Na cava na tucaketale?
Ena Veisorovaki i Jisu Karisiro, ena tucaketale na tamata kecega. Ena vakaduavatataki tale na yagoda kei na yaloda ena dua na ituvaki vinaka sara, ka tawamate rawa. E rawa ni solia vei keda na inuinui kei na ivakarau ni rai na kilai deivaki kei na ivakadinadina ni tucake tale ni da sotava na bolebole kei na qaqa ni bula eso.
Mo vakarautaki iko vakayalo
Na cava o kila me baleta na tucaketale? Na raiyawa cava soti e tiko vei keda mai na ivolanikalou ni gauna oqo me baleta na tucaketale?
Na cava era kila na cauravou me baleta na tucaketale? Ena vakayarayarataka vakacava na nodra nanuma me baleta na yagodra vakayago na kilai deivaki levu ni tucaketale?
Na ivolanikalou se ivurevure cava tale eso o rawa ni vakayagataka me veivuke ena nodra vakatavulici na cauravou me baleta na tucaketale? Na cava o vakauqeti kina mo wasea?
Luke 24 (Na Tucaketale nei Jisu Karisito)
1 Korinica 15 (Ni sa vakadruka oti na mate na iVakabula, eda na vakaturicake kece tale)
Alama 11:41–45 (Ni da sa vakaturicake tale, sa na vakaduavatataki tale na yaloda kei na yagoda, ka da na lewai)
Alama 40–41 (Vakamacalataka o Alama na tucaketale vua na luvena o Korianitoni)
Paul V. Johnson, “Ia ena Sega Tale na Ciba,” Ensign se Liaona, Me 2016, 121–23
Thomas S. Monson, “Sa Tucake Tale ko Koya!” Ensign se Liaona, Me 2010, 87–90
D. Todd Christofferson, “Na Tucaketale nei Jisu Karisito,” Ensign se Liaona, Me 2014
Vidio: “He Is Risen”
Veivakavulici ena ivakarau ni iVakabula
A vakayagataka o Jisu Karisito na ivolanikalou me vakatavulica kina na Nona ilesilesi. A vakatavulici ira na Nona tisaipeli o Koya me ra vakasamataka na ivolanikalou vakaiira ka me vakayagataki me sauma na nodra vakatataro. E rawa vakacava ni o vukei ira na cauravou me ra goleva na ivolanikalou ka kila deivaki na ituvatuva kei na veivakalougatataki ni Kalou sa waraki ira tu?
Vidio: “We Become”
Raica me ra veiliutaki na cauravou
Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou me ra veivosakitaka na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola ni iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.
Tekivuna na gauna ni vuli-ka
Digidigi mai na veivakasama oqo se vakasamataka ga na nomu vakaiiko mo raicalesu kina na ivunau mai na lesoni ni macawa sa oti ka mo vakaraitaka kina na lesoni ni macawa oqo:
-
Sureti ira na cauravou me ra cega e dua na ivolanikalou ena lesoni era a vulica ena macawa sa oti. Vakayaloqaqataki iratou e vica me ratou wasea na nodratou ivolanikalou, na veika eratou sa vulica, kei na veika eratou sa cakava tiko me ratou bulataka kina na kena ivakavuvuli.
-
Taroga vei ira na cauravou na cava era dau marautaka ena Siganimate. Na cava eso na ivakatakarakara ni Siganimate? E vakavulici ira vakacava na ivakatakarakara eso oqo me baleta na tucaketale?
Vulica vata
Na itaviqaravi yadua e ra ena rawa ni vukei ira na lewe ni kuoramu mera kila deivaki na tucaketale. Mai na veituberi ni Yalotabu, digitaka e dua se sivia ka na ganita vinaka na nomu kuoramu:
-
Sureti ira na cauravou me ra wilika na italanoa ena vosa nei Peresitedi Thomas S. Monson “Sa Tucake Tale ko Koya!” kei na vosa nei Elder Paul V. Johnson “Ia ena Sega Tale na Ciba.” Kerei ira me ra wasea na italanoa eso oqo ena nodra vosa ga ka wasea na veika e vakavulica vei ira me baleta na tucaketale. Na cava tale e vakauqeti ira mai na italanoa eso oqo?
