“E Mafai Faapefea Ona Ou Lagona le Filemu Pe a Pei e Lofituina le Kerisimasi?,” Liahona, Tes. 2023.
Autalavou Matutua
E Mafai Faapefea Ona Ou Lagona le Filemu Pe a Pei e Lofituina le Kerisimasi?
O aso malolo e mafai ona avea o se taimi lofituina, ae o le sailia o ni auala laiti e taulai atu ai ia Keriso e aumaia ai le filemu ma le olioli.
Ata na tusia e Bill Mayer
O le Kerisimasi e tatau ona avea o se taimi o le olioli, alofa, ma le filemu, ae o taimi uma e lē faigofie ai ona o o tatou tulaga. Sa ou faaaluina ni Kerisimasi se lua i se misiona i Pasila, e mamao ese mai lo’u aiga ma i se aganuu e lē masani ai. O na vaitau o le Kerisimasi sa i ai ni taimi lelei, ae o taimi muamua ia na ou lagonaina ai ni lagona lē lelei i le vaitau o aso malolo, o le lotovaivai ma le ma’i manatu i le aiga.
Ina ua ou foi mai mai la’u misiona, sa le’i pei lava le fiafia o le vaitau o aso malolo e pei ona sa i ai a o o’u laitiiti. O le faasolo ai ina matua ma tele tiutetauave, sa masani ona ou lagonaina le lofituina i le pisi o le vaitau e faamanatu ai le Kerisimasi i le ala sa ou faamoemoe i ai. A o o’u manao e malolo i le fale, faaalu se taimi e auauna atu ai i isi, pe fiafia i aso malolo ma e pele ia te a’u, sa tatau ona ou faaaluina le tele o Tesema e faigaluega ai, taumafai e taulima mea e tutupu, faatau mo ni meaalofa, ma le suesueina mo suega faaiu i le kolisi.
Ou te iloa foi le toatele o isi e masani ona faaaluina le vaitau o aso malolo e faavauvau ai i le maliu o se tasi e pele, nofo mamao mai le aiga, taulimaina o sootaga faigata, po o le lagonaina faapitoa o le tuuatoatasi i lenei taimi o le tausaga.
Ae a o o’u mafaufau i le tele ma le anoanoai o mea i lenei vaitau, sa ou manatunatu—faamata e finagalo Keriso i se aso malolo ia taulai atu ia te Ia ina ia tatou atuatuvale ai, leai se faamoemoe, ma faavaivaia ai?
Ou te talitonu ana i ai Iesu Keriso iinei, semanu Na te faia ia tatou lagonaina le filemu ma le faamoemoe i le vaitau o aso malolo. O le mea lea, na soifua mai o Ia e fesoasoani ia i tatou ia lagona nā lava mea. Na afio mai o Ia i le lalolagi e fesoasoani ia i tatou e faafetaia’i ma faatoilalo o tatou luitau.
E pei ona sa aoao mai Elder Neil L. Andersen o le Korama a Aposetolo e Toasefululua, “Ou te molimau atu a tatou amiotonu, o le a faapea ona faafetauia o tatou loimata uma o le faanoanoa, faigata, ma le lē mautonu ia te Ia, o le Alo pele o le Atua.”1
E ui i o tatou luitau ma lisi o mea e fai ma atuatuvalega lea e faateteleina i lenei taimi o le tausaga, e mafai ona faafaigofieina o tatou olaga ma faamaloloina o tatou lototiga pe a tatou taulai atu i le mafuaaga mo le Kerisimasi—o lo tatou Faaola o Iesu Keriso.
O Le Sāvali Faigofie o le Malamalama ma le Alofa
O tausaga uma talu mai lo’u laititi, e faitau ai e lo’u aiga le tala o le Feagaiga Fou i le soifua mai o Keriso i moligao i le Po o le Kerisimasi.
E tofu i matou taitoatasi ma ni fuaiupu o mau i luga o ni fasipepa uumi. E tofu i matou ma se moligao umi, ae ua na o le tagata muamua e faitau leotele na te tutuina lana moligao. O la latou afi mumu laitiiti ua na o le pau lea o le malamalama i totonu o le potu pe a amata ona latou faitau mai le Luka mataupu 1:
“O le ono o masina ua auina mai ai e le Atua o le agelu o Kaperielu i le aai o Kalilaia, o Nasareta le igoa,
“I le taupou o le aiga o Tavita, na faufautane i le tagata e igoa ia Iosefa; o Maria foi le igoa o le taupou.
