Meu na vakaitavi vakacava ena kena vakusakusataki na cakacaka ni Turaga?

Eda sa bula tiko oqo ena iotioti ni gauna, ena gauna sa vakayacora tiko kina na Turaga na Nona yalayala: “Io au na kitaka kusarawa na noqu cakacaka ena kena gauna” ( V&V 88:73). Sa tiko na nodra itavi bibi na lewe ni Matabete i Eroni ena cakacaka oqo. Sa rawa meda vakaitavi ena noda sureti ira na tamata kecega mera lako mai vei Karisito ena noda wasea na kosipeli, vakayacora na veiqaravi sa va-Karisito, vakayacora ena ivalavala kilikili na cakacaka vakalotu ni matabete, vaqaqacotaki ira na lewenilotu vou, vueti mai o ira sa luluqa tu vakalotu, ka vakayacora na cakacaka vakalotu ni nodra vakabulai na mate.

Mo vakarautaki iko vakayalo

Na ivakadinadina cava o sa bau raica ni sa vakusakusataka tiko na Turaga na Nona cakacaka ena noda gauna oqo? Na cava o rawa ni wasea mai na veika o sotakaya ena rawa ni vakauqeti ira na cauravou mera vakaitavi vagumatua ena cakacaka oqo?

Na taledi kei na isolisoli cava soti o siqema rawa vei ira na cauravou ena rawa ni ra gugumatua sara kina ena kena tosoi na cakacaka ni Turaga? Na cava era sa cakava tiko mera vakaitavi kina ena cakacaka oqo?

Na ivolanikalou kei na ivurevure cava tale eso ena vakauqeti ira na cauravou mera vakaitavi ena kena vakusakusataki na cakacaka ni Turaga?

Aisea 11:9; 1 Nifai 13:37; 14:14 (Parofisai eso me baleta na cakacaka ni Turaga)

Mosaia 28:1–3 (E ratou sa gadreva na luvei Mosaia me ratou vunautaka na kosipeli)

Mosese 1:39 (Sa vakamacalataka na Kalou na Nona cakacaka)

V&V 20: 46–60 (Nodra itavi na lewe ni Matabete i Eroni)

V&V 138:56 (Era a vakarautaki tu mai na bula taumada o ira na luve ni Kalou yalodina mera mai cakacaka ena were ni Turaga)

Thomas S. Monson, “Tu Vakarau ka Kilikili mo Veiqaravi,” Ensign se Liaona, Me 2012, 66–69

Dieter F. Uchtdorf, “Ko a moce tiko li ena gauna ni Veivakalesui mai?” Ensign se Liaona, Me 2014, 58–62

S. Gifford Nielsen, “Maqusataki na iTuvatuva Qaqa ni Turaga,” Ensign se Liaona, Nove. 2013, 33–35

Maqusataki na Cakacaka ni Veivakabulai

Vidio: “Our Spiritual Passport”

Veivakavulici ena ivakarau ni iVakabula

A taroga na iVakabula na taro eso ka vakavuna vei ira na Nona imuri mera vakasamataka ka vakila vakatitobu. Era kila ni lomani ira o Koya, ka ra lomavakacegu ni wasea na nodra vakasama kei na veika era nanuma. Ni o vakarorogo ena yalodina ka vakaraitaka na nomu kauwai ena nodra isaunitaro kei na vakasama na goneyalewa, o na vukei ira me ra vakila na nona loloma na iVakabula.

Raica mera veiliutaki na cauravou

Raica e dua na ivakaraitaki ni ituvatuva ni soqoni ni kuoramu.

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira mera wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Raica eso tale na vakasama ni vuli kei na veivakavulici.

Digidigi mai na veivakasama oqo, se vakasamataka ga na nomu vakai iko, mo raicalesu kina na lesoni ni macawa sa oti ka vakatakila na lesoni ni macawa oqo:

• Sureti ira na cauravou mera wasea, vakavulica, ka vakadinadinataka na veika sa yaco vei ira ena nodra vakayacora na veika era sa vulica ena lesoni ni macawa sa oti.

• Vola ena vava ni volavola Na cava na cakacaka ni Turaga? Sureti ira na lewe ni kuoramu mera gole mai ka vola ena vava ni volavola e vica na isau dodonu ki na taro oqo. Vakayaloqaqataki ira mera kuria na lisi oqo ni ra vuli vakalevu cake ena gauna ni lesoni oqo.

Vulica vata

Raica eso tale na veivakasama ni vuli kei na veivakavulici.

