Na cava na loloma soli wale?

Na loloma soli wale sa ikoya na veivuke kei na igu vakalou eda dau ciqoma mai na Veisorovaki nei Jisu Karisito. Ena iloloma soli wale, eda sa vakabulai kina mai na ivalavala ca kei na mate. Me kena ikuri, na loloma soli wale sa dua na kaukauwa veivakarautaki ka na vaqaqacotaki keda mai na dua na siga ki na dua tale ka vukei keda me da vosota me yacova na ivakataotioti. Ena gadrevi vei keda na sasaga me da ciqoma kina na taucoko ni Nona loloma soli wale na Turaga.

Mo vakarautaki iko vakayalo

Na cava na ibalebale ni loloma soli wale vei iko? O sa vakila beka vakacava na kaukauwa nei Jisu Karisito ni vukei iko mo veisautaka na nomu bula?

Na cava beka era kila na cauravou me baleta na loloma soli wale? Na sala cava e rawa ni o vukei ira kina me ra kila na kaukauwa ni loloma soli wale ena nodra bula? E rawa ni vukei ira vakacava na cauravou na loloma soli wale ena nodra segata tiko me ra vakayacora na nodra itavi vakamatabete?

Era sa vukei iko beka vakacava na ivolanikalou kei na ivurevure tale eso mo kila deivaki kina na loloma soli wale? Na cava beka o vakauqeti kina mo wasea vei ira na cauravou me rawa ni ra kila deivaki na loloma soli wale?

Efeso 2:8–9; 2 Nifai 25:23 (Ena loloma soli wale ga eda sa vakabulai kina)

Filipai 4:13; Jekope 4:6–7 (Na loloma soli wale i Jisu Karisito e solia vei keda na igu)

Moronai 10:32–33 (Na loloma soli wale e rawa ni vakavinakataki keda sara vei Karisito)

J. Devn Cornish, “Au sa Vinaka Li? Au na Rawata Li?” Ensign se Liaona, Nove. 2016, 32–34

Dieter F. Uchtdorf, “Na iSolisoli ni Loloma Vakalou,” Ensign se Liaona, Me 2015, 107–10

David A. Bednar, “Colata Nodra iColacola ena Loloma,” Ensign se Liaona, Me 2014

“Loloma, ” Tudei ena Vakabauta (2004), 60–62

Raica me ra veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou me ra veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakaiiko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Kauta mai e dua na iyaya se iyaloyalo, ka taroga vei ira na cauravou se veiwekani vakacava ki na lesoni ni macawa sa oti. Na cava era sa cakava ena macawa sa oti me vua ni veika era sa vulica?
Tarogi ira na cauravou se cava era kila me baleta na loloma soli wale. Na cava era nanuma ni ibalebale ni loloma soli wale? E vakaevei na ivakarau ni nodra raica na loloma soli wale ena nodra dui bula? ena nodra veiqaravi vakamatabete? Era vakabauta li ni ra na vakabulai ena loloma soli wale? Na cava na nodra vakatataro me baleta na loloma soli wale? Me tiki ni veivosaki oqo, o na vinakata beka mo wasea na ivakamacala ni loloma soli wale ena itekivu ni ituvatuva oqo.

Vulica vata

Na itaviqaravi yadua e koto e ra e rawa ni vukei ira na lewe ni kuoramu me ra kila na ivunau ni loloma soli wale. Muria na veivakauqeti ni Yalotabu ena nomu digitaka e dua se sivia ka na ganita na nomu kuoramu:

