Ena rawa vakacava meu vukei ira na noqu itokani luluqa mera lesu mai ki lotu?

E tiki ni noda itavi vaka lewe ni matabete sa ikoya meda dolele yani vei ira na lewe ni kuoramu kei ira na itokani era sa sega tiko ni mai lotu. Sa dau vakauqeti keda vakawasoma o Peresitedi Monson meda “laki veivueti” (“Lako ka Veivueti,” Ensign se Liaona, Me 2001, 48). Eda na rawa ni vukei ira na noda itokani luluqa ena noda qarauna mera vakila na noda loloma kei na veikauwaitaki dina, wasea ena vosa kei na kena bulataki na noda ivakadinadina, vakakina na noda dau okati ira ena noda itaviqaravi.

Mo vakarautaki iko vakayalo

Na cava soti o sa bau sotava ena nomu vukei ira tiko na luluqa tu? Na cava o sa bau vulica mai na veika era yaco oqori ka na rawa ni vukei ira na cauravou ena nodra sasaga mera dolele yani vei ira na itokani era sa luluqa tu?

O cei soti na lewe ni kuoramu sa sega ni lako vakawasoma tiko mai? Na cava era kila me baleti koya na lewe ni kuoramu? O na rawa vakacava ni vakauqeti ira na lewe ni kuoramu me ra dolele yani kivei ira?

Vulica ena masumasu na ivolanikalou kei na ivurevure tale eso. Na cava o sa vakauqeti mo wasea kivei ira na cauravou?

Luke 15 (Vosa vakatautauvata ni sipi ka yali, tiki ni siliva ka yali, kei na gone cidroi)

Alama 31:34–35; V&V 18:10, 14–16 (Sa ka talei na tamata yadua)

V&V 20:46–47, 53–55 (iTavi ni Matabete i Eroni)

S. Mark Palmer, “A Sa Vakaraici Koya Ko Jisu A Sa Lomani Koya,” Ensign Liaona, Me 2017, 114–16

Mervyn B. Arnold, “Ki na Veivueti: E Rawa ni Da Cakava,” Ensign se Liaona, Me 2016, 53–55

Dieter F. Uchtdorf, “Mai, Tomani Keimami,” Ensign se Liaona, Nove. 2013, 21-24

Vidio eso: “We Are Brothers”, “Help Others Come Back to Church”, “Reach Out With Love”, “Face to Face with President Eyring and Elder Holland: How can I help my family members who are less-active?”

Veivakavulici ena ivakarau ni iVakabula

E lomani ira na Nona tisaipeli na iVakabula ka dau masulaki ira ka qaravi ira tikoga. O cei ena nomu kuoramu e gadreva vakalevu cake me kauwaitaki, lomani, ka masulaki? Na cava o rawa ni vakayacora mo toro yani kina vei ira?

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Kerei ira na itabagone mera tukuna na ka era a cakava mera vakayacora rawa kina na nodra ilesilesi mai na kalasi ni macawa sa oti.
Vakaraitaka e dua na vidio e vakaturi ena ituvatuva oqo, se wasea e dua na ka o a sotava ena nomu vukea e dua na itokani se lewe ni matavuvale luluqa vakalotu me lesu tale mai ki lotu. Sureti ira na cauravou mera wilika na Alama 31:34–35 kei na V&V18:10, 14–16. Na cava era vakavulica na ivolanikalou kei na italanoa oqo me baleta na ka e vakila na Tamada Vakalomalagi me baleti ira na Luvena?

Vulica vata

Na veitaviqaravi yadua e ra sa rawa ni vukei ira na lewe ni kuoramu mera vulica na iwalewale e rawa ni ra veivuke kina ni vaqaqacotaki ira na nodra itokani luluqa. Muria na veivakauqeti ni Yalotabu, digitaka e dua se sivia ka na ganita na nomu kuoramu:

