Na cava era bibi kina na veiyalayalati ki na noqu bula?

Eda sa cakava na veiyalayalati ena gauna eda ciqoma kina na cakacaka vakalotu me vakataka na papitaiso, veivakatikori ki na matabete, kei na cakacaka vakalotu ni valetabu. Na veiyalayalati sa ikoya na nodrau veidinadinati tabu na Kalou kei ira na Luvena. Sa mai lavaka kina na Kalou na ivakarau eso, ka sa yalataka kina o Koya me vakalougatataki keda ena gauna eda talairawarawa kina ki na ivakarau oqo. Na vakayacori kei na maroroi tiko ni veiyalayalati e sa vakadonui keda meda ciqoma na veivakalougatataki sa yalataka tu na Kalou. Ni da digitaka meda kakua ni muria na veiyalayalati, eda na sega ni ciqoma na veivakalougatataki. Na noda veiyalayalati ena dusimaka na digidigi meda na cakava ka vukei keda meda vorata rawa na veitemaki.

Mo vakarautaki iko vakayalo

O sa vakalougatataki beka ena nomu cakava ka maroroya tiko na veiyalayalati? O rawa ni vakasamataka beka e dua na gauna a veidusimaki kina na nomu veiyalayalati ki na vakatulewa o a cakava?

O na vukei ira vakacava na cauravou mera kila deivaki cake na veiyalayalati era sa cakava kei na kena era na cakava ena siga ni mataka? Ena veivakauqeti vakacava vei ira na cauravou mera bula dodonu vagumatua cake mai na nodra kila deivaki na bibi ni veiyalayalati?

Vulica ena masumasu na veiivolanikalou kei na veiivurevure oqo. O na vukei ira vakacava na cauravou mera gadreva mera cakava ka maroroya na nodra veiyalayalati?

Lako Yani 19:5; V&V 35:24; 90:24 (Ena yaco mai na veivakalougatataki ni da maroroya na veiyalayalati)

Mosaia 5; Alama 46:10–37 (iVakaraitaki ni tamata ena iVola i Momani era cakava ka maroroya na nodra veiyalayalati)

V&V 82:10 (Sa vauci vakakina na Turaga ni da sa talairawarawa)

Russell M. Nelson, “Veiyalayalati,” Ensign se Liaona, Nove. 2011, 86–89

D.Todd Christofferson, “Na Kaukauwa ni Veiyalayalati,” Ensign se Liaona, Me 2009, 19–23

“Veiyalayalati,” Tudei ena Vakabauta (2004), 197

Vidio: “Press Forward”

4:12

Veivakavulici ena ivakarau ni iVakabula

A sureti ira na Nona tisaipeli na iVakabula mera cakacaka ena vakabauta ka bulataka na dina a vakavulica o Koya (raica na Luke 18:18-25). O na vukei ira vakacava na cauravou mera gadreva na vakaitavi ena cakacaka vakalotu kei na veiyalayalati ka rokova tiko na nodra veiyalayalati ena ivalavala sa dodonu?

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou okoya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Kerei ira na cauravou mera vakasamataka mada na lesoni sa oti ka mera wasea vakayadudua mai e dua na yatuvosa e vakamacalataka vakalekaleka na veika era sa vulica mai na lesoni o ya. Era sa vakayacora vakacava na veika era sa vulica?
Sureta e dua na cauravou me gole mai cake. Vakaraitaka na cava na veiyalayalati ena nomu vakayacora vua e dua na yalayala rawarawa sara ka me dolei ena dua na ka me cakava o koya (me vakataka, yalataka ni na solia vua e dua na ka vinaka kevaka me na cavuqaqataka e dua na yavu ni vakabauta). Solia na gauna vei cauravou me cakava ke gadreva vakakina, ka mo vakayacora talega na ka o sa yalayala kina. Vukei ira na cauravou mera tukuna na ibalebale ni veiyalayalati (raica na ikatolu ni parakaravu ni nona vosa o Elder Russell M. Nelson “Na Veiyalayalati”), ka kerei ira mera vakamacalataka na sala e tautauvata kina na ivakaraitaki oqo ka duidui mai na veiyalayalati eda cakava vua na Kalou.