“Ua ulufale mai le agelu ia te ia ona faapea mai lea o ia, Si ou alofa ia te oe le ua alofaina, ua ia te oe le Alii: amuia oe i fafine” (Luka 1:26–28).
O le taimi lava e uma ai ona faitau e le tagata muamua nei fuaiupu, latou te faaaogaina la latou vavae mumu e faaola ai le moligao a le tagata e sosoo ai. O le tagata faitau muamua e tapeina la latou afi mumu, ma faaauau pea le tala:
“Faauta foi, o le a to oe, ma e fanauina se tama tane, e te faaigoa ia te ia o Iesu” (Luka 1:31).
“Ua fanau e ia lana tama ulumatua, ua ia aui ia te ia i le ie, ma faataoto ia te ia i le fale povi; auā latou te le ofi i le fale e tali ai malo” (Luka 2:7).
O le tala i le soifua mai o Keriso e faaauau pea ma le migao i lenei mamanu, mai lea tagata i lea tagata i le moligao. E oo atu i le faaiuga o lenei faitauga o tusitusiga paia, ua faatumulia le potu pogisa i le Agaga ma ave o le malamalama.
E oo lava i le taimi a’o o’u tamaitiiti ma sa tau lē malamalama i le gagana o le Feagaiga Fou, sa ou fiafia lava i taimi uma i tu masani a lo’u aiga o le faitau i moligao e uiga i le soifua mai o Keriso. O loo faaauau pea ona faaali mai e lenei tu masani faigofie ia te au e faapea e le manaomia ni mea maoae e tutupu i lenei taimi o le tausaga e fausia ai manatuaga faamemelo o le Kerisimasi pe faamalosia ai a tatou molimau i le Faaola.
Pe a tatou tausia Iesu Keriso ma Ana sāvali faigofie o le malamalama ma le alofa i le totonugalemu o o tatou olaga, o le a sologa lelei isi popolega ma tiutetauave uma.
Pe o O’u Taulai Atu ea ia Keriso?
Ou te fiafia i le Kerisimasi ma faafiafiaga uma e fesootai i ai: o tu masani, o teuga, o meaai, ma musika. Ou te fiafia faapitoa lava o le Kerisimasi e taulai atu i le Faaola. Ae toeitiiti lava o tausaga uma, ou te toe tepa i tua i aso malolo ma lagona sina lē fiafia. Ua pisi tele le olaga e ola ai i la’u miti i le tuuto atu lea o se masina atoa i faafiafiaga o le Kerisimasi.
I a’u taumafaiga e fatufatu se aso malolo fiafia, e masani ona ou faamamafaina ia te a’u lava ma taulai atili atu i faamatalaga e lē taua nai lo lo’u sootaga ma le Faaola. Ae ua ou aoaoina e faapea o le mea e sili ona taua o le faaavanoa o le taimi mo mausa laiti, e faatotonugalemu ia Keriso. Nai lo le lagonaina o le faamalosia e fai atu ioe i mea uma e tutupu faa-agafesootai pe saili ni meaalofa atoatoa, e mafai ona tatou taulai atu i le faia o mea lelei ma faaavanoa le taimi mo Ia i aso taitasi. Ma e mafai ona tatou iloa a tatou taumafaiga e faasoa atu ma valaaulia Lona malamalama, e tusa lava pe foliga mai e laiti.
Na saunoa Elder Dieter F. Uchtdorf o le Korama a Aposetolo e Toasefululua e uiga i le faafaigofieina o o tatou olaga e taulai atu ai i le Faaola. Na ia faapea mai: Pe a tatou saili e faamama o tatou olaga ma vaai atu ia Keriso i mafaufauga uma, [tagai Mataupu Faavae ma Feagaiga 6:36], o le a amata ona ogatusa isi mea uma. E lē toe lagonaina e le olaga e pei o se lisi umi o ni taumafaiga tuueseese na taofiofi e le paleni le mautu.