Vakaraitaka ki na kuoramu e dua na itaba ni vakatawa ni sipi, kei na sipi E keveta tiko o Jisu e dua na Lami a yali tu (Gospel Art Book [2009], no. 64). Kerei ira na cauravou me ra vakarogoca na vosa se malanivosa e vakayagataki me vakamacalataka na loloma e tu vei Jisu Karisito me baleti ira Nona sipi ena nodra laga sere se wilika “Talei Vua na iVakatawa” (Serenilotu naba 130 Me vukei ira na leweni kuoramu me ra vaqara na sala era rawa ni vukea na iVakabula me ra vakasokumuni ira na sa yali, e rawa ni o kerei ira me ra taleva lesu e va na lesoni e wasea o Elder S. Mark Palmer ena icavacava ni nona vosa “Sa Vakaraici Koya o Jisu A Sa Lomani Koya.” Ena rawa ni vukei keda vakacava na veilesoni oqo ena noda dodoliga yani vei ira na noda leweni matavuvale kei na itokani luluqa tu ena lotu? Na ivakavuvuli cava tale era rawa ni vakasamataka na cauravou ena rawa ni veivuke?
Kerei ira na cauravou mera vakananuma e dua na gauna era a vakayalia kina e dua na ka talei sara. Na cava era a cakava mera kunea tale kina? Kerea vei ira na lewe ni kuoramu vakayadua mera wilika e dua vei ira na tolu na vosa vakatautauvata ena Luke 15. Kerei koya me talanoataka tale na vosa vakaibalebale ena nona vosa saraga vakaikoya ka wasea e dua na malanivosa mai na vosa vakatautauvata ka ivakaleka ni ka e vakavulica tiko na iVakabula. Na cava era vulica na cauravou mai na ka a cakava na ivakatawa ni sipi, na vada, vakakina na tama ena vosa vakatautauvata? Era na vakatotomuria vakacava na nodra ivakaraitaki o ira na cauravou ena nodra tovolea mera vukei ira era sa “yali” mai na nodra kuoramu? Kerei ira na cauravou mera wasea e so na ka a yaco kivei ira na nodra itokani se lewe ni matavuvale ka ra sa lesu mai ki lotu ni oti na nodra luluqa tu.
Sureti ira na cauravou mera wilika na Vunau kei na Veiyalayalati 18:10–13, ka kerei ira mera wasea na sala eso era na vakacavara kina na iyatuvosa oqo: “Sa ka talei na tamata baleta …” Kerei ira na cauravou mera vaqara na Vunau kei na Veiyalayalati 20:46–47, 53–55, ka kerei ira mera vola ena vava ni volavola na veivosa se malanivosa e vakamacalataka na nodra itavi vakamatabete. Na vosa cava soti vei ira oqo e vakamacalataka na sala eso e rawa ni da vukei ira kina na lewe ni kuoramu era sa luluqa tu? Sureta na peresitedi ni kuoramu me liutaka e dua na veivosaki e rawa mera cakava na cauravou mera toro rawa yani kina kivei ira na lewe ni kuoramu luluqa.
Sureta taumada e liu e dua na lewe ni kuoramu me na wilika tiko mai na vosa nei Elder Mervyn B. Arnold “Ki na Veivueti: E Rawa ni Da Cakava.” Kerei koya me vakavakarau tiko mai mena mai wasea e dua se rua na italanoa e veivakauqeti vua. Sureti ira na cauravou mera veivosakitaka na sala era rawa ni vakayagataka na vica na italanoa oqo kivei ira vaka-kuoramu. O cei era kila e sega ni mai lotu tiko? E rawa vakacava ni ra cakacaka vata vakuoramu mera vukea na tamata oya me toro voleka kivua na iVakabula? Sa rawa mo sureti ira talega na cauravou mera raica na va na ivakavuvuli e tiko ena vosa nei Elder Arnold. Era kila beka eso era sa bula vakaraitaka tiko na ivakavuvuli oqo? Na cava era rawa ni ra cakava mera vakataki ira oqo?
Vola ena vava ni volavola eso na iulubale era dau tukuna eso na tamata ni vakavuna na nodra sega ni dau mai lotu, me vaka “Au lomalomaruataka tiko na ivakavuvuli ni Lotu,” “Au sega ni veimaliwai rawa kei ira na tamata ena Lotu,” “Au sega ni vakabauta ni rawa niu bula ena ivakatagedegede ni Lotu,” “Au kila e dua na lewe ni Lotu dauveivakaisini,” kei na so tale. Sureti ira na cauravou mera vaqara na isaunitaro nei Peresitedi Dieter F. Uchtdorf ki na kauwai eso oqo ena nona vosa “Mai, Tomani Keimami.” Solia vei ira na cauravou e dua na madigi mera dramataka na veika era na cakava ke dua na nodra itokani e tukuna e dua vei ira na kauwai oqo.

Kerei ira na cauravou mera wasea na veika era sa vulica nikua. Era sa kila beka na sala mera vaqaqacotaki ira kina na nodra itokani luluqa? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Veivakasalataki vakuoramu ena sala mera sureti kina na lewe ni lotu luluqa ki na lotu ka vakakina ki na Muavata.
Bolei ira na cauravou mera toro yani kivei ira na lewe ni lotu luluqa ka qai tukutuku tale mai ena macawa mai oqo.