iTavi Vua na Kalou

E veirawai vakacava na bula kilikili ki na kaukauwa vaka matabete?

E vakadeitaki ena veitabaki na lewa ni matabete, ia e gadrevi ena rawati ni kaukauwa ni matabete na buladodonu, yalodina, talairawarawa kei na gugumatua yadua. Kevaka mada ga eda ciqoma mai na veitabaki ni liga na lewa ni matabete, ena sega ni tiko vata kei keda na kaukauwa vakamatabete kevaka eda talaidredre, tawakilikili se sega ni vakadonuya meda veiqaravi.

Mo vakarautaki iko vakayalo

Na cava na kedrau duidui na lewa ni matabete kei na kaukauwa ni matabete? Na cava e gadrevi taumada kina na bula kilikili ena kena rawati na kaukauwa ni matabete?

O na rawa ni vukei ira vakacava na lewe ni Matabete i Eroni mera kila deivaki na kedrau isema na bula kilikili kei na kaukauwa ni matabete? Na cava eso na veitemaki era sotava na cauravou ka rawa ni vakavuna mera vakayalia kina na kaukauwa ni matabete?

Ni ko vakavakarau, vulica ena masumasu na ivolanikalou kei na ivurevure oqo. Na veika cava o sa vakauqeti kina mo wasea vei ira na cauravou?

V&V 38:42 (Sa ra vakaroti na lewe ni matabete mera savasava.)

V&V 121:34–46 (Na kaukauwa ni matabete ena vakatau kina nona yalododonu e dua.)

Russell M. Nelson,“Na iSau ni Kaukauwa ni Matabete,”Ensign se Liaona, Me 2016, 66-69

Neil L. Andersen, “Kaukauwa e Tiko ena Matabete,” Ensign se Liaona, Nove. 2013

David A. Bednar, “Na Kaukauwa ga Vakalomalagi,” Ensign se Liaona, Me 2012, 48–51

“Bula Kilikili,” Qarava Vinaka na Noqu iTavi Vua na Kalou (2010), 16–17 (dikoni), 40–41 (ivakavuvuli), 64–65 (bete)

Vidio: “Sanctify Yourselves”; “Priesthood Power and Priesthood Authority”

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vakalewena e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga na nomu vakaiiko mo raicalesu kina na lesoni ni macawa sa oti ka vakatakila na lesoni ni macawa oqo:

Ena loma ni macawa, sureta e vica na cauravou mera vakarautaki ira ni ra gole mai ki na soqoni ni kuoramu mera mai wasea na veika era sa sotava oti ka semati ki na lesoni ni macawa sa oti.
Me bokoca na cina e dua na cauravou ena loma ni kalasi. Cava beka na yaga ni dua na matanicina ke sega na kaukauwa vakalivaliva? E semati beka vakacava oqo ki vua e dua na lewe ni matabete? Wilika vata na Vunau kei na Veiyalayalati 121:36–37, ka kerei ira na cauravou mera veivosakitaka na iwalewale e veirawai kina na bula dodonu ki na kaukauwa vakamatabete.

Vulica vata

Na inaki ni lesoni oqo sa ikoya me vukei ira yadua na cauravou mera kila deivaki na iwalewale ni veivakayarayarataki ni bula kilikili ki na nodra kaukauwa vakamatabete. Vakatiki ni lesoni oqo, mera navunavuci na lewe ni kuoramu ena nodra ivola ni iTavi Vua na Kalou mera vulica ka bulataka na veivakatagedegede ena Me iSakisaki ni iTabagone. Ni bera na soqoni ni kuoramu, sureti ira na cauravou mera kauta mai kei ira ki valenilotu na nodra ivola iTavi Vua na Kalou. Ena veigauna ni soqoni ni kuoramu mai muri, sureti ira mera wasea na veika era sotakaya tiko ena nodra vakayacora tiko na nodra ituvatuva.

