Ua Na’o Tusiga Faaeletonika

Manatu e 4 mo le Fausiaina o Sootaga ma Tapuaiga Soofaatasi

Saunia e Alyssa Bradford

O Mekasini a le Ekalesia

“O loo faaaogaina e le Atua le silia ma le toatasi le tagata mo le faataunuuina o lenei galuega sili ma le ofoofogia.”¹

O le a se mea e mafai ona tupu pe a omai faatasi tagata o le tele o tapuaiga ma talitonuga? E mafai ona faamanuiaina nuu, aiga, e oo lava i le lalolagi! Mo se faataitaiga, i le taimi o le konafesi aoao ia Aperila 2020, sa valaaulia ai e Peresitene Russell M. Nelson tagata uma—o sui uma O Le Ekalesia a Iesu Keriso o le Au Paia o Aso e Gata Ai ma i latou e le auai i lo tatou faatuatuaga—e anapopogi ma tatalo mo se toomaga mai le faama’i oti o le KOVITI-19.²

I le tali atu i le valaaulia a Peresitene Nelson i le lalolagi atoa ia anapopogi, e toatele tagata mai faatuatuaga i le salafa o le lalolagi na tuufaatasia i se faamoemoega tutusa.

Sa amata e vaega eseese o le Facebook ona valaaulia le faitau afe e faasoa mai o latou aafiaga. Sa faimai Brandi, o se tasi o sui o le vaega: “Talu mai le auai i lenei vaega, ua suia e faavavau lo’u olaga. O le vaaia o mea lelei uma ua uunaia ai a’u e le pei o se isi lava mea. … O le avea ai ma se vaega o lenei vaega maoae, faatasi ai ma tagata mai soo se ituaiga o olaga e auai faatasi i le alofa ma le filemu, e pei ai lava o se isi lalolagi. … O mea na ou oo i ai ma lagonaina i lena vaega, faatasi ai ma le silia ma le afa miliona isi, e mautinoa lava o se vaaiga lea o le a faapei ai le lagi. Ua lotogatasi fanau uma a le Atua.”³

Ua faaauau pea ona uunaia e taitai o le Ekalesia ia tagata taitoatasi ina ia galulue faatasi ma i latou o isi talitonuga e fausia ni faigauo, faamalolosia nuu, ma fausia le lotogatasi.

Na saunoa mai Peresitene Dallin H. Oaks Fesoasoani Muamua i le Au Peresitene Sili, e faapea: “E ui i mea uma e fai patino e le Ekalesia, ae o le tele o auaunaga alofa i fanau a le Atua i le lalolagi atoa e faatinoina e tagata ma faalapotopotoga e leai se fesootaiga aloa’ia ma le tatou Ekalesia. E pei ona sa matauina e se tasi o a tatou Aposetolo: ‘O loo faaaogaina e le Atua le silia ma le toatasi le tagata mo le faataunuuina o lenei galuega sili ma le ofoofogia. … E telē na’uā ma faigata tele mo soo se tagata se toatasi.’”⁴

O le a se mea e mafai ona tatou faia e mulimuli ai i fautuaga faaperofeta ma auai i le galulue faatasi o ekalesia soofaatasi o ni tagata taitoatasi, aiga, ma uarota po o paranesi? O ni nai manatu nei e fa e te amata ai:

Fai se gaoioiga auauna atu, e pei o se tuiga toto. I Kalefonia, ISA, sa auai tagata o le Ekalesia ma uso Kerisiano mo le tuiina ma aoina atu o le toto, o se gaioiga a ekalesia soofaatasi. Ona saunoa lea o le Fitugafulu Eria o Elder Robert N. Packer, “Ua faia lenei mea aua e tele naua le alofa i le va o lenei faalapotopotoga Katoliko ma le faalapotopotoga o le Au Paia o Aso e Gata Ai.”⁵
Fuafua ma auai i se tolauapiga a ekalesia soofaatasi mo tamaiti po o le autalavou. O nisi o tagata o le Ekalesia i Manila, Filipaina, sa auai i se tolauapiga faaletausaga a ekalesia soofaatasi na saunia e Tapuaiga mo le Filemu i Asia & o le Upega Fesootai a le Autalavou Soofaatasi o le Pasefika. E tuuina atu e le tolauapiga “i taitai ni meafaigaluega latou te manaomia e galulue faatasi ai e faailoa faafitauli lemafaitaulia o loo feagai ma tagata talavou.”⁶

O tolauapiga ma gaoioiga a Ekalesia Soofaatasi e mafai ona maua ai avanoa e faatasi ai ma isi, lea e mafai ai e i tatou uma ona lagonaina le filemu lea e oo mai e ala i le auauna atu e pei o Iesu Keriso.
Auai i le aoina o meaai i le lotoifale. Fai mai Walker N., 7 tausaga, mai Alberta, Kanata: “O lo matou aai e faia se gaoioiga ma ekalesia soofaatasi o le aoina o meaai, i tausaga taitasi. Matou te tufatufa atu ni pepa faalauiloa ona piki mai lea o meaai o e tuua i luga o faasitepu. Ina ua matou aveina atu meaai i le nofoaga autu, sa ou lagona le fiafia tele. Fai mai lo’u tina o lena lagona o le Agaga Paia lea.”⁷
Auai i konaseti a ekalesia soofaatasi. O Megan C., 18; Ethan M., 19; ma Romy C., 17, mai Florida, ISA, sa auai i se Faaaliga Musika a Ekalesia Soofaatasi faatasi ai ma le sini ia “fesoasoani i tagata mai tulaga eseese ia avea ma ni uo.”⁸

“I se lalolagi ua matua tele naua sauaga o tapuaiga ma faatuatuaga, e matagofie le mafai ona tatou o mai uma faatasi ma talanoa le tasi i le isi. … [O latou na auai] sa lei popole e uiga i le lotu a se isi tagata. Sa na ona i ai iina e ofo atu la latou fesoasoani,” na fai mai ai Romy.⁹

A o i ai i se Fono G20 a Ekalesia Soofaatasi i Italia, sa faamanatu mai ai e Elder Jack N. Gerard o le Fitugafulu ia i tatou le taua o le galulue faatasi ma tagata o talitonuga uma a o tatou taumafai e mulimuli i le faataitaiga a Iesu Keriso: “O sootaga e taitai atu ai i le malamalama moni. … E tatau ona tatou tulai a’e i luga atu o fefinauaiga ua tatou vaaia i le lalolagi i aso nei. Ma e manaomia ona tatou taulamua e faamanatu i o tatou lava tagata ina ia faaalia e ala i faataitaiga i le lalolagi atoa e faapea i lo tatou faatuatuaga, o le Faaola lava Ia o se fomai sili. Sa Ia aumaia faatasi i tatou ma uunaia isi e ’aua le faamasinoina le tasi ma le isi ae ia taufaaoleole, ina ia fuaina i le ala tatou te manatu ai le tasi ma le isi. E mafai ona tatou o mai faatasi ma tutulai a’e i luga atu o nisi o [mea ua] faatagaina i tekinolosi faaonaponei, ma maua i tatou lava i se nofoaga e sili atu ona lelei, ma faamaloloina moni loto ma agaga o tagata uma, e tusa lava po o a tu ma aga masani o lo latou faatuatua po o le leai foi o se tu masani o le faatuatua.”¹⁰