-
Digitaka eso na malanivosa mai na 1 Korinica 15 me baleta na tucaketale. Sureti ira na cauravou me ra wilika na malanivosa, vakailawalawa lalai se yadua, ka bulia e dua na ivakaleka ni tukutuku ena veika era sa vulica me baleta na tucaketale (me ivakaraitaki, tikina e 1–8 e rawa ni vakalekalekataki me “Era tiko na ivakadinadina ni tucaketale”). Cava na vuna era nanuma kina na cauravou ni sa ka bibi vei ira me ra kila na veidina oqo me baleta na tucaketale?
-
Kerei ira na cauravou me ra raitayaloyalotaka na takali ni daulomani ni dua na nodra itokani sega ni lewe ni Lotu. Sureta na veimama ni cauravou me ra wilika na Alama 40 kei na ikarua ni veimama me ra wilika na Alama 41. Kerei ira me ra cakava e dua na ituvatuva ni ivakavuvuli ni tucaketale ena veiwase oqo ka rawa ni ra wasea vei ira na nodra itokani. Me ra qai wasea na nodra ituvatuva vei ira na vo ni kalasi.
-
Cakava vaka kuoramu, e dua na ituvatuva ni tamata ena ivolanikalou ka ra a ivakadinadina ni Tucaketale ni iVakabula. Sureti ira na cauravou me ra vakasaqara na vosa nei Elder D. Todd Christofferson “Na Tucaketale i Jisu Karisito” me kunei kina na ivakaraitaki tale eso. Vakayaloqaqataki ira me ra vakaraica na nodra ivakadinadina o ira oqo ena ivolanikalou (eso na ivakaraitaki e tiko ena vosa nei Elder Christofferson). Na cava eda vulica me baleta na iVakabula kei na Nona Tucaketale mai vei ira na ivakadinadina oqo? Wasea na nomu ivakadinadina me baleta na Tucaketale ni iVakabula, ka sureta e vica na lewe ni kuoramu me ra wasea na nodra ivakadinadina.
-
Veisoliyaka e vica na ivola ni Nodra iVakavuvuli na Peresitedi ni Lotu (se lavetaka eso na wase digitaki), ka sureti ira na cauravou me ra vakaraica na ivakavuvuli eso mai vei ira na parofita ni gauna oqo me baleta na tucaketale. Kerei ira me ra wasea na veika era kunea ena kalasi.
-
Sureti ira na cauravou me ra vakaraica na serenilotu me baleta na tucaketale (raica ena idusidusi vakaivolanikalou ena daku ni ivolanisere me baleta na kena idusidusi eso). Ni lagata vata vakalasi e vica oqori. Raica na ivolanikalou ena idusidusi e ra ni serenilotu, ka veivosakitaka na veika era vakavulica.
Kerei ira na cauravou me ra wasea na veika era sa vulica nikua. Era sa kila vinaka cake beka na tucaketale? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ivunau oqo?
Me Veivuke ena Veivakavulici
“Ni o vakayagataka e vuqa na iwalewale ni itaviqaravi vakavuli, e vaka me ra dau kila deivaki ka tugana e levu cake na ivakavuvuli ni kosipeli o ira na vuli. E dua na iwalewale digitaki vakamatau e rawa ni vakamatatataka cake, vakamikamicataka ka vakavuna na kena guiguilecavi dredre e dua na ivakavuvuli” (Veituberi, Me iLutua ni Noda Bula [1999], 106).
Veisureti mera bulataka
Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:
-
Wasea nona ivakadinadina me baleta na tucaketale.
-
Sureti ira na lewe ni kuoramu me ra vulica eso tale na ka me baleta na tucaketale ena nodra ivolanikalou yadua ka wasea ki na kuoramu na veika era sa vulica.