Na cava era bibi kina na cakacaka vakalotu ki na noqu bula?

Na cakacaka vakalotu sa dua na cakacaka tabu vakarautaki ka vakaibalebale tiko vakayalo. Na cakacakavakalotu e vakayacori ena lewa ni matabete ena ruku ni nodra veiliutaki o ira era taura tu na idola ni matabete.Na cakacaka vakalotu ena vukei keda meda nanuma tiko o cei oi keda ka vakavotuya tiko vei keda na noda itavi vua na Kalou. Era vukei keda meda lako yani vua na Karisito ka ciqoma na bula tawamudu.

Mo vakarautaki iko vakayalo

Na cakacaka vakalotu cava ni kosipeli o sa ciqoma? Era sa vakalougatataka vakacava na nomu bula na cakacaka vakalotu oqo? Na cava era sa rui bibi kina vei iko?

Na cakacaka vakalotu cava era sa ciqoma na cauravou? Na cakacaka vakalotu cava era sa vakavakarau tiko kina mera ciqoma? Na cava e gadrevi kina mera kila deivaki na bibi ni cakacaka vakalotu ni kosipeli?

Vulica ena masumasu na veiivolanikalou kei na veiivurevure oqo. Na cava o sa vakauqeti kina mo wasea vei ira na cauravou mera vukei mera kila deivaki na bibi ni cakacaka vakalotu?

Maciu 3:13–17 (Papitaiso nei Jisu Karisito)

Cakacaka 19:1–6 (Era a papitaisotaki tale mai vei Paula o ira a cala na nodra papitaiso)

3 Nifai 11:21–26 (A solia o Jisu Karisito na veivakadonui ni veipapitaisotaki ka vakasalataka na kena ivakarau dodonu)

Moronai 8:10–12 (E vakavulica o Moronai na papitaiso)

V&V 84:19–21 (Na kaukauwa ni bulavakalou e dau vakatakilai ena cakacaka vakalotu ni matabete)

Yavu ni Vakabauta 1:3–5 (Sa yaga na cakacaka vakalotu ki na veivakabulai)

David A. Bednar, “Yaco Tiko na Bokoci ni Nomuni iValavala Ca,” Ensign se Liaona, Me 2016, 59–62

Gary E. Stevenson, “Nomu Va na Miniti,” Ensign se Liaona, Me 2014, 84–86

“Cakacaka Vakalotu kei na Veivakalougatataki ni Matabete,” iVoladusidusi 2: Veiliutaki ena Lotu (2010), 20.1

“Cakacaka vakalotu,” Tudei ena Vakabauta (2004), 109–10

Vidio: “Faith in the Power of the Priesthood”

1:38

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou okoya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Vakaraitaka e dua na iyaloyalo se dua na ka e semati tiko ki na lesoni ni macawa sa oti, ka kerei ira na cauravou mera vakamacalataka na kena semati tiko ki na lesoni o ya. Era sa vakayacora beka vakacava na veika era sa vulica?
Kerei ira na cauravou me ra vola na levu taucoko ni cakacaka vakalotu ni kosipeli era nanuma rawa. Me ra qai vukei me ra kila na cakacaka vakalotu cava era sa vola e bibi ki na bula cecere vakalou. Na cava na vuna e solia kina vei keda na Tamada Vakalomalagi na cakacaka vakalotu oqo? Era na sauma vakacava na cauravou na nona kaya e dua ni sega na betena na cakacaka vakalotu? (Kevaka era gadreva na cauravou na vakasama eso, sa rawa me ra raica na “Cakacaka Tabu” ena Tudei ena Vakabauta se na wase ena ulutaga “Na Yalo Tabu kei na Cakacaka Vakalotu ni Matabete” ena vosa nei Elder David A. Bednar “Yaco Tiko na Bokoci ni Nomuni iValavala Ca.”)

Vulica vata

Na itaviqaravi yadua e ra ena vukei ira na lewe ni kuoramu mera kila deivaki na vuna era sa bibi kina na cakacaka vakalotu. Mai na veivakauqeti ni Yalotabu, digitaka e dua se sivia ka na ganita na nomu kuoramu:

Ena vosa nei Elder David A. Bednar “Yaco Tiko na Bokoci ni Nomuni iValavala Ca,” ena wase na ulutaga “Rawati kei na Maroroi na Bokoci ni iValavala Ca ena Cakacaka Vakalotu” e vakamacalataka na veivakalougatataki ni cakacaka vakalotu ni papitaiso, veitabaki ni liga ni isolisoli ni Yalo Tabu, kei na sakaramede. Me ra vukei na itabagone me ra vulica na cakacaka vakalotu oqo ena kena rawa ni vukei keda, sureta na cauravou yadua me ra digitaka e dua na cakacaka vakalotu ka vola na veika kece e kila kina mai na wase oqo. Mo qai sureta na cauravou me vakavulica vei ira na vo ni kuoramu na veika sa vulica ena sala vou eso—me vaka na vakayagataki ni iyaloyalo se dua na qito.
Sureta e dua me mai vosa se dua na cauravou sa rawata na itavi eso e bibi me wasea na veika e gadrevi ena kena rawati o ya kei na sala a rawata kina (me vakataka nona rawata na icovi ni Sikauti, rawata e dua na koroi ni vuli, se rawata nona a digitaki ki na dua na vakatasuasua). Mo qai sureti ira na cauravou me ra wilika na parakaravu e tekivu tiko ena “Kei na sala vata ga” mai na vosa nei Elder Gary E. Stevenson “Nomu Va na Miniti.” Era sa yaco vakacava na cakacaka vakalotu me vaka ni ra sa ilalavaki e wasea tiko o koya e vosa se o cauravou? Sa rawa talega mo wilika na vo ni vosa nei Elder Stevenson, mo raica kina na veika tale eso e vakavulica o koya baleta na cakacaka vakalotu.
Sureti ira na cauravou me ra sarava na vidio “Faith in the Power of the Priesthood.” Kerei ira mera vola ena vava na cakacaka vakalotu a vakamacalataki kei na kena veivakalougatataki ena ciqomi ni qaravi na kena cakacaka vakalotu yadua. Sureti ira na itabagone mera wasea na gauna era a ciqoma se vakadinadinataka kina e dua vei ira na cakacaka vakalotu oqo (se cakacaka vakalotu tale eso, me vakataka na veivakalougatataki vakatama se veivakalougatataki ni veivakabulai). Era a vakalougatataki ka vaqaqacotaki vakacava ena veika era a sotava?

1:38
Me railesuva vata na kuoramu na veika e va e gadrevi me vakayacori kina na cakacakavakalotu ena iwasewase 20.1 ni iVoladusidusi 2. Sureti ira na cauravou mera wilika na 3 Nifai 11: 21-26 ka raica na kena veidonui na veika sa lavaki oqo kina veika e vakamacalataka na iVakabula baleta na papitaiso. E veidonui vakacava na nodra qarava na sakaramede kina va na ka e lavaki oqo? Na cava ena yaco kevaka me vakayacori e dua na cakacaka vakalotu ka sega ni sotavi na veika e lavaki tiko qo? Tarogi ira na cauravou se cava e bibi kina me kilai na veika e lavaki tiko oqo ni ra vakavakarau mera vakavulica eso baleta na cakacaka vakalotu.
Sureti ira na cauravou mera raitayaloyalotaka mada ni ra sa vakavulica tiko e dua mai na dua tale na matalotu me baleta na papitaiso, ka kaya mai o koya, “Au sa papitaiso oti ena noqu lotu.” Era na vukea vakacava na cauravou na tamata oqo me kila deivaki ena sala vakayalomatua na vuna e gadrevi kina mena papitaiso tale? Na ivolanikalou cava se cava beka era sa sotava mera na wasea? Sa rawa mo vakaraitaka vei ira na veika e gadrevi tiko ena iwase 20.1 ni iVoladusidusi 2; Maciu 3:13–17; Cakacaka 19:1–6; 3 Nifai 11:21–26; Moronai 8:10–12. Ke rawa, sureti rau na daukaulotu tudei me rau mai wasea ki na kuoramu na sala rau dau wasea kina vei ira na dau vakatataro na bibi ni cakacaka vakalotu (me vakadonuya taumada o bisopi).
Wasea ki na kuoramu na itukutuku oqo mai vei Peresitedi Spencer W. Kimball: “Sa inaki ni cakacaka vakalotu me veivakananumi. Oqori na inaki dina ni sakaramede, me da kakua ni guilecava kina, ka vukea meda na nanuma tikoga” (Teachings of Spencer W. Kimball, ed. Edward L. Kimball [1982], 112). Kerei ira na cauravou mera vola na cakacaka vakalotu ni kosipeli me vakataka na kena ena tabana e 109–10 ni Tudei ena Vakabauta) ka veivosakitaka se cava e vakananuma vei keda na veicakacaka vakalotu oqo.

Kerei ira na cauravou mera wasea na veika era sa vulica nikua. Era sa kila deivaki li na bibi ni cakacaka vakalotu? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Me veivuke ena veivakavulici

“Ni o vakarau veivakavulici, raica mo vakayagataka na kena veimataqali ivakarau ni veivakavulici mai na dua na lesoni ki na dua tale na lesoni. E rawa ni kena ibalebale me vakayagataki e dua na iyaloyalo duiroka ena dua na lesoni kei na dua na ibinibini taro ena vavanivolavola ena lesoni ka tarava” (Veituberi Me iLutua ni Noda Bula [1999], 89).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na nona nanuma baleta na cakacaka vakalotu ni kosipeli.
Liutaka e dua na veivosaki lekaleka me baleta na sala mera vakavakarau kina vakayalo ki na nodra qarava na sakaramede.