Na cava na kena ibalebale me da veivutuni?

A colata o Jisu Karisito na itotogi ni noda ivalavala ca me rawa kina ni da veivutuni. Na veivutuni sai koya na veisau ni yalo kei na vakasama ka na kauti keda vakavoleka yani vua na Kalou. E oka kina na vuki tani mai na ivalavala ca ka gole yani vua na Kalou mo vosoti. E veivakauqeti kina na lomana na Kalou kei na gagadre dina mo talairawarawa ki na Nona ivakaro.

Mo vakarautaki iko vakayalo

Na veika cava soti o sa bau sotava oti me baleta na veivutuni? Ni sega ni veivosakitaki na ivalavala ca yadua, ena rawa vakacava ni o wasea na sala e vukei iko kina na veivutuni mo toro voleka kina vei Tamada Vakalomalagi?

Eso beka na cauravou era sotava tiko na dredre ni bula tawakilikili. Oqo ena vakaleqa na nodra rawa ni veiqaravi vakamatabete yalodina. Na sala cava e rawa ni o kauwaitaki ira tiko kina ka sureta na Yalotabu me vukea na nodra gagadre me ra veivutuni?

Wilika ena yalomasumasu na veiivolanikalou kei na ivurevure oqo. Na cava e dau vakauqeti iko mo veivutuni?

Aisea 1:18 (Ena veivutuni, sa rawa ni da vakasavasavataki mai na noda ivalavala ca)

Roma 3:23; 1 Joni 1:8 (Eda sa ivalavala ca kecega)

Alama 19:33 (Na veivutuni e kauta mai na veisau ni yalo)

Alama 36:6–24 (E veivutuni o Alama ka rawata na veivosoti mai na loloma soli wale ni iVakabula)

Alama 39:8 (E sega ni rawa ni da vunitaka na noda ivalavala ca mai vua na Kalou)

V&V 58:42–43 (Me da veivutuni, sa dodonu me da vakatusa ka biuta tani sara na noda ivalavala ca)

“Veivutuni,” Me iSakisaki ni iTabagone, 29–30

Dale G. Renlund, “Na iVakatawa Vinaka,” Ensign se Liaona, Me 2017, 29–32

Dale G. Renlund, “Veivutuni: Dua na Digidigi Rekitaki,” Ensign se Liaona, Nove. 2016, 121-24

Linda S. Reeves, “Na Yavu Levu ni Veivueti,” Ensign se Liaona, Nove. 2016, 88-90

Dieter F. Uchtdorf, “Ena Colati Iko e Tabana ka Kauti Iko i Vale,” Ensign or Liaona, Me 2016, 101–4

Vidio: “Within Bounds,” “Not A One-Time Thing”

Veivakavulici ena ivakarau ni iVakabula

A sureti ira eso na iVakabula me ra cakacaka ena vakabauta ka bulataka na dina e vakavuvulitaka o Koya. A kunea eso na madigi me ra vuli kina mai na so na veika qaqa sa sotavi oti. Na cava e rawa ni o cakava mo vukei ira kina na cauravou me ra raica na qaqa ni veivutuni e veisiga ena nodra bula?

Raica me ra veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou me ra veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa ni vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakaiiko mo raicalesu kina na lesoni ni macawa sa oti ka vakamacalataka na lesoni ni macawa oqo:

Kerei ira na cauravou me ra droinitaka eso na yaloyalo me vakananuma vei ira e dua na ka era vulica ena macawa sa oti, ka veivosakitaka na veika era droinitaka.
Me dodoka tu na ligana ruarua e dua na cauravou ka taura tu e ligana ruarua e dua na ka bibi ni ra veivosakitaka tiko na lewe ni kuoramu na sala e rawa ni vaka kina e dua na icolacola bibi na ivalavala ca. Ni ia tiko na veivosaki, me biu tiko eso tale na ka bibi e ligana na cauravou. Kauta laivi na veika bibi, ka sureti ira na cauravou me ra wasea na veika era vulica me baleta na ivalavala ca kei na veivutuni mai na lesoni vakaraitaki oqo.

