A cava na matabete?

Na matabete sa ikoya na kaukauwa kei na lewa tawamudu ni Tamada Vakalomalagi. Mai na matabete oqo, a bulia ka lewa kina na Kalou na lomalagi kei na vuravura. Mai na kaukauwa oqo sa vakabulai ira kina na Luvena ka vakalagilagi ira. E solia o Koya vei ira na matabete bula kilikili na dodonu me ra qarava na veicakacaka vakalotu ni veivakabulai. Sa rawa vei ira kece na luvena na Tamada Vakalomalagi me ra ciqoma na veicakacaka vakalotu oqo ka yacova yani na kaukauwa kei na veivakalougatataki ni matabete.

Mo vakarautaki iko vakayalo

Ena veisala cava soti e sa vakalougatataka kina na nomu bula na matabete? Na cava soti e so na veika vakaibalebale o sa sotava oti kei na matabete ka na rawa ni o wasea vei ira na cauravou?

Na cava o rawa ni vakayacora ni bera na soqoni ni kuoramu me kilai kina na ka era kila vakayadua tu na cauravou me baleta na matabete? Na cava e so na ka era a sa sotava ka ra vakayagataka kina na matabete? Ena rawa ni vakayarayarataka vakacava oqo na ka o nanuma mo vakavulica?

Ena nomu vakavakarau, vulica ena yalomasumasu na veivolanikalou kei na ivurevure oqo. Na cava o vakila ni o vakauqeti kina mo wasea ki na kuoramu?

Maciu 3:1–6; 28:19; Joni 15:16 (Era dau vunautaka na kosipeli na lewe ni matabete)

Cakacaka 3:1–8; Jemesa 5:14–15 (Era dau veivakalougatataki na lewe ni matabete mera vakabulai kina na tauvimate kei ira na vakararawataki)

Iperiu 5:4 (Era kacivi mai vua na Kalou na lewe ni matabete)

3 Nifai 11:12; 18:1–5; V&V 107:20 (Era dau qarava na cakacaka vakalotu na lewe ni matabete)

V&V 20:38–67 (Nodra itavi na lewe ni matabete)

V&V 65:2; 124:123 (Era vukea na vakatulewataki ni Lotu na lewe ni matabete)

V&V 121:34–46 (Na kaukauwa kei na lewa ni matabete ena cakacaka walega ena ivakavuvuli ni buladodonu)

Henry B. Eyring, “‘Lako Vata kei Au’,” Ensign se Liaona, Me 2017, 82–85

Thomas S. Monson, “Na Matabete—e dua na iSolisoli Tabu,” Ensign se Liaona, Me 2015, 88–90

M. Russell Ballard, “Oqo na iNaki kei na Lagilagi ni Noqu Cakacaka,” Ensign se Liaona, Me 2013, 18–21

“Matabete,” Tudei ena Vakabauta (2004), 76–83

Vidio: “Priesthood Blessings Available to All,” “Power of God,” “Blessings of the Priesthood”

Veivakavulici ena ivakarau ni iVakabula

A veivakabauti vei ira na Nona tisaipeli na iVakabula, vakarautaki ira, ka solia vei ira na itavi bibi mera veivakavulici, veivakalougatataki, ka qaravi ira na tani. Ena rawa vakacava mo vukei ira na cauravou mera na saumaki ki na ivunau ni matabete me rawa kina ni tiki ni nodra bula na veiqaravi vei ira na tani?

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra itavi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Kerea e dua na cauravou me vakarautaki koya ni lako mai ki na soqoni ni kuoramu me mai wasea na ka e a vulica ena lesoni ni macawa sa oti. Vakauqeti koya me wasea na lomana kei na nona ivakadinadina.
Sureti ira na cauravou mera matanataka e dua na veivosaki ka taroga tiko kina e dua na itokani mai na dua tale na vakabauta, “Na cava na matabete?” Era na vakamacalataka beka vakacava na matabete? Na cava era sa sotava oti ka rawa ni ra wasea? Wasea vata kei ira na cauravou na ivakamacala ni matabete ka soli tiko ena ivakatekivu ni idusidusi oqo se na vidio “Sa Vakarautaki Tu na Veivakalougatataki ni Matabete Vei Ira Kecega na Tamata” ka taroga na ikuri ni dina cava era sa vulica me baleta na matabete.

