Na cava e bibi kina na matavuvale?

Na matavuvale e sa lesi mai vua na Kalou ka sa uto ni Nona ituvatuva me baleta na ivotavota tawamudu ni Luvena. Na ituvatuva vakalou oqo esa mai rawa kina vua e dua na tamata me na lesu tale ki na Nona iserau kei ira na matavuvale me ra cokotivata ka tawamudu.

Mo vakarautaki iko vakayalo

Na cava o nanuma kina ni sa itakele ni yavu ni veivakabulai ni Tamada Vakalomalagi na matavuvale? O sa mai kila vakacava na bibi ni matavuvale?

Na itukutuku cava era sa ciqoma tiko mai na vuravura na cauravou ka vakacala na ka era sa tukuna na parofita me baleta na bibi ni matavuvale? O na vukei ira vakacava na cauravou mera kila deivaki na matalia tawamudu ni matavuvale?

Vulica ena masumasu na ivolanikalou kei na ivurevure veitaravi, ka digitaki eso ka na vukei ira na cauravou mera kila deivaki na vuna e bibi kina na matavuvale.

Roma 8:16–17; Iperiu 12:9 (Eda sa luvena na Tamada Vakalomalagi)

Nai Vakatekivu 2:18–24; V&V 131:1–4; 138:48 (Na dina va-Kosipeli baleta na matavuvale)

Mosaia 4:14–15; V&V 68:25, 27–29; 93:40, 43, 48–50 (Era vulica na gonelalai na kosipeli mai vei ira na nodra itubutubu)

“Na Matavuvale: Ai Vakaro ki Vuravura Raraba,” Ensign se Liaona, Nove. 2010, 129 (raica talega na Tudei ena Vakabauta [2004], 85)

Carole M. Stephens, “Na Matavuvale sa Mai Vua na Kalou,” Ensign se Liaona, Me 2015, 11–13

D. Todd Christofferson, “A Cava na Vuni Vakawati, A Cava na Vuni Matavuvale,” Ensign se Liaona, Me 2015, 50–53

L. Tom Perry, “Yaco Mo ni iTubutubu Vinaka,” Ensign se Liaona, Nove. 2012, 26–28

Vidio: “Families Can Be Together Forever”; “The Home Is a Divine Institution”

Sereivakatagi ni itoko ni itabagone: “Nothing Can Separate Us”

Veivakavulici ena ivakarau ni iVakabula

Sa sureti ira tu na daumuri Koya na iVakabula mera vakadinadinataka, ia ni ra vakayacora, a tara na yalodra na Yalotabu. Ni o vakatavulici ira na cauravou me baleta na bibi ni matavuvale, sureti ira mera wasea na nodra ivakadinadina ena bibi ni matavuvale ena yavu ni veivakabulai ni Kalou.

Raica me ra veiliutaki na cauravou

Ena liutaka na soqoni ni kuoramu e dua na lewe ni mataveiliutaki ni kuoramu (se dua na ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakatautauvata me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou), vakayaloqaqataki ira me ra wasea na veika era sota kaya ni ra vakayacora tiko na nodra itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni va-kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Sureti ira na cauravou me ra wasea vaka-i-sa na ka era a vulica mai na lesoni ni macawa sa oti kei na sala cava e rawa ni ra taurivaka kina ena nodra bula.
Sureti ira na cauravou ni se bera na soqoni ni kuoramu, me ra kauta mai e dua na yaya ni veivakavulici ka matataka e dua na nodra vakanananu vakamareqeti vata kei na nodra matavuvale (vaka na ivalavala tudei vakamatavuvale, lako vakagade, se so tale na itaviqaravi). Sureti ira yadua na cauravou me wasea na nona iyaya ni veivakavulici ka tukuna se cava e bibi kina vua na nona matavuvale.

Vulica vata

Na veitaviqaravi e ra e rawa ni vukei ira na lewe ni kuoramu me ra kila deivaki na bibi ni matavuvale. Mai na veivakauqeti ni Yalotabu, digitaka e dua se sivia ka na ganita vinaka na nomu kuoramu:

Sureti ira na cauravou mera wilika na vosa nei Elder D. Todd Christofferson “A Cava na Vuni Vakawati, A Cava na Vuni Matavuvale” se na iotioti ni walu na parakaravu ni vosa nei L. Tom Perry “Meda Sa iTubutubu Vinaka,” ka vakaraica na isau ni taro “Na cava e bibi kina na matavuvale?” Sureti ira na lewe ni kuoramu mera wasea na ka era kunea. Na cava era rawa ni cakava mera vakaraitaka ni ra sa kila kina na bibi ni matavuvale? Ena rawai vakacava na sala era qarava kina na lewe ni nodra matavuvale na nodra kila deivaki na bibi ni matavuvale?
Wasea na kuoramu ki na va na iwasewase. Mera dikeva na ilawalawa yadua e dua na iwasewase mai na vosa nei Carole M. Stephens “Na Matavuvale sa Mai Vua na Kalou” (era tekivu na iwasewase yadua ena dina qaqa baleta na matavuvale). Kerei ira na ilawalawa yadua me ra vakavulica ki na ilawalawa kadua na veika era sa dui vulica mai na nodra dui wasewase. Ena rawa vakacava mera vakavulica ka vakatetea na dina oqo ena nodra matavuvale kei na itikotiko raraba?
Vakaraitaka e dua vei ira na vidio e vakaturi ena ituvatuva oqo, ka kerei ira na cauravou me ra vakarogoca na vuna sa solia kina vei keda na Tamada Vakalomalagi na veimatavuvale. Tarogi ira na cauravou se iwalewale cava era na sauma lesu kina e dua tale ka tukuna me vakaoqo, “Au sega ni raica na vuna me’u vakawati kina” se “Au sega ni nanuma ni’u na vinakata na gonelalai ni’u sa qase cake.” Na cava era na tukuna ki na dua na nodra itokani ka sega ni tuvaki vinaka tu ena gauna oqo na nona matavuvale? (Raica na “Matavuvale,” Me iSakisaki ni iTabagone, 14-15.)
Lesia vei ira yadua na cauravou e dua na iwase ni ivolanikalou ena ituvatuva oqo. Kerei ira na lewe ni kuoramu mera vakaraica “Na Matavuvale: Ai Vakaro ki Vuravura Raraba” ka vaqara e dua na malanivosa e veiwekani kei na nodra ivolanikalou. Sureti ira yadua na cauravou me wasea na nona ivolanikalou kei na tikina ni ivakaro e semati kina. Kerei ira na cauravou mera wasea eso na ka era sa sotakaya oti ka vakatakarakarataka na bibi ni matavuvale.

Kerei ira na cauravou me ra wasea na veika era sa vulica nikua. Era sa kila deivaki li na vuna e bibi kina na matavuvale? Na cava era sa vakila se nanuma kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na nona ivakadinadina ena bibi ni matavuvale ena ituvatuva ni Kalou.
Sureti ira na lewe ni kuoramu mera wasea vata kei na dua na lewe ni matavuvale se itokani “Na Matavuvale: A iVakaro ki Vuravura Raraba.”