“… Pe a tatou vaai i o tatou olaga ma vaai i le selau o mea e fai, tatou te lagonaina le lofituina. Pe a tatou vaai i se mea se tasi—alofa ma auauna atu i le Atua ma Ana fanau, i ni auala eseese se selau—ona mafai lea ona tatou galulue i na mea ma le olioli.”2
Soo se taimi lava ou te lagonaina ai lagona lofituina lea e o mai faatasi i nisi taimi ma le vaitau o le Kerisimasi, ou te faamanatu ia te a’u lava afai ou te taulai atu ia Keriso, o lona uiga ua lava mea ou te faia.
Atonu na faamoemoe tagata Iutaia o le Feagaiga Fou e afio mai lo latou Faaola i le lalolagi i se faaaliga maoae, ae nai lo lena na afio mai o Ia i le lalolagi ua faaalia i elemene ma manu. Sa le’i malolo o ia i se nofoalii, ae i totonu o se faatanoa vao. O le soifua mai ma le soifuaga o Iesu Keriso o ni faataitaiga tupito taua ia o le faatauvaa ma le lotomaualalo lea e mafai ona tatou valaauliaina i o tatou olaga, aemaise lava i lenei taimi o le tausaga.
E faaauau pea e lo’u aiga le tu masani o le faitauina i moligao o le soifua mai o Keriso i tausaga taitasi. I se tasi Tesema ina ua ou lagona le atuatuvale e uiga i suega faaiu i le aoga, sa ou manatu ua ou misia lo’u avanoa e fiafia ai i le vaitau o le Kerisimasi. Ae o lenei tu masani faigofie o le gaoioiga lea e tasi na fesoasoani ou te lagonaina ai le faagaeetia, faamalieina, ma le lotofaafetai. O le manatuaina o le soifua mai o Keriso na aumaia ai le faamalieina sili atu nai lo soo se isi lava meaalofa na ou mauaina pe soo se teuga sa ou tautauina i lena tausaga.
O La Tatou Meaalofa Silisili
Pe a lagona le lofituina po o le pogisa i le olaga, ae maise lava i le vaitau pisi o aso malolo, ia manatua o Keriso ua na o le pau lea o le punavai o le malamalama tumau. E pei ona sa Ia fetalai, “O A’u nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola”(Ioane 8:12).
Talu ai nei sa ou faaaluina ai o’u aso o Tesema e atuatuvale ai i mea e tutupu faa-agafesootai, popole i a’u tulaga tautupe, ma le vaavaai atu i tagata o lo’u aiga o misia nisi e pele o e ua maliliu. Ae ua ou faaaluina foi se taimi e tatalo ai ma le agaga faafetai mo le tele o o’u faamanuiaga. Ua ou faia se taumafaiga faaopoopo e auauna atu ai e pei ona sa faia e Keriso. Sa ou faaaluina ni nai taimi e manatua ai le ala na tausia ai a’u e le Atua i le taimi ua tuanai, ma ou te iloa e mafai ona ou faatuatuaina o Ia e tusa lava po o a o’u tulaga. Sa toe faitau foi lo’u aiga e faaaoga ai moligao i le soifua mai o Keriso, ma sa faamanatu mai ai ia te a’u Lona alofa ma le filemu.
Afai tatou te sailia o Ia i lo isi mea uma i lenei taimi o le tausaga—i faatusa o le Kerisimasi, o faafiafiaga tatou te auai ai, o meaalofa tatou te faatauina, ma le auaunaga tatou te tuuina atu—o le a tatou mauaina o Ia (tagai Mataio 7:8). O Lana faatosinaga ma le Agaga e avanoa mo i tatou e lē na o le taimi o le Kerisimasi, ae o taimi uma lava.
I upu a Elder José A. Teixeira o le Fitugafulu: “Ona sa afio mai o Ia, o loo i ai le uiga o lo tatou i ai iinei. Ona sa afio mai o Ia, ua i ai le faamoemoe. O Ia o le Faaola o le lalolagi, ma o Ia o la tatou meaalofa silisili.”3
E tusa lava po o a mea tatou te feagai, e mafai uma lava ona tatou valaaulia i o tatou olaga le faamoemoe, filemu, mafanafana, ma le olioli ua folafola mai e le Faaola.