Na cava soti na idola ni matabete?

Na idola ni matabete sai koya na kena lewa sa solia tu vei ira na iliuliu ni matabete o Tamada Vakalomalagi me dusimaka na vakayagataki ni Nona matabete e vuravura. E tu vei Jisu Karisito na idola kece sara ni matabete. A soli vua na Parofita o Josefa Simici “na idola ni cakacaka me vakayacori ena gauna oqo,” ka gadrevi me liutaki kina na Lotu, (raica na V&V 110:16). Nikua sa tu vei iratou na Mataveiliutaki Taumada kei na Kuoramu ni iApositolo Le Tinikarua na idola eso oqori. E dau soli talega na idola ni matabete vei iratou na Mataveiliutaki ni Vitusagavulu; peresitedi ni valetabu, iteki, tikina, bisopi; peresitedi ni tabana; kei na peresitedi ni veikuoramu—oka kina o ira na peresitedi ni veikuoramu ni Matabete i Eroni.

Mo vakarautaki iko vakayalo

Vakasamataki ira mada na iliuliu ni matabete ena nomu bula. Na cava e sa rui bibi kina vei iko mo tokoni ira era taura tiko na idola ni matabete? Na cava soti o sa bau sotakaya ena nomu tokoni ira na iliuliu ni Lotu ka rawa ni o wasea vei ira na cauravou?

Na cava o rawa ni cakava mo vukei ira kina na cauravou mera kila deivaki na matalia ni idola ni matabete ena Lotu? Ena rawa vakacava ni o vukei peresitedi ni kuoramu me vakayagataka na nona idola ni matabete me vakalougatataka na nodra bula na lewe ni kuoramu?

Wilika ena yalomasumasu na veiivolanikalou kei na ivurevure oqo. Na cava ena vukei ira na cauravou ena nodra kila deivaki na idola ni matabete?

Maciu 16:18–19 (Sa yalataki vei Pita na idola ni matanitu ni Kalou)

Mosaia 25:19 (Sa vakadonui Alama o Mosaia me tauyavutaka na Lotu)

V&V 65:2 (E gadrevi na idola ni matabete me toso kina ki liu na kosipeli)

V&V 124:123, 142–43 (Sa tu vei ira na Peresitedi na idola me liutaki kina na vakayacori ni ilesilesi)

V&V 132:7 (Na Peresitedi ni Lotu sai koya na tamata duadua ga e delai vuravura ka vakadonui me vakayagataka na idola kece ni matabete)

Gary E. Stevenson, “Evei na Ki kei na Lewa ni Matabete?” Ensign se Liaona, Me 2016, 29–32

Dallin H. Oaks, “Na iDola kei na Lewa ni Matabete,” Ensign se Liaona, Me 2014

“iDola ni Matabete,” Tudei ena Vakabauta (2004) 78–79

Vidio: “Learn Your Duty”; “The Restoration of Priesthood Keys”; “The Priesthood, an Opportunity to Serve”

Veivakavulici ena ivakarau ni iVakabula

A kacivi ka vakataudeitaki ira na iliuliu na iVakabula mera tutaka ka vakatulewa ena Nona Lotu (raica na Maciu 10:1–5). Ena rawa ni o vukei ira vakacava na lewe ni kuoramu mera dau vakavinavinakataki ira era sa kacivi mera qaravi ira ka vukei ira?

Vidio: “Asking Follow Up Questions”

Sarava eso tale

Raica mera veiliutaki na cauravou

Raica e dua na ivakaraitaki ni ituvatuva ni soqoni ni kuoramu.

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Raica eso tale na vakasama ni vuli kei na veivakavulici.

Digidigi mai na veivakanananu oqo se vakasamataka ga na nomu vakaiiko mo raicalesu kina na lesoni ni macawa sa oti ka vakatakila na lesoni ni macawa oqo:

• Sureta e rua na cauravou me rau wasea e dua na ka rau nanuma mai na lesoni ni macawa sa oti kei na sala e vakayarayarataka kina na nodrau ivukivuki ena loma ni macawa.

• Sureti ira na cauravou mera  veivosakitaka  na vakanananu oqo: Kevaka beka mo a gole tu vakayawa mai na lotu, ena rawa beka mo qaravi iratou nomu matavuvale ena sakaramede?  Me tiki ni veivosaki oqo, sureti ira mera vakasamataka vakatitobu ka sauma na taro me vaka oqo:  Na cava beka na idola ni matabete?O cei so e taura tu na idola ni matabete ena Lotu? Vakayaloqaqataki ira mera raica na isau ni taro  ni ra wilika na “iDola ni Matabete” ena draunipepa 78–79  ena Tudei ena Vakabauta, se saravi na vidio “Na iDola sa Lewa ni Kalou”.