Sureti ira na cauravou mera vulica e vica na tikina ni nona vosa Elder J. Devn Cornish “Au sa Vinaka Li? Au na Rawata Li?” Kerei ira me ra vaqara na isau ni taro “Na cava na loloma soli wale?” Au na rawa ni ciqoma vakacava na loloma soli wale ena noqu bula? Au na rawata vakacava meu bula kilikilikaya ki na nona loloma soli wale na iVakabula ? Ena rawa beka niu lesu ki lomalagi?” Ni sa oti na nodra vakasamataka vakabibi na vica na taro oqo na cauravou, sureti ira me ra vakasamataka mada mai e dua na nodra itokani e sotava tiko na dredre ena vakabauta kei na nona nuidei tiko ena kosipeli. Ena vukea vakacava na nodra itokani na vosa oqo?
Vakasamataka mo droinitaka e dua na matamata tadola kei na katubaleka tadola ena papa, ka kerea vei ira na cauravou me ra vaqaqara ena itekivu ni vosa nei Peresitedi Dieter F. Uchtdorf “Na iSolisoli ni Loloma Vakalou” mo kunea na ivakatautauvata e cakava o koya me baleta na loloma vakalou kei na ka e rua oqo. Wasewasea na vo ni vosa vei ira na cauravou ka kerea me ra vola ka wasea e dua na ivakaleka dua na iyatuvosa ena ka era sa vulica me baleta na loloma vakalou mai na nodra iwasewase. Na cava era na cakava me ra rawata mai kina eso na ka mai na nodrau loloma vakalou na Tamada Vakalomalagi kei na Luvena?
Ni se vo toka e vica na siga, kerea e dua na lewe ni kuoramu me vulica mai na cava na kena ibalebale me da colata na nona ivua na iVakabula, mai na Maciu 11:28–30 kei na vosa nei Elder David A. Bednar “Colata na Nodra iColacola ena Loloma.” Kerei koya me lako mai ki na soqoni ni kuoramu ka vakarau mai me liutaka e dua na veitalanoa me baleta na veika sa vulica kei na sala e rawa ni matataka kina na noda veiwekani kei Jisu Karisito e dua na ivua. Vakauqeti koya me wasea eso na malanivosa mai vei Elder Bednar e nanuma ni rawa ni vukei ira na lewe ni kuoramu me ra vakila na nona loloma soliwale na iVakabula.
Vola na itukutuku leleka ni ivolanikalou mai na ituvatuva oqo, ka biuta e dua na ivakaleka ena lalaga kece ni rumu. Lesia na cauravou yadua me wilika e dua vei ira na ivolanikalou me qai vakaraica ka laki tu ena yasa ni ivakaleka e veisotari kei na nona ivolanikalou. Kerea vei ira na cauravou me ra wasea na veika era sa vulica mai na nodra ivolanikalou me baleta na loloma soli wale. Na ivakadinadina cava ni loloma soli wale era raica ena nodra bula? Na ivakaraitaki cava e rawa ni ra raica mai na ivolanikalou?
Sureti ira yadua na lewe ni kuoramu me ra tuva na veika eso era sa vulica ena nodra wilika me baleta na loloma soli wale (grace) ena Bible Dictionary ka vakakina ena Tudei ena Vakabauta. Kerei ira na cauravou me ra wasea e dua na ka mai na nodra ituvatuva ka vakamacalataka se cava e vakaibalebale kina vei ira. Sureti ira me ra vaqara na iyaloyalo eso (ena iVola ni Cakacakaniliga Vakosipeli se dua na mekasini ni Lotu) ka vakaraitaki kina na tamata era ciqoma na loloma soli wale se na veivuke mai vua na Kalou, ka kerei ira me ra wasea yarua se vakaiwaselalai na veika era sa vulica me baleti ira na tamata oqo. Na cava soti beka era sa sotava oti mai e rawa ni ra wasea mai na nodra bula?
Kauta mai e dua na tabanikau ki na soqoni ni kuoramu, ka sureti ira na cauravou me ra raica na sala e vakayagataka kina na iVakabula na tabanikau me vakavulica na loloma soli wale ena Joni 15:1–10. Na vakasama cava beka era rawata mai na veitikina oqo me baleta na loloma soli wale? Sureta e dua na lewe ni kuoramu me vakayagataka na tabanikau o kauta mai me vakalekalekataka kina vei ira na vo ni lewe ni kuoramu na veika sa vulica me baleta na loloma soli wale.

Kerei ira na cauravou mera wasea na veika era sa vulica nikua. Era kila deivaki beka na ivunau ni loloma soli wale? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Me Veivuke ena Veivakavulici

“Ena yaco beka ... eso na gauna ni ko sega ni kila na isau ni dua na taro. Kevaka e yaco oqo, kaya ga vakadodonu ni o sega ni kila. O na vinakata beka mo tukuna ni o na tovolea mo kunea na kena isau. Se o na vinakata beka mo sureti ira na gonevuli me ra vaqara na kena isau, ena nomu solia vei ira na gauna ena dua tale na lesoni me ra ripotetaka na veika era sa vulica” (Veituberi, Me iLutua ni Bula[1999], 64).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na nona ivakadinadina me baleta na kaukauwa ni loloma soli wale.
Liutaka e dua na mataveivosaki ena sala e rawa ni vukei ira kina na lewe ni kuoramu na loloma soli wale ni iVakabula me ra qarava vakavinaka sara kina na nodra itavi vakamatabete.