Me vukei nodra vulica na cauravou na isau ni kaukauwa ni matabete, sa rawa mo kauta mai eso na iyaya lalai ka kerei ira na cauravou mera vakilakila mada na isau ni dua na iyaya o ya. Na cava na vuna era isau levu cake kina eso na iyaya mai na dua tale? Na veika cava beka era yaga vakalevu cake ena noda bula, kei na isau cava meda na “voli” ira kina? Mo qai sureti ira na cauravou mera raica na vosa nei Peresitedi Russell M. Nelson “Na iSau ni Kaukauwa ni Matabete,” ka vakasaqara na isau me da na sauma ni da cakacakataka na matabete. Na cava e rivarivabitaki baleti ira na lewe ni matabete? Na cava e kerea vei keda meda na cakava yani?
Sureti ira na cauravou mera wilika na Vunau kei na Veiyalayalati 38:42; 121:34–46 ka sauma na taro eso oqo: E veirawai vakacava na ivalavala ca ki na kaukauwa ni matabete? Na cava soti na ivakavuvuli e vakatulewataka na vakayagataki ni matabete? Sureti ira na cauravou mera vosa me baleti ira na tauri matabete era kila ka bulataka na ivakavuvuli eso e lewai voli ena kaukauwa vakamatabete. (Raica na iTavi Vua na Kalou, 72). Kerei ira mera vuki ki na iwase ni “Cakava” ena nodra ivola iTavi Vua na Kalou (tabana 17, 41, se 65) ka caka ituvatuva mera bula kilikili cake ena matabete ena vulici kei na vakamuri ni yavu ena Me iSakisaki ni iTabagone.
Sureta e dua na lewe ni kuoramu me talanoataki Josefa ena nona vorata na wati Potifa (raica na Vakatekivu 39, 41) kei na dua tale me talanoataki Tevita ena nona a rawai ena veitemaki (raica na 2 Samuela 11–12). Va-kuoramu, veivosakitaka vata na ka erau vakavulica na italanoa oqo me baleta na isema ena maliwa ni kaukauwa vakamatabete kei na bula kilikili vakatamata. A vakalougatataki vakacava o Josefa ena nona yalododonu? Na cava a rawa ni vakayacora o Tevita me levea kina na nona vakacalaka? (Raica na iTavi Vua na Kalou, 64.) Sureti ira na cauravou mera cega na iwase “Cakava” ena nodra ivola iTavi Vua na Kalou (tabana e 17, 41, se 65) ka navuca mo bula kilikili kayataka vakalevu cake na matabete.
Vola ena vava ni volavola, “E veirawai vakacava na bula kilikili ki na kaukauwa vakamatabete?” ka sureti ira na lewe ni kuoramu mera wasea na nodra isaunitaro ki na taro oqo. Sureti ira mera vakasamataka na taro oqo ni ra wilika na vitu na parakaravu mai na vosa nei Elder Neil L. Andersen “Kaukauwa e Tiko ena Matabete” ka tekivu ena malanivosa “Eda kila ni kaukauwa ni matabete tabu.” Na ikuri ni vakasama cava tale e tiko vei ira na cauravou me baleta na revurevu ni bula kilikili vakatamata ena kaukauwa vakamatabete? Na cava e so na ka ena rawa ni yalana na noda kaukauwa vakamatabete? Na cava e rawa ni da cakava meda rawata kina na kaukauwa vakamatabete e levu cake?
Sureti ira na cauravou mera vakasaqara ena vosa nei Elder David A. Bednar “Na Kaukauwa kei Lomalagi,” se sarava na vidio “Priesthood Power and Priesthood Authority”ka vakasaqara na itukutuku e vakavulica vei ira na veika e baleta na bula kilikili kei na kaukauwa ni matabete. Ka sureti ira mera wasea ki na kuoramu na veika era sa kunea.

Kerei ira na cauravou mera wasea na veika era sa vulica nikua. Era sa kila deivaki beka na sala e veirawai kina na bula kilikili ki na kaukauwa vakamatabete? Na cava era sa bau vakila se vakanananu kina? E tiko beka eso tale na nodra vakatataro? Ena yaga li me na tauri vakalevu na gauna ena ulutaga oqo?

Me Veivuke ena Veivakavulici

“Ni o sa veivakavulici tiko mai na ivolanikalou, e dau yaga sara vakalevu vei ira na vuli tiko mera raica se vakarogoca e dua na ka namaki se uasivi sara” (Veituberi, Me iLutua Ni Noda Bula [1999], 63).

Veisureti me caka

Me na tinia na soqoni na cauravou ka veiliutaki tiko. E rawa ni wasea vei ira ena kuoramu na ituvatuva sa cakava me vulica ka vakayagataka na ivakatagedegede eso ena Me iSakisaki ni iTabagone. E rawa talega ni vakamacalataka ni ena vica na macawa ka lako mai, era na kerei na lewe ni kuoramu me ra wasea na ivakarau sa vukei ira tiko kina me ra bula kilikili me ra vakayagataka na matabete ena nodra cakava tiko na veika era sa tuvalaka.