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra ena vukei ira na lewe ni kuoramu mera kila vakavinaka na idola ni matabete. Muria na veivakauqeti ni Yalotabu ena nomu digitaka e dua se vica ka na ganita na nomu kuoramu:

• Ena vuku ni vakavakarau ki na soqoni ni kuoramu, sureti peresitedi ni kuoramu me raicalesu na vidio “The Priesthood, an Opportunity to Serve.” Kerei koya me wasea ena soqoni ni kuoramu na veika sa vulica me baleta na tauri tiko ni idola ni matabete. E rawa vua me cakava oqo me tiki ni nona iTavi Vua na Kalou ka vakavulica na veika me baleta na matabete kei na idola ni matabete (raica na “Kila Na iVunau,” tabana e 18, 42, se 66).

• Ena nona vosa “Evei na Ki kei na Lewa ni Matabete?” E vakatauvatana o Gary E. Stevenson na ki ni matabete ki na ki ni motoka. Ni ra wilika na cauravou na vosa vakatauvata oqo, dusimaka mera raica na cava e matataka tiko na vosa vakatauvata oqo baleta na matabete, ki ni matabete, kei ira na iliuliu ni matabete e tu vei ira na kena ki.  Ena sala cava e vakatura tiko o Elder Stevenson mera “kunea kina na ki” o ira na itabagone?  E rawa vakacava meda muria na nona ivakasala? Sureti ira na cauravou mera vakasamataka na nodra lesoni e vakayagataki kina na iyaya eso mera vakamacalataka kina na ki ni matabete.

• Vola ena papa ni volavola na veiivolanikalou oqo: Maciu 16:18–19; V&V 124:123, 142–43; V&V 132:7. Sureti ira na lewe ni kuoramu mera wilika na ivolanikalou yadua ka vola e dua na ivakaleka ni iyatuvosa ni cava era sa vulica rawa me baleta na idola ni matabete mai na veitikina. Mera qai wilika yadua ena domoilevu na cauravou e dua na nodra ivakaleka, ka kerei ira na vo ni cauravou mera vakilakila se ivolanikalou cava e vakalekalekataka oya. Tarogi ira na lewe ni kuoramu se cava e bibi kina vei ira na kena tiko e vuravura nikua na idola ni matabete.

• Vakaraitaka na vidio “Learn Your Duty.” Na cava mera cakava na mataveiliutaki ni kuoramu me vaka e sureti ira kina o Baraca Gibson? A cava mera cakava na lewe kei na daunivakasala ni kuoramu me vaka na nona veisureti? Na cava meda na cakava me cakacakataki kina na nona veisureti? Vakananuma toka mo na qai sureti peresitedi ni kuoramu me liutaka na veivosaki.

• Sureti ira yadua na lewe ni kuoramu me ra wilika na wase III ni vosa nei Elder Dallin H. Oaks “Na iDola kei na Lewa ni Matabete” ka vola e dua na parakaravu lekaleka me umana vata kina, ena nona vosa ga, na veika sa vulica me baleta na idola ni matabete. Solia vei ira na cauravou na gauna me ra wasea kina na veika era sa vola ka taroga na taro cava ga e tu vei ira me baleta na idola ni matabete.

Kerei ira na cauravou mera wasea na veika era sa vulica nikua. Era sa kila vakavinaka cake beka na veika me baleta na idola ni matabete? Na cava era sa bau vakila se vakanananu kina? E tiko beka eso tale na nodra vakatataro? Ena yaga beka me tauri vakalevu na gauna ena ivunau oqo?

Me Veivuke ena Veivakavulici

“Dau taroga na taro e gadrevi kina vei ira na lewenikalasi mera kunea mai na kena isau mai na ivolanikalou kei na nodra ivakavuvuli na parofita edaidai” ( Na Veituberi, Me iLutua Ni Noda Bula [1999], 70).

Veisureti me caka

Raica eso tale na vakasama ni vuli kei na veivakavulici.

Me na tinia na soqoni na cauravou ka veiliutaki tiko. Sa rawa vua me:

• Wasea na nona nanuma me baleta na nona itavi ni taura tu na idola ni matabete.

• Sureti ira na lewe ni kuoramu me ra wasea vei ira nodra matavuvale na veika era sa vulica nikua.

Veisemati ni iTaviqaravi ni iTabagone

Tuva e dua na itaviqaravi ni Muavata ka na vukei ira na cauravou me ra vakayagataka na veika era vulica ena lesoni oqo.