Na itaviqaravi yadua e ra ena vukei ira na cauravou mera raica na sala era rawa ni vakaitavi kina ena Nona  vakusakusataka tiko na Turaga na Nona cakacaka. Mai na veivakauqeti ni Yalotabu, digitaka e dua se sivia ka na mana vinaka ki na nomu kalasi:

• Vola na vosa vakusakusataka ena vava ni volavola, ka kerea e dua me wilika na Vunau kei na Veiyalayalati 88:73 Sureta na kuoramu me veivosakitaka na ibalebale ni kena vakusakusataki e dua na ka (ke gadrevi, sa rawa mera raica na vosa ena dikiseniri). Tarogi ira na cauravou na cava e sa gadrevi me vakusakusataki kina na cakacaka ni Turaga ena noda gauna oqo. Sureti ira mera raica na isau ni taro oqo ena ivolanikalou e vakaturi tiko ena ituvatuva oqo se ivolanikalou tale eso era nanuma rawa.

• Ni vo toka e vica na siga, kerei ira na cauravou mera raica na wase ni Vakusakusataki na Cakacaka ni Veivakabulai ena LDS.org ka raica kina eso na ivurevure. Sureti ira mera vakavakarau mai ki na soqoni ni kuoramu mera mai wasea na veivakauqeti mai na initaneti mera vakaitavi vakalevu cake ena cakacaka ni Turaga.

• Sureti ira na cauravou mera raica e dua na vosa ni koniferedi ena ituvatuva oqo, mera raica kina na itukutuku e vakauqeti ira mera vakaitavi vakalevu cake ena cakacaka ni Turaga. Kerei ira mera wasea na itukutuku oqori ka vakamacalataka na vuna e veivakauqeti kina vei ira.

• Vola na veitaro vaka oqo ena papa: Na cava era rawa ni cakava na Matabete i Eroni mera vakaitavi ena cakacaka ni Turaga? Na cava e vukei iko mo vakila nomu marautaka ka vakusakusataka na cakacaka oqo? Sa vukei iko tiko vakacava na veika o sotava ni ko vakavakarau mo vakaitavi ena cakacaka oqo? Kerei ira na cauravou mera wilika na ivolanikalou e vakaturi tu ena ituvatuva oqo se sarava na vidio “Our Spiritual Passport” me vukei ira me ra sauma e dua se sivia na taro oqo. Sureti ira mera wasea na veika era sa raica.

• Me wilika na kuoramu, na ivakamacala nei Elder S. Gifford Nielsen me baleta na ituvatuva qaqa ena nona vosa “Maqusataki na iTuvatuva Qaqa ni Turaga.” Sureti peresitedi ni kuoramu me liutaka e dua na veivosaki me baleta e dua na “ituvatuva qaqa” me vakaitavi vakalevu cake kina na kuoramu ena ituvaki eso ni cakacaka ni Turaga, me vakataka na wasei ni kosipeli, laki vueti mai e dua na lewe ni kuoramu, se vakayacora na cakacaka ni valetabu kei na tuva kawa.

Kerei ira na cauravou mera wasea na veika era sa vulica nikua. Na cava era sa bau vakila se vakanananu kina? Era sa kila vinaka beka na sala mera vakaitavi kina ena kena vakusakusataki na cakacaka ni Turaga? E tiko beka eso tale na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“O rawa ni vakaraitaka ni o vakarorogo tiko ena nomu vakamacalataka na veika bibi vei ira. Mo na raici koya e vosa tiko ka kakua ni raica e dua tale na ka ena loma ni rumu. E rawa talega ni o vakauqeti koya e vosa tiko me vakaotia na nona vakasama se na ka e tukuna tiko ka mo kakua ni takosova na nona vosa. E rawa talega ni o tovolea mo kakua ni siova yani na veivosaki tale eso mo solia kina na nomu vakasama se na nomu lewa” (Veituberi, Me iLutua ni Noda Bula [1999], 76).

Veisureti me caka

Raica eso tale na vakasama ni vuli kei na veivakavulici.

Me na tinia na soqoni na cauravou ka veiliutaki tiko. Sa rawa vua me:

• Wasea ki na kuoramu na vaqaqacotaki ni nona ivakadinadina ena qaravi ni cakacaka ni Turaga kei na veika e sa vakauqeti me na cakava ena veivakauqeti ni lesoni oqo.

• Sureti ira na kuoramu mera digitaka e dua na ka bibi mera na cakava— vaka-kuoramu ka vakayadudua — me vakusakusataki kina na cakacaka ni Turaga.