Meu cakava vakacava meu na bula Vakarisito vakalevu cake?

Sa biuta toka o Jisu Karisito na ivakaraitaki vinaka duadua baleti keda, ka sa vakaroti keda meda na vakataki Koya.E a bulataka o Koyana ivakaraitaki ni vakabauta, inuinui, loloma uasivi, vosota, bula savasava, yalodina kei na talairawarawa. Ni da sa vuli mai Vua, ka sasaga meda vakatorocaketaka na kena bulataki,eda na yaco meda taukena na matabete ka rau vinakata o Koya kei na Tamada Vakalomalagi.

Mo vakarautaki iko vakayalo

Na cava eso na ivakarau nei Jisu Karisito? Na ivakarau cava vei ira oqo o na gadreva vakalevu duadua mo tara cake? O cei mada o sa bau raica se kila ena nomu bula ni vakaraitaka tiko na ivakarau oqori?

Na ivakarau Vakarisito cava o sa raica tiko ena nodra bula na cauravou o vakavulici ira tiko.? Na itovo cava o nanuma ni ganita mera vakatorocaketaka ena gauna oqo me rawa ni ra na matabete vakabauta ka yalodina?

Vulica ena masumasu na ivolanikalou kei na ivurevure oqo. Na cava o vakila ni uqeti iko mo wasea vata kei ira na cauravou?

Maciu 26:36–45; Luke 7:11–15; 23:33–34; Joni 13:4–10 (iTovo ni iVakabula ka vakaraitaki ena Nona bula)

Mosaia 3:19 (Ena rawa ni da Yalododonu ena Veisorovaki i Jisu Karisito)

3 Nifai 27:27 (Eda sa vakaroti meda na vakataki Karisito)

Robert D. Hales, “Yaco mo Tisaipeli ni Noda Turaga o Jisu,” Ensign se Liaona, Me 2017, 46–48

Stephen W. Owen, “O Ira na iLiuliu Levu Duadua Sai Ira na Dauvakamumuri Levu Duadua,” Ensign se Liaona, Me 2016, 70–76

Richard J. Maynes, “Na Rekitaki ni Bula sa Vakarisito,” Ensign se Liaona, Nove. 2015, 27–30

M. Russell Ballard, “Na iTabatamata Cecere Duadua ni iTabagone Qase Cake,” Ensign se Liaona, Me 2015, 67–70

“Meu na Vakatorocaketaka Vakacava na iTovo Vakarisito?”Vunautaka na Noqu Kosipeli (2004), 129-142

Vidio: “Daily Bread: Change,” “Christlike Attributes”

Veivakavulici ena ivakarau ni iVakabula

Ena veituvaki yadua, sa dau ivakaraitaki ka dauveituberi kina na iVakabula. Sasaga mo na vakataki Koya ka vakatorocaketaka na Nona ivakarau me na vukei iko mo qasenivuli vinaka cake. Ni ko sa vakarau mo veivakavulici, vakasamataka na ivakarau Vakarisito ko na gadreva me rawa ni ko na vakavulici ira na cauravou.

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Sureti ira yadua na lewe ni kuoramu mera vaqara e dua na tiki ni ivolanikalou baleta na ivunau sa vulici rawa mai na lesoni ni macawa sa oti ka qai wasea kei na dua na lewe ni kuoramu.
Solia e yadua vei ira na cauravou na ilavelave ni itaviqaravi ni ivakarau ena tabana e 141 ni Vunautaka na Noqu Kosipeli, qai kerei ira mera taura e vica na miniti mera vakalewena na veika me kilai yadua. Sureti ira na cauravou mera wasea na veika era sa vulica mai na itaviqaravi. Sureti ira e vica na cauravou mera wasea e dua na ivakarau Vakarisito era dau qoroya mai vua e dua tale na lewe ni kuoramu se dua na lewe ni matavuvale.

Vulica vata

Na itaviqaravi yadua e ra ena vukei ira na lewe ni kuoramu mera vulica na ivakarau nei Jisu Karisito. Mai na veivakauqeti ni Yalotabu, digitaka e dua se sivia ka na ganita na nomu kuoramu:

Sureti ira na cauravou me ra wilika na vosa nei Elder Robert D. Hales “Yaco mo Tisaipeli ni Noda Turaga o Jisu” ka veitalanoataka eso na ituvaki ni bula ni tisaipeli e vaka na voivoi talivata me dua na ibe. Ena rawa beka ni marautaka na cauravou kevaka era bulia ga na nodra ivakamacala—ka vakaraitaka na kedra cakacaka na veitikina me buli kina e dua na ka me levu—ka matataka na kena veivakatorocaketaki ni ivakarau Vakakarisito. Sureti ira na cauravou me ra digitaka e dua na ivakarau Vakarisito ka tukuni tiko ena vosa era na vinakata me ra saga me ra na vakatoroicakataka vaka taucoko.
Ena kena gadrevi mera kila vinaka na cauravou na vuna meda vakatabakiduataka kina na noda bula vei Jisu Karisito, sa rawa mo sureti ira mera cakava e dua na qito e vakatabakiduataki kina na iyaya (me vakataka na vakacuru rigi se tuvai matau ni buloko e rewa e cake). Vakaraitaka na imatai ni va na miniti ni vosa nei Elder Richard J. Mayne “Na Rekitaki ni Bula sa Vakarisito.” Na cava era sa vulica me baleta na bibi ni vakatabakiduataki na nodra bula vua na iVakabula mai na itaviqaravi kei na vosa? Kerei ira na lewe ni kuoramu mera cakacaka vakaisa ka raica e dua na italanoa e vakaraitaka tiko na veivakalougatataki eda ciqoma ni da vakatabakiduataka na noda bula vua na Karisito. Na cava mera na cakava mera vakatabakiduataka cake na nodra bula vua na iVakabula kei na Nona ivakavuvuli?
Vakarautaka vei ira na cauravou na ilavelave ni ciwa na taro e tarogi ira voli kina na cauravou o Elder Russell M. Ballard ena nona vosa “Na iTabatamata Cecere Duadua ni iTabagone Qase Cake” (se navuca na vakarorogo ki na iwase ni vosa e vakatataro kina o Elder Ballard). Sureti ira mera vakasamataka vagumatua na iwalewale era na sauma kina na veitaro oqo, ka kerei ira mera vakasamataka na tabana cavaga ena nodra bula ena rawa ni ra vakavinakataka. Na itovo cava soti va-Karisito e rawa ni vukei ira kina na veitaro oqo mera vakatorocaketaki?
Raica mera yadua na cauravou na ilavelave ni wase 6 ni Vunautaka na Noqu Kosipeli. Sureti ira na cauravou mera digitaka e dua na ivakarau Vakarisito ka tukuni tiko ena iwase ni ivola era na vinakata mera vakatorocaketaka. Taroga se cava na vuna e bibi kina vei ira na ivakarau o ya. Solia vei ira na gauna ena soqoni ni kuoramu mera vulica kina na ivakarau era sa digitaka, ni vakamuri na vakatutu e tiko ena ruku ni ulutaga “Vakatorocaketaki ni iVakarau Vakarisito” ena tabana e 137–38 ni Vunautaka na Noqu Kosipeli.
Sureti ira na cauravou mera vakilakila na nodra itavi ni matabete me vaka e volai tu ena iTavi Vua na Kalou (raica na tabana e 23 [dikoni], 46–47 [ivakavuvuli], 70–71 [bete]), ka qai veivosakitaka na duidui era dui sotava tiko ena nodra saga mera vakacokotaka na itavi oqo (me vaka na siko vuvale ena dua na matavuvale ka sega ni taleitaka tiko na kosipeli se me tutaka na ivakatagedegede ni Turaga). Ena veivuke vakacava vei ira na cauravou era tu ena ituvaki vakaoqo na ivakarau Vakarisito? Na gauna cava era a sa raica kina e dua na lewe ni kuoramu ni bulataka tiko e dua na ivakarau oqo? Sa rawa vei ira na cauravou me ra raica na vosa nei Stephen W. Owen, “O Ira na iLiuliu Levu Duadua Sai Ira na Dauvakamumuri Levu Duadua” ka veivosakitaka na ivakaraitaki ni veiliutaki ni matabete era sa raica ena nodra bula. E yaco vakacava na Karisito me ivakaraitaki vinaka duadua ni veiliutaki? Ena yaco vakacava meda iliuliu sa Vakarisito ni da cakava tiko na noda ilesilesi ni matabete?
Sureti ira na goneyalewa me ra dui wilika e dua vei ira na ivolanikalou sa vakaturi tiko ena idusidusi, makataka na vosa kei na malanivosa e vakaraitaka eso na itovo ni iVakabula. Vakayaloqaqataki ira me ra vaqara na itovo ni bula oqo kei na so tale ni ra sarava na vidio “Christlike Attributes.” Solia vei ira na gauna me ra wasea na nodra nanuma me baleta na iVakabula kei na itovo e dau kena ivakaraitaki o Koya. E rawa vakacava me ra tara cake ena nodra dui bula na itovo oqo? E rawa talega ni ra wasea na nodra ivakaraitaki eso na tamata era kila ka nanuma ni ra dau vakaraitaka eso na itovo va-Karisito oqo.

Kerei ira na cauravou mera wasea na veika era sa vulica nikua. Era sa kila li na ka mera cakava me laveti cake kina na nodra bula Vakarisito? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na nona ivakadinadina baleta na bibi ni kena vakatorocaketaki na ivakarau Vakarisito me vukei koya me dinata na nona itavi ni matabete ena gauna oqo kei na veigauna mai muri.
Sureti ira na cauravou mera vakarautaka na nodra lalawa kei na nodra vakatutu mera vakatorocaketaka e dua na ivakarau Vakarisito. Sa na rawa ni vakauqeti ira mera kerea na veivuke ni Tamada Vakalomalagi.