Na cava e bibi kina me vakamuri na ivakatagedegede ni Lotu me baleta na veigadivi?

Era sa solia vei keda na parofita ni gauna oqo na ivakatagedegede me baleta na vakaitau me taqomaki keda mai na veika rerevaki vakayalo ka vukei keda ni vakavakarau ni kunea ena dua na siga e dua na itokani bula kilikili tawamudu. E okati ena ivakatagedegede oqo na kena sega ni vakatarai na vakaitau ni se bera na yabaki 16, na tarovi ni vakaitau wasoma kei na dua tikoga na tamata, kei na nodra vakaitau ga o ira ka taukena na ivakarau ni itagede cecere.

Mo vakarautaki iko vakayalo

Na ivakaraitaki cava o sa raica ka sa vakatavulici iko me baleta na bibi ni talairawarawa ki na ivakatagedegede ni Turaga baleta na vakaitau?

Na vakasama cava kei na veika sa kilai tu e sa bulia tiko na rai ni cauravou me baleta na vakaitau? Na veivakaogai cava era vakila tiko? Na cava e gadrevi me ra kila ni dodonu me tudei tu nodra yalodina ki na ivakatagedegede ni Turaga?

Vulica ena masumasu na ivolanikalou kei na ivurevure oqo. Na cava o vakila ni uasivi na kena vakayagataki kiviei ira na cauravou ena nodra tekivu veimaliwai kei ira na goneyalewa?

Nai Vakarua 7:3–4 (Kakua ni vakawati ena taudaku ni veiyalayalati)

Vunau kei na Veiyalayalati 46:33 (Bulataka na ivalavala dodonu kei na savasava ena mata ni Turaga)

“Na Vakaitau,” Me iSakisaki ni iTabagone (2011), 24–25

Vidio: “A Brand New Year: Dating”

Veivakavulici ena ivakarau ni Turaga

E kila na i Vakabula o ira a vakavulica o Koya ka yaco me ra na vakataki cei. E raica na veisala talei eso me vukei ira me ra vuli ka tubu cake —na salatu me baleti ira sara ga. Ni ra sotava na dredre, a sega ni biuti ira tu o Koya ia a tomana tiko ga me lomani ira ka qaravi ira. Masuta mo kila ka taleitaki ira na cauravou o vakatavulica me rawa ni o kila na cava era gadreva ni o vakatavulici ira tiko me baleta na vakavakarau ena vuku ni kena kunei na itokani tawamudu.

Raica me ra veiliutaki na cauravou

Raica e dua na ivakaraitaki ni ituvatuva ni soqoni ni kuoramu.

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira me ra wasea na veika era sota kaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Raica eso tale na vakasama ni vuli kei na veivakavulici.

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

• Sureti ira yadua na cauravou me tukuna e dua na vosa ka vakamacalataka na lesoni ena macawa sa oti. Kerei ira na cauravou ke rawa ni ra wasea e dua na ka era sa sota kaya oti donuya na macawa sa sivi yani ka semati ki na lesoni.

• Kerei ira na cauravou me ra vola ena vava ni volavola na cava era kila me baleta na ivakatagedegede ni Turaga ena vakaitau. Me ra vakuria na nodra vola ni ra vulica e levu tale na ka me baleta na ituvatuva oqo ena gauna ni lesoni.

Vulica vata

Raica eso tale na veivakasama ni vuli kei na veivakavulici.

Na veitaviqaravi yadua e ra sa rawa ni vukea na lewe ni kuoramu me ra kila deivaki na ivakatagedegede me baleta na vakaitau. Muria na veivakauqeti ni Yalotabu ena nomu digitaka e dua se sivia ka na ganita na nomu kuaromu:

• Sureti ira yadua na cauravou me ra vola na nodra dui yavunibula e gadreva o koya me tiko vei koya me na laki watina. Sureti ira na cauravou me ra wasea ki na kalasi na veika era sa vola ni sa gadrevi vakakina. Kerea e dua na cauravou me wilika na itukutuku oqo nei Elder Robert D. Hales: “Kevaka o gadreva mo vakamautaka e dua ka vinaka sara, totoka, caka dodonu, mamarau, daucakacaka, tamata bula vakayalo ia mo na, vaka na tamata o ya” (“Sotavi na Bolebole ni Vuravura Oqo,” Ensign se Liaona, Nove. 2015, 46). Ni ra sa taleva na cauravou na veika era sa vola, sa rawa mo taroga se na vakacava na nodra nanuma ke sa na vola tiko mai o koya me watidra na veika e baleti ira na cauravou.   Na cava era sa cakava tiko ena gauna oqo me ra na vakataka na tamata  era vinakata tiko mai o ira me ra na vakamautaki ira?  Sureti ira na cauravou me ra veivosakitaka na sala e rawa ni ra tauyavutaka kina na yavunibula o ya ena gauna oqo kei na sala ena mana kina vei ira era dau gadiva. 