Vulica vata

Na itaviqaravi yadua e ra e rawa ni vukei ira na lewe ni kuoramu me ra kila deivaki na ibalebale ni veivutuni. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti e dua na lewe ni kuoramu me vakavakarau mai me wasea e dua vei ira na italanoa e vakaturi tiko ena ulutaga oqo. E rawa talega ni o vakaraitaka na kedra vidio o ira na vosa oqo ni ra talanoataka tiko na italanoa eso oqo. Na cava eda vulica ena italanoa eso oqo baleta na veivutuni? Vola na ivakamacala ni veivutuni mai na rua na vosa oqo ena tiki ni pepa eso. Sureti ira na cauravou me ra digitaka e dua na malanivosa ka wasea na veika era sa vulica—taumada kei na dua na kena isa, oti, qai wasea vei ira na kalasi. Solia vei ira na gauna me ra vakananuma kina na veisau era vakauqeti me ra cakava ena vuku ni veika era sa vulica.
Sureta e dua na lewe ni kuoramu me vakavulica e dua na iwase ni lesoni oqo. E rawa ni cakava oqo me tiki ni nona ituvatuva ni iTavi Vua na Kalou me vulica ka vakavuvulitaka na veivutuni (raica na “Kila na iVunau,” tabana 18, 42, se 66).
Kerea e dua na cauravou me vunia e dua na iyaya ni ra rai tu mai na vo ni lewe ni kuoramu. Kerea e dua tale na lewe ni kuoramu me tovolea me vaqara na iyaya oqori. Na cava e vakavuvulitaka na ivakaraitaki oqo me baleta na kena tovolei me vunitaki na ivalavala ca mai vua na Kalou? (raica Alama 39:8). Na italanoa cava ni ivolanikalou e rawa ni ra wasea na cauravou ka vakavuvulitaka vei keda ni sega ni rawa ni da vunitaka na ivalavala ca mai vua na Kalou? (Na, Kena iVakaraitaki, Jona 1–2; 2 Samuela 11–12; Cakacaka 5:1–11). E rawa tale ga ni dikevi e dua na italanoa mai na vosa nei Sister Linda S. Reeves “Na Yavu Levu ni Veivueti.” Sureti ira na cauravou me ra veivosakitaka na taro eso oqo ena veiwasewase lalai: Na cava eso na sala era tovolea kina na tamata me ra vunitaka na nodra ivalavala ca? Na cava e rawa ni o tukuna mo vukea kina e dua me kila ni sega ni rawa ni da vunitaka na noda ivalavala ca?
Sureta e dua na cauravou me taura cake e dua na iyaloyalo kei Alama kei iratou na luvei Mosaia (raica na iVola ni Cakacakaniliga Vakosipeli, 77) ka vakalekalekataka na italanoa ni nodratou veivutuni (raica na Alama 36:6–24). Kerei ira na cauravou mera wilika yadua na Alama 36:13, 17–20, 23–24, raica na ivakavuvuli ni veivutuni ena veitikina oqo, ka wasea ena veilawalawa lalai na veika era sa vulica. Sureti ira na cauravou mera vakasamataka ka vola e dua na ka e rawa ni ra cakava me ra vakayagataka kina na ivakavuvuli ena nodra bula.
Sureta na cauravou yadua me ra vulica e dua na tiki ni “Veivutuni” ena Me iSakisaki ni iTabagone se dua na iwase digitaki ni vosa eso era vakaturi ena ituvatuva oqo. Me ra qai vakatakilakilataka ka wasea na cauravou e dua na ka e lauti ira. Sureti ira me ra vola vuni na taro cava ga e tu vei ira me baleta na veivutuni. Sureta na bisopi me sauma na taro eso oqo ka wasea na sala e semati kina na veivutuni ki na kaukauwa ni matabete.
Vakaraitaka na vidio “Within Bounds.” Sureta na veimama ni lewe kuoramu me ra vaqara na veika era vulica mai na vidio oqo me baleta na ibalebale ni veivutuni, ka qai sureta na ikarua ni veimama me baleta na itavi nei bisopi ena nodra vukei mera veivutuni. Kerei ira me ra wasea na ka era sa vulica. Na cava era na tukuna vei ira na nodra itokani ka ra rere voli ni vosa vua na bisopi me baleta na veicala era cakava?

Kerei ira na cauravou me ra wasea na veika era sa vulica nikua. Era kila deivaki beka na kena ibalebale me ra veivutuni? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Na gonevuli sara ga me na vakacakacakataki. Ni sa mai taura taucoko na qasenivuli na itavi vaqasenivuli, ka cicivaka duadua na nona kalasi, ka cicivaka taucoko sara na itaviqaravi, sa na rawa ni vakaleqa tale na nodra vuli na lewenikalasi” (Asahel D. Woodruff, ena Veituberi, Me iLutua ni Noda Bula [1999], 69).

Veisureti mera bulataka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Wasea na nona nanuma se kerei ira na lewe ni kuoramu me ra wasea na nodra nanuma me baleta na iVakabula kei na ibalebale ni veivutuni.
Sureti ira na cauravou me ra dikeva na nodra bula ka vakatulewa ena veika era gadreva me ra veisautaka.