Vulica vata

Na itaviqaravi yadua e ra ena vukei ira na lewe ni kuoramu mera kila deivaki na vuna eda vakayacora kina na veiyalayalati. Mai na veivakauqeti ni Yalotabu, digitaka e dua se sivia ka na ganita vinaka na nomu kuoramu:

Sureta e dua na lewe ni kuoramu me vakavulica e dua na tiki ni lesoni oqo. Sa rawa me cakava oqo o koya me tiki tiko ni nona ituvatuva ni iTavi Vua na Kalou me vulica ka vakavulica kina na veika me baleta na veiyalayalati kei na cakacaka vakalotu (raica na “Kila na iVunau” draunipepa 18, 42, se 66).
Sureti ira na cauravou mera raitayalotaka mada ni ra sa sasagataka tiko mera vukea e dua na itokani mai na dua tale na matalotu me kila vakavinaka na veiyalayalati. Sureti ira mera vulica na “Veiyalayalati” ena Tudei ena Vakabauta se na ivolanikalou era volai tiko ena ituvatuva oqo ka vakarautaka na sala eso mera vakamacalataka kina na veiyalayalati vei nodra itokani. Sureti ira mera vakatasuasuataka ni ra sa veivakavulici tiko vakai ira. Kerei ira mera okata ena nodra ivakamacala na vuna e bibi kina vei ira na veiyalayalati.
Sureti ira na cauravou mera dui vakasaqara na Mosaia 5, ka makataka na vosa se malanivosa eso e veivakauqeti vei ira mera na vakayacora ka dau maroroya na veiyalayalati. Kerei ira mera vola ena vava ni volavola na veika era sa raica rawa. Vola ena vava ni volavola, “Sa ka bibi vei au meu maroroya na noqu veiyalayalati baleta ________.” Sureti ira yadua na cauravou mera vakacavara na yatuvosa.
Vakaraitaka na iyaloyalo kei Kavetani Moronai ni laveta cake tu na yavu ni bula galala (raica na iVola ni iYaloyalo Vakosipeli,79). Kerei ira na cauravou mera raica eso na ituvaki ena iyaloyalo ka talanoataka vakalekaleka na kena ibalebale (raica na Alama 46:10–37). Na veiyalayalati cava era a cakava na Nifai (raica na tikina e 20–22)? Na cava na vuna era digitaka kina na tamata mera cakava na veiyalayalati oqo ni ra sotava tiko mada ga na veika rerevaki? A vakayarayarataka vakacava na vatuka ni valu na nodra veiyalayalati? Kerei ira na cauravou mera vola na veiyalayalati era sa vakayacora. Ena vukei keda vakacava na veiyalayalati oqo ena vorati ni bolebole kei na veitemaki?
Me qai wilika, sarava, se vakarorogo na kuoramu, ki na italanoa ena itekitekivu ni vosa nei Elder D. Todd Christofferson “Na Kaukauwa ni Veiyalayalati.” A veivuke vakacava na veiyalayalati nei Pamela me walia rawa kina na leqa a sotava? Lesi ira vakayadua na cauravou mera wilika e dua vei ira na vo ni iwasewase ni vosa oqo, ka mera vakasaqara kina na isau ni taro “Ena rawa ni vaqaqacotaki ka vukei au vakacava na noqu veiyalayalati? Kerei ira na cauravou mera wasea na veika era sa kunea. Sureti ira mera veivosakitaka na veituvaki yadua era na rawa ni sotava ena loma ni macawa ka tu mai ka na rawa ni ra kune kaukauwai se veitaqomaki kina ena nodra veiyalayalati.

Kerei ira na cauravou mera wasea na veika era sa vulica nikua. Era sa kila deivaki cake li na veiyalayalati? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me na tauri vakalevu na gauna ena ivunau oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na ibalebale ni veiyalayalati ki na nona bula.
Vakayaloqaqataki ira na lewe tale eso ni kuoramu mera wasea na nodra nanuma baleta na veika era sa vulica vata kei na dua na lewe ni matavuvale.