Vulica vata

Na itaviqaravi yadua e ra ena vukei ira na lewe ni kuoramu me ra kila deivaki na matabete. Muria na veivakauqeti ni Yalotabu ena nomu digitaka e dua se vica ka na ganita na nomu kalasi:

Ena nona vosa “‘Lako Vata kei Au’,” a wasea kina o Peresitedi Henry B. Eyring e vica na ivolanikalou e kaya o koya ni rawa “ni vakatitobutaka na noda qoroya na matabete tabu” (Ensign se Liaona, Me 2017, 82–83). Kerei ira yadua na cauravou mera vulica e dua na ivolanikalou oqo ka qai tukuna ki na kalasi na ka sa vulica me baleta na matabete. Solia e vica na miniti vei ira na cauravou mera vakasamataka vakatitobu na taro nei Peresitedi Eyring ena parakaravu e tekivu tiko ena “E dua na ivakarau me da bokaca kina na ivakamacala vakaoqo.” Ena vakauqeti ira vakacava na taro oqo?
Wasewasea vakailawalawa na kuoramu ka lesia na ilawalawa yadua me ra wilika e dua na italanoa ena vosa nei Peresitedi Thomas S. Monson “Na Matabete—e dua na iSolisoli Tabu.” Kerea na ilawalawa yadua me ra vakalekalekataka na italanoa ki na kuoramu ka wasea na veika a vulica o Peresitedi Monson me baleta na matabete mai na veika a sotava. Na cava soti era sa sotava na cauravou sa vaqaqacotaka na nodra ivakadinadina baleta na matabete?
Sureta e dua na lewe ni kuoramu me vakavulica e dua na tiki ni lesoni. E rawa ni cakava oqo o koya me tiki ni nona ituvtuva ni iTavi Vua na Kalou me vulica ka vakavulica me baleta na matabete kei na idola ni matabete (raica na“Understand Doctrine,” tabana e 18, 42, se 66).
Wasea vakalalai na kuoramu. Lesia ki na iwasewase yadua e dua se sivia na ivolanikalou ka vakaturi ena ituvatuva oqo, qai kerei ira me ra vakaraica mai na ivolanikalou eso oqori na nodra itavi na matabete. Sureti ira me ra vakasaqaqara ena Gospel Art Book me ra kunea kina na kedra iyaloyalo na tamata era qarava tiko na itavi vakamatabete, ka kerei ira me ra vakamacalataka se sala cava era na vakalougatataki kina eso tale mai na veiqaravi oqori. Sureti ira na cauravou me ra wasea na veika era a sotakaya ena nodra qarava tiko na itavi eso ni matabete ka vakamacalataka se na tara vakacava na nodra bula eso tale na nodra veiqaravi.
Vola ena papa ni volavola “Na veivakalougatataki cava sa yaco mai ki na nomu bula ena vuku ni matabete?” Sureti ira na cauravou me ra vakananuma na taro oqo ka wasea na kena isau. Vakaraitaka e dua na vidio e tiko ena ituvatuva oqo, se wilika vata na imatai ni ciwa na parakaravu ni vosa nei Elder M. Russell Ballard “Oqo na iNaki kei na Lagilagi ni Noqu Cakacaka.” Sureti ira na cauravou me ra vakaraica na isaunitaro me vaka “Na cava na matabete?” kei na “E vakalougatataki keda vakacava na matabete?” Vakayaloqaqataki ira na cauravou me ra vola na italanoa eso ni kena sa vakalougatataki na nodra matavuvale mai na matabete ena nodra ivolaniveisiga se ena ivolalailai ni Noqu Matavuvale. Sa rawa ni ra kere veivuke kivei ira na nodra itubutubu se lewe ni matavuvale.

Kerei ira na cauravou mera wasea na veika era sa vulica nikua. Era sa kila deivaki cake beka na matabete? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ivunau oqo?

Veisureti me caka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Wasea na lomana me baleta na matabete kei na kena ibalebale ki na nona bula.
Bolei ira na lewe ni kuoramu mera wasea vata e dua na lewe ni matavuvale se itokani na ka era a vulica ka vakila ena veika me baleta na matabete ena kalasi nikua.