Na cava au rawa ni vakayacora meu vukei ira kina na lewe ni Lotu vou?

Vei ira e vuqa, sa rawa ni dua na bolebole levu na lewena na Lotu. Ena rawa me yaco kina na biu ni so na veitokani makawa ka vakamatautaki e dua na ivakarau ni bula vou. Na lewe ni Lotu vou yadua ena gadreva e dua na itokani, dua na itavi, vakakina na nona vakavulici ena “ivakavuvuli ni Kalou” (Moronai 6:4). Eda rawa ni vukei ira na lewe ni lotu vou ena noda vakaitokanitaki ira, veiqaravi kei ira, ka wasea vei ira na noda ivakadinadina.

Mo vakarautaki iko vakayalo

Na cava o sa vakayacora mo veivuke kina ena nodra vaqaqacotaki na lewenilotu vou? Na cava era sa vakayacora eso tale mo vukei ena nomu a papitaiso?

E tiko beka eso na cauravou ena nomu kuoramu era lewe ni Lotu vou? E vakaevei beka na nodra sa mai vakamatautaki ira ni ra sa lewe ni Lotu? Era sa vukei ira vakacava na cauravou?

Vulica ena masumasu na ivolanikalou kei na ivurevure oqo. Na cava o vakila ni uqeti iko mo wasea vata kei ira na cauravou?

Luke 22:32; Roma 15:1–2; Moronai 6:4–5; V&V 81:5; 108:7 (Vaqaqacotaki ira na iTokani Yalododonu)

Neill F. Marriott, “Na Cava Meda Cakava?” Ensign or Liaona, Me 2016, 10–12

Neil L. Andersen, “O Koya sa Vinakati Ira, sa Vinakati Au,” Ensign se Liaona, Me 2016, 49–52

“iTokani,” Me iSakisaki ni iTabagone (2011), 20–21

Vidio: “ Missionary Work and Retention: Georgia Elias,” “ Help New Members Take a Name to the Temple”

Veivakavulici ena ivakarau ni iVakabula

A kunea na iVakabula na madigi me baleti ira sa muri Koya mera vuli mai na kaukauwa ni veika era sotava. Ena gauna a rairai kina vei ira na Nifai, a sureti ira mera lako yadudua mai vua, me rawa ni ra raica, vakila, ka kilai Koya vakai ira. Ni o vakavulici ira tiko na cauravou, sureti ira mera kunea na sala ni itokani, veiqaravi, ka wasea na nodra ivakadinadina kei ira na lewe ni Lotu vou.

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sota kaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Veisataki ira na cauravou, ka solia e vica na miniti mera wasea na ka era nanuma mai na lesoni ni macawa sa oti. Kerea e dua na veisa me rau wasea se cava e rau nanuma vei ira ena kuoramu.
Sureti ira na cauravou mera vakamacalataka eso na ka era vakila ni yaco vei ira eso na ka vou, me vaka na nodra imatai ni siga ena kalasi, nodra lewena e dua na isoqosoqo se timi, se tekivu ena dua na cakacaka vou. Kerei ira mera veivosakitaka se rawa me tautauvata vakacava na veika era sotava oqori kei na veika era dau sotava na lewe ni Lotu vou. Sureti ira mera wasea na veika vata vakaoqori era sa sotava oti, se vakalewenilotu vou vakaiira se vata kei ira na lewenilotu tale eso.

