Me vakacava na ivakavakayagataki ni noqu isolisoli vakayalo e vinakata na Tamada Vakalomalagi?

Na isolisoli vakayalo e dua na veivakalougatataki se rawa ka e soli mai ena kaukauwa ni Yalo Tabu. Ni da luvena na Tamada Vakalomalagi, sa dui tu na noda veisolisoli vakayalo. E solia vei keda na Kalou na isolisoli oqo me rawa ni da qaravi ira tale kina eso ka veivuke ena tarai ni Nona matanitu. E vakaroti keda o koya meda dau vakasaqara vagumatua ka vakatorocaketaka na noda veisolisoli vakayalo.

Mo vakarautaki iko vakayalo

Na veisolisoli vakayalo cava soti e tiko vei iko? Era sa vakalougatataki iko kei ira eso tale vakacava, vakabibi ena nomu veiqaravi vakamatabete? Era sa vakalougatataki iko vakacava na nodra veivakalougatataki vakayalo eso tale? O sa kunei ira vakacava na nomu isolisoli?

Na cava e bibi kina vei ira na cauravou mera kila na nodra veivakalougatataki vakayalo? Era na vakayagataki ira vakacava mera vakayacora rawa kina na nodra itavi vakamatabete? Ena vukea vakacava na nodra vakarautaki ira kina veiitavi, vale kei na matavuvale muri mai na ka oqo?

Ni ko vulica na ivolanikalou eso oqo kei na ivurevure tale eso baleta na veivakalougatataki vakayalo, vaqara na veisala ena vukei ira na cauravou mera kila eso na nodra isolisoli ka mera vakayagataka ena nodra vakalougatataki ira tale eso.

1 Koronica 12:3–27; Moronai 10:8–18; V&V 46:8–29 (iSolisoli ni Yalotabu)

“iSolisoli Vakayalo,” Tudei ena Vakabauta (2004), 26–27

“Na iSolisoli Vakayalo,” iVakavuvuli Talei (2009), 125–32

Vidio: “Extraordinary Gift”, “With All Your Heart”

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sota kaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Kerei ira na cauravou yadua mera vola e dua na iyatuvosa ka na ivakaleka vinaka duadua ni lesoni ni macawa sa oti ka mera wasea ki na kuoramu.
Ka kauta mai kina kalasi e dua na iloloma ologi ena dua na kateni lailai ka volai tiko e loma na “Vunau kei na Veiyalayalati 46:8–9”. Sureti ira na cauravou mera vakilakila se cava e tiko ena loma ni kateni. Kerea e dua vei ira me dolava na kateni ka wilika na ivolanikalou. Na cava na “iloloma uasivi duadua”? Na cava e dodonu meda vakayacora meda ciqomi ira kina? Vakauqeti ira na cauravou mera vakasamataka tiko na taro oqo ena gauna ni lesoni.

Vulica vata

Na itaviqaravi yadua e ra ena vukei ira na lewe ni kuoramu mera vulica na isolisoli Vakayalo. Muria na veivakauqeti ni Yalotabu ena nomu digitaka e dua se sivia ka na ganita vinaka na nomu kuoramu:

Wasei ira na kuoramu vakailawalawa, ka lesia vei ira yadua na ilawalawa e dua vei ira na ivolanikalou ena ituvatuva oqo. Kerei ira yadua na ilawalawa mera vola e dua na ituvatuva ni veisolisoli vakayalo ka tukuni tiko ena nodra iwase ka mera qai raica mai na vuna e solia kina vei keda na Kalou na isolisoli vakayalo oqori. Kerea e dua na cauravou mai na iwasewase yadua me wasea se cava era sa kunea rawa na nona ilawalawa. Evei vei ira na isolisoli oqori e tiko vei ira na cauravou? (Ke dua vei ira na cauravou sa ciqoma oti na nona veivakalougatataki vakapeteriaki, vakatura mera qai wilika e muri na nodra veivakalougatataki vakapeteriaki me kilai kina se evei vei ira na isolisoli vakayalo oqori sa soli tu vei ira.) Evei vei ira na isolisoli oqori era na vinakata me nodra? Evei vei ira na isolisoli oqori ena vukei ira me mana cake kina vakalevu na nodra vakayacora na nodra itavi vakamatabete?
Sureti ira na cauravou mera wilika na veisolisoli vakayalo era volai tu ena 1 Koronica 12:8–10; Moronai 10:9–16; se Vunau kei na Veiyalayalati 46:13–25 ka qai raica e dua na isolisoli era galeleta vakalevu duadua mera vulica. Solia vei ira e dua na gauna mera vulica na isolisoli era digia, ena nodra vakayagataka na veiivurevure me vaka na “Na iSolisoli ni Yalo Tabu” ena iVakavuvuli Talei (tabana e 125–30), “iSolisoli Vakayalo” ena Tudei ena Vakabauta (tabana e 26–28), se ena iDusidusi Vakaiulutaga. Kerei ira mera wasea na veika era sa raica. Ena rawa ni ra vakayagataki vakacava na isolisoli oqori me vukea na taraicake ni matanitu ni Kalou?
Kerei ira na cauravou mera vola na veitutu duidui eso ni dua na timi ni qito (me vaka e dua na timi ni soka se veitavipolo). Era dui cau vakacava na lewenitimi yadua me vukea na qaqa ni timi? Mera wilika na 1 Koronica 12:12–21, ka vakatauvatana tiko kina o Paula na Lotu kina dua na yago. E vakavulici ira vakacava na cauravou na vakasama eso oqori mera vakayagataka kina na nodra veisolisoli vakayalo me veivuke ena taraicake ni matanitu ni Kalou? Wasea na veiivakaraitaki ni isolisoli vakayalo o sa kunea rawa vei ira na lewe ni kuoramu. Sureta na peresitedi ni kuoramu me liutaka e dua na veivosaki ena sala era rawa ni cakacaka vata kina na kuoramu ena nodra vakayagataka na nodra isolisoli mera qaravi ira kina eso tale ka vukea na taraicake ni matanitu ni Kalou.
Sureti ira yadudua na cauravou mera taleva lesu na ituvatuva ni isolisoli vakayalo ena tabana e 26–28 ni Tudei ena Vakabauta ka digia e dua se rua ka ena vinakata me vakatubura. Tarogi koya se cava e digi ira kina na veisolisoli oqori. Eda vakatuburi ira vakacava na veisolisoli vakayalo oqori? Sureti ira na cauravou mera vaqara ena Vunau kei na Veiyalayalati 46:7–12kei na “Me da Cakacakataka na iSolisoli sa Soli Vei Keda” ena iVakavuvuli Talei, tabana e 131–32. Kerei ira mera wasea na veika era sa raica. Na cava e vakavulica na Vunau kei na Veiyalayalati 46:9 vei ira na cauravou me baleta ocei e rawa ni rawata na veisolisoli vakayalo?
Vakaraitaka e dua na vidio ena ituvatuva oqo ka sureti ira na cauravou mera vakasamataka ka wasea e dua na taledi se isolisoli era raica vei ira yadua na lewe ni kuoramu (vakadeitaka ni sa veiwaseitaki na itovonibula vinaka ni cauravou yadua). Sureti ira na cauravou mera wilika na Matthew 25:14–30, se sureta e dua na lewe ni kuoramu me tokaruataka na vosa vakatautauvata ni taledi. E semati vakacava na vosa vakatautauvata oqo ki na isolisoli sa solia vei keda na Kalou? E rawa vakacava vei keda na vakaitutu vakamatabete meda vakayagataka noda taledi me da veiqaravi kina vei ira eso ka vakayacora na noda itavi vakamatabete? Sureti ira na cauravou mera vola na nodra vakanananu, ka kerea e lewe vica vei ira mera wasea na veika era vola vei ira na kuoramu.

Kerei ira na cauravou mera wasea na veika era sa vulica nikua. Era sa kila vinaka cake beka na ka me baleta na veisolisoli vakayalo? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ivunau oqo?

Me Veivuke ena Veivakavulici

“Kua ni dau vakalialia se mo vakalewa na taro se vakasama, mo dau vakaraitaka ga na veikauwaitaki kei na loloma ena nomu tovolela mo sauma yani na nodra taro na lewenikalasi. Ena gauna era kila kina na tamata ni dau kauwaitaki na nodra vosa, era qai dau wasea mai na veika era sotava, na veika e tarai ira, ka solia talega na nodra ivakadinadina” (Veituberi, Me iLutua ni Noda Bula[1999], 74).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Sureti ira na cauravou mera vakayagataka ena macawa oqo e dua nodra isolisoli vakayalo mera vakalougatataka kina e dua era kila.
Wasea na ka ena navuca me vakayacora me vakatorocaketaka kina na isolisoli vakayalo, ka sureti ira na lewe ni kuoramu mera vakayacora vakaiira na nodra navunavu.