Na cava na Saioni?

E vakaroti keda na Turaga meda “vunautaka yani me vakadeitaki kina na inaki kei Saioni” (V&V 6:6). O Saioni e vakaibalebaletaki vei ira na tamata ni Turaga ka duavata na yalodra kei na nodra vakanananu ka ra bulavata ena ivalavala dodonu. Eda rawa ni vakaduri Saioni ena noda taracake na duavata kei na kaukauwa vakayalo ena noda veivale, tabanalevu, tabana, kei na itikotiko.

Mo vakarautaki iko vakayalo

O segata tiko vakacava mo bulataka na ivakavuvuli kei Saioni ena nomu bula kei na nomu matavuvale? Na gauna cava o a sa vakila kina na yalo ni duavata ena nomu tabanalevu se ena nomu matavuvale?

Era sa duavata tiko li na cauravou ena nomu kuoramu? Na cava era rawa ni vakayacora me tauyavutaki kina o Saioni? Na itatarabe cava era na rawa ni sotava?

Vulica ena masumasu na veiivolanikalou kei na veiivurevure oqo. Na cava ena vakauqeti ira na cauravou mera tarai Saioni?

Mosaia 18:21; V&V38:27 (Meda dau segata na duavata)

4 Nifai 1:1–18 (Era bula vata na Nifai kei na Leimami ena dua na iteki vaka-Saioni)

V&V6:6; 11:6; 12:6; 14:6 (Me vakadeitaki kina na inaki kei Saioni)

V&V97:21; Moses 7:18 (Na cava na Saioni?)

Jeffrey R. Holland, “Sere e Lagati ka Sega ni Lagati Ensign se Liaona, Me 2017, 49–51

Benjamín De Hoyos, “Me iVakarau ki na Veimatanitu na Noda Rarama,” Ensign Liaona, Me 2017, 124–26

Henry B. Eyring, “Me Duavata na Yaloda, ”Ensign se Liaona, Nove. 2008, 68–71

“Saioni,” Tudei ena Vakabauta (2004),– 109

Vidio: “Dayton’s Legs,” “Sharing the Light of Christ”

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Kerei ira yadudua na lewe ni kuoramu mera vakacavara na iyatuvosa oqo: “A bibi sara vei au na ka eda vulica ena macawa sa oti baleta….”
Vola Saioni ena vava ni volavola, ka kerei ira na cauravou mera vola na ka e basika mai na nodra vakasama ni ra vakasamataki Saioni. Sureti ira mera wilika na tabana 109 ni Tudei ena Vakabauta me ikuri ni nodra lisi. Na cava na noda itavi vakalewe ni matabete ena taraicake kei Saioni?

Vulica vata

O ira vakayadua na itaviqaravi e ra era vukei ira na lewe ni kuoramu mera vulica na veika baleti Saioni. Muria na veivakauqeti ni Yalotabu ena nomu digitaka e dua se sivia ka na ganita vinaka na nomu kuoramu:

Na cava e vakavulica o Elder Jeffrey R. Holland ena nona vosa “Na Sere e Lagati kei na Sere e sega ni Lagati” me baleta na kena vaka e dua na matasere na lotu? Me vukei ira na cauravou me ra kila vinaka na vosa vakaibalebale nei Elder Holland, sureti e dua se sivia na tamata erea sa lagasere oti ena dua na matasere me ra wasea na nodra nanuma me baleta na kena sa vukei ira me ra kila vinaka na gagadre e tiko me baleta na rabailevu ni duidui ena veika e gadrevi ena matanitu ni Kalou. Ena rawa vakacava me da tarai Saioni cake ena noda vakatara eso na “rumu” ena kuoramu, ilawalawa ni Cauravou, se ena tabanalevu vei ira na tamata era vakila ni ra sega ni toka donu kei keda? Na ivakasala cava e solia o Elder Holland ena rawa ni vukei keda meda cakava na veika oqo?
E taroga na veitaro oqo o Elder Benjamin De Hoyos ena nona vosa “Me iVakarau ki na Veimatanitu na Noda Rarama”: “Na cava eso na ka bibi me caka ena gauna vakasakiti oqo meda tarai Sioni cake ka vakasokumuni Isireli?” Me vukei ira na cauravou ena nodra vakasaqara na isaunitaro, e rawa ni ra wilika na otioti ni 11 na parakaravu ni vosa nei Elder De Hoyos. E rawa vakacava ni vakavinakataki cake na noda tarai Saioni ena tolu na sala e wasea o koya?
Wilika vata na Mosese 7:18–19, ka vaqara tiko e dua tale na yacai Saioni. Sureti ira na itabagone mera vakanananutaka tiko se na vakacava tu beka e dua na “Koro Vakalou. E duidui beka vakacava mai na vuravura eda bula tiko kina oqo? Sureti ira mera vola ena vava ni volavola na veika ena sega ena Koro Vakalou kei na veika ena tu kina. Vakauqeti ira mera wilika na 4 Nifai1:1–18 ka vaqara na veika era na rawa ni vakuria kina nodra ituvatuva. Na cava e dodonu me veisau vei keda vakatamata yadua me rawa kina ni da tarai Saioni? Na cava e rawa ni ra vakayacora na cauravou mera tarai Saioni kina ena nodra matavuvale? ena nodra kuoramu?
Kerei ira na cauravou mera wilika na Vunau kei na Veiyalayalati 6:6; 11:6; 12:6; kei na 14:6 ka vakaqara e dua na malanivosa ka kune vei rau ruarua. Na cava era nanuma na cauravou me ibalebale ni vakadeitaki ni inaki kei Saioni? Vakaraitaka e dua vei ira na vidio e vakaturi ena ituvatuva oqo, ka kerea vei ira na lewe ni kuoramu mera vaqara na sala era segata tiko kina na cauravou ena vidio mera vakadeitaka ka vakaduria na inaki kei Saioni. Na cava e vakauqeti ira me baleta na nodra ivakarau kei na gagadre na cauravou oqo? Era na muria vakacava na nodra ivakaraitaki na cauravou oqo mera veivuke ena vakadeitaki kei Saioni?
Wasea na kuoramu ki na rua na iwasewase. Kerea e dua na ilawalawa me wilika ka veitalanoataka Mosaia 18:21 kei na Vunau kei na Veiyalayalati 38:27, a ka kerea na ilawalawa ka dua me wilika ka veitalanoataka na Vunau kei na Veiyalayalati 97:21 kei na Mosese 7:18. Sureta na ilawalawa me ra tuva e dua na lesoni e rawa ni ra vakayagataka me vakavulici kina vo ni kalasi na veika era vulica mai na ivolanikalou (kevaka era gadreva na veivuke, wasea kei ira na “Vakayagataka na iTalanoa kei na iVakaraitaki me Vakavulici na iVakavuvuli ni Kosipeli” ena tabana 22 ni Veivakavulici ena iVakarau ni iVakabula). Kerei ira me ra veiwaseitaka na nodra ivola. Na cava na veivakalougataki ni duavata vakamatavuvale, dua na kuoramu, kei na tabanalevu se tabana?
Wilika vakuoramu na V&V 38:27. Na cava e vinakata kina na Turaga meda dau duavata? Wasewasea na veitiki ni nona vosa o Peresitedi Henry B. Eyring “Me Duavata na Yaloda” vei ira na cauravou, ka kerei ira mera raica na ivakavuvuli ka vakatavulica tiko o Peresitedi Eyring ka na vukei keda meda dau duavata cake vakalevu ena noda matavuvale kei na kuoramu. Sureti ira na cauravou mera vola na ivakavuvuli era kunea ena vava ni volavola. Na cava eso na ka ni vakalatilati ka dau tarovi ira na cauravou mera na duavata? Era na vorata rawa vakacava na veivagolei tani oqo? Vakauqeti ira na cauravou mera tuva na veitakete me baleti ira sara ga mera cakava kina e dua vei ira na ivakavuvuli oqo mera vakatubura kina na duavata ena nodra matavuvale. Ni cakacaka vata ka tuva e dua na takete mo ni duavata vakalevu cake kina vakuoramu.

Kerei ira na cauravou mera wasea na veika era sa vulica nikua. Era sa kila vinaka beka se na cava o Saioni? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ivunau oqo?

Me Veivuke ena Veivakavulici

“E sega ni dodonu meda dau soli vakasama vei ira na iliuliu ni Lotu ka sega mada ni vakadeitaka na yavu ni vakasama. Ni da cavuqaqataka na ivolanikalou, e dodonu me da vakadeitaka ni tautauvata na kena ivakavakayagataki kei na kena ibalebale” (Veituberi, Me iLutua ni Noda Bula [1999], 60).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Sureti ira na kuoramu mera dolele yani vua e dua ka sega tiko ni vakila nona okati se ena nodra loma ni nodra ilawalawa vaka veitokani.
Wasea na veika e vakila baleti Saioni kei na bibi ni duavata ni kuoramu.