• Sureti ira na cauravou me ra vakatudaliga ka veivosakitaka na nodra ivakasala vakamareqeti ni ra wilika se vakarorogo ki na vosa nei Peresitedi Gordon B. Hinckley “Living Worthy of the Girl You Will Someday Marry.” Na cava e vakatavulica o Peresitedi Hinckley me baleta na digidigi era cakava na cauravou ni ra sa vakaitau tiko? Kerei ira me ra vola eso na ituvaki ni bula era na vinakata me tiko vua na watidra mai muri ka digitaka e dua na ituvaki ni bula mai na ivola e rawa ni ra vakavinakataki ira kina ka yaco me vaka na mataqali itokani era nuitaka tu. Ena vakayarayarataka vakacava na mataqali tamata era na qai vakawatitaka na veika era sota kaya oqo ena vakaitau?

• Vakaraitaka vakalailai na “A Brand New Year: Dating,” ka me cegu mada na vidio me soli na gauna vei ira na cauravou me ra raica na ivakatagedegede era vakamacalataka tiko na tamata ena vidio. Kerei ira na cauravou me ra taleva na “Veigadivi” ena Me iSakisaki ni iTabagone ka raica na ikuri ni ivakatagedegede a sega ni vakatakilai ena vidio. Sureti ira me ra sauma na taro vakaoqo: “Na cava na ivakatagedegede ni Lotu me baleta na veigadivi?” “Na cava e bibi kina vei iko mo vakamuria na ivakatagedegede oqo?” kei “Na cava na inaki ni veigadivi?” Sureti ira na cauravou me ra veivosakitaka na sala eso e rawa ni ra tukuna kina na lomadra ni ra yavalati me ra cakava e dua na ka e veisaqasaqa kei na ivakatagedegede ni Lotu me baleta na veigadivi. Vakasamataka mo wasea na ivakaraitaki ni sala eso o sa vakalougatataki kina ena nomu rokova tiko na ivakatagedegede ni veigadivi ena Lotu, ka sureti ira eso tale me ra wasea na veika tautauvata era sa sotava. Sureti ira na cauravou me ra wasea na veika era na cakava me ra maroroya tiko na ivakatagedegede oqo.

• Sureti ira na lewe ni kuoramu me ra raicalesu na tabana ni “Na Vakaitau” ena Me iSakisaki ni iTabagone ka vola na taro eso e tu vei ira me baleta na vakaitau. Sureta e dua na iwase ni cauravou kei na goneyalewa qase cake me ra sauma na nodra vakatataro ka veitalanoataka na ivakatagedegede ni vakaitau.Vakayaloqaqataki ira na iwase ni lawalawa me ra okata eso na ivakaraitaki ni iwalewale ni nodra bulataka na ivakatagedegede ni ra a vakaitau, me vaka na isulusulu maqosa, digitaki ni itaviqaravi veiganiti, kei na nodra vakaitau ga o ira ka cecere na nodra ivakatagedegede ni bula.

Kerei ira na cauravou me ra wasea na veika era sa vulica nikua. Era sa kila deivaki li na ivakatagedegede ni Lotu me baleta na vakaitau? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena iulutaga oqo?

Me Veivuke ena Veivakavulici

“Tarogi ira o vakavulica tiko na cava era na tukuna kevaka e dua e via kila na veika era sa vulica mai na lesoni” (Veituberi, Me iLutua ni Noda Bula [1999], 94).

Veisureti me caka

Raica eso tale na vakasama ni vuli kei na veivakavulici.

Me na tinia na soqoni na cauravou ka veiliutaki tiko. Sa rawa vua me:

• Vakayaloqaqataki ira na lewe ni kuoramu mera tuva e dua na nakinaki ni talairawarawa ki na ituvatuva ni Turaga me baleta na vakaitau.

• Wasea na nona ivakadinadina ena veivakalougatataki ka yaco mai na talairawarawa ki na ituvatuva ni Turaga me baleta na vakaitau.

Veisemati ni iTaviqaravi ni iTabagone

Tuva e dua na itaviqaravi ni Muavata ka na vukei ira na cauravou me ra vakayagataka na veika era vulica ena lesoni oqo.