Vulica vata

Na veiitaviqaravi kece e ra ena rawa ni vukei ira na lewe ni kuoramu ena nodra vakaukauwataki ira na lewenilotu vou. Muria na veivakauqeti ni Yalotabu, ena nomu digitaka e dua se sivia ka na ganita vinaka na nomu kuoramu:

Sureti ira na cauravou mera raitayalotaka se vakasamataka mada e dua na lewe ni Lotu e dau dodoliga yani vei ira na saumaki vou mai, a rairai duatani mai na nodra ivakarau ni bula ni vakatauvatani kei lewenilotu oqo. E rawa mera vola na cauravou ena vava ni volavola na veika e rawa ni cakava se sega o lewe ni Lotu oqo me vakila o koya sa saumaki vou mai ni sa lomani. Elder Neil L. Andersen ena “O Koya sa Vinakati Ira, sa Vinakati Au” e tukuni kina e vica na kedra italanoa eso era a dodoliga yani kivei ira na lewenilotu vou, kei na vosa nei Sisita Neill F. Marriott “Na Cava Meda Cakava?” e tukuni kina na nona a lomani mai na bubu vakacabecabe nei watina. Na cava era rawa ni vulica na cauravou mai na vica na italanoa oqo me ikuri ni nodra lisi?
Vola ena vava ni volavola na veiivolanikalou (me vakataki ira era sa lisitaki tu ena ituvatuva oqo) me baleta na noda itavi ni nodra vaqaqacotaki na noda itokani Yalododonu. Kerei ira yadudua na cauravou me ra wilika e dua vei ira na ivolanikalou sa soli tu, ka vakasamataka tiko na sala e rawa ni yaga kina vei ira na lewe ni Lotu vou. Ka kerei koya me vola ena vava ni volavola e dua na ivakaleka ni nona iwase ka wasea e dua na ivakaraitaki ni ivakavuvuli e vakavulica tiko. Taroga vei ira na cauravou se cava na vuna e bibi kina na nona vaqaqacotaki e dua na lewe ni Lotu vou.
Sureti ira na cauravou mera sarava na vidio “Missionary Work and Retention: Georgia Elias” kei na veika era a vakayacora na lewe ni tabanalevu vou nei Georgia me vukei koya ena nona qaqaco tiko ni oti na nona papitaiso. Na cava tale era rawa ni vulica mai na ka a yaco vei Georgia ka rawa ni veivuke ena nodra vaqaqacotaki na lewe ni lotu vou? Sureti ira na cauravou mera vakasamataki ira tiko na lewe ni lotu vou ena nodra tabanalevu. Na cava beka era lomatarotarotaka tiko? Era na vukei rawa vakacava na lewe ni kuoramu? Me tiki ni veivosaki oqo, o na via vakaraitaka ka veivosakitaka beka na vidio “Help New Members Take a Name to the Temple.”
Sureti ira na cauravou mera wilika na “iTokani” ena Me iSakisaki ni iTabagone ka vaqara na isau ni taro “Na cava na ibalebale ni meda itokani dina?” Kerei ira mera wasea na ka era raica ka wasea na nona yaco e dua me nodra itokani dina. Na cava na vuna e bibi meda itokani vinaka sara kina vei ira na lewe ni Lotu vou? Sureti ira na cauravou mera vola na yacadra na lewenilotu vou era kila ka veivosatakitaka na sala e rawa ni ra vakayagataka kina na ivakasala ena Me iSakisaki ni iTabagone mo nodra itokani.
Sureta na kuoramu me vakacavara e dua vei ira na itaviqaravi ni vuli mai na Vunautaka na Noqu Kosipeli,tabana e 253: na ikarua ni “Vuli Yadua” itaviqaravi se na ikatolu ni itaviqaravi ni “Vuli Vakaveitokani”.

Kerei ira na cauravou mera wasea na veika era sa vulica nikua. Era sa kila beka na sala mera vaqaqacotaki ira kina na lewe ni lotu vou? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ulutaga oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na nona ivakadinadina me baleta na bibi ni nodra vakaitokanitaki na lewenilotu vou.
Sureti ira na cauravou mera tuva vakaiira e dua na takete ena nodra ivola ni iTavi Vua na Kalou mera vakaitokanitaki ira kina na lewe ni lotu vou (raica na “Sureti ira na Tamata Kecega mera Lako Mai vei Karisito,”tabana e 28–29, 52–53, se 76–77).