Na cava e gadrevi kina meu vosoti ira na tani?

Me rawa ni vosoti na noda ivalavala ca, sa gadrevi me da vosoti ira na tani. Na noda vosoti ira na tani ena rawa kina vei keda me da vakamalumalumutaka na yalocudrucudru, na yaloca, se na via sosomitaka na ca. Na veivosoti e rawa ni vakabula na mavoa vakayalo ka kauta mai na vakacegu kei na loloma e rawa duadua ga ni solia na Kalou.

Mo vakarautaki iko vakayalo

Na cava o sa bau vulica ena nomu vosoti ira na tani? E rawa ni o vakasamataka e dua na gauna mai na nomu vosota e dua ni a vukea mo vakila na vakacegu kei na loloma?

Na veika cava soti era sa sotava tiko na cauravou me ra na gadreva kina me ra vosota eso? Na cava era gadreva me ra vulica me baleta na nodra vosoti ira vakataki ira? E rawa vakacava ni o vukei ira na cauravou me ra vulica me ra veivosoti me rawa ni ra kunea kina na vakacegu?

Me Kilai: Kevaka e tu na nodra vakatataro na cauravou me baleta na veivosoti ena gauna ni veivakalolomataki, vakatura me ra taro ivakasala mai vei nodra bisopi se peresitedi ni tabana.

Na ivolanikalou cava ena vukei ira na cauravou me ra raica na veivakalougatataki ena yaco mai ki na nodra bula ni ra vosoti ira tale eso?

Maciu 5:44; V&V 64:9–11 (Eda sa vakaroti me da vosoti ira na tamata kecega)

Maciu 6:14–15; 18:21–35 se na vidio “Forgive 70 Times 7” (Me ciqomi na veivosoti, sa dodonu meda vosoti ira na tani)

Luke 23:34 (A vosoti ira era vakamatei koya ena kauveilatai o Jisu Karisito)

Kevin R. Duncan, “Na iLumu Veivakabulai ni Veivosoti,” Ensign se Liaona, Me 2016, 33–35

Gordon B. Hinckley, “Na Veivosoti,” Ensign se Liaona, Nove. 2005, 81–84.

Dieter F. Uchtdorf, “O Ira Era Dauloloma Era na Lomani,” Ensign se Liaona, Me 2012, 70–76

Vidio: “Forgiveness: My Burden Was Made Light”

Raica me ra veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola ni iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakaiiko mo raicalesu kina na lesoni ni macawa sa oti ka vakamacalataka na lesoni ni macawa oqo:

Na cava era bau nanuma rawa na cauravou mai na lesoni sa oti? Na cava era a sureti me ra cakava? Na cava soti era sa bau sotava ni ra vakayagataka tiko na veika era sa vulica?
Kerei ira na cauravou me ra vakasamataka mada e dua na gauna a gadrevi kina me ra vosota e dua. Sureti ira me ra wasea na veika era sa sotava oti, kevaka era logavinaka kina. Na cava a qai yaco kina? Ena duidui beka vakacava na veika ena yaco kevaka era a sega ni veivosoti?

Vulica vata

Na itaviqaravi yadua e ra e rawa ni vukei ira na lewe ni kuoramu me ra kila deivaki na bibi ni veivosoti vei ira na tani. Mai na veivakauqeti ni Yalotabu, digitaka e dua se sivia ka na ganita vinaka na nomu kuoramu:

Wasea vakailawalawa na kuoramu, ka sureta na ilawalawa yadua me ra wilika na veitikina digitaki mai na vosa vakarautaki ena ituvatuva oqo se dua tale na vosa o digitaka. Kerei ira na cauravou me ra vakatakilakilataka na veitiki ni vosa e lauti ira. Sureti ira me ra wasea na ka era vakatakilakilataka ka vakamacalataka na vuna e vakaibalebale kina vei ira.
Wilika vata na italanoa vakaibalebale ni tamata sega ni loloma ena Maciu 18:23–35 (se vakaraitaka na vidio “Forgive 70 Times 7”), ka vukei ira na cauravou me ra cakacakataka ka vakatauvatana na nona dinau na tamata cakacaka kei ira na nona itokani vakacakacaka (raica na “Weights and Measures” ena Bible Dictionary). Na cava beka era vulica na cauravou mai na italanoa vakaibalebale oqo me baleta na veivosoti? Sureti ira na cauravou me ra vakaraica ka wasea na ivolanikalou tale eso e vakatavulica na bibi ni nodra vosoti na tani (me vaka e vakatura na ivolanikalou ena ituvatuva oqo).
Kerei ira na cauravou mera vakatauvatana na ivakaraitaki eso ena ivolanikalou me baleti ira na tamata ka vosota tiko eso tale. E rawa ni o railesuva na ivakaraitaki eso nei Josefa mai Ijipita (raica Nai Vakatekivu 45:1–7), Nifai kei iratou na tacina (raica na 1 Nifai 7:21), Jisu Karisito ena kauveilatai (raica na Luke 23:34), se so tale. Na cava e sa rui bibi sara kina me da vosoti ira na lewe ni matavuvale? Vakaraitaka e dua na vidio e vakaturi tiko ena ituvatuva oqo, ka kerei ira na cauravou mera wasea na nodra nanuma. Na cava eso tale na ivakaraitaki ni veivosoti e rawa ni ra wasea?
Kerei ira na cauravou me ra vakaraica e dua na ka ena ivolanikalou e a vakavuvulitaka na iVakabula me baleta na nodra vosoti na tani ka wasea na veika era kunea ki na kalasi (me baleta na ivakaraitaki eso, raica na Maciu 5:44; 6:14–15; 18:22–23). Kerei ira me ra wasea na veika era sa sotava oti me baleta na vakacegu e dau yaco mai ena noda vosoti ira na tani.
Vola na veitaro oqo ena tiki ni pepa duidui eso, ka solia e dua ki na lewe ni kuoramu yadua: Cava na vuna e gadrevi kina me da vosota na tamata kecega, oka kina o keda? Cava na vuna e tu duadua ga kina vua na Turaga na lewa me baleta na nona vosoti se sega e dua na tamata? Cava na vuna e sa rui valavala ca levu kina na tawaveivosoti? Sureta na cauravou yadua me vakananuma vakatitobu na nona taro ni wilika na Vunau kei na Veiyalayalati 64:9–11. Qai sureti ira na cauravou me ra wasea na nodra nanuma kei na vakasama.

Kerei ira na cauravou me ra wasea na veika era sa vulica nikua. Era sa kila deivaki beka na bibi ni nodra vosoti na tani? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Me Veivuke ena Veivakavulici

“Na qasenivuli e dau vosa tu ga ena vuqa na gauna se sauma ga vakataki koya na taro ena vakayalolailaitaki ira na gonevuli me ra vakaitavi” (Veituberi, Me iLutua ni Noda Bula [1999], 73).

Veisureti mera bulataka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Vakayaloqaqataki ira na lewe ni kuoramu me ra vakasamataka e dua e dodonu me ra vosota ka cakava e dua na yalayala me ra vosota na tamata oqori.
Sureti ira na lewe ni kuoramu me ra wasea vei ira na nodra matavuvale na veika era sa vulica.