Ua Na’o Tusiga Faaeletonika: Autalavou Matutua
O Le Mea Sa Ou Le Malamalama Ai e uiga i le Faaola
Ina ua umi atu lo’u ma’i nai lo le mea na faamoemoeina, sa ou aoao ai e le tatau ona ou feagai ma tofotofoga na o a’u.
Ina ua oo mai le faama’i oti i le 2020, o a’u o se tasi o uluai tagata na aafia i le KOVITI-19 i la’u eria i Sikotilani. I le taimi muamua sa ou manatu o se fulū masani. Ae a o faagasolo pea le taimi, sa faasolo ina sili atu le leaga o lo’u soifua maloloina, seia oo lava i le tulaga o se tauiviga le tau manava. Sa matua faaleagaina lo’u faa’i ma ’ava e fesootai ma alaea o le isu, ma sa ou mafatia mai le vaivai tele.
O le toe maua o le malosi sa o se vaega faifai pea mo le silia ma le tausaga ma le afa, o le taimi lea sa le mafai ai ona ou auai i soo se taaloga po o se gaoioiga faaletino. Sa tatau ai ona ou taofia mea uma. Sa oo foi ina ou aluese mai le iunivesite mo se tausaga, ma sa oo ina ou matuai le fiafia lava,—le fiafia e uiga i o’u tulaga ma ita i le Tama Faalelagi ina ua foliga mai e le mafai ona toe foi i se manuia.
Tatou te Malolosi faatasi ma Iesu Keriso
E ui lava i le tulaga o lo’u mafaufau, sa faaauau pea ona ou ola i le talalelei. Sa faaauau pea ona ou alu i le lotu ma faia mea ou te mafaia e fesoasoani ma auauna atu ai i isi. Sa faasolosolo malie lava, ona toe sologa lelei le tulaga o lo’u mafaufau.
Ina ua amata ona mou atu auga na sili ona leaga, sa ou maua se valaauga sa le’i faamoemoeina e auauna atu i le aufautua maualuga i la’u siteki. E ui i lo’u popole, sa ou taliaina le valaauga ma le faamoemoe o le a saunia e le Alii se ala mo a’u e faataunuu ai le valaauga e ui lava i le le lelei o lo’u ola maloloina (tagai i le 1 Nifae 3:7).
O se tasi o tofiga muamua na ou mauaina o le lauga atu lea e uiga i le Faaola ma Lana Togiola. Faatasi ai ma lauga uma sa ou tuuina atu i isi soo o Iesu Keriso, sa tuputupu a’e ai lo’u malamalama ia te Ia ma mea sa Ia faia mo a’u. Sa ou iloaina sa ou le amanaiaina se vaega taua o Lana Togiola—sa puapuagatia le Alii ma maliu e le gata mo a tatou agasala ae mo o tatou puapuaga. Na te silafia le auala e siitia ai i tatou i o tatou tofotofoga (tagai i le Alema 7:12).
Na aoao mai talu ai nei ia Peresitene Camille N. Johnson, Peresitene Aoao a le Aualofa:
“E mafai e Iesu Keriso ona faamāmā la tatou uta.
“E mafai e Iesu Keriso ona si’i a tatou avega.
“Ua saunia e Iesu Keriso se ala mo i tatou e mapu i ai mai le mamafa o le agasala.
“O Iesu Keriso o lo tatou mapusaga. …
“… E le mafai ona ou faia na o a’u, ma ou te le tau faia, ma o le a ou le faia lava. O le filifili ia noatia i lo’u faaola, o Iesu Keriso, e ala i feagaiga na ou osia ma le Atua, ‘Ou te mafaia mea uma lava i le faamalosi mai o Keriso ia te a’u’ [Filipi 4:13].”1
Ua ou faalagolago foi i lo’u lava malosi, ma i lo’u faamaualuga sa ou manatu moni ai e mafai ona ou faatoilaloina na o a’u o’u tofotofoga. Ae sa oo ina ou iloa ou te le’i toilalo ona sa faigata tele le tofotofoga; ae ona sa ou le’i faatagaina Iesu Keriso e ofoina mai ia te a’u Lona malosi ma le lagolago.
Mulimuli ane o le malamalama i mea ua Ia ofoina mai ia te a’u e ala i Lona mana faamalolo na suia ai mea uma. E ui o le a le faigofie pe vave lo’u auala i le toe faaleleia, ae sa mafai ona ou maua le filemu, olioli, ma le malosi i le ala i le liliu atu ia te Ia.
Faalolotoina o la Tatou Sootaga ma Keriso
Tatou te le tau feagai na o i tatou ma ni tofotofoga. E mafai ona tatou faalagolago i lo tatou Faaola mo le malosi. Sa ou iloaina o faigata faaleagaga sa ou lagonaina i le taimi o lo’u ma’i na oo mai ona o le leai o so’u malamalama i la’u sootaga ma le Tama Faalelagi ma Iesu Keriso ma le malosi e mafai ona La tuuina mai ia te a’u a o faaauau pea ona ou auauna atu, saili, ma mulimuli ia i La’ua.
Na tuuina mai e Peresitene Dallin H. Oaks, Fesoasoani Muamua i le Au Peresitene Sili, se faamanatu mamana o la tatou sootaga ma le Faaola ina ua ia saunoa: “O loo Ia … silafia o tatou tauiviga, o o tatou lototiga, o o tatou faaosoosoga, ma o tatou mafatiaga, aua sa Ia silafia ma le naunautai i latou uma o se vaega taua o Lana Togiola. Ma ona o lenei mea, o Lana Togiola ua Ia maua ai le mana e fesoasoani ai ia i tatou—e tuu mai ai ia i tatou le malosi e onosaia uma ai.”2
O le mea e lelei ai, sa uunaia a’u e le Alii ina ia sili atu ona ou toaga i le sailiga o le malamalama ia te Ia. Ma a o ou malamalama atili ia te Ia, sa mafai ona ou vaaia Lona aao i lo’u olaga i se faatelega sili atu ma vaai i vavega o le faamalologa, e tusa lava pe umi atu nai lo le mea na faamoemoeina. E pei ona aoao mai foi Peresitene Johnson, “E faamanuiaina e tausi feagaiga i le toomaga o le Faaola.”3
O le faateleina o lo’u malamalama i le Faaola ma le tausia o a’u feagaiga ua avea ma se faamanuiaga tele i lo’u olaga. Ua Ia tuuina mai ia te a’u le tele o le toomaga faaleagaga ma faaletino mai o’u faigata. E mafai ona ou folafola atu a o e taumafai e faia lea lava mea e tasi, o le a manino le alofa o le Alii ma lou faamoemoega paia. O le a e maua le malosi e sili atu nai lo lou lava malosi—e pei ona ou mauaina.