalofa, sa amata ona ou maua ni manatu fitoitonu. O se fata e faamau i le puipui e tuu ai mea faamanogi kuka o le a faatulaga ai mea faamanogi kuka ma faigofie ona tau i ai. O se poloka sila i le umukuka (e mafai foi ona faamau i le puipui) e mafai ona tuu ai naifi ma isi mea uamea fai meaai. O nei manatu ma isi manatu, ina ua faatinoina, sa i ai se eseesega tele i a’u taumafaiga e kuka. E manaomia ni thyme [mea faamanogi meaai]? Aniani saina, masima? Pauta aniani saina? “O a’u o lau tama!”
Ona tupu ai lea o se mea malie. Sa faaauau ona oso mai ni manatu laiti i lo’u mafaufau mo ni auala laiti e faalelei atili ai le faatulagaga o isi mea o lo’u olaga. Mo se faataitaiga, o la’u olo fogafaletolu sa fau i le fale mo tagamea o le a le aveina atu ai lo’u aiga i le nuu o le folafolaga, ae atonu e talisapaia foi e Nifae le ala na ou fauina ai—e ala i le mulimuli i uunaiga ia na oo mai ia te a’u e tasi le vaega i le taimi.
O le meaalofa faaleagaga o le faatulagaga ua faaleleia ai lo’u olaga ma olaga o lo’u aiga e sili atu nai lo le mea ou te ono mateiaina lava.
Ma sa oo uma mai lava ona sa ou talosaga atu i ai.
Tele Meaalofa, Toalaiti Tagata Talosaga
Sa aoaoina e le Aposetolo o Paulo tagata i Korinito e uiga i nisi o meaalofa faaleagaga eseese e tele o loo i ai, e pei o le faatuatua po o le faamalologa (tagai 1 Korinito 12:5–11). Ona ia faatonuina lea o i latou ia “naunau [manao] ai i meaalofa e sili” (1 Korinito 12:31).
Atonu e faigata ona e malamalama i le manatu e faapea o le manao e mafai ona avea o se mea lelei ae i le tulaga lea e mafai ona i ai. Ua faatonuina i tatou e vaai atu i nisi o meaalofa faaleagaga tatou te iloa i isi ona ole atu lea i le Atua e faamanuia i tatou i na lava foi meaalofa. O le tatou faamoemoe mo le faia o lena mea e tatau ona, ia auauna lelei atu ai i isi ma atiina ae ai le malo o le Atua (tagai MF&F 46:26–29).
E matuai tele lava meaalofa—e tele atu nai lo o mea o le a e maua i tusitusiga paia. O le onosai o se meaalofa faaleagaga. E faapena foi i le talitonu o le a lelei mea uma. Ma le lototele. Ma le avea ma se tagata e faatupu filemu. Na aoao mai Elder Larry R. Lawrence o le Fitugafulu: “O nisi taimi ou te vaai faalemafaufau ai i se faleteuoloa tele lava i le lagi, e faatumulia atoa i meaalofa faaleagaga, e avanoa i le Au Paia uma o e e i ai le faatuatua e ole atu ai mo i latou. Ae o le mea e faanoanoa ai, e le toatele nisi e talosagaina, o taimi uma lava la e tumu saisai ai le faleteuoloa.”1
Sa faamatalaina e Elder Lawrence se uo sa tonu e tatalo mo le meaalofa o le alofa mama. Sa ia faamatalaina mai lona aafiaga, “Sa ia tusia: ‘Mo ni nai masina, sa ou tatalo patino ai lava mo se faateleina o le alofa mama. … Sa faasolosolo malie lava ona sui o’u manatu e uiga i isi. … Sa amata ona le gata ina ou alofa i tagata sa siomia au, ae ia ou fiafia foi ia i latou. O le taimi muamua, atonu sa ou taumamao, ae o le taimi nei ua ou fiafia moni lava i tagata uma.’”2
O Au Meaalofa, ua Sauni ma Faatalitali Mai
O meaalofa faaleagaga e matuai sili atu ona taua nai lo o meaalofa faaletino!. O le mea moni, o i latou o meaalofa sili. Ua poloaiina i tatou i tusitusiga paia, “Ia matua saili atu i meaalofa sili” (MF&F 46:8).
Po o le a lava se isi mea e te faamoemoe e tatala i le taeao o le Kerisimasi, taumafai ma vaai faalemafaufau i ni nai “meaalofa sili” o loo faatalitali mai foi mo oe. Ua uma ona “afifiina” ma sauni e faamanuia ai oe ma i latou o loo siomia oe.
Ia fai loa ae ole atu.